ក្រុមយុវជនបរិស្ថាន ចុះប្រមូលថង់ប្លាស្ទិកនៅបឹងទន្លេសាប ក្នុងខេត្តសៀមរាប កាលពីឆ្នាំ២០២២។ រូបថត ក្រសួអបរិស្ថាន
បាត់ដំបងៈ រដ្ឋមន្រ្តីក្រសួងបរិស្ថាន លោក អ៊ាង សុផល្លែត បានលើកឡើងថា ក្រសួងមានគម្រោងសម្អាត និងលុបបំបាត់ថង់ប្លាស្ទិក លើផ្ទៃទឹកបឹងទន្លេសាប។ មន្រ្តីអង្គការធ្វើការលើបញ្ហាបរិស្ថានបានសាទរចំពោះគម្រោងនេះ។
លោករដ្ឋមន្ត្រី បានលើកឡើងដូចនេះក្នុងឱកាសលោកបានដឹកនាំគណៈប្រតិភូអន្តរក្រសួង និងប្រតិភូសហភាពអឺរ៉ុបប្រចាំកម្ពុជាធ្វើទស្សនកិច្ចទៅកាន់តំបន់បឹងទន្លេសាបក្នុងតំបន់រ៉ាមសារព្រែកទាល់ក្នុងភូមិសាស្រ្តឃុំកោះជីវាំង ស្រុកឯកភ្នំ ខេត្តបាត់ដំបង កាលពីចុងខែមករាកន្លងទៅ។ នេះបើយោងតាមហ្វេសប៊ុកក្រសួងបរិស្ថាន កាលពីថ្ងៃទី៤ ខែកុម្ភៈ។
លោក អ៊ាង សុផល្លែត បានថ្លែងថា៖ «ក្រសួងបរិស្ថានបានធ្វើការសិក្សា និងគ្រោងដាក់ចេញវិធានការ និងលុបបំបាត់ថង់ប្លាស្ទិកនៅលើផ្ទៃទឹក ខណៈដែលបឹងទន្លេសាប គឺជាអាទិភាពចម្បងដែលត្រូវអនុវត្តមុនគេ»។
លោកបានបន្តថា ៖ «បឹងទន្លេសាបគឺជាការងារអាទិភាពដែលនឹងត្រូវធ្វើការសម្អាតថង់ប្លាស្ទិកដើម្បីធ្វើយ៉ាងណាឱ្យទន្លេសាបស្អាត មិនឱ្យបាត់បង់ត្រី បាត់បង់ជីវចម្រុះដែលជាការបង្កការគំរាមកំហែងធ្ងន់ធ្ងរ និងអាចធ្វើឱ្យមហន្តរាយដល់បឹងទន្លេសាប ដែលជាទ្រព្យដ៏កម្រមួយរបស់កម្ពុជា ដែលយើងមាន តែប្រទេសដទៃទៀតមិនមាន»។
ទាក់ទងនឹងគម្រោងសម្អាតបឹងទន្លេសាបនេះដែរ លោក ស៊ា សុផល ប្រធានអង្គការមូលនិធិទំពាំងស្នងឫស្សី បានថ្លែងនៅថ្ងៃទី៥ ខែកុម្ភៈថា លោកសប្បាយចិត្តនៅពេលដែលឮដូចនេះ ព្រោះវាដូចនឹងអ្វីដែលខាងអង្គការលោកកំពុងធ្វើដែរ។
លោកបានលើកឡើងថា ៖ «យើងខំធ្វើសព្វថ្ងៃនេះ គឺធ្វើដើម្បីឱ្យទន្លេសាបយើងមិនមានថង់ប្លាស្ទិក ដែលស្របតាមបេសកកម្មដែលខ្ញុំកំពុងធ្វើ អប់រំសហគមន៍ទន្លេសាបកុំឱ្យមានថង់ប្លាស្ទិក ហើយស្របនឹងយុទ្ធនាការដែលយើងធ្វើនៅឆ្នាំនេះដែរ គឺសម្អាតបឹងទន្លេសាប សហគមន៍យើងស្អាត ទន្លេសាបបៃតងស្អាត ដោយគ្មានប្លាស្ទិក»។
លោក ស៊ា សុផល បានបន្តថា ៖ «បើសិនជាក្រសួង ក៏ដូចជារដ្ឋាភិបាលធ្វើមែន គឺខ្ញុំពិតជាសប្បាយចិត្តណាស់ ប្រៀបដូចជាក្តីសុបិនយើងខំធ្វើកន្លងមក គឺបានផល»។
លោក Igor Driesmans ឯកអគ្គរដ្ឋទូតសហភាពអឺរ៉ុប បានលើកឡើងក្នុងពេលធ្វើដំណើរទស្សនកិច្ចនោះដែរថា បេសកកម្មនៅបឹងទន្លេសាបនាពេលនេះ ជាសក្ខីភាពមួយចំពោះការចូលរួមយ៉ាងសកម្មរបស់សហភាពអឺរ៉ុប ក្នុងការប្តេជ្ញាចិត្តរួមគ្នា បន្តជួយជ្រោមជ្រែងប្រទេសកម្ពុជា លើកិច្ចការងារអភិរក្សបរិស្ថាន និងជីវចម្រុះនៅបឹងទន្លេសាប ក្នុងបរិបទ នៃការបម្រែបម្រួលអាកាសធាតុជាសកល។
លោកបានបញ្ជាក់ថា ប្រសិនបើកម្ពុជាមានធម្មជាតិ និងបរិស្ថានស្រស់ស្អាត នោះវានឹងអាចទាក់ទាញភ្ញៀវទេសចរនានា ឱ្យមកកម្សាន្តនៅកម្ពុជាបានកាន់តែច្រើន។
លោក ខ្វៃ អាទិត្យា អ្នកនាំពាក្យក្រសួងបរិស្ថានថ្លែងថា ក្រសួងពិតជាមានគម្រោងសម្អាតថង់ប្លាស្ទិកនៅក្នុងទន្លេសាបនៅពេលខាងមុខឆាប់ៗខាងមុខនេះ ដោយក្នុងនោះ ក្រសួងបរិស្ថានបានកំណត់ទិសដៅស្អាត បៃតង និងចីរភាព។ ដូច្នេះ នៅក្នុងមុំទីមួយ «ស្អាត» នៃយុទ្ធសាស្ត្រចក្រា ២០២៣-២០២៨ នេះ តម្រូវឱ្យមានភាពស្អាតទាំងនៅលើគោក ទាំងនៅក្នុងទឹក និងទាំងនៅលើអាកាស។
លោក ខ្វៃ អាទិត្យា បញ្ជាក់ថា ចំពោះស្អាតលើគោក ត្រូវបានចាប់ផ្តើមដំណើរការកាលពីថ្ងៃទី ១ ខែកញ្ញា ឆ្នាំ ២០២៣ ក្រោយពេលបង្កើតរាជរដ្ឋាភិបាលអាណត្តិទី ៧ ដោយបានកំណត់នូវយុទ្ធនាការ កាត់បន្ថយការប្រើប្រាស់ថង់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ»។ ជំហានបន្ទាប់នេះក្រសួងនឹងសម្អាតនៅក្នុង ទឹក និងនៅលើអាកាសបន្តទៀត។
លោក ថ្លែងថា៖« អ៊ីចឹង យើងគ្រោង នៅពេលដែលយើងសម្រេចបាននូវភាពស្អាតនៅលើគោក ដែលមានប្រជាពលរដ្ឋ បានយល់ដឹង និងចូលរួមសម្អាតលើគោកនេះ បាន ៥០ % នៃចំនួន ប្រជាជនសរុប។ នោះក្រសួងបរិស្ថាននឹងដាក់ផែនការសម្អាតក្នុងទឺក។ ដូច្នេះ គម្រោងសម្អាតថង់ប្លាស្ទិកនេះ ជាផ្នែកមួយនៃជំហានទី២ ដែលនឹងចាប់ផ្តើមនៅពេលឆាប់ៗ ហើយក្រសួងបរិស្ថានបានកំណត់ទិសដៅហើយ»។
បើតាម លោក ខ្វៃ អាទិត្យា នៅក្នុងដំណើរចុះទៅពិនិត្យជាក់ស្តែងបឹងទន្លេសាបរបស់ លោក អ៊ាង សុផល្លែត រដ្ឋមន្ត្រីក្រសួងបរិស្ថាន ជាមួយប្រតិភូសហភាពអឺរ៉ុប កាលពីពេលថ្មីៗនេះ គឺបានកត់សម្គាល់ឃើញផ្ទៃបឹងទន្លេសាបកំពុងតែគំរាមកំហែង ដោយសំរាម និងថង់ប្លាស្ទិក ។ ដូច្នេះ បានជាក្រសួងកំណត់យុទ្ធសាស្ត្រ បន្តសម្អាតនៅក្នុងទឹក ដោយផ្តើមពីទន្លេសាបមុនគេ ដោយក្នុងនោះនឹងចាប់ផ្តើមទប់ស្កាត់ពីបណ្តាព្រែកនានាដែលនាំចូលមកក្នុងទន្លេសាប៕
