រូបភាពជំងឺអុតស្វានិងសេចក្ដីប្រកាសរបស់ក្រសួងសុខាភិបាលកាលពីថ្ងៃទី៥ កុម្ភៈ ។ រូបថត ក្រសួងសុខាភិបាល
ភ្នំពេញៈក្រសួងសុខាភិបាលបានក្រើនរំឭកជាថ្មីឱ្យប្រជាពលរដ្ឋទាំងអស់ឱ្យមានការប្រុងប្រយ័ត្នចំពោះជំងឺអុតស្វាដោយអនុវត្តបង្ការខ្លួនតាមវិធានការណែនាំរបស់ក្រសួងត្រូវលាងសម្អាតដៃជាមួយសាប៊ូឬអាល់កុលលាងដៃ ខណៈដែលក្រសួងបន្តរកឃើញជំងឺនេះ១ករណីទៀតដែលជាករណីទី៥ហើយ។
ក្រសួងបានក្រើនរំឭកបែបនេះ តាមរយៈសេចក្ដីប្រកាសចុះថ្ងៃទី៥ ខែកុម្ភៈ ដោយបានលើកឡើងថា មានករណីជំងឺអឹមផក (Mpox) ឈ្មោះដើមជំងឺអុតស្វា១ករណីបន្ថែមទៀតទៅលើបុរសម្នាក់ដែលសរុបមកទល់ពេលនេះ កម្ពុជាមានករណីជំងឺអុតស្វា ដែលបានរកឃើញចំនួន៥ករណីហើយ។
ក្រសួងបានឱ្យដឹងទៀតថា ក្រោយពីរកឃើញករណីជំងឺអុតស្វា១ករណីទៀត តាមរយៈលទ្ធផលទទួលស្គាល់ពីវិទ្យាស្ថានជាតិសុខភាពសាធារណៈ និងវិទ្យាស្ថានប៉ាស្ទ័រកម្ពុជា គឺអ្នកជំងឺអុតស្វានេះ ត្រូវដាក់ឱ្យនៅសម្រាកព្យាបាលដាច់ដោយឡែកនៅក្នុងមន្ទីរពេទ្យបានយ៉ាងត្រឹមត្រូវ។
ក្រសួងសុខាភិបាលបានបញ្ជាក់ថា៖«សូមអំពាវនាវក្រើនរំឭកដល់បងប្អូនប្រជាពលរដ្ឋទាំងអស់ជាថ្មីទៀតថា សូមមេត្តាយកចិត្តទុកដាក់ប្រុងប្រយ័ត្នផ្ទាល់ខ្លួនប្រកបដោយស្មារតីទទួលខុសត្រូវខ្ពស់ដើម្បីបង្ការនូវការចម្លងជំងឺអឹមផក ដោយត្រូវស្វែងយល់របៀបឆ្លង និងត្រូវអនុវត្តវិធានការបង្ការនានា»។
ជុំវិញការបន្តរកឃើញជំងឺអុតស្វានេះ លោក អ៊ី លីម៉ា អ្នកជំនាញសុខភាពសាធារណៈនិងជាសាកលវិទ្យាធិការរងនៃសាកលវិទ្យាល័យចេនឡាបានឱ្យដឹងថា ប្រសិនបើអ្នកឆ្លងជំងឺអុតស្វានោះជាអ្នកមានជំងឺរ៉ាំរ៉ៃ ជាមនុស្សចាស់ ស្ដ្រីមានផ្ទៃពោះ និងជាកុមារ ហើយថែមទាំងមិនទទួលសេវាព្យាបាលឱ្យទាន់ពេលវេលានោះជំងឺនេះ វាក៏អាចបណ្ដាលឱ្យអ្នកឆ្លងបាត់បង់ជីវិតផងដែរ។
លោកបានថ្លែងបញ្ជាក់ថា៖ «ដ្បិតតែវាជាជំងឺឆ្លងដ៏កាចសាហាវក៏ពិតមែន ប៉ុន្តែត្រឹមករណីឆ្លងម្នាក់ ឬក៏២នាក់ វាមិនមែនជាការបង្កឱ្យភ័យខ្លាច និងធ្វើឱ្យប្រជាជនយើងមិនអាចចេញទៅប្រកបមុខរបរបាននោះទេ»។
ទាក់ទងនឹងការការពារពីជំងឺអុតស្វានេះក្រសួងសុខាភិបាលបានណែនាំពីវិធានការបង្ការផងដែររួមមាន ត្រូវចៀសវាងការប៉ះពាល់ផ្ទាល់ដូចជា ឱប ថើប ម៉ាស្សា និយាយជិតគ្នាជាមួយអ្នកដែលមានចេញរោគសញ្ញាជំងឺអុតស្វា។ ចៀសវាងការប៉ះពាល់ផ្ទាល់ ឬប៉ះពាល់ជាមួយសម្លៀកបំពាក់ កម្រាលពូក ខ្នើយ ឬកន្សែងពោះគោ ឬចាន ស្លាបព្រា ឬពែង ឬផ្ទៃនៃទីតាំង ដែលអ្នកមានជំងឺអុតស្វាប្រើប្រាស់។
ក្រសួងបន្តថា ត្រូវចៀសវាងការប៉ះពាល់ជាមួយតំណក់ទឹកចេញពីផ្លូវដង្ហើម ឬសារធាតុរាវតាមមាត់របស់អ្នកជំងឺអុតស្វា ក៏ដូចជាត្រូវពាក់ម៉ាស់ ប្រសិនបើនៅជិតអ្នកមានរោគសញ្ញាជំងឺអុតស្វាហើយជាពិសេស គឺត្រូវរក្សាអនាម័យផ្លូវដង្ហើមនិងអនុវត្តអនាម័យដៃដោយលាងសម្អាតដៃជាមួយទឹកនិងសាប៊ូជែលលាងដៃឬអាល់កុលលាងដៃ។
ដោយឡែក ចំពោះបុគ្គលិកសុខាភិបាលវិញ ក្រសួងបានណែនាំឱ្យគ្រប់មន្ទីរពេទ្យ និងមណ្ឌលសុខភាពត្រូវប្រុងប្រយ័ត្ន និងតាមដានយ៉ាងហ្មត់ចត់ចំពោះអ្នកជំងឺដែលមានចេញរោគសញ្ញាកន្ទួលពងរមាស់លើស្បែក លើមុខ បាតដៃ ជើង ដងខ្លួន ភ្នែក មាត់ ឬប្រដាប់ភេទ គ្រុនក្តៅ ហើមកូនកណ្តុរ ឈឺក្បាល ឈឺសាច់ដុំ និងឈឺចង្កេះ អស់កម្លាំងជាដើម៕
