លោកហ៊ុន ម៉ាណែត នៅក្នុងពិធីនាថ្ងៃទី ៦ កុម្ភៈ។ រូបថត STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានលើកឡើងថា នយោបាយរាជរដ្ឋាភិបាលអាណត្តិទី៧ នេះនៅតែបន្តដោះស្រាយបញ្ហាប្រឈមនាពេលបច្ចុប្បន្នក្នុងរយៈពេលខ្លីដែលប្រជាពលរដ្ឋជួបការលំបាក ហើយនយោបាយគាំពារសង្គមមិនមែនបង្កើតវប្បធម៌ពឹងផ្អែកនោះទេ តែជាការបង្កើតវប្បធម៌ម្ចាស់ការ។
លោកបានលើកឡើងដូចនេះ នៅក្នុងពិធីបិទសន្និបាតបូកសរុបការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី ៦ ខែកុម្ភៈ ឆ្នាំ ២០២៤។
លោកបានបន្តថា គោលនយោបាយរបស់រាជរដ្ឋាភិបាលគ្រប់អាណត្តិគឺធ្វើយ៉ាងណាឱ្យប្រទេសកាន់តែរីកចម្រើនតាមរយៈធ្វើឱ្យពលរដ្ឋរីកចម្រើន កាត់បន្ថយភាពក្រីក្រ និងលើកកម្ពស់ជីវភាព។
លោក ហ៊ុន ម៉ាណែត បានមានប្រសាសន៍ថា«រាជរដ្ឋាភិបាលអាណត្តិទី៧ នេះគឺយើងនៅបន្តកិច្ចការងារនេះ និងពង្រីកបន្ថែម ហើយរៀបចំគោលនយោបាយដើម្បីធ្វើយ៉ាងណាឱ្យប្រព័ន្ធសំណាញ់សុវត្ថិភាពសង្គមក្នុងការជួយពួកគាត់ក្នុងរយៈពេលខ្លីណាមួយ រហូតគាត់មានលទ្ធភាពជួយខ្លួនឯងវិញ»។
លោកនាយករដ្ឋមន្ត្រីបានអះអាងផងដែរថា គោលដៅរបស់រាជរដ្ឋាភិបាលគឺមិនបោះបង់ពលរដ្ឋណាម្នាក់ ដោយមិនមានការថែទាំនោះទេ។
លោកបានបញ្ជាក់ថា៖ «យើងមិនមែនប្រទេសអ្នកមាន យើងជាប្រទេសកំពុងអភិវឌ្ឍន៍ ហើយយើងចាប់ផ្តើមពីប្រទេសក្រីក្រទៅជាប្រទេសមានចំណូលមធ្យមកម្រិតទាប ហើយទិសដៅយើងនឹងទៅជាប្រទេសអ្នកមាន ប៉ុន្តែយើងបានដាក់គោលនយោបាយជួយប្រជាពលរដ្ឋចាប់ពីប្រទេសយើងមិនទាន់ចាកចេញពីប្រទេសក្រីក្រ»។
ជាមួយគ្នានេះ លោកបានពន្យល់ដែរថា នយោបាយគាំពារសង្គមមិនមែនបង្កើតវប្បធម៌ពឹងផ្អែកនោះទេ ផ្ទុយទៅវិញជាការបង្កើតវប្បធម៌ម្ចាស់ការ ជាការជួយពលរដ្ឋពេលមានបញ្ហា កុំឱ្យជីវភាពធ្លាក់ក្នុងស្ថានភាពលំបាក។ នៅពេលពួកគាត់មានជីវភាពធូរធារ រដ្ឋដកការជួយនោះទៅជួយអ្នកផ្សេងដែលលំបាក។ ដូចនេះ រដ្ឋមិនមានការសន្យាជួយអស់ ១ ជីវិតនោះទេ។
លោក ហ៊ុន ម៉ាណែត បានបញ្ជាក់ទៀតថា៖ «ជាក់ស្តែងអាណត្តិទី៧ នេះ កម្មវិធីនយោបាយអាទិភាព ៦ ដែលខ្ញុំដាក់ចេញនៅក្នុងពេលចាប់ផ្តើមដែលយើងបានគ្រោងថវិកាជិត ៤៥០ លានដុល្លារ ដើម្បីអនុវត្តកម្មវិធីអាទិភាពទាំងនេះ»។
កម្មវិធីរបស់រាជរដ្ឋាភិបាលដែលបានដាក់ចេញឱ្យអនុវត្ត មិនមែនជាកម្មវិធីដែលមានចរិតពឹងផ្អែកទេ គឺជាការបង្កើតកម្មវិធីម្ចាស់ការ ប៉ុន្តែរដ្ឋត្រូវទទួលស្គាល់ថា ពលរដ្ឋខ្លះត្រូវការឱ្យរដ្ឋជួយក្នុងពេលមានការលំបាក ហើយត្រូវជួយយ៉ាងណាដើម្បីទប់ការប្រែប្រួលជាគំហុកជាអវិជ្ជមានដោយប្រការណាមួយដូចជាករណីជំងឺឆ្លងកូវីដ ១៩ អតិផរណា សង្គ្រាមជាដើម ដែលមានការប៉ះពាល់ដល់កម្ពុជា។ នេះជាការពន្យល់បន្ថែមរបស់លោកនាយករដ្ឋមន្ត្រីហ៊ុន ម៉ាណែត។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក ជា សុមេធី បានថ្លែងនាឱកាសនោះដែរថា ក្រសួងបាននិងកំពុងចូលរួមកែលម្អវិស័យសង្គមកិច្ច អតីតយុទ្ធជន និងយុវនីតិសម្បទាសំដៅជំរុញភាពធន់នៃសេដ្ឋកិច្ចគ្រួសារ,លើកកម្ពស់ជីវភាពប្រជាជន និងកាត់បន្ថយភាពក្រីក្រ តាមរយៈការគាំពារគ្រួសារក្រីក្រ,ក្រុមជនងាយរងគ្រោះក្នុងគ្រួសារក្រីក្រ និងគ្រួសារងាយរងហានិភ័យនៅកម្ពុជា។
លោកបានបន្តថា ទន្ទឹមនឹងការទទួលបានសមិទ្ធផលនេះ ក្រសួងក៏ជួបបញ្ហាខ្លះផងដែរដែលលោកស្នើសុំការគាំទ្រពីនាយករដ្ឋមន្ត្រី។ លោកបានថ្លែងថា៖ «ស្នើសុំបង្កើនរបបហូបចុកសម្រាប់ជនរងគ្រោះស្នាក់នៅក្នុងមណ្ឌលរដ្ឋពី ៥ ពាន់រៀល ទៅ ១២ ០០០ រៀល សម្រាប់ជនរងគ្រោះម្នាក់ក្នុង ១ ថ្ងៃ ដើម្បីឆ្លើយតបទៅនឹងតម្លៃទំនិញនៅលើទីផ្សារ និងកញ្ចប់ថវិកាសម្រាប់ដំណើរការករណីជនរងគ្រោះដោយអំពើជួញដូរមនុស្ស ជនអនាថា កុមាររងគ្រោះ និងកុមារដែលដាក់ជាទម្រង់នៃការថែទាំដោយសាច់ញាតិ និងគ្រួសារធម៌ក្នុងសហគមន៍»។
លោកក៏បានស្នើសុំរបបគោលនយោបាយចំពោះជនមានពិការភាពក្រីក្រនៅតាមសហគមន៍សម្រាប់អាហារក្នុងអំឡុងពេលមកទទួលសេវាក្នុង ១ ថ្ងៃពីអត្រា ៣ ពាន់រៀលទៅ ១ ម៉ឺនរៀល និងប្រាក់សោហ៊ុយធ្វើដំណើរមកទទួលសេវាស្តារលទ្ធភាពពលកម្មពីអត្រា ១ ម៉ឺនរៀល ទៅ ២ ម៉ឺនរៀលឱ្យបានសមស្របតាមលទ្ធភាពសង្គមសេដ្ឋកិច្ច។
ក្រៅពីនោះលោក ជា សុមេធី ក៏បានស្នើឱ្យមានការកែសម្រួល និងបង្កើតមណ្ឌលសំចតសង្គមកិច្ចនៅថ្នាក់តំបន់ដើម្បីងាយស្រួលគ្រប់គ្រង និងដោះស្រាយជនអនាថា និងជនរងគ្រោះនានា រួមនឹងស្នើឱ្យមានបង្កើនចំនួនកម្លាំងសេវាសង្គមនៅតាមរដ្ឋបាលឃុំ-សង្កាត់ដើម្បីផ្តល់សេវាសង្គម និងជំនួយសង្គមប្រកបដោយប្រសិទ្ធភាព និងប្រសិទ្ធផល។
លោករដ្ឋមន្ដ្រីបានបញ្ជាក់ថា៖ «ជារួម ក្រសួងនឹងបន្តអនុវត្តមុខងារបេសកកម្មរបស់ខ្លួនដោយប្រកាន់ខ្ជាប់នូវភាពម៉ឺងម៉ាត់ ហ្មត់ចត់ ឆន្ទៈមោះមុត និងការទទួលខុសត្រូវខ្ពស់ ស្របតាមគោលនយោបាយ របស់រាជរដ្ឋាភិបាលដើម្បីសម្រេចឱ្យបានសមិទ្ធផលថ្មីៗបន្ថែមទៀត ក្នុងទិសដៅរួមចំណែកដល់ការជំរុញការអភិវឌ្ឍសង្គម និងសេដ្ឋកិច្ច»។
សូមបញ្ជាក់ថា នៅអំឡុងពេលកើតមានវិបត្តិផ្សេងៗក្រសួងសង្គមកិច្ចបានអនុវត្តកិច្ចអន្តរាគមន៍ជំនួយសង្គមចំនួន ៥ ក្នុងទឹកប្រាក់ជាង ១ ៤០០ លានដុល្លារដែលបានជួយដល់ពលរដ្ឋជាង ១ លាននាក់ និងជាង ៧២ ម៉ឺនគ្រួសារ៕
