ក្រសួងអប់រំ យុវជន និងកីឡា បានប្រកាសដាក់ឱ្យដំណើរការផ្ទាល់នូវការអប់រំសាលាឌីជីថល (SalaDigital)។ ក្រសួងអប់រំ
ភ្នំពេញៈ ក្រសួងអប់រំ យុវជន និងកីឡា បានប្រកាសដាក់ឱ្យដំណើរការផ្ទាល់នូវការអប់រំសាលាឌីជីថល (SalaDigital) សម្រាប់គាំទ្រដល់ការបង្រៀន និងរៀន ស្របទៅតាមបរិបទថ្មីនៃការអប់រំបែបឌីជីថលនិងគោលនយោបាយរដ្ឋាភិបាលឌីជីថលកម្ពុជា ២០២៣-២០៣៥ ប្រកបដោយបរិយាបន្ន គុណភាព និងស័ក្តិសិទ្ធិភាព។
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានបញ្ជាក់នៅក្នុងសេចក្តីជូនដំណឹងកាលពីថ្ងៃទី ៦ ខែកុម្ភៈថា ថ្នាលអប់រំសាលាឌីជីថល ត្រូវបានបង្កើតឡើងក្នុងគោលបំណងលើកកម្ពស់ ជំរុញការចែករំលែក និងប្រើប្រាស់មាតិកាអប់រំឌីជីថលឱ្យកាន់តែសម្បូរបែប សម្រាប់បម្រើដល់ការបង្រៀនរៀនតាមរយៈការប្រើប្រាស់ បច្ចេកវិទ្យា ដែលផ្តល់ភាពងាយស្រួលដល់គ្រឹះស្ថានសិក្សា គ្រូបង្រៀន និងសាធារណជនទូទៅ។
លោកបានលើកឡើងថា៖ «ថ្នាលអប់រំសាលាឌីជីថលនេះអាចឱ្យសាធារណជនទូទៅ ចូលទៅបង្កើតសាលារៀននិម្មិត និងបង្កើតវគ្គសិក្សានានានៅលើថ្នាលសាលាឌីជីថលសម្រាប់សិស្សា-នុសិស្សចូលធ្វើស្វ័យសិក្សាដោយសេរីមិនគិតថ្លៃ គ្រប់ពេលវេលា និងទីកន្លែង»។
លោក ហង់ជួន ណារ៉ុន បានបន្ថែមថា៖«ថ្នាលអប់រំសាលាឌីជីថលនេះ ក៏បានផ្តល់ភាពងាយស្រួលដល់អ្នកប្រើប្រាស់ក្នុងការស្វែងរកឯកសារឌីជីថលតាមកម្រិតថ្នាក់ចាប់ពីមត្តេយ្យសិក្សារហូតដល់កម្រិតឧត្ដមសិក្សាដោយអាចស្វែងរកតាមរយៈពាក្យគន្លឹះ ប្រភេទក្រុមមុខវិជ្ជា ប្រភេទវគ្គសិក្សា និងកម្រិតថ្នាក់ថែមទៀត»។
ជាមួយគ្នានេះដែរ លោកក៏បានណែនាំដល់គ្រឹះស្ថានសិក្សាសាធារណៈនិងឯកជនចូលទៅបង្កើតសាលារៀននិម្មិត វគ្គសិក្សា និងបង្ហោះស្នាដៃសិក្សាស្រាវជ្រាវរបស់សិស្ស និស្សិត និងសាស្ត្រាចារ្យនៅក្នុងថ្នាលអប់រំសាលាឌីជីថលដើម្បីឱ្យធនធានឌីជីថលជាភាសាជាតិមានសម្បូរបែបលើបណ្តាញអ៊ីនធឺណិតសម្រាប់ជាប្រយោជន៍ដល់ការសិក្សា ការស្រាវជ្រាវនិងស្វ័យសិក្សារបស់សិស្ស និស្សិត និងអ្នកស្រឡាញ់ការសិក្សាពេញ ១ ជីវិត។
ប្រធានសហព័ន្ធសេវាអប់រំនៅកម្ពុជាលោក គង់ សំនៀង បានឱ្យដឹងនៅថ្ងៃទី ៧ ខែកុម្ភៈថា លោកគាំទ្រចំពោះការបង្កើតឱ្យមានថ្នាលអប់រំសាលាឌីជីថលនេះឡើងដោយលោកចាត់ទុកថានេះគឺជាយុទ្ធសាស្ត្រថ្មីរបស់ក្រសួងក្នុងការជំរុញឱ្យមានការកសាងសមត្ថភាពយុវជន ពិសេសសិស្សនិស្សិត។
លោកបានបញ្ជាក់ថា៖«ការជំរុញឱ្យមានការកសាងសមត្ថភាពយុវជនគឺជារឿងចាំបាច់ព្រោះបើយុវជនមានសមត្ថភាពនឹងក្លាយជាធនធានសំខាន់ឆ្លើយតបដល់ការជំរុញកំណើនសេដ្ឋកិច្ចហើយក៏សូមឱ្យក្រសួងបង្កើនការផ្សព្វផ្សាយពីថ្នាលអប់រំសាលាឌីជីថលឱ្យកាន់តែទូលាយបន្ថែមទៀតដើម្បីសិស្សានុសិស្ស លោកគ្រូ អ្នកគ្រូ អាចសិក្សារៀនសូត្រ និងចែករំលែកបន្តឱ្យកាន់តែមានប្រសិទ្ធភាព»។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានឱ្យដឹងដែរថា ក្រសួងអប់រំ បានដាក់ដំណើរការឱ្យសាកល្បងប្រើប្រាស់ថ្នាលអប់រំសាលាឌីជីថល ចាប់តាំងពីខែធ្នូ ឆ្នាំ ២០២៣ មកម្ល៉េះ ហើយបើគិតមកទល់បច្ចុប្បន្នមានអ្នកប្រើប្រាស់ជិត ៩ ម៉ឺននាក់ មានសាលាចំនួន ៦២ ដោយមានផ្ទុកសៀវភៅចំនួន ១ ៨៤៩ ក្បាល និងមានមេរៀនចំនួន ១១៨ មេរៀន៕
ថ្នាលអប់រំសាលាឌីជីថលនេះ អាចឱ្យសាធារណជនទូទៅ ចូលទៅបង្កើតសាលារៀននិម្មិត និងបង្កើតវគ្គសិក្សានានានៅលើថ្នាលសាលាឌីជីថលសម្រាប់សិស្សា-នុសិស្សចូលធ្វើស្វ័យសិក្សាដោយសេរីមិនគិតថ្លៃ គ្រប់ពេលវេលា និងទីកន្លែង។ ក្រសួងអប់រំ
