ទិដ្ឋភាពដីក្នុងតំបន់ទន្លេសាបខេត្ដបាត់ដំបងនៅដើមខែកុម្ភៈនេះ។ រូប អាជ្ញាធរទន្លេសាប
បាត់ដំបង/កំពង់ធំៈ អាជ្ញាធរខេត្តចំនួន ៣ រួមមាន ខេត្តកំពង់ធំ បាត់ដំបង និងខេត្តស្ទឹងត្រែង បានដាក់ចេញវិធានការ និងណែនាំឱ្យអាជ្ញាធរមូលដ្ឋានចុះបង្ក្រាប និងអនុវត្តច្បាប់ឱ្យបានតឹងរ៉ឹងចំពោះជនខិលខូចដែលចូលទៅឈូសឆាយទន្ទ្រានកាន់កាប់ដីព្រៃលិចទឹក ក៏ដូចជា ដីព្រៃនៅតាមតំបន់ការពារធម្មជាតិ។
ការដាក់ចេញវិធានការនេះ បន្ទាប់ពីលោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី ៣០ ខែមករា ឆ្នាំ ២០២៤ បានជំរុញឱ្យអាជ្ញាធរទន្លេសាប និងស្ថាប័នពាក់ព័ន្ធបន្តអនុវត្តចុះបញ្ជីដី និងកំណត់ព្រំដែននៅក្នុងតំបន់ព្រៃលិចទឹកជុំវិញបឹងទន្លេសាប ប្រកបដោយសុក្រឹតភាព ចីរភាព និងបរិយាបន្ន ដើម្បីថែរក្សាព្រៃលិចទឹក ត្រី ជាពិសេសជីវចម្រុះសម្រាប់ផលប្រយោជន៍រួម និងមនុស្សជំនាន់ក្រោយ។
លោក ហ៊ុន ម៉ាណែត បានបញ្ជាក់ថា៖ «ការថែរក្សាតំបន់ព្រៃលិចទឹកបឹងទន្លេសាប មិនមែនការពារផលប្រយោជន៍បុគ្គលឬមួយផលប្រយោជន៍នរណាសម្រាប់រយៈពេលខ្លីនោះទេ គឺផលប្រយោជន៍សម្រាប់ជាតិយើងរយៈពេលវែង អ៊ីចឹង! ការការពារជារឿងសំខាន់ដែលត្រូវធ្វើ»។
ជុំវិញការអនុវត្ដវិធានការនេះ លោក សុក ហៃ អភិបាលរងខេត្តកំពង់ធំបានឱ្យដឹងនៅថ្ងៃទី ៧ ខែកុម្ភៈថា ថ្នាក់ដឹកនាំខេត្តបានណែនាំឱ្យអាជ្ញាធរក្រុង-ស្រុកទាំង ៦ នៅក្នុងភូមិសាស្ត្រខេត្តកំពង់ធំ ដាក់កម្លាំងដើរល្បាតជារៀងរាល់ថ្ងៃនៅក្នុងតំបន់ព្រៃលិចទឹកក៏ដូចជាដីព្រៃនិងដីរដ្ឋជាដើម។
លោកបន្តថា ក្រៅពីការដាក់កម្លាំងដើរល្បាតហើយ ថ្នាក់ដឹកនាំខេត្ត ក៏បានចុះទៅត្រួតពិនិត្យនៅក្នុងតំបន់ទាំងនោះផងដែរដើម្បីឱ្យប្រាកដថា រាល់បទបញ្ជាដែលថ្នាក់ខេត្តដាក់ចេញមក មន្ត្រីថ្នាក់ក្រោមអនុវត្តមានប្រសិទ្ធភាពកម្រិតណា។
លោកបានថ្លែងថា៖ «ដោយសារនៅគ្រប់ក្រុង-ស្រុកទាំងអស់ គឺយើងមានទីបញ្ជាការមួយដែលមានកម្លាំងចុះល្បាតសម្រាប់ភូមិសាស្ត្រក្រុង-ស្រុកទាំងនោះ ដូច្នេះក្នុងករណីដែលមានបទល្មើសក្នុងតំបន់ព្រៃលិចទឹក ក៏ដូចជា ការរុករានដីព្រៃនិងការទន្ទ្រានយកដីរដ្ឋគឺសមត្ថកិច្ចដែលនៅប្រចាំការនៅតំបន់នីមួយៗនោះគាត់នឹងចាប់ជនល្មើសមកទទួលទោសតាមច្បាប់ជាធរមាន»។
ជាមួយគ្នានេះ លោកក៏បានអំពាវនាវឱ្យប្រជាពលរដ្ឋទាំងអស់ មិនថា បុគ្គលណានោះទេ ដែលមានបំណងឬកំពុងរុករានទន្ទ្រានដីព្រៃលិចទឹកក៏ដូចជារំលោភយកដីរដ្ឋ និងដីព្រៃ សូមកុំរុករានទន្ទ្រានបន្តទៀត បើពុំនោះទេនឹងធ្វើឱ្យបាត់បង់ព្រៃលិចទឹកដែលជាជម្រកនៃត្រី និងសត្វគ្រប់ប្រភេទផងដែរ។
ចំណែកលោក សឿម ប៊ុនរិទ្ធិ អភិបាលរងខេត្តបាត់ដំបងក៏បានឱ្យដឹងដែរថា ទោះបីកន្លងមក ថ្នាក់ដឹកនាំខេត្ត និងរាជរដ្ឋាភិបាលបានចេញជាវិធានការបន្តបន្ទាប់ដើម្បីទប់ស្កាត់បទល្មើសកាប់ទន្ទ្រានដីព្រៃលិចទឹកក្នុងតំបន់ ៣ ក៏ដោយ ប៉ុន្តែក្រុមជនល្មើសនិងបុគ្គលមួយចំនួននៅតែបន្តធ្វើសកម្មភាពបំផ្លិតបំផ្លាញធនធានធម្មជាតិ ក៏ដូចជាជីវចម្រុះផ្សេងៗដោយមានសភាពធ្ងន់ធ្ងរពី ១ ថ្ងៃទៅ ១ ថ្ងៃ។
ជាការឆ្លើយតបនឹងសកម្មភាពទន្ទ្រានដីខុសច្បាប់នេះ លោក ប៊ុនរិទ្ធិ បានអះអាងថា បច្ចុប្បន្នអាជ្ញាធរខេត្ត បានណែនាំឱ្យក្រុង-ស្រុកទាំង ៤ នៅជាប់តំបន់បឹងទន្លេសាបចុះបង្ក្រាប និងអនុវត្តវិធានការផ្លូវច្បាប់ឱ្យបានម៉ឺងម៉ាត់ និងតឹងរ៉ឹងបំផុតមិនថា បុគ្គល ក្រុម បក្ខពួក មន្ត្រីរាជការស៊ីវិល កងកម្លាំងប្រដាប់អាវុធ ឬមន្ត្រីអាជ្ញាធរមូលដ្ឋាននោះទេ ឱ្យតែមានការពាក់ព័ន្ធធ្វើសកម្មភាពឈូសឆាយទន្ទ្រានកាន់កាប់ដីព្រៃលិចទឹកនៅក្នុងតំបន់ ៣ នឹងប្រឈមមុខជាមួយផ្លូវច្បាប់។
លោកបានបញ្ជាក់ប្រាប់ថា៖ «ទន្ទឹមនឹងនេះ យើងក៏បានណែនាំឱ្យអាជ្ញាធរទាំងនោះ ត្រូវធ្វើការស្រាវជ្រាវ និងវែករកមុខសញ្ញាជនដែលបានពាក់ព័ន្ធទាំងអស់ដើម្បីកសាងសំណុំរឿងបញ្ជូនទៅកាន់តុលាការដោយគ្មានការលើកលែងឡើយ»។
ក្រៅពីការដាក់ចេញវិធានការបង្ក្រាបបទល្មើសឈូសឆាយដីព្រៃលិចទឹក ថ្នាក់ដឹកនាំខេត្ត ក៏បានណែនាំឱ្យអាជ្ញាធរក្រុង-ស្រុកទាំងនោះត្រូវបង្ក្រាបបទល្មើសនេសាទគ្រប់រូបភាពផងដែរ ជាពិសេសគឺត្រូវអប់រំដល់ជនដែលបានប្រើប្រាស់ឧបករណ៍នេសាទខុសច្បាប់ មុននឹងត្រូវអនុវត្តទោសតាមផ្លូវច្បាប់។ នេះជាការបន្ថែមរបស់លោក សឿម ប៊ុនរិទ្ធិ។
ដោយឡែកលោក ស្វាយ សំអ៊ាង អភិបាលខេត្តស្ទឹងត្រែងបានឱ្យដឹងតាមរយៈសេចក្ដីជូនដំណឹងកាលពីថ្ងៃទី ៥ ខែកុម្ភៈ ថា មានបុគ្គលមួយចំនួនបានបំផុសបំផុលចលនាឱ្យធ្វើការកាប់រាន ដុត ឈូសឆាយ រុករាន ទន្ទ្រាន ហ៊ុមព័ទ្ធ បែងចែកកាន់កាប់ដីព្រៃឈើ ដីព្រៃលិចទឹក ដីតំបន់ការពារធម្មជាតិ ការទិញ-លក់ដីរដ្ឋ និងការបញ្ជាក់ការទិញ-លក់លើដីរដ្ឋដោយខុសច្បាប់ ដើម្បីវាតយកធ្វើជាកម្មសិទ្ធិក្រោមលេសខ្វះដីអាស្រ័យផលឬបង្កបង្កើនផល និងលេសថាមានការកាត់ឆ្កៀលដីសម្រាប់ឱ្យសហគមន៍ប្រើប្រាស់អាស្រ័យផលជាដើម។
លោកបានបញ្ជាក់ថា៖ «ក្នុងនាមគណៈកម្មការដើម្បីទប់ស្កាត់និងបង្ក្រាបបទល្មើសធនធានធម្មជាតិ ថ្នាក់ខេត្ត បានដាក់ចេញបទបញ្ជាឱ្យបញ្ឈប់រាល់ការបំផុសបំផុលចលនា ទោះនីតិបុគ្គល ឬរូបវន្តបុគ្គលណាក៏ដោយ ក៏ពុំមានសិទ្ធិរុករានដីព្រៃ កាន់កាប់ និងបែងចែកដីនៅក្នុងតំបន់សហគមន៍ព្រៃឈើ តំបន់ព្រៃលិចទឹក តំបន់ដីព្រៃឈើសហគមន៍ និងនៅក្នុងតំបន់ការពារធម្មជាតិនោះទេ»។
បន្ថែមពីនេះទៀត លោក ស្វាយ សំអ៊ាង ក៏បានណែនាំដល់អាជ្ញាធរមូលដ្ឋាន ជាពិសេសមេភូមិ មេឃុំ-ចៅ-សង្កាត់ និងរដ្ឋបាលក្រុង-ស្រុក និងមន្ទីរអង្គភាពជំនាញត្រូវបញ្ឈប់រាល់ការបញ្ជាក់លើលិខិតទិញ-លក់ដីរដ្ឋ ការផ្ទេរសិទ្ធិ ឬបញ្ជាក់លើប្លង់បង្ហាញទីតាំងដីនៅក្នុងតំបន់សហគមន៍ព្រៃឈើ តំបន់ព្រៃលិចទឹក តំបន់ដីព្រៃឈើ និងតំបន់ការពារធម្មជាតិនិងត្រូវនិរាករណ៍រាល់លិខិតបញ្ជាក់ទិញ-លក់ដីរដ្ឋ ការផ្ទេរសិទ្ធិឬបញ្ជាក់លើប្លង់បង្ហាញទីតាំងដីទាំងនោះ៕
