លោក Stefan Heck (ឆ្វេង)និងលោកJohannes Steinger។ រូបថត AKP
ភ្នំពេញៈ សមាជិកសភាអាល្លឺម៉ង់នៃបក្សជំទាស់ដ៏ធំ ២ រូប នៃគណបក្សគ្រិស្តសាសនិកប្រជាធិបតេយ្យអាល្លឺម៉ង់ (CDU) គឺលោក Johannes Steiniger និងលោក Stefan Heck គ្រោងមកបំពេញទស្សនកិច្ចនៅកម្ពុជានៅពាក់កណ្តាលខែកុម្ភៈ ក្នុងបេសកកម្មស្វែងយល់បន្ថែមពីស្ថានភាពនយោបាយ សង្គម និងសេដ្ឋកិច្ចនៅតំបន់អាស៊ីអាគ្នេយ៍ ក៏ដូចជាដើម្បីពង្រឹងទំនាក់ទំនងការទូតជាមួយកម្ពុជាឱ្យកាន់តែស៊ីជម្រៅ។
គណៈប្រតិភូជាន់ខ្ពស់អាល្លឺម៉ង់ ២ រូបនេះ គ្រោងបំពេញទស្សនកិច្ចរយៈពេល ១ សប្តាហ៍ នាខែកុម្ភៈ ឆ្នាំ ២០២៤ ខាងមុខ នៅប្រទេសថៃ និងកម្ពុជា ដើម្បីពង្រឹង និងពង្រីកទំនាក់ទំនងការទូត និងកិច្ចសហប្រតិបត្តិការជាមួយរដ្ឋាភិបាលថ្មីនៃប្រទេសទាំង ២។ សមាជិកសភាទាំង ២ នេះ នឹងមកកាន់កម្ពុជារយៈពេល ៣ ថ្ងៃ ចាប់ពីថ្ងៃទី ១២ ដល់ថ្ងៃទី ១៤ ខែកុម្ភៈ។ នេះបើយោងតាមសេចក្តីប្រកាសព័ត៌មានពីមូលនិធិខុនរ៉ាត អាឌិនណៅអ៊ែរ (KAS) ចុះនៅថ្ងៃទី ៧ ខែកុម្ភៈ។
ប្រភពដដែលបានឱ្យដឹងថា ដំណើរទស្សនកិច្ចនេះ គឺដើម្បីឆ្លើយតបជាយុទ្ធសាស្ត្រចំពោះការកើនឡើងនៃឥទ្ធិពលនយោបាយ និងសេដ្ឋកិច្ចចិន នៅក្នុងតំបន់អាស៊ីអាគ្នេយ៍ផ្ទាល់ ដោយភាគីអាល្លឺម៉ង់ចង់ជួបពិភាក្សាជាមួយតួអង្គនយោបាយសំខាន់ៗរបស់កម្ពុជា និងថៃ ព្រមទាំងដើម្បីបញ្ជាក់ពីការប្តេជ្ញាចិត្តរបស់អាល្លឺម៉ង់ក្នុងការរក្សា និងពង្រឹងទំនាក់ទំនងល្អជាមួយបណ្តាប្រទេសក្នុងតំបន់អាស៊ីអាគ្នេយ៍ទាំងមូល។
សេចក្តីប្រកាសដដែលបានគូសបញ្ជាក់ថា ក្នុងដំណើរទស្សនកិច្ចនៅកម្ពុជា សមាជិកសភាទាំង ២ គ្រោងជួបពិភាក្សាជាមួយថ្នាក់ដឹកនាំរដ្ឋាភិបាលជាន់ខ្ពស់ អ្នកតាក់តែងគោលនយោបាយ និងឥស្សរជនជាន់ខ្ពស់ដែលមានឥទ្ធិពលនៅតាមវិស័យនានា តួយ៉ាងរដ្ឋសភាកម្ពុជា ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រុមប្រឹក្សាអភិវឌ្ឍន៍កម្ពុជា (CDC) ជាដើម។
មូលនិធិខុនរ៉ាតលើកឡើងតាមរយៈសេចក្តីប្រកាសផងដែរថា បេសកកម្មការទូតនេះឆ្លុះបញ្ចាំងកាន់តែច្បាស់ពីនយោបាយការបរទេសអាល្លឺម៉ង់ដែលមានការចាប់អារម្មណ៍កាន់តែជ្រៅចំពោះនយោបាយ និងសេដ្ឋកិច្ចក្នុងតំបន់អាស៊ីអាគ្នេយ៍ ដែលរំពឹងថានឹងបើកទំព័រថ្មីលើចំណងកិច្ចសហប្រតិបត្តិការក្នុងវិស័យនានាតួយ៉ាង ពាណិជ្ជកម្ម បច្ចេកវិទ្យា និងនវានុវត្តន៍ ដែលនឹងពង្រឹងតួនាទីបន្ថែមរបស់អាល្លឺម៉ង់ក្នុងនាមជាមហាអំណាចមួយលើផ្នែកការទូតអន្តរជាតិ។
ជាមួយគ្នានេះ លោក Stefan Heck ផ្ទាល់គូសបញ្ជាក់ថា ដំណើរទស្សនកិច្ចរបស់លោកមកកាន់កម្ពុជានិងថៃ នឹងពង្រឹងចំណងការទូត និងកិច្ចសហប្រតិបត្តិការបន្ថែមរវាងអាល្លឺម៉ង់ នឹងប្រទេសទាំង ២ ព្រមទាំងជាការលើកកម្ពស់ផលប្រយោជន៍របស់អាល្លឺម៉ង់នាបរិបទសកលលោកនេះផង។ ការផ្លាស់ប្តូរដោយផ្ទាល់ជាមួយតួអង្គក្នុងស្រុកផ្តល់ឱកាសដើម្បីស្វែងរកផ្លូវថ្មីសម្រាប់កិច្ចសហប្រតិបត្តិការ និងភាពជាដៃគូសេដ្ឋកិច្ចដែលរួមចំណែកជំរុញដល់សេដ្ឋកិច្ចអាល្លឺម៉ង់ និងការអភិវឌ្ឍប្រកបដោយនិរន្តរភាពសម្រាប់បណ្តាប្រទេសដែលបានទៅបំពេញទស្សនកិច្ច [កម្ពុជា និងថៃ]។
លោក Johannes Steiniger វិញលើកឡើងថា ដំណើរទស្សនកិច្ចរបស់លោកជាឱកាសស្វែងយល់កាន់តែស៊ីជម្រៅអំពីទិដ្ឋភាពពិតនៃនយោបាយ សង្គម និងសេដ្ឋកិច្ច ក្នុងតំបន់អាស៊ីអាគ្នេយ៍។
លោកបន្តទៀតថា៖ «ចំណេះដឹងស៊ីជម្រៅនេះគឺមានសារៈសំខាន់ជាមូលដ្ឋានសម្រាប់ការអនុវត្តគោលនយោបាយការបរទេសរបស់ប្រទេសអាល្លឺម៉ង់»។
លោក ប៉ែន បូណា ប្រធានអង្គភាពអ្នកនាំពាក្យរដ្ឋាភិបាល បានថ្លែងដោយស្វាគមន៍ចំពោះវត្តមានរបស់សមាជិកសភាអាល្លឺម៉ង់ដែលគ្រោងមកបំពេញទស្សនកិច្ចនៅកម្ពុជាដើម្បីស្វែងយល់ពីទិដ្ឋភាពនានា ដែលជារឿងល្អមួយសម្រាប់កម្ពុជា ខណៈកម្ពុជាជាប្រទេសកំពុងអភិវឌ្ឍន៍ប្រកបដោយសក្តានុពល កាត់បន្ថយភាពក្រីក្របានលឿន ជាធាតុផ្សំទាក់ទាញការចង់ដឹងពីរង្វង់អ្នកនយោបាយ អ្នកជំនួញពីបណ្តាប្រទេសផ្សេងៗ ជាពិសេសក្នុងបរិបទដឹកនាំដោយរដ្ឋាភិបាលជំនាន់ថ្មីនេះ។
លោកបានថ្លែងនៅថ្ងៃទី ៨ ខែកុម្ភៈនេះថា៖ «កម្ពុជាមាននយោបាយការបរទេសទន់ភ្លន់ ដែលរាប់អានបណ្តាប្រទេសទាំងអស់នៅក្នុងពិភពលោកដោយស្មើមុខស្មើមាត់ មិនប្រកាន់ប្រទេសតូច ឬធំនោះទេ។ សម្រាប់អាល្លឺម៉ង់ជាប្រទេសធំ មានឥទ្ធិពលនៅអឺរ៉ុប ក៏ជាទំនាក់ទំនងមួយដ៏សំខាន់ ហើយកន្លងមកកម្ពុជា និងអាល្លឺម៉ង់មានទំនាក់ទំនងល្អជាមួយគ្នា»។
លោកបន្ថែមថា រដ្ឋាភិបាលកម្ពុជាជាពិសេសរដ្ឋាភិបាលថ្មីផ្តល់តម្លៃក្នុងការពង្រឹងទំនាក់ទំនងល្អជាមួយបណ្តាប្រទេសនៅតំបន់អឺរ៉ុប រួមមានអាល្លឺម៉ង់ជាដើម ជាក់ស្តែងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន ម៉ាណែត ទៅប្រទេសបារាំងនាពេលថ្មីៗ ជាឧទាហរណ៍ស្រាប់។
លោក សេង វណ្ណលី សាស្ត្រាចារ្យទំនាក់ទំនងអន្តរជាតិ និងជាអ្នកតាមដានបញ្ហាតំបន់ថ្លែងថា ដំណើរទស្សនកិច្ចរបស់សមាជិកសភានៃបក្សជំទាស់អាល្លឺម៉ង់ ២ រូបនេះ មកកាន់អាស៊ីអាគ្នេយ៍ សបញ្ជាក់ឱ្យឃើញពីការយកចិត្តទុកដាក់របស់អ្នកនយោបាយអាល្លឺម៉ង់ទាំងបក្សកាន់អំណាច និងបក្សជំទាស់មកលើកាលានុវត្តភាពរបស់អាស៊ាន ខណៈនាពេលថ្មីៗអាល្លឺម៉ង់កំពុងបង្កើនការយកចិត្តទុកដាក់របស់ខ្លួនលើទំនាក់ទំនងជាមួយបណ្តាប្រទេសឥណ្ឌូប៉ាស៊ីហ្វិក នៅចំពោះមុខការដកខ្លួនចេញពីសហភាពអឺរ៉ុបពីសំណាក់ប្រទេសអឺរ៉ុប។
លោកបន្តថា៖«អាល្លឺម៉ង់ជាប្រទេសនាំមុខគេរបស់សហភាពអឺរ៉ុប លើនយោបាយការបរទេស នាពេលសព្វថ្ងៃ ដែលក្នុងនាមជាបងធំសហភាពអឺរ៉ុប ព្យាយាមពង្រីកឥទ្ធិពលក្នុងវិស័យការទូតដើម្បីផ្សារភ្ជាប់ជាមួយបណ្តាប្រទេសនានាក្នុងពិភពលោក រួមទាំងបណ្តាប្រទេសឥណ្ឌូប៉ាស៊ីហ្វិក ដែលមានអាស៊ានជាស្នូល។ ដំណើរទស្សនកិច្ចនេះ គឺដើម្បីស្វែងយល់ពីអាស៊ានបន្ថែម ជាពិសេសថៃ ដែលជាប្រទេសទាក់ទាញការវិនិយោគ ហើយកម្ពុជាវិញជាទីផ្សារមួយកំពុងងើបឡើង»។
លោកថ្លែងថា អាល្លឺម៉ង់កំពុងព្យាយាមសម្របសម្រួលទំនាក់ទំនងរបស់ខ្លួនជាមួយកម្ពុជា បន្ទាប់ពីអាក់អន់ស្រពន់ចិត្តចាប់តាំងពីឆ្នាំ ២០១៧ មកពោល គឺចាប់ពីការរំលាយគណបក្សប្រឆាំងដ៏ធំ គឺអតីតគណបក្សសង្គ្រោះជាតិ។ តែទោះជាយ៉ាងណានាពេលបច្ចុប្បន្ន អាល្លឺម៉ង់កំពុងផ្សារភ្ជាប់ការទូតជាមួយរដ្ឋាភិបាលកម្ពុជាថ្មី ដោយប្រកាន់យកឥរិយាបថនយោបាយទន់ភ្លន់ជាងមុន។ ដំណើរទស្សនកិច្ចលើកនេះសមាជិកសភាបក្សជំទាស់អាល្លឺម៉ង់នឹងវាយតម្លៃស្ថានភាពសង្គម នយោបាយ សេដ្ឋកិច្ចកម្ពុជា ដើម្បីផ្គូផ្គងជាមួយបក្សកាន់អំណាចរបស់ខ្លួន ក្នុងគោលដៅអនុវត្តន៍គោលនយោបាយខ្លួនឱ្យរលូន។
លោក Johannes Steiniger ជាសមាជិកសភាអាល្លឺម៉ង់ចាប់តាំងពីឆ្នាំ ២០១៣ មកដែលលោកផ្តោតលើកិច្ចការងារផ្នែកហិរញ្ញវត្ថុ ហើយជាអ្នកតស៊ូមតិលើគោលនយោបាយសារពើពន្ធដើម្បីភាពយុត្តិធម៌អន្តរជំនាន់ គាំទ្រដល់និយោជិត និងសហគ្រិនក្នុងប្រទេសអាល្លឺម៉ង់។ ចំណែកលោក Stefan Heck វិញបានក្លាយជាសមាជិកសភាពីឆ្នាំ ២០១៣ ដែលការងារផ្តោតទៅលើការត្រួតពិនិត្យលើការបោះឆ្នោត កិច្ចការផ្នែកច្បាប់ និងការពារសិទ្ធិអ្នកប្រើប្រាស់ និងកិច្ចការផ្ទៃក្នុង ខណៈធ្លាប់បម្រើការជារដ្ឋលេខាធិការក្រសួងមហាផ្ទៃ និងកីឡារបស់អាល្លឺម៉ង់ផងដែរ៕
