ជំនួបរវាងឈាង រ៉ា និងលោកស្រី Mandy K.Cohen ពីថ្ងៃទី ៧ កុម្ភៈ។ រូប ក្រសួងសុខាភិបាល
ភ្នំពេញៈ ក្រសួងសុខាភិបាល និងមជ្ឈមណ្ឌលប្រយុទ្ធ និងបង្ការជំងឺឆ្លង (CDC) របស់សហរដ្ឋអាមេរិកនឹងបន្តកិច្ចសហប្រតិបត្តិការរួមគ្នាដើម្បីជួយដល់ការអនុវត្តកម្មវិធីសុខភាពសាធារណៈនៅកម្ពុជា ក៏ដូចជាជួយដល់រាជរដ្ឋាភិបាលកម្ពុជាលើការអនុវត្តផែនការយុទ្ធសាស្ត្រជាតិលុបបំបាត់ជំងឺគ្រុនចាញ់នៅក្នុងឆ្នាំ ២០២៥។
ការបង្ហាញជំហររួមគ្នានេះ ធ្វើឡើងក្នុងជំនួបពិភាក្សាការងាររវាងលោកឈាង រ៉ា រដ្ឋមន្ត្រីក្រសួងសុខាភិបាល និងលោកស្រី Mandy K. Cohen នាយិកានៃមជ្ឈមណ្ឌលប្រយុទ្ធ និងបង្ការជំងឺឆ្លង (CDC) របស់សហរដ្ឋអាមេរិកកាលពីថ្ងៃទី ៧ ខែកុម្ភៈ ឆ្នាំ ២០២៤។ នេះបើតាមហ្វេសប៊ុកក្រសួងសុខាភិបាល។
ប្រភពដដែលបានឱ្យដឹងថា ក្នុងជំនួបនោះលោក ឈាង រ៉ា បានអរគុណដល់សហរដ្ឋអាមេរិក និងប្រជាជនអាមេរិកចំពោះការផ្តល់ជំនួយសហប្រតិបត្តិការបច្ចេកទេសដល់វិស័យសុខាភិបាលកម្ពុជាតាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)។ ជាពិសេសមជ្ឈមណ្ឌលប្រយុទ្ធនិងបង្ការជំងឺឆ្លងដែលបានសហការចូលរួមគាំទ្រក្រសួងសុខាភិបាលក្នុងការលើកកម្ពស់សុខុមាលភាពប្រជាជនកម្ពុជា និងធ្វើឱ្យប្រសើរឡើងនូវប្រព័ន្ធថែទាំសុខភាព ដែលមានភាពធន់ និងរឹងមាំនៅកម្ពុជាជាច្រើននាពេលកន្លងមក។
លោកមានប្រសាសន៍ថា៖ «សូមថ្លែងអំណរគុណដល់សហរដ្ឋអាមេរិក ជាពិសេសមជ្ឈមណ្ឌលត្រួតពិនិត្យ និងបង្ការជំងឺឆ្លង ការិយាល័យកណ្តាលដែលបានបញ្ជាក់ជំហរបន្តគាំទ្រ រួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល ដើម្បីរួមចំណែកជាមួយរាជរដ្ឋាភិបាលកម្ពុជាឈានទៅសម្រេចបាននូវការគ្របដណ្តប់សុខភាពជាសកលស្របតាមផែនការយុទ្ធសាស្ត្របញ្ចកោណនៃរាជរដ្ឋាភិបាលអាណត្តិទី៧ នេះ»។
បើតាមក្រសួងសុខាភិបាលនាឱកាសនោះ «លោកស្រីនាយិកាបានបញ្ជាក់ជំហរបន្តកិច្ចសហប្រតិបត្តិការរួមគ្នាពង្រឹងភាពជាដៃគូដើម្បីសម្រេចបានគោលដៅដែលបានកំណត់ដោយផែនការយុទ្ធសាស្ត្រសុខាភិបាល ២០២២-២០៣០ (HSP4) ព្រមទាំងសហការបន្តពង្រឹងសន្តិសុខសុខភាពសកលបន្ថែមទៀត តាមរយៈការបន្តគាំទ្រការបណ្តុះបណ្តាលមន្ត្រីសុខាភិបាល ដើម្បីជួយក្នុងការអនុវត្តកម្មវិធីសុខភាពសាធារណៈនៅកម្ពុជា និងបន្តជួយក្រសួងសុខាភិបាលក៏ដូចជារាជរដ្ឋាភិបាលកម្ពុជាលើការអនុវត្តផែនការយុទ្ធសាស្ត្រជាតិលុបបំបាត់ជំងឺគ្រុនចាញ់នៅឆ្នាំ ២០២៥»។
ដោយឡែកស្ថានទូតអាមេរិកប្រចាំកម្ពុជាចេញសេចក្តីប្រកាសព័ត៌មាននៅថ្ងៃទី ៨ កុម្ភៈថា នៅក្នុងជំនួបជាមួយឈាង រ៉ា នោះ លោកស្រី Cohen បានរំឭកពីកិច្ចសហការជាដៃគូដ៏យូរដែលមានរយៈពេល ២២ ឆ្នាំ រវាង CDC សហរដ្ឋអាមេរិក និងកម្ពុជា។
លើសពីនោះ លោកស្រីក៏បានបានគូសបញ្ជាក់ពីសារៈសំខាន់នៃការបន្តកិច្ចសហការគ្នានៅក្នុងការការពារ និងរកឃើញទាន់ពេលនូវជំងឺផ្លូវដង្ហើម និងការឆ្លើយតប ហើយនិងការត្រៀមរៀបចំសម្រាប់គ្រាបន្ទាន់ផ្នែកសុខភាពសាធារណៈ។ ជាមួយគ្នានេះ លោកស្រី បានបញ្ជាក់សាជាថ្មីពីការប្តេជ្ញាចិត្តរបស់ CDC អាមេរិក ក្នុងការលើកកម្ពស់សមត្ថភាពស្នូលផ្នែកសុខភាពសាធារណៈដើម្បីការពារសុខភាព និងសុវត្ថិភាព។
លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានលើកឡើងនៅក្នុងសេចក្តីប្រកាសព័ត៌មានដែរថា ទស្សនកិច្ចរបស់លោកស្រី Cohen បញ្ជាក់ពីការប្តេជ្ញាចិត្តរបស់សហរដ្ឋអាមេរិកចំពោះការលើកកម្ពស់វិស័យសុខភាពសាធារណៈនៅកម្ពុជា។
លោកបានបញ្ជាក់ថា៖ «ភាពជាដៃគូជាបន្តរបស់ CDC អាមេរិក បានជួយកម្ពុជាប្រកបដោយប្រសិទ្ធភាពក្នុងការប្រឆាំងនឹងជំងឺអេដស៍ របេង គ្រុនចាញ់ ផ្តាសាយ និងជំងឺឆ្កែឆ្កួត។ រដ្ឋាភិបាលសហរដ្ឋអាមេរិកដែលរួមមានទាំង CDC និងទីភ្នាក់ងារសហរដ្ឋអាមេរិកដទៃទៀតផ្នែកសុខភាពដែលកំពុងធ្វើការនៅព្រះរាជាណាចក្រកម្ពុជា ក៏បានជួយផងដែរដល់អាជ្ញាធរកម្ពុជាក្នុងការធ្វើការឆ្លើយតបបានភ្លាមៗ និងប្រកបដោយប្រសិទ្ធភាពបំផុតក្នុងចំណោមការឆ្លើយតបប្រកបដោយប្រសិទ្ធភាពបំផុតក្នុងពិភពលោកទៅនឹងការផ្ទុះឡើងនៃជំងឺកូវីដ ១៩» ។
ជុំវិញកិច្ចសហការនេះ លោក នុត សម្បត្តិ ប្រធានវិទ្យាស្ថានជីវសាស្ត្រ វេជ្ជសាស្ត្រ និងកសិកម្មនៃរាជបណ្ឌិត្យសភាកម្ពុជាបានលើកឡើងថា អាមេរិកគឺជាប្រទេសខ្លាំងលើការស្រាវជ្រាវជំងឺឆ្លង ដូច្នេះតាមរយៈកិច្ចសហប្រតិបត្តិការនានា ជាពិសេសលើការបណ្តុះបណ្តាលមន្ត្រីសុខាភិបាលកម្ពុជានឹងរួមចំណែកពង្រឹងសមត្ថភាពមន្ត្រីសុខាភិបាល។
លោកបានថ្លែងថា៖ «សហរដ្ឋអាមេរិកគឺមានបទពិសោធន៍ច្រើនប្រយុទ្ធប្រឆាំងជំងឺឆ្លង ពិសេសផ្នែកប្រយុទ្ធប្រឆាំងនៅតំបន់ត្រូពិក ហេតុនេះបើអាមេរិកជួយលើរឿងនេះនឹងអាចជួយបណ្តុះធនធានមនុស្សកម្ពុជា ខណៈកម្ពុជានៅខ្វះខាតធនធានមនុស្សផ្នែកជំងឺឆ្លង»៕
