នារីរងគ្រោះពេលអំពាវនាវឱ្យជួយបានវិលមកស្រុកវិញកាលពីថ្ងៃទី៩ មីនា។ រូបថត ហ្វេសប៊ុក
ភ្នំពេញៈ លោក ទូច សុខៈ អ្នកនាំពាក្យរងក្រសួងមហាផ្ទៃបានឱ្យដឹងថា នារីវ័យក្មេងកម្ពុជា ១ រូប ដែលត្រូវបានគេយកទៅឃុំឃាំងក្នុងផ្ទះ ១ កន្លែងនៅឯប្រទេសចិន តាមរយៈមេខ្យល់យកទៅលក់ ដោយកុហកថា យកទៅធ្វើការនោះ ត្រូវបានជួយអន្តរាគមន៍ចេញពីទីកន្លែងឃុំឃាំងវិញហើយ បន្ទាប់ពីមានការជួយពីសមត្ថកិច្ចប្រទេសចិន និងអាជ្ញាធរកម្ពុជា។
លោកបានប្រាប់ថា៖ «មកទល់ពេលនេះ សមត្ថកិច្ចរបស់ចិន តាមរយៈការស្នើសុំអន្តរគមន៍ពីកម្ពុជាយើង មានក្រសួងមហាផ្ទៃ ក្រសួងការបរទេស គឺសមត្ថកិច្ចនគរបាលចិន បានទៅយកប្អូនស្រីនោះចេញពីបន្ទប់ដែលម្ចាស់ផ្ទះបង្ខាំងមិនឱ្យទៅណា និងបន្តនីតិវិធីជាមួយស្ថានអគ្គកុងស៊ុលកម្ពុជាបន្តទៀត ដើម្បីចាត់ចែងបញ្ជូនប្អូនស្រីមកកាន់កម្ពុជាវិញ»។
សូមបញ្ជាក់ថា កាលពីថ្ងៃទី ៩ ខែមីនា តាមរយៈគណនីហ្វេសប៊ុកឈ្មោះ លីណា បានបង្ហោះវីដេអូឃ្លីបមួយដែលមានខ្លឹមសារថា៖ «ជម្រាបសួរពុកម៉ែបងប្អូនទាំងអស់គ្នា ខ្ញុំមានឈ្មោះថា ភិផា មានអាយុ ១៦ ឆ្នាំ ជាអ្នកខេត្តត្បូងឃ្មុំ ស្រុកក្រូចឆ្មារ ភូមិខ្សាច់ប្រឆេះក្រោម ឥឡូវហ្នឹងខ្ញុំបានចាញ់បោកគេ ហើយមេខ្យល់យកខ្ញុំមកលក់នៅឯប្រទេសចិន គេថាយកខ្ញុំមកធ្វើការ ប៉ុន្តែគេយកខ្ញុំមកលក់ ហើយគេយកខ្ញុំមកយកប្តីចិន»។
វីដេអូដដែលបានបន្តថា៖ «គេចាប់ខ្ញុំឃុំ ៦ ខែ ហើយគេចាក់សោពីក្រៅទៀត អ៊ីចឹងខ្ញុំមានតែម្រាមដៃ ១០ សំពះសុំជំនួយសម្តេចយាយ សម្ដេចតា សម្តេច ហ៊ុន សែន ជួយកូនចៅទៅវិញផង»។
ជាមួយគ្នានេះដែរ បើយោងតាមសេចក្តីប្រកាសព័ត៌មានរបស់រដ្ឋបាលខេត្តត្បូងឃ្មុំនៅថ្ងៃទី ១០ ខែមីនា បានឱ្យដឹងថា ក្រោយពីទទួលបានព័ត៌មាននេះ រដ្ឋបាលខេត្តត្បូងឃ្មុំ បានចាត់ស្នងការនគរបាលខេត្ត សហការជាមួយនឹងអាជ្ញាធរពាក់ព័ន្ធ ដើម្បីចុះពិនិត្យ ស្រាវជ្រាវជាបន្ទាន់ភ្លាមៗ និងជួបឈ្មោះ រ៉ុម គន្ធា អាយុ ៣១ ឆ្នាំ ដែលត្រូវជាបងស្រីបង្កើតរបស់ជនរងគ្រោះ (រុំ ភិផា) ដើម្បីសួរនាំព័ត៌មានបន្ថែម ។
សេចក្តីប្រកាសបានបន្តថា កាលពីអំឡុងដើមឆ្នាំ ២០២៣ ជនរងគ្រោះ រុំ ភិផា បានចេញពីផ្ទះទៅរាជធានីភ្នំពេញ ដើម្បីធ្វើការរោងចក្រកាត់ដេរ និងតែងតែផ្ញើប្រាក់ខែមកឧបត្ថម្ភគ្រួសារជាប្រចាំរាល់ខែ។ លុះប្រហែលជា ៥ ទៅ ៦ ខែក្រោយមក ស្រាប់តែក្រុមគ្រួសារបាត់មិនឃើញ និងទាក់ទងជនរងគ្រោះលែងបាន។
ប្រភពដដែលបន្ថែមថា៖ «ពេលនោះបងស្រីបង្កើតរបស់ជនរងគ្រោះ និងក្រុមគ្រួសារពុំបានរាយការណ៍មកសមត្ថកិច្ចទេ ដោយគិតថាជនរងគ្រោះខឹងនរណាម្នាក់ក្នុងគ្រួសារ ឬមានសង្សារ មិនឱ្យគ្រួសារដឹងជាដើម ទើបនៅល្ងាចថ្ងៃទី ៩ ខែមីនា ឆ្នាំ ២០២៤ ក្រុមគ្រួសារបានឃើញវីដេអូឃ្លីបរបស់ជនរងគ្រោះនៅខេត្តលីសួយជីញធាន ប្រទេសចិន និងបានប្ដឹងរាយការណ៍មកសមត្ថកិច្ចតែម្តង។
រដ្ឋបាលខេត្តត្បូងឃ្មុំ បានទាក់ទងជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ សហការជាមួយនឹងនាយកដ្ឋានប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ ដើម្បីផ្តល់ព័ត៌មានដល់ស្ថានទូតសាធារណរដ្ឋប្រជាមានិតចិនប្រចាំកម្ពុជា ធ្វើការស្រាវជ្រាវ និងជួយសង្គ្រោះក្មេងស្រីរងគ្រោះឱ្យបានត្រឡប់មកប្រទេសកំណើតវិញ ព្រមទាំងស្វែងរកមេខ្យល់ មកផ្ដន្ទាទោសតាមច្បាប់ជាធរមាន។
ទាក់ទិននឹងបញ្ហានេះ លោកស្រី ជូ ប៊ុនអេង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៅថ្ងៃទី ១១ ខែមីនា បានសាទរចំពោះសមត្ថកិច្ចកម្ពុជាដែលបានសហការជាមួយសមត្ថកិច្ចចិនក្នុងការជួយអន្តរាគមន៍សង្គ្រោះក្មេងស្រីកម្ពុជា ឱ្យមានសុវត្ថិភាព និងរៀបចំឱ្យវិលមកកម្ពុជាវិញ។
យ៉ាងណាក្ដី លោកស្រីថា វាហួសពេលទៅហើយ ដោយសារតែនារីរូបនោះបានចាញ់បោកគេរួចទៅហើយ ទើបអំពាវនាវឱ្យជួយសង្គ្រោះ។
ត្រង់ចំណុចនេះ លោកស្រី ជូ ប៊ុនអេង បានបញ្ជាក់ថា៖ «ជនរងគ្រោះពីការចាញ់បោកមេខ្យល់ ភាគច្រើនគឺ មិនសូវជាស្តាប់តាមការណែនាំរបស់អាជ្ញាធរកម្ពុជាទេ ពួកគេស្តាប់ និងជឿតាមតែការអូសទាញពីមេខ្យល់ប៉ុណ្ណោះ តាមរយៈទំនាក់ទំនងតាមទូរស័ព្ទ។ មិនតែប៉ុណ្ណោះ អ្នកខ្លះបានយកធ្វើជាអាជីពតែម្តង ដោយពួកគេបានធ្វើដំណើរទៅក្រៅប្រទេស ប៉ុន្តែមិនទទួលបានលទ្ធផលល្អដូចការរំពឹងទុក បែរជាលើកឡើងថា ចាញ់បោកគេវិញ»។
លោកស្រី ជូ ប៊ុនអេង បានបន្ដថា៖ «ទំនាក់ទំនងតាមទូរស័ព្ទវាមានឥទ្ធិពល ប៉ុន្តែមនុស្សវៃឆ្លាតមើលឃើញពីភាពរងគ្រោះ តែគាត់មើលមិនឃើញ។ មួយទៀត គាត់ទៅប្រទេសគេ គាត់រំពឹងថា ទទួលបានផលអ្វីមួយ ប៉ុន្តែមិនទទួលបានដូចចិត្ត គាត់ប្រាប់យើងថាគាត់ចាញ់បោកគេទៅវិញ»។
ទោះយ៉ាងនេះក្តី បើតាមការប៉ាន់ស្មានរបស់លោកស្រីជូ ប៊ុនអេង ក្នុងរយៈពេលប្រមាណ ៣ ខែ ក្នុងឆ្នាំ ២០២៤ នេះ សមត្ថកិច្ចកម្ពុជាបានជួយសង្គ្រោះប្រជាពលរដ្ឋ ដែលរងគ្រោះដោយការចាញ់បោកមេខ្យល់មានប្រមាណជាង ១០០ ករណីហើយ៕
