ស្ត្រីជាថ្នាក់ដឹកនាំនិងជាមន្ត្រីរាជការដែលសុទ្ធតែស្លៀកសំពត់បត់ខ្មែរកំពុងត្រួតពិនិត្យសំពត់បត់ខ្មែរនៅកម្មវិធី «រាត្រីសមោសរ សំពត់បត់ខ្មែរ»ពីថ្ងៃទី២មីនា។ រូបថត ក្រសួងវប្បធម៌
ភ្នំពេញៈ ក្រសួងវប្បធម៌ និងវិចិត្រសិល្បៈ បានរៀបចំកម្មវិធី «រាត្រីសមោសរ សំពត់បត់ខ្មែរ» ជាលើកទី១ ដើម្បីឱ្យកូនខ្មែរជំនាន់ក្រោយ បានដឹងពីតម្លៃសំពត់បត់ខ្មែរ ជាពិសេសដឹងពីតួនាទី និងភារកិច្ច ក្នុងការចូលរួមអភិរក្សសម្លៀកបំពាក់ប្រពៃណីបុរាណខ្មែរ ដើម្បីលើកកម្ពស់តម្លៃវប្បធម៌ជាតិ។
កម្មវិធី «រាត្រីសមោសរ សំពត់បត់ខ្មែរ» បានធ្វើឡើង ក្រោមអធិបតីលោកស្រី ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងមានការចូលរួមពីថ្នាក់ដឹកនាំពាក់ព័ន្ធ និងសិល្បករ សិល្បការិនីទាំងក្នុងនិងក្រៅប្រព័ន្ធជាច្រើនរូប កាលពីយប់ថ្ងៃទី២ ខែមីនា ឆ្នាំ២០២៤។
លោកស្រីឡងឌី សាន់ណារ៉ា រដ្ឋលេខាធិការក្រសួងវប្បធម៌ បានថ្លែងក្នុងពិធីនេះថា គោលបំណងដែលក្រសួងវប្បធម៌ បានរៀបចំកម្មវិធី «រាត្រីសមោសរ សំពត់បត់ខ្មែរ» គឺចង់បង្ហាញពីភាពសាមញ្ញ និងភាពថ្លៃថ្នូរ ដែលប្រកបដោយអត្ថន័យរបស់សំពត់បត់ អាចប្រើប្រាស់បានគ្រប់ឋានៈសង្គម ជាពិសេសសំពត់បត់ ក៏ជាកេរដំណែលវប្បធម៌អរូបី ក៏ដូចជាបញ្ជាក់អំពីប្រពៃណីដែលមិនអាចកាត់ថ្លៃបានឡើយ។
លោកស្រីបន្តថា រាត្រីសមោសរ សំពត់បត់ខ្មែរនេះ ជាកម្មវិធីមួយផ្សព្វផ្សាយពីអត្ថន័យ គុណតម្លៃនៃសំពត់បត់ខ្មែរ ទៅកាន់សាធារណជនឱ្យយល់ដឹងពីការប្រើប្រាស់សំពត់បត់ទៅតាមសម័យកាល។ ជាពិសេសកម្មវិធីនេះ បានបំផុសស្មារតីឱ្យកូនខ្មែរ និងយុវជន ឱ្យងាកមកស្រឡាញ់វប្បធម៌របស់ខ្លួន ក៏ដូចជាជំរុញឱ្យស្ដ្រីខ្មែរមានការយល់ដឹងកាន់តែច្បាស់ពីភាពស្រស់ស្អាតនៃសំពត់បត់ ដើម្បីចូលរួមថែរក្សាប្រពៃណី ទំនៀមទម្លាប់ដែលជាកេរដំណែលដូនតា។
លោកស្រីថ្លែងថា៖ «ក្នុងនាមយើងជាកូនខ្មែរជំនាន់ក្រោយ មានភារកិច្ចថែរក្សា ការពារ លើកតម្កើង ក្លាយជាសកម្មភាពជាក់ស្ដែងប្រើប្រាស់ក្នុងជីវភាពប្រចាំថ្ងៃឱ្យកាន់តែពេញនិយមនៅក្នុងចំណោមប្រជាជនគ្រប់ស្រទាប់វណ្ណៈ ជាពិសេសចង់ឱ្យយុវជនជំនាន់ក្រោយ បានស្គាល់ឱ្យកាន់ច្បាស់ពីតម្លៃ នៃការប្រើប្រាស់សម្លៀកបំពាក់ជាប្រពៃណី ដែលជាផ្នែកមួយនៃអត្តសញ្ញាណជាតិ»។
ក្នុងពិធីនោះដែរ លោកស្រី ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ ក៏បានលើកឡើងដែរថា«រាត្រីសមោសរ សំពត់បត់ខ្មែរ» គឺជាកម្មវិធីដ៏មានអត្ថន័យ និងមានសារៈសំខាន់បំផុតដល់យុវជន យុវតីខ្មែរ ជំនាន់ក្រោយ ក្នុងការបង្កើនចំណេះដឹង ជាពិសេសបានយល់កាន់តែច្បាស់ពីប្រវត្តិ ក៏ដូចជាតម្លៃសម្លៀកបំពាក់ប្រពៃណីបុរាណខ្មែរ។
លោកស្រី ក៏បានទឹកចិត្តដល់អ្នកសិល្បៈច្នៃម៉ូដសម្លៀកបំពាក់ យកចិតទុកដាក់ទៅលើតម្លៃសម្លៀកបំពាក់ ដែលប្រើប្រាស់ដោយកូនខ្មែរ សូមកុំច្នៃម៉ូដលើសលប់ពេក ដែលអាចមើលទៅមិនសមរម្យ ប្រាសចាកពីតម្លៃសម្លៀកបំពាក់របស់ខ្មែរ ដែលមានលក្ខណៈចាស់ទុំ សុភាព និងថ្នៃថ្នូរ។
លោកស្រី ម៉ែន សំអន បានមានប្រសាសន៍ថា៖ «សម្លៀកបបំពាក់ គឺជាផ្នែកមួយនៃវប្បធម៌ ដែលបញ្ជាក់ពីឫសគល់នៃអរិយធម៌ដ៏ចំណាស់របស់ជាតិយើង ដូច្នេះការថែរក្សា អភិវឌ្ឍ និងលើកតម្កើងកេរដំណែលវប្បធម៌ដ៏ល្អឯកនេះ ជាភារកិច្ចរបស់កូនខ្មែរគ្រប់ៗរូប ដែលត្រូវយល់ឱ្យច្បាស់អំពីប្រវត្តិ តម្លៃ និងកេរដំណែលអត្ថន័យនៃសម្លៀកបំពាក់ របៀបរបបនៃការប្រើប្រាស់ម្លៀកបំពាក់ទៅតាមពិធី និងពេលវេលា ព្រមទាំងការចូលរួមផ្សព្វផ្សាយកម្រិតជាតិ និងអន្តរជាតិផងដែរ»។
បន្ថែមពីនេះ លោកស្រីថា សម្លៀកបំពាក់ខ្មែរ ក៏ពិតជាមានប្រវត្តិច្បាស់លាស់ និងមានការវិវត្តទៅតាមសម័យកាល ខណៈមកដល់បច្ចុប្បន្ននេះ សម្លៀកបំពាក់ខ្មែរ អាចសម្គាល់បានតាមសម័យកាលដូចជា៖ សម័យនគរភ្នំ សម័យចេនឡា សម័យអង្គរ សម័យចតុមុខ សម័យលង្វែក សម័យឧដុង្គ សម័យអាណានិគម សម័យសង្គមរាស្ត្រនិយម និងសម័យបច្ចុប្បន្នជាដើម។
សូមបញ្ជាក់ថា កម្មវិធី «រាត្រីសមោសរ សំពត់បត់ខ្មែរ» ប្រព្រឹត្តទៅមានរយៈពេល ៣ថ្ងៃ ចាប់ពីថ្ងៃទី១ ដល់ថ្ងៃទី៣ ខែមីនា ឆ្នាំ២០២៤ នៅសាលសន្និសីទចតុមុខ។ កម្មវិធីនេះ ក៏មានការតាំងបង្ហាញ «ពិព័រណ៍សិប្បកម្មយើង» ដែលមានការចូលរួមបង្ហាញស្នាដៃផលិតផលសិប្បកម្មខ្មែរជាច្រើនមុខរួមមាន៖ ហូល ផាមួង ក្រមា និងវត្ថុសិល្បៈផ្សេងៗទៀតជាដើម៕
