លោកហ៊ុន ម៉ាណែត និងភរិយានៅអូស្ដ្រាលីកាលពីថ្ងៃទី២ មីនា ។ រូបថត STPM
ភ្នំពេញៈ លោក ហ៊ុន ម៉ាណែត នាយករដ្ឋមន្ត្រី បានអះអាងថា ក្នុងរយៈពេល ៦ ខែ នៃការកាន់តំណែងជានាយករដ្ឋមន្ត្រីរបស់លោក ដែលបានខិតខំប្រឹងប្រែងទាក់ទាញវិនិយោគិនបរទេស នៅរាល់ពេលធ្វើដំណើរទស្សនកិច្ចទៅក្រៅប្រទេសនោះ គឺសម្រេចបានលទ្ធផលជាផ្លែផ្កា ដោយក្នុងរយៈពេលនេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងថ្មីៗ ១៧២ គម្រោង ដែលមានទុនវិនិយោគជិត ៤ ពាន់លានដុល្លារ។
ការអះអាងរបស់ លោក ហ៊ុន ម៉ាណែត នេះ បានធ្វើឡើងនៅក្នុងពិធីសំណេះសំណាលរបស់លោក និងភរិយាជាមួយប្រជាពលរដ្ឋ សហគមន៍ខ្មែររស់នៅក្នុងប្រទេស អូស្ត្រាលី និង នូវែលសេឡង់ នាទីក្រុងមែលប៊ន ប្រទេសអូស្ត្រាលី នៅថ្ងៃទី ៣ ខែមីនា នៅក្នុងឱកាសដែលលោកដឹកនាំគណៈប្រតិភូរាជរដ្ឋាភិបាលកម្ពុជាចូលរួមកិច្ចប្រជុំ កំពូលពិសេស អាស៊ាន-អូស្ត្រាលី នៅអូស្ត្រាលី។
លោក ហ៊ុន ម៉ាណែត បានថ្លែងថា៖ «ការវិនិយោគ នៅក្នុងរយៈពេល ៦ ខែចុងក្រោយ ចាប់ពីខែ ៨ ឆ្នាំ ២០២៣ ដល់ខែ១ ឆ្នាំ ២០២៤ ដែលខ្ញុំដាក់គោលដៅថា ដើរទាក់ម៉ូយនោះ នៅក្នុងរយៈពេលនេះ គម្រោងដែល CDC បានអនុម័តមាន ១៧២ គម្រោងទាំងក្នុងប្រទេស និង ក្រៅប្រទេស ដែលទំហំវិនិយោគជិត ៤ ពាន់លានដុល្លារ ហើយនៅពេលគម្រោងទាំងនេះបញ្ចប់ គឺអាចបង្កើតការងារបាន ១៩ ម៉ឺនកន្លែងជូនប្រជាពលរដ្ឋ»។
លោកបានបន្ថែមថា នៅប៉ុន្មានថ្ងៃខាងមុខនេះ លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) នឹងត្រឡប់មកកាន់ប្រទេសកម្ពុជាវិញ ដើម្បីមកជួបជាមួយគណៈប្រតិភូវិនិយោគមកពីប្រទេសចិនប្រមាណ ១៥០ ក្រុមហ៊ុន ដែលក្នុងនោះមានក្រុមហ៊ុនមួយដែលផលិតសម្បកកង់រថយន្ត ដែលនឹងវិនិយោគជាង ១ ពាន់លានដុល្លារនៅកម្ពុជា។
«ជាមួយគ្នានោះ ក្រុមហ៊ុនដែលកំពុងដំណើរការស្រាប់នៅកម្ពុជា ដោយសារតែគេមានទំនុកចិត្តលើរាជរដ្ឋាភិបាលកម្ពុជា ក្នុងការរក្សាស្ថិរភាពនយោបាយ ក្នុងរយៈពេលប៉ុន្មានខែនេះ គេបានសម្រេចចិត្តពង្រីកការវិនិយោគបន្ថែមចន្លោះពី ២០០ លានដុល្លារ ទៅ ៦០០ លានដុល្លារថែមទៀត។ គេទុកចិត្ត ទើបគេពង្រីក ហើយការពង្រីកនេះ នឹងបង្កើនចំនួនការងារ និងប្រាក់ចំណូលជូនដល់ពលរដ្ឋយើង។នេះគឺជានិរន្តរភាពក្នុងរយៈពេល ៦ខែ ដែលយើងបានធ្វើ»។ នេះជាការបញ្ជាក់បន្ថែម របស់លោកនាយករដ្ឋមន្ត្រី។
លោកបានបន្ថែមថា នៅថ្ងៃទី៥ ខែមីនា ខាងមុខ លោកនឹងមានជំនួបជាមួយវិស័យឯកជនរបស់ប្រទេសអូស្ត្រាលី តាមរយៈវេទិកាធុរកិច្ចរវាងវិស័យឯកជនកម្ពុជា និងអូស្ត្រាលី សរុបជាង២០០ក្រុមហ៊ុន ដើម្បីបន្តទាក់ទាញការវិនិយោគបន្ថែមទៀត។
លោកបានថ្លែងទៀតថា៖ «អ្នកខ្លះគេថា កម្ពុជាទាក់ទាញអ្នកវិនិយោគតែពីចិន ខ្ញុំថាអត់ទេ ខ្ញុំដើរទាក់ម៉ូយគ្រប់ទីកន្លែង ពីណាក៏ខ្ញុំស្វាគមន៍ដែរ។ ទោះបីជាជួប ១០០ ក្រុមហ៊ុន ហើយទៅបានតែ ១ ឬ ២ ក៏ជាជោគជ័យដែរ ហើយការងារផ្សេងទៀតទុកឱ្យវិស័យឯកជនគេអ្នកធ្វើបន្ត ថាគួរវិនិយោគទៅលើអ្វីខ្លះ»។
ទាក់ទងនឹងគម្រោងព្រែកជីកហ្វូណន-តេជោវិញ លោកនាយករដ្ឋមន្ត្រីបានលើកឡើងដែរថា គម្រោងនេះនឹងក្លាយជាចំណែកបម្រើវិស័យដឹកជញ្ជូនតាមផ្លូវទឹកពីទន្លេ ទៅសមុទ្រ បង្កើតការងារ និងជួយឱ្យតម្លៃដឹកជញ្ជូនមានកម្រិតទាប។
លោកបានបញ្ជាក់ថា៖ «គម្រោងធំមួយ ដែលយើងព្យាយាមជំរុញឱ្យលេចចេញជារូបរាង គឺគម្រោងព្រែកជីក ហ្វូណន-តេជោ ដែលជាគម្រោងភ្ជាប់ពីសមុទ្រនៅកំពត មកដល់ទន្លេបាសាក់យើង ដើម្បីសម្រួលដល់ការដឹកជញ្ជូនតាមផ្លូវទឹកឱ្យកាន់តែឆាប់រហ័ស និងមានតម្លៃសមរម្យ និងជំរុញឱ្យតំបន់គម្រោងនេះក្លាយជាតំបន់ឧស្សាហកម្មផងដែរ»។
សូមជម្រាបថា នាពិធីបិទសន្និបាតបូកសរុបវាយតម្លៃការងារឆ្នាំ ២០២៣ និង លើកទិសដៅការងារឆ្នាំ ២០២៤ របស់ក្រសួងសាធារណការ និងដឹកជញ្ជូន កាលពីថ្ងៃទី២៩ ខែកុម្ភៈ ឆ្នាំ ២០២៤ លោក ស៊ុន ចាន់ថុល ក៏បានជំរុញឱ្យរដ្ឋមន្ត្រីក្រសួងសាធារណការនិងដឹកជញ្ជូន គឺលោក ប៉េង ពោធិ៍នា ពន្លឿនការងារចរចាជាមួយក្រុមហ៊ុនសាជីវកម្មស្ពាន និងថ្នល់ចិន (CRBC) នូវកិច្ចព្រមព្រៀងសម្បទានដើម្បីឈានទៅរកការបើកការដ្ឋានសាងសង់គម្រោងនាវាចរណ៍ព្រែកជីកហ្វូណន-តេជោ។
លោកបានបញ្ជាក់ថា៖«នេះជាគម្រោងអាទិភាពខ្ពស់ ដែលសម្តេចតេជោ ក៏ដូចជាសម្តេចធិបតី បានជំរុញឱ្យយើងខិតខំប្រឹងប្រែងធ្វើការងារនេះឱ្យមានប្រសិទ្ធភាព ដោយសម្តេចធិបតីចង់ធ្វើឱ្យគម្រោងនេះ គឺជាគម្រោងតភ្ជាប់ផ្លូវទឹក និងផ្លូវសមុទ្រឱ្យបាន។ នេះជាគម្រោងដ៏សំខាន់មួយ ដោយយើងសង្ឃឹមថា យើងអាចពិភាក្សាចរចាលើកិច្ចព្រមព្រៀងសម្បទាននេះ អាចនឹងនៅខែ៦ ឬ៧ ខាងមុខនេះ ដើម្បីឈានដល់ការបើកការដ្ឋានសាងសង់ គម្រោងព្រែកជីកហ្វូណន-តេជោ»។
សូមបញ្ជាក់ថា គម្រោង «ព្រែកជីកហ្វូណន-តេជោ» មានប្រវែង១៨០គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប។
ផ្លូវទឹកនេះនឹងមានទទឹងមុខកាត់ផ្នែកខាងលើប្រវែង ១០០ ម៉ែត្រ និង មុខកាត់ផ្នែកខាងក្រោមប្រមាណ ៨០ ម៉ែត្រ និងជម្រៅទឹកប្រមាណ ៥,៤ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) មានគន្លងនាវាចរណ៍ចំនួន ២គន្លង អាចចេញ-ចូល និង ចៀសគ្នាបានដោយសុវត្ថិភាព។ ការសាងសង់គម្រោងផ្លូវទឹកថ្មីនេះត្រូវបានប៉ាន់ស្មានថានឹងចំណាយទុនវិនិយោគ
១ ៧០០ លានដុល្លារ និងរយៈពេលសាងសង់ប្រមាណ ៤ឆ្នាំ៕
