លោក ហ៊ុន ម៉ាណែត និងភរិយា ជួបសំណេះសំណាលជាមួយបងប្អូនសហគមន៍ខ្មែររស់នៅប្រទេសអូស្ត្រាលី និងនូវែលសេឡង់ កាលពីថ្ងៃទី ៣ ខែមីនា ឆ្នាំ ២០២៤។ រូបថត STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានចាត់ទុកការជួបជាមួយខ្មែរនៅអូស្ត្រាលី និងនូវែលសេឡង់ បានបង្ហាញឱ្យឃើញពីសាមគ្គីភាពរវាងខ្មែរនិងខ្មែរនៅគ្រប់ទីកន្លែង ដែលជាកិច្ចការដ៏សំខាន់សម្រាប់ដំណើរកសាងជាតិ។
លោកក៏បានថ្លែងអំណរគុណដល់និស្សិត និងប្រជាជនខ្មែរជាង ១ ពាន់នាក់ ដែលបានទទួលស្វាគមន៍លោក និងភរិយា នារសៀលថ្ងៃទី ៣ ខែមីនា ក្នុងទីក្រុងមែលប៊ន ប្រទេសអូស្ត្រាលី ដែលនេះបង្ហាញនូវមហាសាមគ្គីគ្រួសារខ្មែរផងដែរ។
លោក ហ៊ុន ម៉ាណែត បានបញ្ជាក់ថា៖ «ខ្ញុំសូមអរគុណចំពោះការសម្តែងមតិគាំទ្រទៅដល់រាជរដ្ឋាភិបាលយ៉ាងគគ្រឹកគគ្រេង ហើយវាជាសារៈសំខាន់ដែលបង្ហាញជាសាធារណៈរបស់អូស្ត្រាលីពីមិត្តភាព កម្ពុជា-អូស្ត្រាលី ក៏ដូចជាបង្ហាញទៅដល់គោលនយោបាយវិជ្ជមាន និងសមិទ្ធផលវិជ្ជមានដែលរដ្ឋាភិបាលខិតខំកសាង និងថែរក្សាមកដល់ម៉ោងនេះ»។
លោកបានលើកឡើងដែរថា ចំពោះសុខសន្តិភាពដែលរកបានដោយលោកគឺមានតម្លៃណាស់មានសន្តិភាព ដែលនាំឱ្យកម្ពុជាមានការរីកចម្រើន នាំឱ្យមានការចងភ្ជាប់ឡើងវិញរវាងខ្មែរនៅក្រៅប្រទេសជាមួយប្រទេសជាតិ។
លោកបានមានប្រសាសន៍ថា៖ «ការចេញសារគាំទ្រ គឺជាការសំខាន់ណាស់ដើម្បីឱ្យពិភពលោកដឹងថា ខ្មែរនៅទីណាក៏ដោយក៏នាំគ្នាយល់ពីតម្លៃសន្តិភាព និងឱ្យតម្លៃសន្តិភាពនៅក្នុងប្រទេសកំណើតរបស់ខ្លួន។ ស្មារតីនៃការសាមគ្គីគ្នានេះ គឺជាអ្វីដែលមិនអាចកាត់ថ្លៃបានសម្រាប់សុខសន្តិភាព និងប្រទេសជាតិរបស់យើង»។
ក្នុងពិធីនោះដែរលោក ហ៊ុន ម៉ាណែត ក៏លើកឡើងពីការប្រយុទ្ធប្រឆាំងនឹងជំងឺកូវីដ ១៩ កន្លងមកដែលអតីតនាយករដ្ឋមន្ត្រី ហ៊ុន សែន បានប្រឹងប្រែងខ្លាំងណាស់ ទាំងកិច្ចការពារអាយុជីវិតប្រជាពលរដ្ឋ និងការដោះស្រាយបញ្ហាជីវភាពរបស់ប្រជាពលរដ្ឋ ដោយបានចំណាយថវិការង្វង់ប្រមាណ ១ ៤០០ លានដុល្លារអាមេរិក។
លោក ហ៊ុន ម៉ាណែត បាននិយាយផងដែរពាក់ព័ន្ធនឹងដំណើរការបោះឆ្នោតជ្រើសតាំងតំណាងរាស្ត្រឆ្នាំ ២០២៣ ដែលមានគណបក្សនយោបាយចំនួន ២០ និងអ្នកចូលរួមប្រមាណ ៩ លាននាក់។ ក្នុងនោះពលរដ្ឋ ៦ លាន ៤ សែននាក់ ស្មើ ៨២,៣ ភាគរយ បោះឆ្នោតគាំទ្រសម្តេចតេជោ និងគណបក្សប្រជាជនកម្ពុជា។
លោក ហ៊ុន ម៉ាណែត បានថ្លែងថា៖ «លទ្ធផលបោះឆ្នោតបានបង្ហាញច្បាស់ពីដំណើរប្រជាធិបតេយ្យ និងការជឿជាក់ចំពោះការដឹកនាំរបស់សម្តេចតេជោ ហ៊ុន សែន»។
លោកនាយករដ្ឋមន្ត្រី ក៏បានរំលេចឱ្យដឹងទៀតថា គណៈរដ្ឋមន្ត្រីរបស់រាជរដ្ឋាភិបាលថ្មី បានផ្លាស់ប្តូរស្ទើរតែទាំងស្រុង ហើយគណៈរដ្ឋមន្ត្រីបានផ្លាស់ប្តូរ តែមិនមានការផ្លាស់ប្តូរគោលនយោបាយនោះឡើយ។
លោកនាយករដ្ឋមន្ត្រីបញ្ជាក់ថា៖ «ប្រវត្តិសាស្ត្ររបស់កម្ពុជា នៅពេលផ្លាស់ប្តូរមេដឹកនាំ ភាគច្រើនជួបសង្គ្រាម ប៉ុន្តែសម្រាប់ការប្តូរក្រុមដឹកនាំតាមសំឡេងបោះឆ្នោតនៅពេលនេះ គឺដំណើរការរលូន ដែលជាព្រឹត្តិការណ៍ប្រវត្តិសាស្ត្ររបស់កម្ពុជា»។
មានការស្ទង់មតិរបស់អង្គការអន្តរជាតិជំនាញមួយលើការដឹកនាំរបស់រាជរដ្ឋាភិបាលមុនពេលបោះឆ្នោត និងក្រោយបោះឆ្នោត។ មុនបោះឆ្នោតរកឃើញថា ពលរដ្ឋជាង ៧០ ភាគរយ យល់ថារាជរដ្ឋាភិបាលដឹកនាំត្រឹមត្រូវ លុះក្រោយពេលបោះឆ្នោតការយល់ថា ការដឹកនាំរបស់រាជរដ្ឋាភិបាលត្រឹមត្រូវឡើងរហូតដល់ ៨២ ភាគរយ។
លោកហ៊ុន ម៉ាណែត ក្នុងពិធីជួបជាមួយខ្មែរនៅអូស្ត្រាលី និងនូវែលសេឡង់។ រូបថត STPM
លោកបានថ្លែងថា៖ «ប្រជាពលរដ្ឋមានការព្រួយបារម្ភខ្លាចរដ្ឋបាលថ្មី ដឹកនាំគ្រប់គ្រងប្រទេស និងដាក់បទបញ្ជានានាអត់មានការអនុវត្តអី ប៉ុន្តែមិនដូច្នោះទេ រយៈពេលជាង ៦ ខែមកនេះ ពលរដ្ឋបែរជាមានការពេញចិត្ត និងគាំទ្រខ្ពស់ដល់រដ្ឋាភិបាលថ្មីនេះ»។
សូមបញ្ជាក់ដែរថា លោកនាយករដ្ឋមន្ត្រី ហ៊ុន ម៉ាណែត បានដឹកនាំគណៈប្រតិភូជាន់ខ្ពស់កម្ពុជា ចូលរួមកិច្ចប្រជុំកំពូលពិសេសអាស៊ាន-អូស្ត្រាលី ចាប់ពីថ្ងៃទី ១ ដល់ទី ៧ ខែមីនា ឆ្នាំ២០២៤ នៅទីក្រុង មែលប៊ន ប្រទេសអូស្ត្រាលី ដើម្បីពង្រឹងទំនាក់ទំនងឱ្យកាន់តែស៊ីជម្រៅ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី ២៩ ខែកុម្ភៈ ឆ្នាំ ២០២៤ បានឱ្យដឹងថា ការចូលរួមរបស់ភាគីនៃព្រះរាជាណាចក្រកម្ពុជា តបតាមការអញ្ជើញរបស់លោក អេនថូនី អាល់បានី ស៊ី នាយករដ្ឋមន្ត្រីអូស្ត្រាលី ដើម្បីអបអរសាទរខួបអនុស្សាវរីយ៍ លើកទី ៥០ នៃទំនាក់ទំនងដៃគូសន្ទនាអាស៊ាន-អូស្ត្រាលី។
ក្រសួងបានបញ្ជាក់ថា៖ «កិច្ចប្រជុំកំពូលពិសេស នឹងផ្តល់ឱកាសដល់ថ្នាក់ដឹកនាំ កំណត់ទិសដៅអនាគតរួម និងធ្វើឱ្យទំនាក់ទំនងកាន់តែស៊ីជម្រៅ តាមរយៈការអនុវត្តឱ្យបានពេញលេញ និងប្រកបដោយប្រសិទ្ធភាពនូវអាទិភាពសំខាន់ៗ នៃភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-អូស្ត្រាលី»។
ថ្នាក់ដឹកនាំ គ្រោងនឹងអនុម័តសេចក្ដីថ្លែងការណ៍ទីក្រុងម៉ែលប៊ន និងសេចក្តីប្រកាសចក្ខុវិស័យរបស់ថ្នាក់ដឹកនាំអាស៊ាន-អូស្ត្រាលី។ ស្របពេលនៃការចូលរួមកិច្ចប្រជុំកំពូលនេះដែរលោក ហ៊ុន ម៉ាណែត ក៏នឹងមានជំនួបទ្វេភាគី ជាមួយ លោក អេនថូនី អាល់បានីស៊ី និងសមភាគីអាស៊ានមួយចំនួន ដើម្បីពង្រឹងបន្ថែមនូវទំនាក់ទំនងទ្វេភាគីបន្ថែមទៀត។
សូមជម្រាបថា អញ្ជើញអមដំណើរលោកនាយករដ្ឋមន្ត្រី ហ៊ុន ម៉ាណែត និងលោកស្រី ពេជ ចន្ទមុន្នី រួមមាន៖ លោក ស៊ុនចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា,លោក ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា, លោក សុខ ចិន្តសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ និងមន្ត្រីសំខាន់ៗនៃរាជរដ្ឋាភិបាលកម្ពុជា។
ក្នុងអំឡុងពេលចូលរួមកិច្ចប្រជុំកំពូលពិសេសអាស៊ាន-អូស្ត្រាលី លោក ហ៊ុន ម៉ាណែត ក៏នឹងមានជំនួបជាមួយថ្នាក់ដឹកនាំកំពូលប្រទេសជាមិត្តចំនួន ៥ និងទទួលជួបតំណាងក្រុមហ៊ុនអូស្ត្រាលីចំនួន ១១ ផងដែរ៕
