ឡូហ្គោគណបក្សប្រជាជនកម្ពុជា គណបក្សឆន្ទៈខ្មែរ និងគណបក្សកម្លាំងជាតិ។ រូបថត ហ្វេសប៊ុក
ភ្នំពេញៈ គណបក្សនយោបាយចំនួន ៣ គឺគណបក្សប្រជាជនកម្ពុជា គណបក្សឆន្ទៈខ្មែរ និងគណបក្សកម្លាំងជាតិ បានដាក់ពាក្យស្នើសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌហៅកាត់ថា «ក្រុមប្រឹក្សា» អាណត្តិទី៤ ឆ្នាំ ២០២៤ ដែលមានបេក្ខជនឈរឈ្មោះសរុបជិត ១ ម៉ឺននាក់។
សេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី ៣ ខែមីនា បានលើកឡើងថា ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសរើសក្រុមប្រឹក្សារាជធានី-ខេត្ត-ក្រុង-ស្រុក-ខណ្ឌ អាណត្តិទី៤ ឆ្នាំ ២០២៤ នៅថ្ងៃទី ២ មីនា គណៈកម្មការរាជធានី ខេត្តរៀបចំការបោះឆ្នោត (គធ.ខប) បានទទួលពាក្យសុំចុះបញ្ជីបេក្ខជនរបស់គណបក្សចំនួន ៣។
គណបក្សទាំង ៣ រួមមាន គណបក្សប្រជាជនកម្ពុជា បានដាក់ពាក្យស្នើសុំចុះបញ្ជីគ្រប់ទាំង ២៥ រាជធានីខេត្ត ដែលមានសមាជិកពេញសិទ្ធិ និងបម្រុងចំនួន ៨ ៦១៨ រូប, គណបក្សឆន្ទៈខ្មែរ បានដាក់ពាក្យស្នើក្នុងក្រុង ស្រុកចំនួន ៣ លើ ២៥ រាជធានី-ខេត្ត មានបេក្ខជនឈរឈ្មោះទាំងពេញសិទ្ធិ និងបម្រុង សរុប ៧៤៩ រូប។
ចំណែកគណបក្សកម្លាំងជាតិ បានដាក់ពាក្យស្នើសុំចុះបញ្ជីចំនួន ២ រាជធានីខេត្ត លើ ២៥ រាជធានី-ខេត្ត ដែលមានបេក្ខជនឈរឈ្មោះទាំងពេញសិទ្ធិ និងបម្រុងសរុប ៤២៧ នាក់។ បើតាម គ.ជ.ប ផ្អែកតាមបទបញ្ជា និងនីតិវិធីសម្រាប់ការបោះឆ្នោត គធ.ខប ត្រូវពិនិត្យ និងសម្រេចលើពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត ក្នុងរយៈពេលយ៉ាងយូរ ៥ ថ្ងៃ បន្ទាប់ពីថ្ងៃបានទទួលពាក្យស្នើសុំ។
ប្រភពដដែលបន្ថែមថា៖ «ការដាក់ និងការទទួលពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ ២០២៤ មានរយៈពេល ៥ ថ្ងៃ គឺចាប់ពីថ្ងៃទី ២ ដល់ថ្ងៃទី ៦ ខែមីនា ឆ្នាំ ២០២៤»។
លោក គីមសួរ ភីរិទ្ធ ប្រធានក្រុមប្រឹក្សាវិន័យគណបក្ស ឆន្ទៈខ្មែរនៅថ្ងៃទី ៣ ខែមីនា បានថ្លែងថា គណបក្សរបស់លោកក៏នឹងដាក់បញ្ជីបេក្ខជន សម្រាប់ការបោះឆ្នោតជ្រើសរើសក្រុមប្រឹក្សារាជធានី-ខេត្ត-ក្រុង-ស្រុក-ខណ្ឌ អាណត្តិទី៤ ឆ្នាំ ២០២៤ គ្រប់ក្រុងស្រុក របស់រាជធានីខេត្តទាំងអស់ផងដែរ។
លោកថា៖ «សម្រាប់រាជធានី ខេត្តដែលបានរៀបចំគ្រប់គ្រាន់ គណបក្សឆន្ទៈខ្មែរដាក់ហើយ ប៉ុន្តែសម្រាប់រាជធានីខេត្តដែលមិនទាន់រៀបចំឯកសារហើយយើងនៅរៀបចំបន្តទៀត។ ដូច្នេះ គ.ជ.ប កំណត់ឱ្យ ៥ ថ្ងៃនេះមិនជាបញ្ហាទេ ព្រោះគណបក្សបានត្រៀមខ្លួនតាំងពី ២ ខែមុនមកម្ល៉េះ»។ ទោះយ៉ាងណា លោកភីរិទ្ធ មិនទាន់អាចធ្វើអត្ថាធិប្បាយបានទេចំពោះលទ្ធផលបែបណានោះ ប៉ុន្តែជាគោលការណ៍គណបក្សរបស់លោកដាក់ពាក្យចូលរួមការបោះឆ្នោនេះដើម្បីស្វែងរកការតស៊ូមតិ។
ចំណែក លោក ញឿន រ៉ាដែន អ្នកនាំពាក្យគណបក្សហ៊ុនស៊ិនប៉ិច ក៏ថ្លែងដែរថា គណបក្សក៏នឹងដាក់ពាក្យស្នើសុំចុះបញ្ជី និងបេក្ខជនសម្រាប់ការបោះឆ្នោតជ្រើសរើសក្រុមប្រឹក្សានេះផងដែរ។ លោកថា ការដាក់ពាក្យស្នើសុំចុះបញ្ជីរបស់លោកនឹងចាប់ផ្តើមពីថ្ងៃទី ៣ ខែមីនាតែម្តង សម្រាប់ក្រុងស្រុកដែលរៀបចំឯកសាររួចរាល់។
លោក ឌឹម សុវណ្ណារុំ សមាជិក គ.ជ.ប នៅក្នុងកិច្ចប្រជុំជាមួយភាគីពាក់ព័ន្ធនឹងការបោះឆ្នោត នៅថ្ងៃទី ១ ខែមីនា ឆ្នាំ ២០២៤ លើកឡើងថា ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះត្រូវធ្វើឡើងតាមទម្រង់បែបបទលេខ ១០០៨ ដែលកំណត់ដោយ គ.ជ.ប។
លោកថា ទម្រង់បែបបទ (ទ.១០០៨) មានផ្តល់ជូនដោយឥតគិតថ្លៃដែលគណបក្សនយោបាយអាចមកទទួលយកនៅទីស្តីការ គ.ជ.ប លេខាធិការដ្ឋាននៃគណៈកម្មការរាជធានីខេត្តរៀបចំការបោះឆ្នោត (លគធ.ខប) ឬអាចទាញយកពីគេហទំព័ររបស់ គ.ជ.ប www.nec.gov.kh។
លោក ឌឹម សុវណ្ណារុំ បានលើកឡើងថា៖ «ប្រជាពលរដ្ឋខ្មែរទាំង ២ ភេទ ដែលមានបំណងឈរឈ្មោះជាបេក្ខជនសម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី ៤ ត្រូវបំពេញលក្ខខណ្ឌ និងមានលក្ខណសម្បត្តិ រួមមាន សញ្ជាតិខ្មែរពីកំណើត អាយុយ៉ាងតិច ២៥ ឆ្នាំ គិតដល់ថ្ងៃបោះឆ្នោតមានសិទ្ធិបោះឆ្នោត និងមានលក្ខណសម្បត្តិគ្រប់គ្រាន់តាមលក្ខខណ្ឌកំណត់ដោយច្បាប់ស្តីពីការបោះឆ្នោតជ្រើសរើសក្រុមប្រឹក្សា អាណត្តិទី៤ ឆ្នាំ ២០២៤ និងច្បាប់ស្តីពីវិសោធនកម្មនៃច្បាប់នេះ (ច.ប.ក)»។
សូមបញ្ជាក់ថា ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ នឹងប្រព្រឹត្តទៅនៅថ្ងៃទី ២៦ ឧសភា ឆ្នាំ ២០២៤៕
