លោកហ៊ុន ម៉ានី ក្នុងសន្និសីទកាសែតកាលពីថ្ងៃទី៣ខែមីនា។ រូបថត ក្រសួងមុខងារសាធារណៈ
ភ្នំពេញៈ លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងជ្រើសរើសមន្ត្រីរាជការ បានបង្ហាញពីការប្តេជ្ញាចិត្តថា នឹងខិតខំបំពេញការងារក្នុងការដឹកនាំវិស័យមុខងារសាធារណៈឱ្យទទួលបានជោគជ័យ ដោយមិនឱ្យថ្នាក់ដឹកនាំជាន់ខ្ពស់ និងប្រជាពលរដ្ឋមានការខកចិត្តឡើយ។
លោកបានលើកឡើងដូចនេះ ក្នុងពេលថ្លែងប្រាប់អ្នកសារព័ត៌មាន អំឡុងដំណើរការប្រឡងជ្រើសរើសមន្ត្រីរាជការចូលបម្រើការងារក្នុងក្របខ័ណ្ឌអង្គភាពប្រឆាំងអំពើពុករលួយ កាលពីថ្ងៃទី៣ ខែមីនា ឆ្នាំ២០២៤។
លោក ហ៊ុន ម៉ានី បានលើកឡើងថា ជាការពិតណាស់ភាពរីកចម្រើននៃវិស័យមុខងារសាធារណៈ គឺមិនអាចខ្វះបានឡើយពីការចូលរួមចំណែកប្រកបដោយការយកចិត្តទុកដាក់ និងការទទួលខុសត្រូវពីមន្រ្តីគ្រប់ជាន់ថ្នាក់នៃក្រសួងមុខងារសាធារណៈ ហើយលោកនឹងខំបំពេញលើកិច្ចការងារនេះឱ្យមានប្រសិទ្ធភាពគឺមិនចង់ឱ្យថ្នាក់ដឹកនាំជាន់ខ្ពស់ និងប្រជាពលរដ្ឋមានការខកចិត្តឡើយ។
លោកបញ្ជាក់ដូច្នេះថា៖«ប្រាកដណាស់ ជាអ្វីមួយដែលយើងដឹងច្បាស់ ជាបេសកកម្មរបស់យើង ហើយសូមបញ្ជាក់ជាថ្មីម្តងទៀតថា យើងចង់ឃើញវិស័យមុខងារសាធារណៈទទួលបានជោគជ័យ ពីថ្នាក់ដឹកនាំគ្រប់ថ្នាក់នៃក្រសួងមុខងារសាធារណៈ។ ហេតុនេះយើងមានការប្តេជ្ញាចិត្តខ្ពស់ដោយមិនចង់ឃើញថ្នាក់ដឹកនាំជាន់ខ្ពស់ ថ្នាក់ដឹកនាំ និងប្រជាពលរដ្ឋមានការខកចិត្តដោយសារយើងនោះឡើយ»។
ជាមួយគ្នានោះដែរ ក្នុងនាមប្រធានគណៈកម្មការរៀបចំការប្រឡងលោក ហ៊ុន ម៉ានី ក៏បានជំរុញឱ្យបេក្ខជនប្រឡង នានា ពិសេសប្រឡងចូលបម្រើការងារក្នុងក្របខ័ណ្ឌអង្គភាពប្រឆាំងអំពើពុករលួយទាំងអស់ ត្រូវខិតខំប្រឹងប្រែងឱ្យអស់ពីសមត្ថភាព ស្របទៅតាមប្រសាសន៍របស់លោកនាយករដ្ឋមន្រ្តី ហ៊ុន ម៉ាណែត «បើជាប់ ជាប់ដោយជាទីមោទនៈ ហើយបើធ្លាក់ ធ្លាក់ដោយអស់ចិត្ត»។
បន្ថែមពីនេះ លោកក៏បានស្នើឱ្យបេក្ខជនដែលមិនបានទទួលជោគជ័យលើការប្រឡងមិនត្រូវអស់សង្ឃឹម តែត្រូវខិតខំចូលរួមប្រឡងលើកក្រោយទៀត ដើម្បីរួមចំណែកជំរុញវិស័យមុខងារសាធារណៈ។
លោក ហ៊ុន ម៉ានី ក្រៅពីបានប្តេជ្ញាដឹកនាំវិស័យមុខងារសាធារណៈ មិនឱ្យថ្នាក់ដឹកនាំជាន់ខ្ពស់ និងប្រជាពលរដ្ឋមានការខកចិត្តនោះ លោកក៏បានស្នើឱ្យប្រជាពលរដ្ឋរង់ចាំមើល ការអនុវត្តកិច្ចការងាររបស់លោក ហើយលោករំពឹងថា ការចូលរួមរបស់លោកនឹងជួយឱ្យវិស័យមុខងារសាធារណៈកាន់តែមានភាពប្រសើរឡើង។
ក្នុងពេលជាមួយគ្នានោះដែរ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានចាត់ទុកការរៀបចំការប្រឡងចូលបម្រើការងារក្នុងក្របខ័ណ្ឌអង្គភាពប្រឆាំងអំពើពុករលួយនាពេលនេះ ក៏ដូចជាការប្រឡងនៅតាមក្រសួងស្ថាប័ននានា នាពេលកន្លងមក បានប្រែប្រួលដើម្បីទៅរកគុណភាពមួយថ្មីទៀតក្រោមការរៀបចំ និងដឹកនាំដោយក្រសួងមុខងារសាធារណៈ។
លោកថា៖«ក្រោមការដឹកនាំរបស់ក្រសួង ដែលមានស្តង់ដារបស់រាជរដ្ឋាភិបាល គឺយើងចង់ឱ្យរាល់ការប្រឡងទាំងអស់ល្អៗដូចគ្នាដែលកន្លងមកល្អហើយ ក្រសួងខ្លះល្អកម្រិតនេះ ក្រសួងខ្លះល្អកម្រិតនោះ។ អ៊ីចឹងខ្ញុំជឿជាក់ថា ឥឡូវនេះដើម្បីគុណភាពមន្រ្តីរាជការ គឺល្អកម្រិតមួយដូចៗគ្នា មិនអាចឱ្យអ្នកណាល្អជាងអ្នកណាទេ គឺល្អដូចគ្នា ហើយនេះគឺជាការប្រឡងបែបគោលការណ៍ថ្មី»។
ទាក់ទងនឹងរឿងនេះដែរ លោក យង់ ពៅ អគ្គលេខាធិការរាជបណ្ឌិត្យសភាកម្ពុជា បានថ្លែងសាទរចំពោះការចំរៀបការប្រឡងជ្រើសរើសមន្រ្តីរាជការប្រកបដោយភាពច្បាស់លាស់ និងត្រូវនឹងស្ថានភាពរបស់ស្ថាប័ននីមួយៗ។
លោកយល់ថា៖«ដើម្បីកែទម្រង់វិស័យមុខងារសាធារណៈទទួលបានផ្លែផ្កាចំពោះសង្គម ល្គឹកណា មានការផ្តល់ឱកាសប្រកួតប្រជែងសមធម៌ ហ៊ានវះកាត់មន្ត្រីអសកម្មចេញ ហ៊ានផ្តល់គុណសម្បត្តិដល់មន្ត្រីសកម្ម បើកច្រកឱ្យបញ្ញវន្តនានា មានឱកាសចូលបម្រើសង្គម (មិនប្រកាន់វ័យ ភេទ ពណ៌សម្បុរ និងមិនផ្អែកលើគោលការណ៍រឹងត្អឹងសំខាន់សមត្ថភាព និងមនសិការ)លះបង់ជំងឺតួឯក បែងចែកឱ្យច្បាស់រវាងមុខងារមន្ត្រីនយោបាយ និងមុខងារមន្ត្រីបច្ចេកទេស..ជាដើម»។
យ៉ាងណាមិញ លោក យង់ ពៅ អះអាងថា បច្ចុប្បន្នមន្ត្រីរាជការតាមក្រសួងស្ថាប័ន មិនខ្វះច្រើនទេ ខ្វះតែឆន្ទៈ និងឱកាសប្រកួតប្រជែងប៉ុណ្ណោះ៕
