លោក សាន វណ្ណទី រដ្ឋលេខាធិការប្រចាំការ ក្រសួងបរិស្ថាន និងលោក KjellTormodPettersen អគ្គរាជទូតនៃព្រះរាជាណាចក្រន័រវែស ប្រចាំអាស៊ាន រួមនឹងអង្គការដៃគូពាក់ព័ន្ធនានា។ រូបថត ក្រសួងបរិស្ថាន
ក្រសួងបរិស្ថាន នឹងចាប់ផ្តើមអនុវត្តកិច្ចសហប្រតិបត្តិការអាស៊ាន-ន័រវែស ក្នុងការពង្រឹងសមត្ថភាពមូលដ្ឋាន សម្រាប់កាត់បន្ថយការបំពុលដោយប្លាស្ទិកនៅតំបន់អាស៊ានដំណាក់កាលទី២ (ASEANO2) ដែលការអនុវត្តនេះ ស្របទៅនឹងយុទ្ធសាស្ត្រចក្រាវិស័យបរិស្ថានរបស់ក្រសួងបរិស្ថាន។
ការចាប់ផ្ដើមអនុវត្តនេះធ្វើឡើងតាមរយៈកិច្ចប្រជុំមួយ ដែលរៀបចំនៅខេត្តសៀមរាប ក្រោមការដឹកនាំ ដោយលោក សាន វណ្ណទី រដ្ឋលេខាធិការប្រចាំការ ក្រសួងបរិស្ថាន និងលោក KjellTormodPettersenអគ្គរាជទូតនៃព្រះរាជាណាចក្រន័រវែសប្រចាំអាស៊ាន រួមនឹងអង្គការដៃគូពាក់ព័ន្ធនានាផងដែរ។ នេះបើយោងតាមហ្វេសប៊ុករបស់ក្រសួងបរិស្ថាន បានឱ្យដឹងនៅថ្ងៃទី៤ ខែមីនា ឆ្នាំ២០២៤។
លោក សាន វណ្ណទី បានលើកឡើងពីគោលបំណងនៃការរៀបចំកិច្ចប្រជុំនេះឡើង គឺដើម្បីចាប់ផ្តើមអនុវត្តកិច្ចសហប្រតិបត្តិការអាស៊ាន-ន័រវែសក្នុងការពង្រឹងសមត្ថភាពមូលដ្ឋានសម្រាប់កាត់បន្ថយការបំពុលដោយប្លាស្ទិកនៅតំបន់អាស៊ានដំណាក់កាលទី២ (ASEANO 2) ដែលប្រទេសកម្ពុជា និងប្រទេសវៀតណាមត្រូវបានជ្រើសរើសជាទីតាំងអនុវត្ត។
លោកថ្លែងថា៖ «ការចាប់ផ្តើមអនុវត្តកិច្ចសហប្រតិបត្តិការអាស៊ាន-ន័រវែសក្នុងការពង្រឹងសមត្ថភាពមូលដ្ឋានសម្រាប់កាត់បន្ថយការបំពុលដោយប្លាស្ទិកនៅតំបន់អាស៊ាន (ASEANO 2) គឺស្របទៅនឹងអាទិភាពរបស់ក្រសួងបរិស្ថាន ជាពិសេសយុទ្ធសាស្ត្រចក្រាវិស័យបរិស្ថាន២០២៣-២០២៨»។
ទន្ទឺមនេះ លោកក៏បានលើកឡើងពីភាពជោគជ័យរបស់កម្ពុជា ក្នុងកាត់បន្ថយប្រើប្លាស្ទិក តាមរយៈការធ្វើយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ»និង«យុទ្ធនាការផ្ទៃទឹកស្អាត កាត់បន្ថយការបំពុលក្នុងផ្ទៃទឹក ដើម្បីសុខភាពប្រជាជន» ដែលទើបនឹងប្រកាសចាប់ផ្តើមដោយរដ្ឋមន្ត្រីក្រសួងបរិស្ថានកាលពីដើមខែមីនាថ្មីនេះ។
តាមរយៈយុទ្ធនាការទាំងនេះ លោក KjellTormodPettersenក៏បានគាំទ្រ ចំពោះកិច្ចផ្តួចផ្តើមរបស់ក្រសួងបរិស្ថាន និងបានសាទរដល់ការជោគជ័យរបស់ក្រសួងបរិស្ថាន អំពីយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលបានចូលរួមកាត់បន្ថយការបំពុលដោយប្លាស្ទិកនៅប្រទេសកម្ពុជា និងឈានទៅដល់ថ្នាក់តំបន់ផងដែរ។
លោកថ្លែងបញ្ជាក់ថា៖ «ផលប៉ះពាល់នៃថង់ប្លាស្ទិក បានបំពុលដល់បរិស្ថាននៅលើភពផែនដី សំខាន់នៅលើដី ក្នុងដី ក្នុងទឹក ដែលវាត្រូវការពេលវេលាជាច្រើនរយឆ្នាំ ដើម្បីធ្វើការបំបែកសំណល់ប្លាស្ទិក ដែលជាសារធាតុដែលមិនងាយនឹងពុកផុយ ឬរលួយបានដោយងាយនោះទេ»។
លោកបានបន្ថែមថា ដូច្នេះចំណោទបញ្ហាបរិស្ថាននៅលើពិភពលោក បានធ្វើឱ្យមានការបម្រែបម្រួលអាកាសធាតុ និងការបំពុលបរិយាកាសនៅក្នុងតំបន់ ខណៈការបំពុលបរិយាកាសនេះ វាធ្វើឱ្យប្រទេសមួយចំនួនទទួលរងផលប៉ះពាល់ខ្លាំងជាងគេពីការបម្រែបម្រួលអាកាសធាតុ។
ដោយឡែក លោក យុន លីនណេ អភិបាលរងខេត្តសៀមរាបបានលើកឡើងដែរថា ខេត្តសៀមរាប ជាខេត្តសម្បូរទៅដោយធនធានធម្មជាតិ និងបេតិកភណ្ឌវប្បធម៌ ដែលមានប្រាសាទបុរាណដ៏ល្អប្រណីត មានប្រាសាទអង្គរវត្ត ជាដួងព្រលឹងជាតិ ដែលជាបេតិកភណ្ឌពិភពលោក និងតភ្ជាប់ទៅបឹងទឹកសាបដ៏ធំបំផុតនៅអាស៊ីអាគ្នេយ៍។
បន្ថែមពីនេះ លោកថា លក្ខខណ្ឌជីវភូមិសាស្ត្រនៃបឹងទន្លេសាប ក៏មានសារៈសំខាន់ ក្នុងការចិញ្ចឹមបីបាច់ថែរក្សាទេសភាព បរិស្ថាន ដែលមានគុណភាពខ្ពស់ ជំរុញទាំងការអភិវឌ្ឍសេដ្ឋកិច្ចសង្គម និងជីវភាពរស់នៅយូរអង្វែងរបស់សហគមន៍មូលដ្ឋានពេញ១សតវត្សរ៍ផងដែរ៕
