លោក លី ធុជ ក្នុងជំនួបជាមួយលោក Greygory Crowther។ រូបថត CMAA
ភ្នំពេញៈ លោក លី ធុជ ប្រធានអនុសញ្ញាអូតាវ៉ាឆ្នាំ ២០២៤ បាននិងកំពុងបន្តជួបជាមួយនឹងមន្ត្រីពាក់ព័ន្ធនានាដើម្បីស្វែងរកកិច្ចសហប្រតិបត្តិការ និងការគាំទ្រកិច្ចប្រជុំកំពូលសៀមរាបអង្គរ ស្តីពីពិភពលោកមួយដែលគ្មានមីន ដែលកម្ពុជាធ្វើជាប្រធាន និងជាម្ចាស់ផ្ទះសម្រាប់ឆ្នាំ ២០២៤ នេះ។
ក្នុងឱកាសដឹកនាំគណៈប្រតិភូកម្ពុជាបំពេញបេសកកម្មនៅទីក្រុងហ្សឺណែវ ប្រទេសស្វ៊ីស លោក លី ធុជ បានជួបប្រជុំទ្វេភាគីជាមួយលោក Tormod C. Endresen តំណាងស្ថានបេសកកម្មអចិន្រៃ្តយ៍នៃប្រទេសន័រវែសប្រចាំអង្គការសហប្រជាជាតិ និងអង្គការអន្តរជាតិនានា កាលពីថ្ងៃទី ៤ ខែមីនា ដើម្បីស្វែងរកកិច្ចសហប្រតិបត្តិការ និងការគាំទ្ររបស់ប្រទេសន័រវែស។
ក្នុងជំនួបនោះ ភាគីទាំង ២ បានពិភាក្សា និងប្រមូលព័ត៌មានបន្ថែមពីសកម្មភាពដែលប្រទេសន័រវែសអាចចូលរួមគាំទ្រ ឬសកម្មភាពនានាសម្រាប់កិច្ចប្រជុំកំពូលសៀមរាបអង្គរស្តីពីពិភពលោកមួយដែលគ្មានមីន ក្នុងគោលបំណងធានាឱ្យការរួមចំណែកវិភាគទានពីប្រទេសន័រវែសអាចសម្រេចបាននូវគោលដៅរួមសម្រាប់ព្រឹត្តិការណ៍នានានៃកិច្ចប្រជុំអនុសញ្ញាអូតាវ៉ា។
លោក លី ធុជ ថ្លែងថា៖ «ក្នុងនាមសម្តេចបវរធិបតីខ្ញុំសូមថ្លែងអំណរគុណដល់រាជរដ្ឋាភិបាល និងប្រជាជននៃប្រទេសន័រវែសសម្រាប់ការផ្តល់ជំនួយហិរញ្ញវត្ថុក្នុងកម្មវិធីឧបត្ថម្ភ (Sponsorship Program) (កម្មវិធីគាំទ្រប្រទេសដែលមិនមានលទ្ធភាពចូលរួមក្នុងកិច្ចប្រជុំ) និងគាំទ្រដល់ដំណើរការរៀបចំកិច្ចប្រជុំកំពូលសៀមរាបអង្គរ»។
សូមបញ្ជាក់ដែរថា រដ្ឋាភិបាលនិងប្រជាជនន័រវែស តែងតែផ្តល់ការគាំទ្រដល់កិច្ចខិតខំប្រឹងប្រែងរបស់កម្ពុជា ដើម្បីឱ្យកម្ពុជាអាចសម្រេចបានគោលដៅកម្ពុជាគ្មានមីនឆ្នាំ ២០២៥ និងកាត់បន្ថយផលប៉ះពាល់នៃគ្រាប់បែកចង្កោម និងសំណល់ជាតិផ្ទុះនៃសង្គ្រាម។ ជាមួយគ្នានោះអង្គការ NPA គឺជាដៃគូយុទ្ធសាស្ត្រ និងយូរអង្វែងដែលគាំទ្រដល់ការកសាងសមត្ថភាពចាំបាច់របស់អាជ្ញាធរមីន ចាប់តាំងពីឆ្នាំ ២០១៤ មក។
ដោយឡែកនៅថ្ងៃដដែលនោះដែរ លោក លី ធុជ ក៏បានទទួលជួបពិភាក្សាជាមួយ លោក Greygory Crowther នាយកកម្មវិធីនៃអង្គការ MAG ដើម្បីស្វែងរកការគាំទ្រពីអ្នកជំនាញរបស់ MAG លើធាតុចូលសម្រាប់ការពិនិត្យឡើងវិញនៃផែនការសកម្មភាពទីក្រុងអូស្លូឆ្នាំ ២០១៩ និងការរៀបចំផែនការសកម្មភាពសៀមរាបអង្គរផងដែរ។
យោងតាមអាជ្ញាធរមីន ភាគីទាំង ២ ជំរុញឱ្យមានកិច្ចពិភាក្សាបន្តជាមួយដៃគូអភិវឌ្ឍន៍ដទៃទៀត និងតម្រូវឱ្យមានភាសាតែមួយក្នុងការដោះស្រាយបញ្ហាប្រឈមនានាក្នុងការងារសកម្មភាពមីន ដើម្បីឱ្យសម្រេចតាមគោលដៅកំណត់។
ចំណែកក្នុងជំនួបជាមួយនឹងលោក Ioannis GHIKAS តំណាងស្ថានបេសកកម្មអចិន្រៃ្តយ៍នៃប្រទេសក្រិកប្រចាំអង្គការសហប្រជាជាតិ និងអង្គការអន្តរជាតិនានាផងដែរនោះ លោកលី ធុជ បានចូលរួមអបអរសាទរដល់ប្រទេសក្រិកដែលមានដំណើរការវិជ្ជមាន ឆ្ពោះទៅរកការសម្រេចបានគោលដៅតាមមាត្រា ៤ នៃអនុសញ្ញាស្តីពីការបំផ្លាញគ្រាប់មីនដែលរក្សាទុក។
សូមបញ្ជាក់ថា ចាប់តាំងពីប្រទេសក្រិក បានក្លាយជារដ្ឋភាគីនៃអនុសញ្ញាអូតាវ៉ាក្នុងឆ្នាំ ២០០៤ រហូតដល់បច្ចុប្បន្ន ប្រទេសក្រិក គ្មានតំបន់ដែលរងប៉ះពាល់ដោយគ្រាប់មីនទៀតទេ ព្រមទាំងបានបំផ្លាញចោលគ្រាប់មីនក្នុងស្តុកបានចំនួនជាង ១,២ លានគ្រាប់ និងនៅសល់ប្រមាណជាង ៣៤៣ ០០០ គ្រាប់ទៀត។
សូមរំឭកថា លោក លី ធុជ បានដឹកនាំគណៈប្រតិភូទៅបំពេញបេសកកម្មនៅទីក្រុងហ្សឺណែវ ប្រទេសស្វ៊ីស ចាប់ពីថ្ងៃទី ២៧ ខែកុម្ភៈ រហូតដល់ថ្ងៃទី ៧ ខែមីនា ឆ្នាំ ២០២៤៕
