គ.ជ.ប ប្រជុំប្រកាសលទ្ធផល កាលពីថ្ងៃម្សិលមិញ។ រូបថត គ.ជ.ប
ភ្នំពេញៈ ដូចការគ្រោងទុក គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី ៥ ខែមីនា ឆ្នាំ ២០២៤ បានប្រកាសលទ្ធផលផ្លូវការនៃការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ដែលបានប្រព្រឹត្តទៅកាលពីថ្ងៃទី ២៥ ខែកុម្ភៈ នៅតាមណ្ឌលភូមិភាគ ទាំង ៨ នៅទូទាំងប្រទេស បន្ទាប់ពីក្នុងរយៈពេល ៧២ ម៉ោង មិនទទួលបានពាក្យបណ្តឹងតវ៉ាពីគណបក្សនយោបាយ។
សេចក្តីប្រកាសលទ្ធផលផ្លូវការដែលចុះហត្ថលេខាដោយលោក ប្រាជ្ញ ចន្ទ ប្រធាន គ.ជ.ប បានបញ្ជាក់ថា សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ កន្លងមកនេះ គណបក្សប្រជាជនកម្ពុជា ទទួលបានចំនួន ១០ ០៥២ សំឡេង ស្មើនឹង ៥៥ អាសនៈ, គណបក្សឆន្ទៈខ្មែរ ទទួលបាន ១ ៣៩៤ សំឡេងស្មើនឹង ៣ អាសនៈ។ រីឯគណបក្សហ្វុ៊នស៊ិនប៉ិចទទួលបាន ១៩ សំឡេង និងគណបក្សកម្លាំងជាតិ ទទួលបាន ២៣៤ សំឡេងមិនទទួលបានអាសនៈនោះទេ។
ក្រោយការប្រកាសលទ្ធផលផ្លូវការនេះភ្លាម គណបក្សប្រជាជនកម្ពុជា នៅថ្ងៃទី ៥ ខែមីនា បានចេញសេចក្តីថ្លែងការណ៍ ប្រកាស ទទួលយកលទ្ធផលផ្លូវការនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ នេះ និងបានចាត់ទុកលទ្ធផលនៃការបោះឆ្នោតនេះថា បានឆ្លុះបញ្ចាំងទាំងស្រុងពីឆន្ទៈដ៏ថ្លៃថ្លា និងមោះមុតរបស់ប្រជាជនកម្ពុជា នៅទូទាំងប្រទេសក្នុងការថែរក្សាសន្តិភាព និងបន្តជំរុញការអភិវឌ្ឍសេដ្ឋកិច្ច សង្គមដើម្បីលើកស្ទួយជីវភាពរបស់ខ្លួន។
សេចក្តីថ្លែងការណ៍បញ្ជាក់ថា៖ «ជ័យជម្នះនេះ ជាការផ្តល់ឧត្តមភាពថែមទៀតចំពោះការដឹកនាំរបស់គណបក្សប្រជាជនកម្ពុជា ក្នុងការជំរុញអនុវត្តន៍ឱ្យបានសម្រេចជោគជ័យនូវកម្មវិធីនយោបាយរបស់គណបក្សសម្រាប់ការកសាង និងការពារមាតុភូមិ ឆ្នាំ ២០២៣-២០២៨ ដែលបានក្លាយជាកម្មវិធីនយោបាយរបស់រាជរដ្ឋាភិបាលនីតិកាលទី៧»។
គណបក្សប្រជាជនកម្ពុជា ក៏បានវាយតម្លៃខ្ពស់ចំពោះ គជប ដែល «បានបំពេញតួនាទី និងភារកិច្ចរបស់ខ្លួន ប្រកបដោយប្រសិទ្ធភាព និងការទទួលខុសត្រូវខ្ពស់ ដោយប្រកាន់ខ្ជាប់នូវជំហរឯករាជ្យ អព្យាក្រឹតឥតលម្រៀង តម្លាភាព និងយុត្តិធម៌ ធ្វើឱ្យដំណើរការរៀបចំការបោះឆ្នោតនៅគ្រប់ដំណាក់កាលបានប្រព្រឹត្តទៅយ៉ាងល្អស្របតាមរដ្ឋធម្មនុញ្ញ ច្បាប់ បទបញ្ជា នីតិវិធី និងក្រមសីលធម៌សម្រាប់ការបោះឆ្នោត។
គណបក្សប្រជាជនកម្ពុជាប្តេជ្ញាថា៖ «ព្រឹទ្ធសភា នីតិកាលទី៥ ដឹកនាំដោយគណបក្សប្រជាជនកម្ពុជាដែលមាន សម្តេចតេជោ ហ៊ុន សែន ជាប្រធាននឹងបន្តបេសកកម្មជាប្រវត្តិសាស្ត្ររបស់ព្រឹទ្ធសភា ក្នុងស្មារតីគោរពយ៉ាងម៉ឺងម៉ាត់តាមរដ្ឋធម្មនុញ្ញកម្ពុជា ដើម្បីបំពេញរាល់មុខងាររបស់ព្រឹទ្ធសភាប្រកបដោយប្រសិទ្ធភាព»។
ជាមួយគ្នានេះដែរ គណបក្សប្រជាជនកម្ពុជា ក៏បានបញ្ជាក់ជាថ្មីថា គណបក្សនឹងបន្តធ្វើអ្វីៗគ្រប់យ៉ាងក្នុងលទ្ធភាពទាំងអស់របស់ខ្លួនដើម្បីពង្រឹងធ្លុងសាមគ្គីភាព ឯកភាពជាតិ ថែរក្សាសន្តិភាព ស្ថិរភាពនយោបាយសន្តិសុខ និងសណ្តាប់ធ្នាប់សាធារណៈ, ការពារឯករាជ្យ អធិបតេយ្យ និងបូរណភាពទឹកដី, ការពាររបបរាជានិយមអាស្រ័យធម្មនុញ្ញ លើកស្ទួយលទ្ធិប្រជាធិបតេយ្យ និងនីតិរដ្ឋ និងបន្តជំរុញការអភិវឌ្ឍ ប្រទេសជាតិឱ្យកាន់តែរីកចម្រើនឡើង។
លោក គីមសួរ ភីរិទ្ធ ប្រធានក្រុមប្រឹក្សាវិន័យគណបក្សឆន្ទៈខ្មែរមិនអាចទាក់ទងសុំធ្វើអត្ថាធិប្បាយបានទេ នៅថ្ងៃទី ៥ ខែមីនា ប៉ុន្តែយោងតាមសេចក្ដីថ្លែងការណ៍របស់គណបក្សឆន្ទៈខ្មែរកាលពីថ្ងៃទី ២៦ ខែកុម្ភៈ បានបញ្ជាក់ថា ទោះបីគណបក្សឆន្ទៈខ្មែរ មិនទទួលបានលទ្ធផលជាទីគាប់ចិត្តដូចការរំពឹងទុកក្ដី ក៏គណបក្សឆន្ទៈខ្មែរ គោរពឆន្ទៈ និងការសម្រេចចិត្តរបស់សមាជិកក្រុមប្រឹក្សាឃុំ-សង្កាត់ទាំងអស់ ដែលជាអង្គបោះឆ្នោត។
សេចក្តីថ្លែងការណ៍បានបន្ថែមថា៖ «គណបក្សឆន្ទៈខ្មែរ សូមសម្តែងការគោរពដឹងគុណ និងអរគុណចំពោះសមាជិកក្រុមប្រឹក្សាឃុំ-សង្កាត់ ទាំងអស់ដែលបានបោះឆ្នោតគាំទ្រគណបក្សឆន្ទៈខ្មែរ ដែលជាតំណាងតែមួយគត់របស់គណបក្សភ្លើងទៀន នៅក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នេះ»។
គ.ជ.ប ក៏បញ្ជាក់ផងដែរថា ក្នុងរយៈពេល ៧២ ម៉ោង បន្ទាប់ពីការប្រកាសផ្សាយលទ្ធផលបណ្ដោះអាសន្ននៃការបោះឆ្នោត ជ្រើសតាំងសមាជិកព្រឹទ្ធសភានីតិកាលទី៥ ឆ្នាំ ២០២៤ កាលពីថ្ងៃទី ២៩ កុម្ភៈ គជប និងក្រុមប្រឹក្សាធម្មនុញ្ញពុំទទួលបានពាក្យបណ្ដឹងតវ៉ាណាមួយឡើយ។ ដូចនេះ លទ្ធផលបណ្ដោះអាសន្ន នឹងក្លាយទៅជាលទ្ធផលផ្លូវការនៃការបោះឆ្នោត។
គ.ជ.ប បានប្រកាសផ្សាយលទ្ធផលផ្លូវការនៃការបោះឆ្នោត ការបែងចែកអាសនៈ និងការកំណត់បេក្ខជនជាប់ឆ្នោតសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ ២០២៤ នៅថ្ងៃទី ៥ ខែមីនានេះ តាមប្រព័ន្ធផ្សព្វផ្សាយនានាដូចជា តាមទូរទស្សន៍ជាតិកម្ពុជា, វិទ្យុជាតិកម្ពុជា, គេហទំព័រ គជប, កម្មវិធីទូរស័ព្ទដៃ (App), ហ្វេសប៊ុក និងយូធូប (YouTube) របស់គជប៕
