ស្ត្រីជាប្រជាកសិករកំពុងច្រូតស្រូវនៅខេត្តកំពត នាពេលកន្លងមក។ ហុង មិនា
កិច្ចការរបស់ស្ត្រី៖ ពេលវេលាដ៏ស័ក្តិសមក្នុងការទទួលស្គាល់តួនាទីរបស់ស្ត្រីព្រមទាំងបញ្ចូលពួកគេទៅក្នុងការវិនិយោគវិស័យកសិកម្ម!
ទោះបីជាមានការរួមចំណែកសំខាន់ៗជាច្រើនរបស់ស្ត្រីនៅក្នុងប្រព័ន្ធកសិកម្មនៅតំបន់អាស៊ីប៉ាស៊ីហ្វិកក៏ដោយ ក៏ស្ត្រីនៅតែបន្តប្រឈមមុខនឹងឧបសគ្គជាហូរហែនៅឡើយជាពិសេសលទ្ធភាពទទួលបានធនធាន សេវាកម្ម និងការបន្តរើសអើងចំពោះពួកគេនៅតាមខ្សែច្រវ៉ាក់តម្លៃស្បៀង។
ស្របពេលដែលយើងកំពុងប្រមូលផ្តុំគ្នាដើម្បីអបអរទិវានារីអន្តរជាតិ (IWD) នាឆ្នាំនេះ យើងក៏ត្រូវឆ្លៀតយកឱកាសនេះធ្វើសកម្មភាពឱ្យកាន់តែសកម្ម ដើម្បីជួយឱ្យស្ត្រីទទួលបានការទទួលស្គាល់ពេញលេញចំពោះតួនាទីដែលមិនអាចខ្វះបានរបស់ពួកគេនៅក្នុងវិស័យនានាដូចជាវិស័យរោងចក្រ ក្រុមហ៊ុនខ្នាតតូច និងមធ្យម សមាគម និងសហគមន៍ផ្សេងៗ ដែលសុទ្ធសឹងជាអ្នករួមចំណែកក្នុងដំណើរការផលិតអាហារប្រកបដោយជីវជាតិសម្រាប់យើងបរិភោគជារៀងរាល់ថ្ងៃ។
យ៉ាងណាក៏ដោយត្រឹមតែការទទួលស្គាល់និងផ្ដល់តម្លៃនេះនៅមិនទាន់គ្រប់គ្រាន់នោះទេ។ សម្រាប់តំបន់អាស៊ី និងប៉ាស៊ីហ្វិកនៅតែមានតម្រូវការវិនិយោគផ្នែកហិរញ្ញវត្ថុឱ្យកាន់តែច្រើន ដើម្បីជួយបង្កើនសមភាពយេនឌ័រនៅក្នុងប្រព័ន្ធកសិកម្ម។ ការលើកកម្ពស់សមភាពយេនឌ័រនេះនឹងដើរតួយ៉ាងសំខាន់នៅក្នុងបរិវត្តកម្មប្រព័ន្ធកសិកម្ម ហើយឥឡូវនេះកំពុងតែមានសកម្មភាពគ្រប់ទិសទីក្នុងតំបន់។
បរិវត្តកម្មនេះទទួលបានការគាំទ្រពីបណ្ដាប្រទេសជារដ្ឋសមាជិករបស់អង្គការស្បៀង និងកសិកម្មនៃសហប្រជាតិ (FAO) ចំនួន ៤០ នៅឯសន្និសីទថ្នាក់តំបន់អាស៊ី និងប៉ាស៊ីហ្វិករបស់អង្គការស្បៀង និងកសិកម្មនៃសហប្រជាជាតិ (FAO) ដែលទើបតែបានរៀបចំកាលពីពេលថ្មីៗនេះនៅទីក្រុង កូឡុំបូប្រទេសស្រីលង្កា។
ប្រធានបទសម្រាប់ទិវានារីអន្តរជាតិនៅឆ្នាំនេះគឺ «ការវិនិយោគជាមួយស្ត្រី ដើម្បីបង្កើនវឌ្ឍនភាព» ដោយឆ្លើយតបនឹងភាពបន្ទាន់នានា ដោយមិនត្រឹមតែបង្កើនការវិនិយោគប៉ុណ្ណោះទេ ប៉ុន្តែថែមទាំងធានាបានថារាល់ការវិនិយោគទាំងនោះមានភាពល្អប្រសើរដើម្បីបង្កើតបរិយាកាសអំណោយផល និងលទ្ធផលប្រកបដោយនិរន្តរភាពឆ្ពោះទៅរកសមភាពយេនឌ័រ។
ទោះបីជាការវិនិយោគទៅលើការពង្រឹងភាពអង់អាចផ្នែកសេដ្ឋកិច្ចរបស់ស្ត្រីមានលក្ខណៈប្រសើរមួយចំនួនហើយក៏ដោយក៏ការវិនិយោគផ្នែកហិរញ្ញវត្ថុ ជាពិសេសការបង្កើនសម្ទុះសំដៅឆ្ពោះទៅរកសមភាពយេនឌ័រក្នុងវិស័យសេដ្ឋកិច្ចនិងផលិតកម្មគឺនៅតែមិនទាន់មានលក្ខណៈគ្រប់គ្រាន់នៅឡើយ។ ការវិនិយោគទៅលើស្ត្រីនៅមានលក្ខណៈតិចតួច និងមិនអាចរួមចំណែកគ្រប់គ្រាន់ដល់វឌ្ឍនភាពក្នុងការជំរុញការពង្រឹងភាពអង់អាចផ្នែកសេដ្ឋកិច្ចរបស់ស្ត្រីម្យ៉ាងវិញទៀតវានៅតែរារាំងឱកាសរបស់ពួកគេនៅក្នុងប្រព័ន្ធកសិកម្មនៅឡើយ។
យោងតាមទិន្នន័យរបស់អង្គការស្បៀង និងកសិកម្មនៃសហប្រជាជាតិ (FAO) កាលពីឆ្នាំ ២០២៣ បានបង្ហាញថាតាមរយៈការកាត់បន្ថយគម្លាតយេនឌ័រក្នុងផលិតកម្មកសិកម្ម និងគម្លាតប្រាក់ឈ្នួលក្នុងវិស័យការងារនៃប្រព័ន្ធកសិកម្មកន្លងមក ផលិតផលក្នុងស្រុកសរុបរបស់ពិភពលោកកើនឡើងចំនួន ១ ភាគរយ (ជិត ១ ពាន់ពាន់លានដុល្លារ)។ ក្នុងន័យនេះវាក៏នឹងជួយកាត់បន្ថយអសន្តិសុខស្បៀងជាសកលបានប្រហែល ២ ភាគរយ ដោយកាត់បន្ថយចំនួនអ្នករងគ្រោះពីអសន្តិសុខស្បៀងបានរហូតដល់ទៅចំនួន ៤៥ លាននាក់។
ដូច្នេះតើយើងអាចធ្វើអ្វីរួមគ្នាបានខ្លះដើម្បីដោះស្រាយគម្លាតការវិនិយោគហិរញ្ញវត្ថុនេះ? ដើម្បីអាចឆ្លើយទៅនឹងសំណួរនេះបាន រឿងដែលចាំបាច់គឺត្រូវពិនិត្យឱ្យបានហ្មត់ចត់ទៅលើលិខិតុបករណ៍ហិរញ្ញវត្ថុ ដែលមានស្រាប់ និងលិខិតទើបបង្កើតថ្មីព្រមទាំងគោលនយោបាយនានា ដែលពាក់ព័ន្ធ។ ថវិកាឆ្លើយតបយេនឌ័រ (GRB) គឺជាវិធីសាស្ត្រដោះស្រាយដ៏សំខាន់មួយ ប៉ុន្តែរឿងដែលចាំបាច់ គឺការទទួលស្គាល់យុទ្ធសាស្ត្រឱ្យកាន់តែទូលំទូលាយក្នុងការវិនិយោគលើស្ត្រី។
យើងចង់ឱ្យមានសំឡេងចូលរួមពីស្ត្រីឱ្យកាន់តែច្រើន យើងក៏ចង់សិក្សាពីភាពជោគជ័យរបស់ពួកគេនាពេលកន្លងមកព្រមទាំងស្វែងយល់ទៅលើផលជះនៃការពន្លឿនការវិនិយោគ។ ការណ៍នេះនឹងបង្កើតឱកាសកាន់តែប្រសើរសម្រាប់ដៃគូអភិវឌ្ឍន៍រួមទាំងស្ត្រីនៅតាមទីជនបទ និងសហគមន៍ក្នុងការចែករំលែកបទពិសោធន៍ និងចូលរួមជាកម្លាំងបន្ថែមក្នុងការបង្កើតនូវកាលានុវត្តភាពជាក់ស្តែង ដើម្បីឈានទៅសម្រេចឱ្យបានរបៀបវារៈឆ្នាំ ២០៣០ ដែលនិយាយពីសមភាពយេនឌ័រ។
ក្រៅតែពីការដោះស្រាយបញ្ហាគម្លាតយេនឌ័រដែលជារឿងសំខាន់នោះ យើងក៏ផ្តោតទៅលើកិច្ចខិតខំប្រឹងប្រែងទាំងឡាយក្នុងការលើកកម្ពស់ភាពជាអ្នកដឹកនាំ និងការបង្កើនសំឡេងរបស់ស្ត្រី ព្រមទាំងដោះស្រាយបញ្ហាចម្បងៗ ដែលជាឫសគល់នៃវិសមភាពយេនឌ័រដែលកិច្ចការទាំងអស់នេះពិតជាសំខាន់ ដើម្បីអាចធានាបាននូវលទ្ធផលរយៈពេលវែង។
អង្គការស្បៀង និងកសិកម្មនៃសហប្រជាជាតិ (FAO) «ធ្វើសកម្មភាពដើម្បីឱ្យស្របទៅនឹងការសន្យារបស់ខ្លួន» ដើម្បីឱ្យ «សកម្មភាពស្របទៅនឹងការសន្យារបស់ខ្លួន» ថ្មីៗនេះ នៅទីស្នាក់ការកណ្តាលរបស់អង្គការស្បៀង និងកសិកម្មនៃសហប្រជាជាតិ (FAO) នាទីក្រុងរ៉ូម លោកអគ្គនាយកបណ្ឌិត គូ ដុងយូបានប្រកាសពីការបង្កើតការិយាល័យសម្រាប់កិច្ចការយុវជន និងស្ត្រី។ ដើម្បីលើកកម្ពស់ប្រសិទ្ធភាពការងាររបស់គណៈកម្មាធិការស្ត្រី។
ការិយាល័យនេះ គឺជាផ្នែកមួយដ៏សំខាន់ ដែលនឹងផ្ដល់នូវ «បរិយាកាសប្រកបដោយសុវត្ថិភាព» ដើម្បីពិភាក្សាអំពីប្រធានបទដែលពាក់ព័ន្ធនឹងស្ត្រីនៅកន្លែងធ្វើការ ដូចជាបញ្ហាសមភាពយេនឌ័រ ការបៀតបៀនផ្លូវភេទ និងការទទួលបានច្បាប់ឈប់សម្រាកសម្រាប់មាតាបិតា។ ការិយាល័យនេះក៏នឹងជំរុញឱ្យមាននូវការតស៊ូមតិ ការទំនាក់ទំនង នវានុវត្តន៍ និងការផ្សព្វផ្សាយតាមរយៈវេទិកាសន្ទនាជាប្រចាំ ដើម្បីផ្សាភ្ជាប់ទំនាក់ទំនងរបស់ក្រុមការងារស្ត្រីឱ្យកាន់តែមានភាពប្រសើរឡើងនៅជុំវិញពិភពលោក ព្រមទាំងអាចជួយឱ្យស្ត្រីមានឱកាសចែករំលែកបទពិសោធន៍លើប្រធានបទរួមជាក់លាក់ណាមួយ និងអាចរៀនសូត្រពីភាពជោគជ័យនានារបស់អង្គការស្បៀងនិងកសិកម្មនៃសហប្រជាជាតិ (FAO) និងអង្គការដទៃទៀតក្នុងការផ្ដល់ភាពអង់អាចដល់ស្ត្រីទាំងនៅកន្លែងធ្វើការ និងនៅកន្លែងផ្សេងៗទៀត។
យ៉ាងណាមិញវាក៏នឹងជួយពង្រឹងបន្ថែមភាពជាអ្នកដឹកនាំ និងគណនេយ្យភាពរបស់អ្នកគ្រប់គ្រងក្នុងការបញ្ជ្រាបយេនឌ័រ តាមរយៈគំនិតផ្តួចផ្តើម «She Matters» របស់ខ្លួនដែលផ្តោតលើការជំរុញបរិវត្តកម្មភាពជាអ្នកដឹកនាំ ដើម្បីពង្រឹងភាពអង់អាច និងសុខុមាលភាពរបស់បុគ្គលិកជាស្ត្រីនៅគ្រប់កម្រិតក្នុងស្ថាប័ន។
នៅទូទាំងពិភពលោកយើងសង្កេតឃើញថាតែងតែមានការរើសអើងជារឿយៗទៅលើស្ត្រី ដោយគេតែងយល់ថា ស្ត្រីត្រូវទទួលរ៉ាប់រងការមើលថែគ្រួសារដែលធ្វើឱ្យមានវិសមភាពយេនឌ័រកាន់តែធ្ងន់ធ្ងរឡើងនៅក្នុងទីផ្សារការងារ ទាំងជនបទ និងទីក្រុង។ ជាសកលស្ត្រីបានលះបង់ពេលវេលារបស់ខ្លួនប្រមាណ ៣,២ ដងច្រើនជាងការងារដែលបំពេញដោយបុរសទៅលើការមើលថែគ្រួសារដោយមិនទទួលបានប្រាក់ចំណូលទាល់តែសោះ។ប៉ុន្តែនៅតំបន់អាស៊ី និងប៉ាស៊ីហ្វិក សមាមាត្រ គឺបុរស ៤ នាក់ ទល់នឹងវត្តមានរបស់ស្ត្រី ១ នាក់ ដូច្នេះតម្រូវឱ្យមានការទទួលស្គាល់ឱ្យកាន់តែច្រើន ការបន្ធូរបន្ថយ រួមទាំងការបែងចែកការងារមើលថែគ្រួសារប្រកបដោយសមធម៌និងផ្គត់ផ្គង់នូវប្រព័ន្ធមើលថែកាន់តែប្រសើរ ព្រមទាំងជាប្រព័ន្ធដែលអាចស្វែងរកបានពីសំណាក់អ្នកប្រើប្រាស់ផ្សេងៗ។ ដូច្នេះវានឹងជួយជំរុញបរិវត្តកម្មដោយផ្ដល់ការគាំទ្រដល់គ្រួសារនានា ទាំងនៅទីក្រុង ក៏ដូចជាទីជនបទក្នុងន័យលើកកម្ពស់ជីវភាពនិងសុខុមាលភាពរបស់ស្ត្រី។
ប៉ុន្តែយើងត្រូវតែគិតគូរឱ្យបានហ្មត់ចត់បន្ថែមទៀតក្រៅតែពីការជំរុញនិងការគាំទ្រទាំងនេះ។ យើងត្រូវតែវិនិយោគលើជំនាញបច្ចេកទេសនិងភាពជាអ្នកដឹកនាំរបស់ស្ត្រី ដើម្បីគាំទ្រដល់ការពង្រឹងភាពជាសហគ្រិននិងការបង្កើតប្រាក់ចំណូលរបស់ពួកគេ រួមទាំងការបង្កើត និងការពង្រឹងបណ្តាញទំនាក់ទំនង និងវេទិកាសិក្សាដែលមានស្រាប់ផងដែរ។
យុទ្ធសាស្ត្រ និងផែនការសកម្មភាពយេនឌ័ររបស់អង្គការស្បៀង និងកសិកម្មនៃសហប្រជាជាតិ (FAO) សម្រាប់តំបន់អាស៊ី និងប៉ាស៊ីហ្វិកបានកំណត់ពីភាពចាំបាច់ក្នុងការប្រមូលផ្តុំការចូលរួមរបស់បុរស និងស្ត្រី ដើម្បីរួមចំណែកដល់បរិវត្តកម្មកសិកម្មដោយការបែងចែកការទទួលខុសត្រូវរបស់ខ្លួនប្រកបដោយសមធម៌។ ការឆ្លុះបញ្ចាំងនិងការបង្កើតបរិយាកាសសន្ទនាប្រកបដោយបរិយាបន្ន គឺពិតជាសំខាន់ដោយសារតែវាបានផ្ដល់នូវភាពអង់អាចដល់ស្ត្រីនិងជួយបង្កើនភាពរឹងមាំដល់ពួកគេទៅតាមបែបផែនផ្សេងៗ។អង្គការស្បៀង និងកសិកម្មនៃសហប្រជាជាតិ (FAO) ក៏បានផ្ដល់ការគាំទ្រដល់ស្ត្រីតាមរយៈគម្រោងរបស់ខ្លួន មានជាអាទិ៍សាលាស្រែកសិករដែលជាអភិក្រមក្នុងការផ្សាភ្ជាប់ការចូលរួមពីសំណាក់ភាគីបុរស និងស្ត្រីប្រកបដោយបរិយាបន្នរួមជាមួយនឹងសកម្មភាពពាក់ព័ន្ធដទៃទៀតដែលផ្តោតជាសំខាន់ទៅលើស្ត្រី។
អង្គការស្បៀង និងកសិកម្មនៃសហប្រជាជាតិ (FAO) ប្តេជ្ញាសហការយ៉ាងជិតស្និទ្ធជាមួយបណ្តាប្រទេសជាសមាជិក និងដៃគូអភិវឌ្ឍន៍នៅតំបន់អាស៊ីនិងប៉ាស៊ីហ្វិក ដើម្បីសម្រេចបាននិរន្តរភាពបរិវត្តកម្មសមភាពយេនឌ័រក្នុងប្រព័ន្ធកសិកម្ម។
សមភាពយេនឌ័រ គឺជាកិច្ចខិតខំប្រឹងប្រែងរួមរបស់យើងទាំងអស់គ្នា ហើយម្នាក់ៗសុទ្ធតែមានចំណែកក្នុងដំណើរបោះជំហានទៅមុខឆ្ពោះទៅរកការសម្រេចបានសមភាពយេនឌ័រ និងការពង្រឹងភាពអង់អាចរបស់ស្ត្រី និងកុមារី ដែលជាគោលដៅមួយរបស់គោលដៅអភិវឌ្ឍន៍ប្រកបដោយចីរភាព (គោលដៅអភិវឌ្ឍន៍ទី៥)។ ទិវានារីអន្តរជាតិថ្ងៃនេះ គឺមិនត្រឹមតែឆ្លុះបញ្ចាំងពីបញ្ហាប្រឈមនានា ដែលស្ត្រីកំពុងជួបប្រទះប៉ុណ្ណោះទេប៉ុន្តែថែមទាំងបញ្ជាក់ជាថ្មីពីការប្តេជ្ញាចិត្តរបស់យើងចំពោះសកម្មភាពដែលត្រូវអនុវត្តបន្ត។
តោះយើងរួមគ្នាជាធ្លុងមួយបង្កើនសំឡេងរបស់យើងនិងក្លាយជាអ្នកគាំទ្រដ៏សកម្មតាមរយៈ «ការវិនិយោគជាមួយស្ត្រី ដើម្បីបង្កើនវឌ្ឍនភាព» ឆ្ពោះទៅរកបរិវត្តកម្មប្រព័ន្ធកសិកម្មប្រកបដោយនិរន្តរភាព និងសមធម៌៕
ដោយលោកចុង ជីគីម ឧបការីអគ្គនាយក និងជាតំណាងប្រចាំតំបន់អាស៊ីប៉ាស៊ីហ្វិករបស់អង្គការស្បៀង និងកសិកម្មនៃសហប្រជាជាតិ (FAO)
