ជំនួបពិភាក្សារវាងលោក ហ៊ុន សែន និង លោក ថងលុន ស៊ីសូលីត ប្រធានាធិបតីឡាវក្នុងពេលលោកបំពេញទស្សនកិច្ចរយៈពេលពីរថ្ងៃ នៅកម្ពុជាចាប់ពីថ្ងៃទី២៣ ដល់២៤ ខែមេសានេះ។ SHS
លោក ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាបានស្នើទៅប្រមុខរដ្ឋឡាវឲ្យគាំទ្រដល់គម្រោងសាងសង់ «ព្រែកជីកហ្វូណនតេជោ» របស់កម្ពុជា ដោយបញ្ជាក់ថា គម្រោងនេះនឹងមិនបង្កផលប៉ះពាល់ដល់បរិស្ថាន ឬចរន្តទឹកទន្លេមេគង្គនោះទេ។
ការស្នើនេះធ្វើឡើងក្នុងអំឡុងជំនួបពិភាក្សារវាងលោក ហ៊ុន សែន និង លោក ថងលុន ស៊ីសូលីត ប្រធានាធិបតីឡាវក្នុងពេលលោកបំពេញទស្សនកិច្ចរយៈពេលពីរថ្ងៃ នៅកម្ពុជាចាប់ពីថ្ងៃទី២៣ ដល់២៤ ខែមេសានេះ។ នេះបើតាមព័ត៌មាននៅលើប្រព័ន្ធតេឡេក្រាមរបស់លោក ហ៊ុន សែន។
ប្រភពដដែលអះអាងថា៖ «ព្រែកជីកនេះគឺជាការតភ្ជាប់រវាងទន្លេបាសាក់និងសមុទ្ររបស់កម្ពុជា។ ប្រមុខរដ្ឋឡាវក៏បានបង្ហាញការគាំទ្រចំពោះគម្រោងដ៏ធំមួយនេះដែរ»។
.jpg)
គម្រោងព្រែកជីកហ្វូណនតេជោ មានប្រវែង១៨០គីឡូម៉ែត្រ ដែលនឹងតភ្ជាប់ព្រែកតាកែវនៃប្រព័ន្ធទន្លេមេគង្គទៅកាន់ព្រែកតាឯក និងព្រែកតាហ៊ីងនៃប្រព័ន្ធទន្លេបាសាក់ និងបន្តទៅកាន់ខេត្តកែប ដោយឆ្លងកាត់ខេត្តកណ្ដាល តាកែវ និងកំពត។
គម្រោងនេះមានទ្វារទឹកចំនួន៣ ស្ពានចំនួន១១ និងផ្លូវប្រវែង ២០៨គីឡូម៉ែត្រនៅអមសងខាងនៃព្រែកជីក។ គម្រោងនេះនឹងត្រូវចំណាយទឹកប្រាក់ប្រមាណ ១.៧ពាន់លានដុល្លារ និងរយៈពេលសាងសង់៤ឆ្នាំ។
កាលពីខែមីនា លោក ហ៊ុន សែន ក៏បានស្នើសុំការគាំទ្រចំពោះគម្រោងនេះពីសំណាក់ភាគីចិនផងដែរ នៅពេលលោកជួបពិភាក្សាជាមួយលោក Zhao Leji ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិននៅខេត្តហៃណាន នៅពេលលោកចូលរួមវេទិកាបូអាវប្រចាំឆ្នាំ២០២៤។
សារព័ត៌មានជាច្រើនចុះផ្សាយអំពីក្ដីបារម្ភពាក់ព័ន្ធទៅនឹងផលប៉ះពាល់ទៅលើលំហូរទឹកទន្លេមេគង្គ ជាពិសេសនៅប្រទេសវៀតណាមដែលស្ថិតនៅលើដងទន្លេមេគង្គផ្នែកខាងក្រោម។
ការគាំទ្ររបស់ប្រធានាធិបតីនៃប្រទេសឡាវដែលជាប្រទេសសមាជិកនៃគណៈកម្មការទន្លេមេគង្គអាចនឹងជួយកាត់បន្ថយការបារម្ភអំពីបញ្ហាបរិស្ថានបង្កដោយគម្រោងនេះ៕
