ភ្នំពេញ៖ ក្នុងការសម្រេចបាននូវការផ្គត់ផ្គង់ទឹកស្អាតពេញលេញ រដ្ឋាករទឹកស្វយ័តក្រុងភ្នំពេញ (PPWSA) បានប្រារព្ធពិធីសម្ពោធប្រព័ន្ធប្រព្រឹត្ដិកម្មទឹកស្អាតបាក់ខែងដំណាក់កាលទី ២ និងការបើកការដ្ឋានសាងសង់ដំណាក់កាលទី ៣។
កម្មវិធីសម្ពោធកាលពីថ្ងៃទី ២៥ ខែមិថុនា ក្រោមអធិបតីភាពឧបនាយករដ្ឋមន្ត្រី លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបង្ហាញពីជំហានក្នុងការធានាឱ្យមានការប្រើប្រាស់ទឹកប្រកបដោយនិរន្តរភាព និងសុវត្ថិភាព។
លោក ព័ន្ធមុនីរ័ត្ន បានថ្លែងថា៖ «រោងចក្រប្រព្រឹត្តកម្មទឹកស្អាតបាក់ខែង ជំហានទី ២ ដែលត្រូវបានសម្ពោធដាក់ឱ្យដំណើរការជាផ្លូវការនាពេលនេះ មានសមត្ថភាពផលិតទឹកស្អាត បានចំនួនប្រមាណ ១៩ ម៉ឺន ៥ ពាន់ម៉ែត្រគូប បន្ថែមទៀតក្នុងមួយថ្ងៃ។
រដ្ឋាករទឹកស្វយ័តក្រុងភ្នំពេញ អាចផលិតទឹកស្អាតបាន ចំនួនប្រមាណ ៩៨២០០០ ម៉ែត្រគូបក្នុងមួយថ្ងៃ ដែលបរិមាណនេះ អាចឆ្លើយតបទៅនឹងតម្រូវការបច្ចុប្បន្នរបស់ប្រជាពលរដ្ឋនៅក្នុងរាជធានីភ្នំពេញ និង ក្រុងតាខ្មៅនៃខេត្តកណ្តាល។
លោកបានបន្ដថា៖ «ខ្ញុំសូមប្រកាសថា ការដាក់ឱ្យដំណើរការនូវរោងចក្រប្រព្រឹត្តិកម្មទឹកស្អាត ជំហានទី ២ នាពេលនេះ គឺជាការបិទបញ្ចប់ទាំងស្រុងនូវបញ្ហាកង្វះទឹកស្អាត នៃផ្ទៃសេវាគ្របដណ្តប់របស់រដ្ឋាករទឹកស្វយ័តក្រុងភ្នំពេញ ដែលធ្លាប់បានកើតមានដោយអន្លើ នាពេលកន្លងទៅ នៅក្នុងភូមិសាស្ត្រខ្លះនៃរាជធានីភ្នំពេញ និងក្រុងតាខ្មៅនៃខេត្តកណ្តាល»។
ការបញ្ចប់ដំណាក់កាលនេះ គឺជាចំណុចសំខាន់មួយនៅក្នុងគម្រោងហេដ្ឋារចនាសម្ព័ន្ធទឹកស្អាតដ៏ធំបំផុតរបស់កម្ពុជា ប្រើទុនវិនិយោគចំនួន ១៤៨,២ លានដុល្លារ ដែលផ្តល់ហិរញ្ញប្បទានជាចម្បងតាមរយៈប្រាក់កម្ចីចំនួន ១១៤,៥ លានដុល្លារពីទីភ្នាក់ងារអភិវឌ្ឍន៍បារាំង (AFD)។
ពិធីបើកការដ្ឋានសាងសង់ដំណាក់កាលទី ៣ ដែលបានដំណើរការទន្ទឹមនឹងការសម្ពោធនេះ ព្យាករណ៍ថានឹងកើនឡើងបន្ថែមទៀតនូវសមត្ថភាព ១៩៥០០០ម៉ែត្រគូបទៀតក្នុងមួយថ្ងៃ។
លោក ព័ន្ធមុនីរ័ត្ន បានថ្លែងថា គម្រោងនេះត្រូវបានប៉ាន់ប្រមាណថានឹងចំណាយអស់ ២៥៧ លានដុល្លារ ដែលផ្តល់មូលនិធិដោយប្រាក់កម្ចី និងជំនួយចម្រុះ រួមទាំងប្រាក់កម្ចីចំនួន ២១០ លានដុល្លារពី AFD និងជំនួយចំនួន ១២ លានដុល្លារពីសហភាពអឺរ៉ុប ហើយគ្រោងនឹងបញ្ចប់នៅត្រីមាសទីបីនៃឆ្នាំ ២០២៧។
រោងចក្រប្រព្រឹត្ដិកម្មទឹកស្អាតបាក់ខែងនេះដើរតួនាទីយ៉ាងសំខាន់ក្នុងការបំពេញតម្រូវការទឹកដែលបានព្យាករណ៍ទុកចំនួន ១,៨ លានម៉ែត្រគូបក្នុងមួយថ្ងៃនៅឆ្នាំ២០៣០ ដូចដែលបានគូសបញ្ជាក់នៅក្នុងផែនការមេទីបីដែលបានធ្វើបច្ចុប្បន្នភាព (២០២១-២០៣០)។
លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) បានលើកឡើងពីកិច្ចខិតខំប្រឹងប្រែងជាបន្តបន្ទាប់របស់រដ្ឋាភិបាលក្នុងការលើកកម្ពស់ការគ្រប់គ្រង និងអភិវឌ្ឍន៍វិស័យទឹកស្អាត។
លោកបានឱ្យដឹងថា៖ «រាជរដ្ឋាភិបាលកម្ពុជាបានបន្តតួនាទីយុទ្ធសាស្ត្ររបស់ខ្លួនក្នុងការពង្រឹងការគ្រប់គ្រង និងអភិវឌ្ឍន៍វិស័យទឹកស្អាត ដោយមានការចូលរួមពីប្រតិបត្តិករទឹកឯកជន ដើម្បីបំពេញតម្រូវការប្រចាំថ្ងៃសម្រាប់គ្រួសារ និងគាំទ្រវិស័យអាទិភា ពដូចជា តំបន់ឧស្សាហកម្ម ចង្កោមសហគ្រាសធុនតូច និងមធ្យម តំបន់សេដ្ឋកិច្ចពិសេស និងប៉ូលសេដ្ឋកិច្ច ផ្តល់ឱកាសការងារ និងជំរុញកំណើនសេដ្ឋកិច្ច»។
ស្ថិតិពីក្រសួង MISTI បានបង្ហាញថា ការផ្គត់ផ្គង់ទឹកកើនឡើង ៣២ភាគរយពីឆ្នាំ២០១៨ ដល់ឆ្នាំ២០២៣ ដោយ PPWSA ផលិតទឹកស្អាតបានប្រមាណ ២៧៩ លានម៉ែត្រគូបក្នុងឆ្នាំចុងក្រោយនេះ ដែលស្មើនឹង ៦០ភាគរយនៃចំនួនសរុបទូទាំងប្រទេស។
រោងចក្រប្រព្រឹត្តិកម្មទឹកបាក់ខែងទាំងបីប្រើប្រាស់ទុនវិនិយោគរួមគ្នាចំនួន ៦៦០ លានដុល្លារ ដែលបង្ហាញពីការប្តេជ្ញាចិត្តចំពោះនិរន្តរភាពយូរអង្វែង និងភាពធន់នៅក្នុងហេដ្ឋារចនាសម្ព័ន្ធផ្គត់ផ្គង់ទឹករបស់កម្ពុជា៕