ភ្ញៀវទេសចរចូលមកទស្សនាប្រាសាទអង្គរវត្ត កាលពីថ្ងៃទី ២១ ខែមករា ឆ្នាំ ២០២៤។ Post Staff
ភ្នំពេញៈ មន្ត្រីជាន់ខ្ពស់អន្តោប្រវេសន៍លើកឡើងថា ក្នុងរយៈពេល ៥ខែដើមឆ្នាំ ២០២៤ អ្នកដំណើរបរទេសដែលបានធ្វើដំណើរចូលមកប្រទេសកម្ពុជាមានជាង ២លាននាក់ កើនឡើងជិត ៤០ភាគរយ បើធៀបនឹងរយៈពេលដូចគ្នាកាលពីឆ្នាំ២០២៣។
លោក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានថ្លែងថា៖ «អ្នកដំណើរចូលចេញនៅក្នុងប្រទេសកម្ពុជារបស់យើងមានការកើនឡើង ៥ខែដើមឆ្នាំនេះគឺយើងមានអ្នកដំណើរជាលក្ខណៈអន្តរជាតិជាង ២លាននាក់។ ក្នុងនោះ បើយើងរាប់ថាជាទេសចរណ៍មានដល់ ១,៧លាននាក់...។ យើងមានការកើនឡើងជិត ៤០ភាគរយ បើប្រៀបធៀបជាមួយនឹងឆ្នាំ ២០២៣ ៥ខែដើមឆ្នាំដូចគ្នានេះ»។
ក្នុងកិច្ចសម្ភាសន៍ជាមួយស្ថានីយទូរទស្សន៍មហាផ្ទៃដែលផ្សាយនាថ្ងៃទី២៦ មិថុនា លោកបានកត់សម្គាល់ពីការកើនឡើងច្រើននៃទេសចរថៃ និងវៀតណាមក្នុងរយៈពេលនេះ។ ប៉ុន្តែ ទេសចរថៃភាគច្រើនចូលមកកម្ពុជានៅត្រឹមព្រំដែន។
.jpg)
លោក សុខ វាសនា ថ្លែងថា៖ «យើងក៏នៅតែរាប់គាត់ [ជនជាតិថៃ] ជាទេសចរដោយសារតែគាត់ចូលមកប្រទេសកម្ពុជាយើង ចេញចូលប៉ុន្មានថ្ងៃក៏ដោយ ក៏យើងរាប់ជាទេសចរ។ បន្ថែមលើនោះ គឺគាត់គ្រាន់តែថាទេសចរមួយចំនួនធំគាត់នៅត្រឹមព្រំដែន ហើយយើងបានដឹងថាមានការចូលមកលេងត្រឹមព្រំដែននេះគឺច្រើន»។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា សាទរចំពោះចំនួនកើនឡើងនេះ បើប្រៀបធៀបនឹងក្រោយជំងឺកូវីដ ១៩ ប៉ុន្តែបើប្រៀបធៀបនឹងមុនជំងឺកូវីដ ១៩ ចំនួននេះនៅមានបញ្ហានៅឡើយទេ។
លោកសង្ឃឹមថា រាជរដ្ឋាភិបាល ក្រសួងទេសចរណ៍ ក្រសួងពាក់ព័ន្ធផ្សេងៗ និងក្រសួងដែលពាក់ព័ន្ធនឹងមុខរបរផ្សេងៗទៀតនឹង «មូរដៃអាវ» ធ្វើការបន្ថែមទៀតដើម្បីស្រោចស្រង់វិស័យទេសចរណ៍កម្ពុជា។
លោកប្រាប់ភ្នំពេញប៉ុស្តិ៍ថា៖ «ប្រសិនបើយើងប្រៀបធៀបនឹងអ្នកទេសចរណ៍ទៅនឹងឆ្នាំចាស់ ដែលទើបរួចផុតពីកូវីដ យើងឃើញថា វាកើនអ៊ីចឹងហើយ ក៏ប៉ុន្តែបើយើងធៀបនឹងមុនកូវីដ គឺយើងនៅឆ្ងាយច្រើន»។
លោក យង់ ពៅ ថ្លែងថា៖ «ម្យ៉ាងទៀត នៅតាមបណ្ដាខេត្តគោលដៅ ខេត្តសៀមរាបក្ដី ខេត្តព្រះសីហនុក្ដី និងខេត្តផ្សេងៗទៀត ដែលជាគោលដៅទេសចរណ៍សំខាន់ៗ ហើយខ្លាំងជាងគេហ្នឹងគឺសៀមរាបរងគ្រោះខ្លាំងជាងគេ គឺនៅមានអាជីវកម្មជាច្រើនត្រូវបានបិទទ្វារ មិនទាន់បើកទេ។ សណ្ឋាគារ ផ្ទះសំណាក់ក៏មិនទាន់បើកទ្វារដែរ»។
លោកបន្ថែមថា សណ្ឋាគារខ្លះដែលបានបើកទ្វារហើយ ក៏ហៀបនឹងចាំបិទទ្វារទៅទៀតដែរ ដោយសារតែស្ថានភាពធ្ងន់ធ្ងរនៅឡើយ។ លោកថា៖ «បើអ៊ីចឹង នៅមិនទាន់អាចស្រោចស្រង់បាន អាចរស់រានមានជីវិតបានទៅលើអាជីវកម្មហ្នឹង អាចធានាបាននូវស្ថិរភាពនៅឡើយទេ»។
បើតាមលោក សុខ វាសនា ក្នុងរយៈពេល ១០ឆ្នាំមកនេះ បន្ទាប់ពីបង្កើតអគ្គនាយកដ្ឋានអន្តោប្រវេសន៍ ប្រព័ន្ធបច្ចេកវិទ្យាត្រូវបានកសាងឡើងដើម្បីបម្រើដល់ការគ្រប់គ្រងជនអន្តោប្រវេសន៍ឱ្យមានប្រសិទ្ធភាព ដោយគ្រប់គ្រងដំណើរចេញចូលជនបរទេសដើម្បីឱ្យស្របទៅតាមស្ថានភាពបច្ចុប្បន្ន ក៏ដូចជាប្រទេសនានានៅក្នុងតំបន់ និងនៅក្រៅតំបន់ផងដែរ។
លោក សុខ វាសនា ថ្លែងថា៖ «មន្ត្រីរបស់យើងទាំងអស់គឺត្រូវតែគ្រប់គ្រងលើជនបរទេសគ្រប់ប្រភេទដែលចូលចេញ ស្នាក់នៅ ឆ្លងកាត់ក៏យើងគ្រប់គ្រងដែរ ហើយនិងប្រកបរបរនៅក្នុងប្រទេសកម្ពុជាគឺជាការមួយដែលយើងត្រូវតែគ្រប់គ្រងឱ្យបាន និងកត់ត្រាឱ្យច្បាស់លាស់នៅក្នុងទិន្នន័យដើម្បីឆ្ពោះទៅការការពារសន្តិសុខ សណ្ដាប់ធ្នាប់សាធារណៈរបស់យើង»។
លោកបន្ថែមថា មុនបង្កើតអគ្គនាយកដ្ឋានអន្តោប្រវេសន៍ មន្ត្រីអន្តោប្រវេសន៍មានជាង ១ ២០០នាក់ ប៉ុន្តែក្រោយពីបង្កើតអគ្គនាយកដ្ឋាននេះក្នុងឆ្នាំ ២០១៤ មកពេលនេះមានមន្ត្រីជាង ៣ ៧០០នាក់។ ក្នុងរយៈពេល ១០ឆ្នាំមកនេះ អគ្គនាយកដ្ឋាននេះបានធ្វើការបណ្ដុះបណ្ដាល និងអភិវឌ្ឍសមត្ថភាពមន្ត្រីរបស់ខ្លួនបានប្រមាណ៨០ភាគរយ។
របាយការណ៍អគ្គនាយកដ្ឋានអន្តោប្រវេសន៍បានឱ្យដឹងថា កាលពីថ្ងៃទី១៩ ខែមិថុនា ជនជាតិវៀតណាមចំនួន ៣៣ នាក់ត្រូវបានបណ្ដេញចេញពីប្រទេសកម្ពុជា ពាក់ព័ន្ធករណីលួចឆ្លងដែនខុសច្បាប់ លួចស្នាក់នៅនិងធ្វើការងារខុសច្បាប់ គ្មានលិខិតឆ្លងដែន និងបទល្មើសគ្រឿងញៀនដែលបានប្រព្រឹត្តនៅប្រទេសវៀតណាម៕
