លោក វ៉ាង វិនពីន (Wang Wenbin) ឯកអគ្គរដ្ឋទូតចិនដែលទើបតែងតាំងថ្មីប្រចាំកម្ពុជា (ឆ្វេង) និងលោក ហ៊ុន សែន ប្រធានព្រឹទ្ធសភា ចាប់ដៃគ្នាក្នុងជំនួបថ្ងៃទី១៨ ខែកក្កដា នៅរាជធានីភ្នំពេញ។ ហ្វេសប៊ុកលោក ហ៊ុន សែន
ភ្នំពេញៈ លោក ហ៊ុន សែន ប្រធានព្រឹទ្ធសភាបន្តស្នើឱ្យចិនបន្តគាំទ្រកម្ពុជាជាបន្តទៀតលើការអភិវឌ្ឍគ្រប់វិស័យ ដោយលោកបានបញ្ជាក់សារជាថ្មីនូវជំហររបស់កម្ពុជាក្នុងការប្រកាន់ខ្ជាប់នូវនយោបាយចិនតែមួយ។
លោកស្នើដូច្នេះក្នុងជំនួបថ្ងៃទី១៨ ខែកក្កដាជាមួយលោក វ៉ាង វិនពីន (Wang Wenbin) ឯកអគ្គរដ្ឋទូតចិនដែលទើបតែងតាំងថ្មីប្រចាំកម្ពុជានៅរាជធានីភ្នំពេញ។
លោក ហ៊ុន សែន ប្រាប់លោក Wang ថា ក្នុងនាមជាប្រធានគណបក្សប្រជាជនកម្ពុជា លោកនឹងស្ថិតនៅយូរអង្វែង ហើយបើទោះបីជាមានការផ្លាស់ប្ដូរនាយករដ្ឋមន្ត្រីក៏ដោយ ក៏ជំហររបស់កម្ពុជាជាមួយចិនពុំមានការផ្លាស់ប្ដូរនោះទេ។
សេចក្តីប្រកាសព័ត៌មានថ្ងៃទី១៨ កក្កដា បង្ហោះក្នុងបណ្តាញសង្គមលោក ហ៊ុន សែន បានឱ្យដឹងថា៖ «សម្តេចតេជោបានស្នើឱ្យមិត្តចិនបន្តការគាំទ្រកម្ពុជាជាបន្តទៀតលើការអភិវឌ្ឍគ្រប់វិស័យ។ សម្តេចតេជោ ក៏បានរំឭកពីជំហររបស់កម្ពុជាក្នុងការប្រកាន់ខ្ជាប់នូវនយោបាយចិនតែមួយ ហើយចាត់ទុកបញ្ហាហុងកុង តៃវ៉ាន់ ទីបេ និងស៊ីនជាំងជាបញ្ហាផ្ទៃក្នុងរបស់ចិន»។
សេចក្តីប្រកាសព័ត៌មានបានដកស្រង់សម្តីលោក Wang ថា លោក ហ៊ុន សែន ជាមិត្តចាស់ដ៏ពិតប្រាកដរបស់ចិនដែលបានគាំទ្រគ្នាទៅវិញទៅមក។ លោកក៏បានអរគុណលោក ហ៊ុន សែន ដែលបានទៅទស្សនកិច្ចនៅប្រទេសចិន អំឡុងពេលដែលមានការផ្ទុះកូវីដ១៩។
លោក Wang ត្រូវបានស្រង់សម្តីថា ទស្សនកិច្ចនេះបានធ្វើឱ្យប្រជាជនចិន និងពិភពលោកមានការភ្ញាក់ផ្អើល និងចាប់អារម្មណ៍យ៉ាងខ្លាំង ហើយបានចាត់ទុកថា លោក ហ៊ុន សែន ជាមិត្តល្អសម្រាប់ប្រជាជនចិន ដែលគាំទ្រគ្នាក្នុងគ្រាមានអាសន្ន។
លោកថា៖«ដូចនេះ សុខទុក្ខរបស់កម្ពុជា គឺជាសុខទុក្ខរបស់ប្រទេសចិនដូចគ្នា»។
ក្នុងអាណត្តិការទូតរបស់លោកនៅកម្ពុជា លោក Wang បានបេ្តជ្ញាពង្រឹងនិងពង្រីកបន្ថែមទៀតនូវទំនាក់ទំនងសេដ្ឋកិច្ច-សង្គម, សន្តិសុខ-យោធា, និងទំនាក់ទំនងរវាងប្រជាជននិងប្រជាជន ឱ្យកាន់តែប្រសើរឡើងមួយកម្រិតទៀត។
លោកក៏បានអញ្ជើញលោក ហ៊ុន សែន ទៅបំពេញទស្សនកិច្ចនៅប្រទេសចិន ក្នុងពេលវេលាសមស្របណាមួយនាពេលខាងមុខ។
លោក ហ៊ុន សែន បានលើកឡើងពីសារៈសំខាន់ «មិនអាចខ្វះបាន» នៃទំនុកចិត្តនិងការគោរពឱ្យតម្លៃគ្នាទៅវិញទៅមក ក្នុងការវិវត្តនៃទំនាក់ទំនងរវាង កម្ពុជា-ចិន ពីដៃគូយុទ្ធសាស្ត្រ ទៅជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប ដើម្បីរួមគ្នាកសាងសហគមន៍ជោគវាសនារួម។
លោកថ្លែងថា៖ «កម្ពុជាបានរក្សាចំណងមិត្តភាពជាប្រពៃណីដ៏ល្អនេះតាំងពីថ្នាក់ដឹកនាំជំនាន់មុន ហើយថ្នាក់ថ្នមថែរក្សាទំនាក់ទំនងនេះឱ្យមានភាពរឹងមាំជារៀងរហូតមក។ ទំនាក់ទំនងជាប្រវត្តិសាស្ត្រ រវាងប្រទេសទាំងពីរ តម្រូវឱ្យប្រទេសយើងទាំងពីរនៅតែជាដៃគូដ៏ស្មោះត្រង់ជាមួយគ្នា»។
លោក ហ៊ុន សែន បានរំឭកថា ទស្សនកិច្ចរបស់លោកទៅកាន់ប្រទេសចិន នៅពេលដែលផ្ទុះខ្លាំងនូវជំងឺកូវីដ១៩ ជាការបង្ហាញពីសាមគ្គីភាពចំពោះប្រជាជនកម្ពុជា ជាមួយប្រជាជនចិនក្នុងគ្រាដ៏លំបាក និងជាការលើកទឹកចិត្តចំពោះនិស្សិតកម្ពុជាដែលកំពុងស្នាក់នៅ និងបន្តការសិក្សានៅប្រទេសចិន។
លោកបានអរគុណដល់ប្រទេសចិនដែលបានផ្ដល់នូវវ៉ាក់សាំងកូវីដ១៩ មកដល់កម្ពុជាជាបន្តបន្ទាប់៕
