លោក Sanui Kazumasa តំណាង JICA ប្រចាំកម្ពុជា (ឆ្វេង) និងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ចាប់ដៃគ្នាក្រោយចុះហត្ថលេខាលើកិច្ចព្រមព្រៀងផ្តល់ជំនួយ និងកម្ចី។ Supplied
រដ្ឋាភិបាលជប៉ុនផ្តល់ជំនួយឥតសំណង និងកម្ចីដល់កម្ពុជាប្រមាណ៥៧លានដុល្លារសម្រាប់គម្រោងអាហារូបករណ៍អភិវឌ្ឍន៍ធនធានមនុស្ស (JDS) និងគម្រោងធ្វើឱ្យប្រសើរឡើងកំណាត់ផ្លូវជាតិលេខ៥ជំហានទី៣ ដែលតភ្ជាប់ពីធ្លាម្អម ស្ថិតក្នុងខេត្តពោធិ៍សាត់ ទៅកាន់ខេត្តបាត់ដំបង និងតភ្ជាប់ពីក្រុងសិរីសោភ័ណ ខេត្តបន្ទាយមានជ័យ ទៅក្រុងប៉ោយប៉ែត ដែលជាប់ព្រំដែនថៃ។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Sanui Kazumasa តំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំកម្ពុជាបានចុះហត្ថលេខាលើកិច្ចព្រមព្រៀងផ្តល់ជំនួយ និងកម្ចីនេះនៅថ្ងៃទី ១៩ ខែកក្កដា នៅរាជធានីភ្នំពេញ។
គម្រោងអាហារូបករណ៍ប្រមាណ២,៥លានដុល្លារមានគោលបំណងគាំទ្រដល់ការអភិវឌ្ឍធនធានមនុស្ស ដោយផ្តល់ឱកាសបន្ថែមទៀតដល់មន្ត្រីរាជការ ជាពិសេសដើម្បីពង្រឹងទំនាក់ទំនងទ្វេភាគី រវាង ប្រទេសទាំងពីរ តាមរយៈការទំនាក់ទំនង សកម្មភាពសិក្សា និងសង្គម និងបទពិសោធន៍នៅប្រទេសជប៉ុន។
សេចក្តីប្រកាសព័ត៌មានរួមថ្ងៃទី១៩ កក្កដា នៃស្ថាប័នទាំងពីរបញ្ជាក់ថា៖ «តាមរយៈកិច្ចព្រមព្រៀងហិរញ្ញប្បទានឥតសំណងថ្មីនេះ ក្រោមកម្មវិធី JDS មន្ត្រីរាជការសរុបចំនួន២៦រូបនឹងទទួលបានឱកាសទៅសិក្សានៅប្រទេសជប៉ុន។ ក្នុងនោះ២៤រូបនឹងត្រូវបានជ្រើសរើសសម្រាប់កម្មវិធីសិក្សា ថ្នាក់អនុបណ្ឌិត និង២រូបទៀតសម្រាប់កម្មវិធីសិក្សាថ្នាក់បណ្ឌិត»។
សេចក្តីប្រកាសព័ត៌មានបានឱ្យដឹងថា តាមរយៈកម្មវិធី JDS នេះ គិតចាប់ពីឆ្នាំ ២០០០ មក មន្ត្រីរាជការកម្ពុជាប្រមាណ៥៣០នាក់បានទទួលអាហារូបករណ៍ថ្នាក់អនុបណ្ឌិត និងថ្នាក់បណ្ឌិតនៅប្រទេសជប៉ុន។
សេចក្តីប្រកាសព័ត៌មានបន្ថែមថា កម្ចីប្រមាណ៥៥លានដុល្លារសម្រាប់គម្រោងធ្វើឱ្យប្រសើរឡើងកំណាត់ផ្លូវជាតិលេខ៥នេះគឺជាកម្ចីសម្រាប់បំពេញបន្ថែមឱ្យការងារសាងសង់ និងការងារជាបន្តបន្ទាប់របស់គម្រោង ដើម្បីឈានទៅបញ្ចប់កំណាត់ផ្លូវដែលកំពុងសាងសង់ ពីក្រុងសិរីសោភ័ណ ទៅក្រុងប៉ោយប៉ែត។
កំណាត់ផ្លូវនេះ មានទិសដៅសាងសង់ផ្លូវប្រវែង១៤៦គីឡូម៉ែត្រ ដែលក្នុងនោះពីធ្លាម្អមទៅក្រុងបាត់ដំបងមានប្រវែង៩៩គីឡូម៉ែត្រជាផ្លូវ៤គន្លង, ផ្លូវវាងក្រុងពោធិ៍សាត់ប្រវែង១១គីឡូម៉ែត្រ, និងកំណាត់ផ្លូវពីក្រុងសិរីសោភ័ណ ទៅក្រុងប៉ោយប៉ែតប្រវែង៣៥គីឡូម៉ែត្រ។
គម្រោងធ្វើឱ្យប្រសើរឡើងកំណាត់ផ្លូវជាតិលេខ ៥ ពីស្ពានព្រែកក្តាមស្ថិតក្នុងខេត្តកណ្តាល ទៅក្រុងប៉ោយប៉ែត តាមរយៈកម្ចីជប៉ុនមានប្រវែងសរុប ៣៦៦គីឡូម៉ែត្រ ត្រូវសាងសង់ជាផ្លូវ ៤ គន្លង មានទទឹង២៣ម៉ែត្រ ដោយក្រាលកៅស៊ូ (AC) កម្រាស់ ១៥ សង់ទីម៉ែត្រ និងមានសួនច្បារកណ្តាល។
លោក អូន ព័ន្ធមុនីរ័ត្ន បានថ្លែងអំណរគុណដល់រដ្ឋាភិបាល និងប្រជាជនជប៉ុន និងគ្រប់ស្ថាប័នពាក់ព័ន្ធរបស់រដ្ឋាភិបាលជប៉ុន ជាពិសេស តាមរយៈ JICA ដែលលោកបញ្ជាក់ថា តែងតែបានផ្តល់នូវកិច្ចសហប្រតិបត្តិការដ៏ល្អប្រសើរ និងបានចូលរួមគាំទ្រដល់កិច្ចអភិវឌ្ឍសង្គម-សេដ្ឋកិច្ចកម្ពុជា។
លោកបន្តថា ជប៉ុនបានបន្តផ្តល់ហិរញ្ញប្បទានសម្រាប់កិច្ចសហប្រតិបត្តិការអភិវឌ្ឍន៍ផ្លូវការ (ODA) ដែលបានឆ្លើយតបចំទិសដៅនៃកម្មវិធីគោលនយោបាយអាទិភាពរបស់រាជរដ្ឋាភិបាលកម្ពុជា និងជាពិសេសបានឆ្លើយតបទៅនឹងយុទ្ធសាស្ត្របញ្ចកោណ ក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត។
លោក អូន ព័ន្ធមុនីរ័ត្ន វាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការកម្ពុជា-ជប៉ុន ដែលជាទំនាក់ទំនងល្អប្រសើរបំផុតក្នុងប្រវត្តិនៃទំនាក់ទំនងរវាងប្រទេសទាំងពីរ បន្ទាប់ពីបានដំឡើងកម្រិតទំនាក់ទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ក្នុងឆ្នាំ២០២៣ និងការដាក់ចេញគំនិតផ្ដួចផ្ដើមថ្មីៗក្នុងការពង្រឹង និងពង្រីកកិច្ចសហប្រតិបត្តិការឱ្យកាន់តែរឹងមាំថែមទៀត។
JICA បានប្តេជ្ញាចិត្តយ៉ាងមុតមាំក្នុងការធ្វើការជាមួយរាជរដ្ឋាភិបាលកម្ពុជាក្នុងភាពជាដៃគូយុទ្ធសាស្ត្ររយៈពេលវែងសម្រាប់ការគាំទ្រដល់ការពង្រឹងបន្ថែមទៀតនៃការអភិវឌ្ឍសង្គម-សេដ្ឋកិច្ច របស់ប្រទេសកម្ពុជា៕
