ក្រុមការងារចុះពិនិត្យស្ថានភាពជំនន់ទឹកភ្លៀងចំនួន៦ទីតាំង ស្ថិតនៅក្នុងស្រុកកំពង់សីលា ខេត្តព្រះសីហនុ នារសៀលថ្ងៃទី១៧ ខែកក្កដា ឆ្នាំ២០២៤។ រដ្ឋបាលខេត្តព្រះសីហនុ
ភ្នំពេញៈ ខេត្តយ៉ាងហោចណាស់ចំនួន៩បាននឹងកំពុងតែទទួលរងផលប៉ះពាល់ពីជំនន់ទឹកភ្លៀង ប៉ុន្តែមិនទាន់បង្កឱ្យមានស្ថានភាពធ្ងន់ធ្ងរ ឬបាត់បង់អាយុជីវិតពលរដ្ឋនោះទេ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោកសុទ្ធ គឹមកុលមុនីបានឱ្យដឹងថា ភ្លៀងធ្លាក់ប៉ុន្មានថ្ងៃជាប់ៗគ្នា មកនេះ បណ្តាលឱ្យមានជំនន់ទឹកភ្លៀងនៅតាមបណ្តាខេត្តមួយចំនួនដូចជា ស្ទឹងត្រែង ព្រះវិហារ កំពង់ធំ ក្រចេះ កំពង់ស្ពឺ ព្រះសីហនុ កោះកុង បាត់ដំបង និងផ្នែកខាងលើនៃខេត្តពោធិ៍សាត់ផងដែរ។
លោកមានប្រសាសន៍ថា៖«អញ្ជឹងមានប៉ុន្មានខេត្តហ្នឹង ប៉ុន្តែជារួមផលប៉ះពាល់មិនមានអីធ្ងន់ធ្ងរនោះទេ។ គ្រាន់តែថាបានលិចនៅតាមតំបន់មួយចំនួន ហូកាត់ច្រោះផ្លូវ ដាច់ផ្លូវគ្រួសក្រហម តាមជនបទមួយចំនួន ហូចូលដល់ផ្ទះពលរដ្ឋ។ នៅតាមខេត្តខ្លះក៏ធ្វើឱ្យលិចលង់នូវស្រូវដែលកំពុងតែជិតទទួលផល តែកសិករក៏ដូចអាជ្ញាធរបានជួយច្រូតកាត់ស្រូវទាំងអស់នោះក្នុងទឹកដើម្បីអាចទទួលផលបាន»។
លោកបន្ថែមថា ទោះយ៉ាងណា តំបន់ខ្លះទឹកក៏បានស្រកចុះវិញ ដោយសារតែ ភ្លៀងមិនខ្លាំង តែតំបន់ខ្លះមានភ្លៀងជាប់ក៏បណ្តាលឱ្យកម្រិតទឹកបន្តកើនឡើងផងដែរ។
លោកបន្តថា យោងតាមការជូនដំណឹងរបស់ក្រសួងធនធានទឹក និងឧតុនិយម ព្យុះអាចកើតមានជាបន្តបន្ទាប់ ហើយអាចនឹងច្រើនផងដែរ។ ហេតុនេះស្ថានភាពជំនន់ទឹកភ្លៀងក៏អាចកើតឡើងហើយ ជំនន់ទន្លេមេគង្គក៏អាចមានកម្រិតខ្ពស់ដែលអាចបង្កផលប៉ះពាល់ផងដែរ។
ចំពោះទិន្នន័យនៃការប៉ះពាល់វិញ គណៈកម្មាធិការជាតិគ្រប់គ្រងគ្រោះមហន្តរាយកំពុងតែធ្វើជាបន្តបន្ទាប់ ប៉ុន្តែមិនទាន់មានជាតួលេខជារួមជាក់លាក់ទេ ដោយសារតែការវិវត្តនៃផលប៉ះពាល់មានជាប្រចាំ និងជាប់កំពុងអន្តរគមន៍ផងដែរ។
នៅចំពោះមុខស្ថានភាពនេះ គណៈកម្មាធិការជាតិគ្រប់គ្រងគ្រោះមហន្តរាយ និងស្ថាប័នពាក់ព័ន្ធកំពុងតែតាមដានស្ថានភាពដោយយកចិត្តទុកដាក់ និងចាត់វិធានការជាបន្តបន្ទាប់ទៅតាមយន្តការរបស់ខ្លួនដែលបានត្រៀមទុកជាស្រេចដើម្បីអន្តរគមន៍ជួយដល់ពលរដ្ឋ ពិសេសកុំឱ្យមានការបាត់បង់អាយុជីវិតពលរដ្ឋ។
លោកបញ្ជាក់ថា៖«មកដល់ពេលនេះមិនទាន់មានការបាត់បង់អាយុជីវិតពលរដ្ឋនៅឡើយទេ។ យើង បានត្រៀមវិធានការទុកជាមុនស្រេច ដើម្បីឆ្លើយតបទឹកជំនន់ ទាំងថ្នាក់ខេត្ត និងថ្នាក់ជាតិ គឺបានគិតគូរលើហានិភ័យដែលអាចកើតមាន ពលរដ្ឋអាចប៉ះពាល់ប៉ុន្មាន តំបន់ណា ប៉ះពាល់អីខ្លះ ហើយប្រើវិធានការអី។ ធនធានត្រូវការគឺយើងមានក្នុងផែនការត្រៀមបប្រុងរបស់យើងរួចរាល់អស់ហើយ»។
លើសពីនោះ ថ្នាក់ដឹកនាំរបស់គណៈកម្មាធិការជាតិគ្រប់គ្រងគ្រោះមហន្តរាយក៏កំពុងតែចុះពិនិត្យ និងពង្រឹងកងម្លាំងអន្តរាគមន៍ ក៏ដូចជាធនធានសំភារៈសង្រ្គោះផងដែរ ដើម្បីឆ្លើយតបសង្រ្គោះបន្ទាន់។
នាថ្ងៃទី ១៩ ខែកក្កដានេះផងដែរ រដ្ឋបាលខេត្តកំពង់ធំក៏បានជូនដំណឹងឱ្យពលរដ្ឋមានប្រុងប្រយ័ត្នខ្ពស់ និងត្រៀមបង្ការគ្រោះមហន្តរាយទឹកជំនន់ នៅពេលដែលទឹកស្ទឹងសែនកំពុងតែបន្តឡើងដែលអាចដល់កម្រិតប្រកាសអាសន្ន។
អភិបាលខេត្តកំពង់ធំ ចុះពិនិត្យស្ថានភាពផ្លូវដែលដាច់ខូចដោយសារជំនន់ទឹកភ្លៀង ក្នុងស្រុកសណ្តាន់កាលពីថ្ងៃទី ១៧ កក្កដា។ រដ្ឋបាលខេត្តកំពង់ធំ
សេចក្តីជូនដំណឹងបញ្ជាក់ថា បច្ចុប្បន្នកម្រិតទឹកស្ទឹងសែននៅស្ថានីយកំពង់ធំ មានកម្ពស់ ១២,៩៣ម៉ែត្រ ហើយ កម្រិតទឹកមានការកើនឡើងជាបន្តបន្ទាប់ ដោយសារតែជំនន់ទឹកភ្លៀង ខណៈ កម្រិតទឹក ដែលត្រូវប្រកាស អាសន្នស្ថិតនៅកម្ពស់១៣,៥០ម៉ែត្រ។
ស្របពេលជាមួយគ្នានេះផងដែរ ក្រសួងសាធារណការ និងដឹកជញ្ជូនបានណែនាំឱ្យមន្រ្តីពាក់ព័ន្ធក្រោមឱវាទ ត្រូវចាត់កម្លាំងជាបន្ទាន់ ដើម្បីចុះជួសជុលផ្លូវ ឱ្យបានទាន់ពេលវេលា ក្នុងករណីមានការកាត់ផ្តាច់ចរាចរណ៍ ដោយសារតែគ្រោះទឹកជំនន់ក្នុងរដូវវស្សានេះ ដើម្បីធានាកុំឱ្យមានការប៉ះពាល់ដល់ការធ្វើដំណើររបស់ពលរដ្ឋ។
ក្រសួងសាធារណការ បានលើកឡើងថា ក្នុងរដូវវស្សាឆ្នាំ២០២៤នេះ ស្ថានភាពទឹកភ្លៀងបានចាប់ផ្តើមធ្លាក់ក្នុងកម្រិតពីមធ្យមទៅច្រើន ដែលតម្រូវឱ្យមានការប្រុងប្រយ័ត្នខ្ពស់ អំពីបរិមាណជំនន់ទឹកភ្លៀង និងទឹកទន្លេមេគង្គ។ កម្ពស់ទឹក អាចនឹងហក់ឡើងខ្ពស់ និងអាចបង្កឱ្យមានផលប៉ះពាល់ដល់អាយុជីវិតពលរដ្ឋ ផលដំណាំផ្សេងៗ និងហេដ្ឋារចនាសម្ព័ន្ធផ្លូវថ្នល់-ស្ពាន ដែលតម្រូវឱ្យមានវិធានការឆ្លើយតបឱ្យបានហ្មត់ចត់ និងទាន់ពេលវេលា ដើម្បីទប់ទល់ និងគ្រប់គ្រងហានិភ័យផ្សេងៗ ដែលអាចនឹងកើតមានឡើងជាយថាហេតុ។
ក្រសួងណែនាំដល់ក្រុមការងារលេខាធិការដ្ឋានគ្រប់គ្រងគ្រោះមហន្តរាយរបស់ក្រសួង អគ្គនាយកដ្ឋានសាធារណការ អគ្គនាយកដ្ឋានបច្ចេកទេស អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ កំពង់ផែស្វយ័ត ក្រុងព្រះសីហនុ កំពង់ផែស្វយ័តភ្នំពេញ មន្ទីរសាធារណការនិងដឹកជញ្ជូនរាជធានី-ខេត្ត និងអង្គភាពពាក់ព័ន្ធ ត្រូវរៀបចំមធ្យោបាយ សម្ភារ និងធនធានមនុស្សឱ្យបានសមស្រប ដើម្បីត្រៀមបង្ការឆ្លើយតបទៅនឹង គ្រោះមហន្តរាយឱ្យបានទាន់ពេលវេលា និងមានប្រសិទ្ធភាព ដោយសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ។
ក្រសួងបានណែនាំថា៖«ត្រូវសហការជាមួយអាជ្ញាធរមូលដ្ឋាន និងមន្ទីរជំនាញពាក់ព័ន្ធ ដើម្បីទប់ទល់គ្រោះទឹកជំនន់ ទប់ស្កាត់មធ្យោបាយដឹកជញ្ជូនធុនធ្ងន់ដែលឆ្លងកាត់ទីតាំងកំពុងរងគ្រោះដោយទឹកជំនន់ និងផ្សព្វផ្សាយផ្តល់ព័ត៌មានជូនពលរដ្ឋ អ្នកធ្វើដំណើរ និងក្រុមហ៊ុនដឹកជញ្ជូនផ្សេងៗ»។ លើសពីនោះក៏ត្រូវចាត់កម្លាំងដំឡើងផ្លាកសញ្ញាចរាចរណ៍ និងផ្លាកសញ្ញាសុវត្ថិភាព នៅតាមទីតាំងដែល កំពុង និងងាយរងគ្រោះដោយទឹកជំនន់ ដើម្បីចៀសវាងគ្រោះថ្នាក់ជាយថាហេតុ ដល់ អ្នកប្រើប្រាស់ផ្លូវថ្នល់ និង ប្រើប្រាស់មធ្យោបាយ និងសម្ភារបរិក្ខាររបស់អង្គភាព ដើម្បីត្រៀមចូលរួម ធ្វើអន្តរាគមន៍រុករក និងសង្គ្រោះពលរដ្ឋក្នុងករណីចាំបាច់។
មន្រ្តីពាក់ព័ន្ធក៏ត្រូវរៀបចំស្ដារឡើងវិញនូវហេដ្ឋារចនាសម្ព័ន្ធផ្លូវថ្នល់-ស្ពាន ស្ថិតក្រោមសមត្ថកិច្ចក្រសួង ដែលទទួលរងផលប៉ះពាល់ដោយសារជំនន់ទឹកភ្លៀង និង ជំនន់ទឹកទន្លេមេគង្គផងដែរ៕
