លោក វង្សី វិស្សុត ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី (កណ្តាល) ថ្លែងក្នុងសិក្ខាសាលាពិគ្រោះយោបល់ស្ដីពីសេចក្ដីព្រាងក្របខ័ណ្ឌតាមដាន ត្រួតពិនិត្យ និងវាយតម្លៃនៃការអនុវត្តយុទ្ធសាស្ត្របញ្ចកោណដំណាក់កាលទី១។ រី សុចាន់
ភ្នំពេញៈ រាជរដ្ឋាភិបាលកំពុងរៀបចំសេចក្ដីព្រាងក្របខ័ណ្ឌតាមដាន ត្រួតពិនិត្យ និងវាយតម្លៃនៃការអនុវត្តយុទ្ធសាស្ត្របញ្ចកោណដំណាក់កាលទី១ ដើម្បីគាំទ្រ និងជំរុញការអនុវត្តយុទ្ធសាស្ត្រនេះឱ្យទទួលបានជោគជ័យ។
កាលពីខែសីហា ឆ្នាំ២០២៣ រាជរដ្ឋាភិបាល បានដាក់ចេញយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០។
ក្នុងនោះប្រទេសមានចំណូលខ្ពស់ និងសេដ្ឋកិច្ចធន់ ជាសេដ្ឋកិច្ចបើកចំហ មានភាពប្រកួតប្រជែង និងបរិយាបន្ន ហើយប្រជាជនរស់នៅក្នុងសេចក្ដីថ្លៃថ្នូរ សុភមង្គល និងទទួលបានការគាំពារសង្គមប្រកបដោយសមធម៌ ស្មើសិទ្ធិ ស្មើឱកាស។
យុទ្ធសាស្ត្រនេះបានកំណត់គោលដៅក្នុងការធានាឱ្យបានកំណើនសេដ្ឋកិច្ចក្នុងរង្វង់៧ភាគរយក្នុង១ឆ្នាំ, បង្កើតការងារឱ្យបានកាន់តែច្រើនទាំងបរិមាណ និងគុណភាព, កាត់បន្ថយភាពក្រីក្រឱ្យនៅក្រោមអត្រា១០ភាគរយ, បន្តពង្រឹងសមត្ថភាពអភិបាលកិច្ច និងលើកកម្ពស់គុណភាពស្ថាប័ន, និងធានាចីរភាពនៃការអភិវឌ្ឍសង្គម-សេដ្ឋកិច្ច និងកសាងភាពធន់ទៅនឹងការប្រែប្រួលអាកាសធាតុ។
ថ្លែងក្នុងសិក្ខាសាលាពិគ្រោះយោបល់លើសេចក្ដីព្រាងក្របខ័ណ្ឌនេះ នាថ្ងៃទី២២ កក្កដា លោក វង្សី វិស្សុត ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ថ្លែងថា ការពិភាក្សាលើសេចក្ដីព្រាងនេះមានគោលដៅប្រមូលធាតុចូលពីអ្នកពាក់ព័ន្ធដើម្បីធ្វើយ៉ាងណាឱ្យការរៀបចំក្របខ័ណ្ឌនេះមានភាពគ្រប់ជ្រុងជ្រោយ មានគុណភាព និងមានប្រយោជន៍ និងអាចយកទៅប្រើប្រាស់បានជាប្រយោជន៍ក្នុងការសម្រេចបាននូវគោលដៅយុទ្ធសាស្ត្របញ្ចកោណដំណាក់កាលទី១។
កាលពីខែសីហា ឆ្នាំ២០២៣ រាជរដ្ឋាភិបាលក៏បានបង្កើតគណៈកម្មាធិការតាមដាន ត្រួតពិនិត្យ និងវាយតម្លៃអនុវត្តយុទ្ធសាស្ត្របញ្ចកោណដំណាក់កាលទី១នេះ៕
