![](https://pppkhmer.sgp1.digitaloceanspaces.com/image/main/20247/26_7_2024_the_57th_asean_foreign_ministers_meeting_was_held_in_vientiane_laos_on_july_25_foreign_affairs_ministry.jpg)
កិច្ចប្រជុំរដ្ឋមន្ត្រីការបរទេសអាស៊ានលើកទី៥៧ បានប្រព្រឹត្តទៅនៅទីក្រុងវៀងចន្ទន៍ ប្រទេសឡាវ នាថ្ងៃទី២៥ ខែកក្កដា។ ក្រសួងការបរទេស
ភ្នំពេញៈ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក សុខ ចិន្តាសោភា បានបញ្ជាក់សាជាថ្មីនូវការប្ដេជ្ញាចិត្តរបស់កម្ពុជាក្នុងការអនុវត្តចក្ខុវិស័យសហគមន៍អាស៊ានឆ្នាំ២០២៥ ប្រកបដោយប្រសិទ្ធភាពដើម្បីពង្រឹងសហគមន៍អាស៊ាន។
លោក សុខ ចិន្តាសោភា ដែលជាឧបនាយករដ្ឋមន្ត្រី បញ្ជាក់ដូច្នេះក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី៥៧ នៅទីក្រុងវៀងចន្ទន៍ ប្រទេសឡាវ នាថ្ងៃទី២៥ ខែកក្កដា។
ក្រសួងការបរទេសបញ្ជាក់ក្នុងសេចក្ដីប្រកាសព័ត៌មាននាថ្ងៃទី២៦ កក្កដា ថា៖ «ឯកឧត្ដមឧបនាយករដ្ឋមន្ត្រីបានបញ្ជាក់សាជាថ្មីនូវការប្ដេជ្ញាចិត្តក្នុងការអនុវត្តឱ្យបានពេញលេញ និងប្រកបដោយប្រសិទ្ធភាពនូវចក្ខុវិស័យសហគមន៍អាស៊ានឆ្នាំ២០២៥ ក្នុងគោលបំណង ពង្រឹងសហគមន៍អាស៊ាន ក៏ដូចជាមជ្ឈភាពនិងឯកភាពអាស៊ាន តាមរយៈការពង្រឹងកិច្ចសហប្រតិបត្តិការឆ្លងសសរស្ដម្ភសហគមន៍ទាំងបី»។
រដ្ឋមន្ត្រីការបរទេសអាស៊ានបានពិភាក្សាអំពីកិច្ចខិតខំប្រឹងប្រែងកសាងសហគមន៍អាស៊ាន និងវឌ្ឍនភាពក្នុងការសម្រេចបាននូវអាទិភាព និងសមិទ្ធផលសំខាន់ៗរបស់អាស៊ានសម្រាប់ឆ្នាំ២០២៤ ស្របតាមមូលបទនៃភាពជាប្រធានអាស៊ានរបស់ឡាវ «អាស៊ាន ការពង្រឹងការតភ្ជាប់ និងភាពធន់» ដើម្បីធានាថាអាស៊ាននៅតែអាចឆ្លើយតបទៅនឹងការផ្លាស់ប្ដូរ និងត្រៀមខ្លួនជាស្រេចសម្រាប់ពេលអនាគត ហើយនៅតែបន្តដើរតួនាទីជាមជ្ឈមណ្ឌលនៃកំណើនសាកល។
លោក សុខ ចិន្តាសោភា ក៏បានថ្លែងកោតសរសើរក្រុមការងារជាន់ខ្ពស់ស្តីពីចក្ខុវិស័យក្រោយឆ្នាំ២០២៥ចំពោះវឌ្ឍនភាព និងសន្ទុះក្នុងការអភិវឌ្ឍផែនការយុទ្ធសាស្ត្រសហគមន៍នយោបាយ-សន្តិសុខអាស៊ាន ផែនការយុទ្ធសាស្ត្រសហគមន៍សេដ្ឋកិច្ចអាស៊ាន ផែនការយុទ្ធសាស្ត្រសហគមន៍សង្គម-វប្បធម៌អាស៊ាន និងផែនការយុទ្ធសាស្ត្រតភ្ជាប់អាស៊ានឱ្យបានទាន់ពេលសម្រាប់ការអនុម័តទន្ទឹមនឹងចក្ខុវិស័យសហគមន៍អាស៊ានឆ្នាំ២០៤៥ នៅឆ្នាំក្រោយ។
លោក ឯក ប៊ុនលី អ្នកស្រាវជ្រាវនៃមជ្ឈមណ្ឌលខ្មែរសិក្សាកិច្ចការតំបន់ (CCRS) ថ្លែងថា ការបញ្ជាក់សាជាថ្មីពីការប្ដេជ្ញាចិត្តរបស់កម្ពុជានេះបើកចំហអំពីការគាំទ្រ និងវឌ្ឍនភាពរបស់ប្រទេសកម្ពុជាទៅលើផែនការរបស់សហគមន៍អាស៊ានដែលបានអនុម័តតាំងពីឆ្នាំ២០១៥នៅប្រទេសម៉ាឡេស៊ី។ ចក្ខុវិស័យនេះបានជំរុញឱ្យប្រទេសនៅក្នុងសហគមន៍អាស៊ានពង្រឹងនូវភាពសហការទៅលើផ្នែកនយោបាយសន្តិសុខ ផ្នែកសេដ្ឋកិច្ច និងលើកកម្ពស់ការផ្លាស់ប្ដូរទំនាក់ទំនងសង្គមនិងវប្បធម៌រវាងសមាជិកអាស៊ានទាំងអស់ រួមទាំងកម្ពុជាផងដែរ។
លោកថ្លែងថា៖ «នៅពេលទៅមុខទៀតខ្ញុំគិតថាការសហការរវាងសមាជិកអាស៊ាននឹងកាន់តែឆ្ពោះទៅមុខ ជាពិសេសផ្នែកសហការសេដ្ឋកិច្ច។ ប៉ុន្តែសំណួរដែលពិបាកឆ្លើយចំពោះអាស៊ាននៅពេលឆ្នាំ២០២៥កន្លងផុតទៅនោះគឺ តើចក្ខុវិស័យសហគមន៍អាស៊ានឆ្នាំ២០១៥-២០២៥ នេះបានបង្រៀនអ្វីខ្លះដល់អាស៊ានដែលអាចជាមេរៀនសម្រាប់យកទៅអភិវឌ្ឍចក្ខុវិស័យសហគមន៍អាស៊ានក្រោយឆ្នាំ២០២៥»។
លោក ឯក ប៊ុនលី បន្ថែមថា៖ «សំណួរដែលពិបាកជាងនេះសម្រាប់អាស៊ាន ប៉ុន្តែសំខាន់សម្រាប់ការអភិវឌ្ឍសហគមន៍ទៅថ្ងៃមុខនោះគឺ តើវិស័យណាខ្លះនៅក្នុងចក្ខុវិស័យ២០១៥-២០២៥នេះ ដែលអាស៊ានបរាជ័យសម្រេចមិនបាន? ហើយមកពីមូលហេតុអ្វី? នៅពេលដែលសមាជិកអាស៊ានមានភាពស្មោះត្រង់ក្នុងការវិភាគ និងឆ្លើយសំណួរទាំងនេះ ខ្ញុំគិតថា ចក្ខុវិស័យក្រោយឆ្នាំ ២០២៥ គឺពិតជានឹងកាន់តែល្អប្រសើរឡើងនៅថ្ងៃអនាគត»។
លោកបន្តថា សហគមន៍អាស៊ានគឺនៅមិនទាន់ល្អឥតខ្ចោះទេ។ ប៉ុន្តែ ប្រសិនបើសមាជិកអាស៊ានមានការប្ដេជ្ញាចិត្តប្រកបទៅដោយឆន្ទៈ និងសកម្មភាព នោះនឹងមិនមានតែលក្ខណៈវោហារសាស្ត្រ ហើយលោកជឿជាក់ថា សហគមន៍នេះនឹងក្លាយទៅជាសហគមន៍មជ្ឈិមក្នុងតំបន់ឥណ្ឌូប៉ាស៊ីហ្វិក។
នៅក្នុងកិច្ចប្រជុំនេះដែរ ប្រមុខការទូតកម្ពុជាក៏បានបញ្ជាក់សាជាថ្មីអំពីសារសំខាន់នៃសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) ក្នុងការលើកកម្ពស់ទំនាក់ទំនងប្រកបដោយមិត្តភាព និងកិច្ចសហប្រតិបត្តិការដែលជាផលប្រយោជន៍រួម។
លោកបានប្រកាសស្វាគមន៍នូវចំណាប់អារម្មណ៍ជាបន្តបន្ទាប់របស់ប្រទេសដែលនៅក្រៅតំបន់អាស៊ីអាគ្នេយ៍ក្នុងការស្នើសុំចូលជាភាគីនៃសន្ធិសញ្ញា TAC ហើយទន្ទឹងរង់ចាំការចូលជាភាគីនៃសន្ធិសញ្ញា TAC ដោយប្រទេសហ្វាំងឡង់ លុចហ្សំបួរ អេស្ប៉ាញ ម៉ិកស៊ិក និងអាល់ហ្សេរី។ កិច្ចប្រជុំក៏បានស្វាគមន៍ភាពជោគជ័យនៃការរៀបចំសន្និសីទភាគីហត្ថលេខីនៃសន្ធិសញ្ញា TAC នៅថ្ងៃទី២៦ ខែមិថុនា ឆ្នាំ២០២៤ នៅលេខាធិការដ្ឋានអាស៊ាន នៅទីក្រុងហ្សាការតា ប្រទេសឥណ្ឌូណេស៊ី។
នៅក្នុងប្រជុំចង្អៀត រដ្ឋមន្ត្រីការបរទេសអាស៊ានបានពិភាក្សាអំពីការតាមដានការវាយតម្លៃ និងសេចក្ដីសម្រេចចិត្តរបស់ប្រមុខដឹកនាំអាស៊ានស្ដីពីការអនុវត្តកិច្ចព្រមព្រៀងជាឯកច្ឆន្ទ៥ចំណុច និងបានផ្លាស់ប្ដូរទស្សនៈគ្នាទៅលើទំនាក់ទំនងខាងក្រៅរបស់អាស៊ាន និងមជ្ឈភាពអាស៊ាននៅក្នុងនិម្មាបនកម្មតំបន់ដែលកំពុងវិវត្ត ក៏ដូចជាបញ្ហាតំបន់និងអន្តរជាតិដែលជាកង្វល់ និងប្រយោជន៍រួម។
រដ្ឋមន្ត្រីអាស៊ានទាំងអស់ក៏បានពិភាក្សាអំពីវិស័យនៃកិច្ចសហប្រតិបត្តិការមួយចំនួន រួមមាន អន្តរកាលបៃតង សេដ្ឋកិច្ចពណ៌ខៀវ ការប្រែប្រួលអាកាសធាតុ សន្តិសុខថាមពលនិងស្បៀង បរិវត្តកម្មឌីជីថល និងភាពធន់នៃខ្សែច្រវាក់ផ្គត់ផ្គង់។ល៕