ពិធីបើកការដ្ឋានសាងសង់មណ្ឌលព្យាបាលកុមារអាស៊ី កាលពីថ្ងៃទី៣០ ខែកក្កដា។ រូបថត សហការី
ក្រុងតាខ្មៅ៖ កាលពីថ្ងៃទី៣០ ខែកក្កដា លោកវេជ្ជបណ្ឌិត ហ៊ីដេតុ យ៉ូស៊ីអូកា ប្រធានទីប្រឹក្សា និងជាស្ថាបនិកអង្គការបេះដូងជប៉ុន បានថ្លែងអំណរគុណដល់ព្រះសង្ឃ និងប្រជាពលរដ្ឋកម្ពុជា ដែលបានចូលរួមក្នុងពិធីបើកការដ្ឋានសាងសង់មណ្ឌលព្យាបាលកុមារអាស៊ី។
ថ្វីត្បិតតែចំនួនអ្នកចូលរួមតិចជាងការរំពឹងទុកក៏ដោយ ការចាប់ផ្តើមសាងសង់គឺជាព្រឹត្តិការណ៍ដ៏សំខាន់មួយសម្រាប់វិស័យសុខាភិបាលរបស់ប្រទេសកម្ពុជា ខណៈមណ្ឌលនេះនឹងក្លាយជាគ្លីនិកជំងឺមហារីកកុមារដ៏ធំដំបូងគេ។
លោកបានឱ្យដឹងថា អង្គការបេះដូងជប៉ុនទទួលបានការជួយជ្រោមជ្រែងយ៉ាងកក់ក្តៅដោយផ្អែកលើទំនាក់ទំនងមិត្តភាពរវាងប្រទេសជប៉ុន និងកម្ពុជារហូតមកដល់ពេលនេះ។
លោក យ៉ូស៊ីអូកា បានប្រាប់ភ្នំពេញប៉ុស្ដិ៍ថា៖ «ការសាងសង់មន្ទីរពេទ្យថ្មី គឺដើម្បីសង្គ្រោះអាយុជីវិតកុមារ ហើយក៏ជាគម្រោងដ៏សំខាន់ក្នុងការបង្កើតឱកាសដល់ពួកគេបានសម្រេចក្តីប្រាថ្នានាពេលអនាគតរបស់ពួកគេផងដែរ»។
ស្ថាបនិកមន្ទីរពេទ្យផ្ដោតលើជំងឺមហារីកកុមាររូបនេះ បានបន្ដថា៖ «យើងខ្ញុំសូមប្តេជ្ញាចិត្តថានឹង ផ្តល់សេវាថែទាំវេជ្ជសាស្ត្រ ប្រកបដោយគុណភាពខ្ពស់បំផុត ហើយអ្នកជំងឺកុមារទាំងអស់នឹងមានសិទ្ធទទួលបានការព្យាបាលដោយស្មើភាពគ្នា នៅមន្ទីរពេទ្យថ្មីនេះ»។
លោក គួយ ប៊ុនធឿន ប្រធានមន្ទីរសុខាភិបាលខេត្តកណ្តាលក៏បានថ្លែងក្នុងពិធីនេះ ដោយបានលើកឡើងពីផែនការយុទ្ធសាស្ត្រសុខភាព ផ្តោតលើការផ្តល់សេវាថែទាំសុខភាពប្រកបដោយគុណភាព សុវត្ថិភាព ប្រសិទ្ធភាព និងសមធម៌ជូនប្រជាពលរដ្ឋ។
លោកបន្តថា៖ «គម្រោងនេះស្របតាមគោលដៅរបស់យើងក្នុងការអនុវត្តប្រព័ន្ធសុខាភិបាលប្រកបដោយប្រសិទ្ធភាពខ្ពស់»។
មណ្ឌលព្យាបាលកុមារអាស៊ី នៃអង្គការបេះដូងជប៉ុន អគារមានទំហំ ៨ពាន់ម៉ែត្រការ៉េ កម្ពស់៣ជាន់ ១០០បន្ទប់ ជាមួយបន្ទប់វះកាត់ចំនួន ៤ គ្រែសម្រាកសរុបចំនួន ២០០ ដោយប្រើប្រាស់បុគ្គលិកប្រមាណ១០០នាក់។
ថវិកាសរុបសម្រាប់ដំណើរការ ការងារគម្រោងរបស់មន្ទីរពេទ្យ ជាង ១៣លានដុល្លារអេមេរិក សម្រាប់រយៈពេល៣ឆ្នាំ ដែលមានម្ចាស់ជំនួយគឺការិយាល័យកណ្តាលនៅប្រទេសជប៉ុន និងការបរិច្ចាគពីសប្បុរសជនក្រៅប្រទេស និងក្នុងប្រទេស។
មណ្ឌលព្យាបាលកុមារអាស៊ី នៃអង្គការបេះដូងជប៉ុន អគារមានទំហំ ៨ពាន់ម៉ែត្រការ៉េ កម្ពស់៣ជាន់ ១០០បន្ទប់ ជាមួយបន្ទប់វះកាត់ចំនួន ៤ គ្រែសម្រាកសរុបចំនួន ២០០ ដោយប្រើប្រាស់បុគ្គលិកប្រមាណ១០០នាក់។ រូបថត សហការី
មន្ទីរពេទ្យនេះនឹងក្លាយជាមជ្ឈមណ្ឌលវេជ្ជសាស្ត្រថ្មីមួយ ដើម្បីផ្តល់ការថែទាំវេជ្ជសាស្ត្រកម្រិតខ្ពស់ នៅក្នុងក្រុងតាខ្មៅ។
លោក ប៊ុនធឿន បានឱ្យដឹងថា វាបានចូលរួមចំណែកបណ្តុះបណ្តាល និងចែករម្លែកបទពិសោធន៍បច្ចេកទេសវេជ្ជសាស្ត្រ ពីក្រុម គ្រូពេទ្យឯកទេសជនជាតិជប៉ុន ដល់ក្រុមគ្រូពេទ្យកម្ពុជា ក្នុងការពិនិត្យ និងព្យាបាលជំងឺកុមារមហារីក និងបង្កើនបច្ចេកទសថែទាំសង្គ្រោះអាយុជីវិតកុមារឱ្យបានកាន់តែច្រើនតាមលទ្ធភាពដែលអាចធ្វើបាន។
វាក៏ជាមជ្ឈមណ្ឌលបណ្តុះបណ្តាល និងអប់រំបុគ្គលិកក្នុងស្រុក ក្នុងការផ្តល់សេវាថែទាំដល់កុមារ ដើម្បីកាត់បន្ថយអត្រាមរណៈភាពកុមារពីជំងឺមិនឆ្លងក្នុងចំណោមកុមារនៅក្នុងតំបន់អាស៊ីអាគ្នេយ៍។
លោក ប៊ុនធឿន បាននិយាយថា៖ «មណ្ឌលព្យាបាលកុមារអាស៊ី នៃអង្គការបេះដូងជប៉ុន គ្រោងនឹងដំណើរការសាងសង់រយៈពេល១៥ខែ បន្ទាប់ ពីធីបញ្ចុះបឋមសិលានាពេលនេះ(សង់រួចរាល់អម្លុងខែតុលា ឆ្នាំ២០២៥)»។
បន្ទាប់ពីសាងសង់រួច មណ្ឌលនេះអាចនឹងមានលទ្ធភាពផ្តល់ការពិនិត្យ និងពិគ្រោះជំងឺក្រៅ ប្រហែល ២ម៉ឺននាក់ និងអ្នកជំងឺវះកាត់ ៣ពាន់ករណីរៀងរាល់ឆ្នាំ។
លោក ប៊ុនធឿន បន្ដថា មណ្ឌលព្យាបាលកុមារអាស៊ី ផ្តល់លទ្ធភាពដល់វេជ្ជបណ្ឌិត និងគិលានុបដ្ឋាក ឆ្មប និងបុគ្គលិកសុខាភិបាលផ្សេងៗទៀត នៅក្នុងមន្ទីរពេទ្យរបស់ខ្លួន និងមន្ទីរពេទ្យជាដៃគូ ដើម្បីបង្ហាញឱ្យឃើញនូវប្រតិបត្តិការ និងការពិនិត្យអ្នកជំងឺប្រកបដោយបច្ចេកទេស និងគុណភាពកម្រិតខ្ពស់។
មណ្ឌលផ្ដល់ការបណ្តុះបណ្តាលដល់និស្សិតវេជ្ជសាស្ត្រ ដើម្បីឱ្យពួកគេបញ្ចប់ការសិក្សាប្រកបដោយគុណភាពខ្ពស់ លើកកម្ពស់ប្រព័ន្ធថែទាំវេជ្ជសាស្ត្រនៅក្នុងប្រទេស ដោយការរួមសហការជាមួយនឹងមន្ទីរពេទ្យដៃគូ និងសហការគ្នារកឱ្យឃើញនូវរោគសញ្ញាជំងឺកើតឡើងដំបូងនៃជំងឺមហារីកលើកុមារ និងធ្វើឱ្យប្រសើរ ឡើងនូវអត្រារស់រានមានជីវិតពីជំងឺមហារីកដល់កុមារ។
លោក ប៊ុនធឿន បានបន្ថែមថា៖ «ក្នុងនាមមន្ទីរសុខាភិបាលខេត្ត និងខ្លួនខ្ញុំផ្ទាល់ សូមសម្តែងនូវការកោតសរសើរ និងវាយតម្លៃខ្ពស់ ចំពោះ អង្គការបេះដូងជប៉ុន ចំពោះបេសកកម្មជាង១៥ឆ្នាំរបស់ខ្លួនក្នុងការគាំទ្រសកម្មភាពផ្នែកវេជ្ជសាស្ត្រនៅកម្ពុជា ដោយបានសហការបើកដំណើរការមន្ទីរពេទ្យមួយនៅក្នុងមន្ទីរពេទ្យបង្អែកពញាឮ នៅឆ្នាំ២០១៦ និងបានចាប់ផ្តើមបន្ថែមផ្តល់សេវាព្យាបាលជំងឺមហារីកនៅឆ្នាំ២០១៨ ដោយបានផ្តល់នូវការព្យាបាលដល់អ្នកជំងឺប្រមាណ ១០៧ ០៤៣នាក់»។
វេជ្ជបណ្ឌិត ម៉ៃកុ កូជីរ៉ុ អ្នកឯកទេសខាងជំងឺឆ្លង នៅមន្ទីរពេទ្យបេះដូងជប៉ុន បានសង្កត់ធ្ងន់លើការប្តេជ្ញាចិត្តរបស់មន្ទីរពេទ្យចំពោះការថែទាំកុមារ ជាពិសេសក្នុងការវះកាត់ និងការព្យាបាលកម្រិតខ្ពស់ ដោយមិនគិតពីជនជាតិ ឬប្រទេសដើមរបស់អ្នកជំងឺឡើយ។
ពិធីបើកការដ្ឋានសាងសង់មណ្ឌលព្យាបាលកុមារអាស៊ី កាលពីថ្ងៃទី៣០ ខែកក្កដា។ រូបថត សហការី
អ្នកស្រីវេជ្ជបណ្ឌិត បាននិយាយថា៖ «មន្ទីរពេទ្យនឹងមានឯកទេសក្នុងការថែទាំកុមារ ដោយផ្តោតលើការវះកាត់ និងការព្យាបាលកម្រិតខ្ពស់ គោលបំណងកាត់បន្ថយអត្រាមរណភាពរបស់កុមារ»។
ព្រះភិក្ខុវជិរប្បញ្ញោ គូ សុភាព ព្រះចៅអធិការវត្តនិគ្រោធវ័ន គល់ទទឹង ដែលបាននិមន្ដចូលរួមក្នុងពិធីនេះ មានសង្ឃដីកាថា ព្រះអង្គមានសេចក្តីសោមនស្សរីករាយដែលអង្គការបេះដូង បើកមន្ទីរពេទ្យមួយទៀតនៅក្រុងតាខ្មៅ ព្រោះជាទីតាំងងាយស្រួលសម្រាប់អ្នករស់នៅតំបន់នោះ។
ព្រះតេជគុណមានសង្ឃដីកាថា៖ «អាត្មាសង្ឃឹមថា បេសកកម្មបង្កើតមន្ទីរពេទ្យបេះដូងជប៉ុន សម្រាប់កុមារមហារីក នឹងផ្តល់ផលប្រយោជន៍យ៉ាងច្រើនដល់ប្រជាពលរដ្ឋ ជាពិសេសកុមារកម្ពុជា»។
ដោយឆ្លុះបញ្ចាំងពីការធ្វើដំណើរនេះ លោកវេជ្ជបណ្ឌិត ហ៊ីដេតុ យ៉ូស៊ីអូកា បានចែករំលែកការបំផុសគំនិតរបស់លោកសម្រាប់ការផ្តល់ជំនួយផ្នែកវេជ្ជសាស្ត្រដល់ប្រទេសកំពុងអភិវឌ្ឍន៍ បន្ទាប់ពីបានឃើញស្ថានភាពធ្ងន់ធ្ងរនៅក្នុងប្រទេសមីយ៉ាន់ម៉ាក្នុងឆ្នាំ១៩៩៥។
លោកសង្កេតឃើញថា អត្រាមរណភាពកុមារក្នុងប្រទេសមីយ៉ាន់ម៉ា ឡាវ និងកម្ពុជាមានកម្រិតខ្ពស់ ហើយសេវាព្យាបាលមិនគ្រប់គ្រាន់ និងត្រូវចំណាយខ្ពស់។
លោក យ៉ូស៊ីអូកា បាននិយាយថា៖ «ជាមធ្យម ក្នុងចំណោមកុមារកើតមហារីក ១ម៉ឺននាក់ មិនមានមន្ទីរពេទ្យព្យាបាលជំងឺដ៏សាហាវបែបនេះសូម្បីតែមួយ»។
លោកបានកត់សម្គាល់ថា គ្រួសារច្រើនតែជួបការលំបាកផ្នែកហិរញ្ញវត្ថុនៅពេលដែលកូនចូលសម្រាកនៅមន្ទីរពេទ្យ ដោយសារឪពុក ឬម្តាយម្នាក់ត្រូវឈប់ធ្វើការដើម្បីផ្តល់ការថែទាំ។
ដោយយល់ពីទុក្ខលំបាករបស់ប្រជាជនកម្ពុជា លោក យ៉ូស៊ីអូកា បានសម្រេចចិត្តផ្តោតលើការជួយកុមារ។
លោកបានថ្លែងថា៖ «ខ្ញុំចង់សាងសង់មន្ទីរពេទ្យមួយដែលអាចផ្តល់សេវាព្យាបាលដល់ប្រជាជនកម្ពុជាទាំងអស់ និងប្រជាជនក្រីក្រពីប្រទេសផ្សេងទៀត»។
លោកបានបើកដំណើរការអង្គការជំងឺបេះដូងជប៉ុនក្នុងឆ្នាំ២០០៤ និងបានចាប់ផ្តើមផ្តល់ការព្យាបាលនៅប្រទេសកម្ពុជាក្នុងឆ្នាំ២០០៨ ហើយទីបំផុតបានសាងសង់មជ្ឈមណ្ឌលវេជ្ជសាស្ត្រនៅឆ្នាំ ២០១៦។
វិធីសាស្ត្ររបស់លោកសង្កត់ធ្ងន់ទៅលើការរកឃើញរោគសញ្ញានៅដំណាក់កាលដំបូង និងអប់រំឪពុកម្តាយអំពីសញ្ញាព្រមានដូចជា រូបរាងមិនធម្មតា ហើម ដុំសាច់ ឬក្អួតញឹកញាប់។
លោក យ៉ូស៊ីអូកា បានបញ្ជាក់ថា៖ «យើងខ្ញុំពិតជាមានមោទនភាពណាស់ ចំពោះសមិទ្ធផលថ្មីនេះ ជាសក្ខីភាពនៃមិត្តភាពរវាងប្រទេសជប៉ុន និងកម្ពុជា។ យើងនឹងដើររួមគ្នាទៅមុខទៀត ដើម្បីសម្រេចគោលដៅតាមការរំពឹងទុក»៕
