ទិដ្ឋភាពចំការដំណាំនៅលើកោះពាមរាំង ស្រុកពាមជរ ខេត្តព្រៃវែង។ រូបថត ក្រសួងអភិវឌ្ឍន៍ជនបទ
ព្រៃវែងៈ ភូមិកោះពាមរាំង ដែលល្បីល្បាញខាងផលិតផលបន្លែសរីរាង្គរកចំណូលបានជាង ៣០ម៉ឺនដុល្លារក្នុង១ឆ្នាំ មានបរិស្ថានស្អាតបរិសុទ្ធ គ្មានគ្រឿងញៀន និងល្បែងស៊ីសងជាដើមនោះនឹងត្រូវដាក់បញ្ជូលជាភូមិគំរូរបស់ក្រសួងអភិវឌ្ឍន៍ជនបទនាពេលខាងមុខ។
កោះពាមរាំង ស្ថិតក្នុងឃុំកោះចេក ស្រុកពាមជរបានប្រែក្លាយពីភូមិដាច់ស្រយាល មិនសូវមានអ្នកស្គាល់ ទៅជាតំបន់អភិវឌ្ឍមួយ ដែលទាក់ទាញអារម្មណ៍ពីពលរដ្ឋកម្ពុជា និងជនបរទេស រហូតដល់រដ្ឋមន្ត្រីក្រសួងអភិវឌ្ឍន៍ជនបទលោក ឆាយ ឫទ្ធិសែន។
កោះពាមរាំងព័ទ្ធជុំវិញទៅដោយទឹកទន្លេមេគង្គថ្លាឈ្វង់ អមដោយខ្យល់អាកាសបរិសុទ្ធ។ ធ្វើដំណើរតាមទូកចម្លងប្រមាណជាង១០នាទី ពីកំពង់ចម្លងកោះពាមរាំងគេនឹងទៅដល់ទឹកដីកោះនោះ ដែលមានសួនបន្លែធំតូចពណ៌បៃតងចាំទទួលស្វាគមន៍។
ក្រោយពីបានចុះទៅពិនិត្យស្ថានភាពភូមិកោះពាមរាំងកាលពីពេលថ្មីៗនេះ លោករដ្ឋមន្ត្រីបានសម្តែងការភ្ញាក់ផ្អើល និងពេញចិត្ត ហើយគ្រោងនឹងប្រកាសដាក់បញ្ចូលជាភូមិគំរូនាពេលខាងមុខ។
ការដាក់បញ្ជូលនេះនឹងធ្វើឱ្យភូមិនេះក្លាយជាភូមិគំរូតែមួយគត់ក្នុងខេត្តព្រៃវែង ដែលបន្ថែមទៅលើ ភូមិគំរូ ដែលមានស្រាប់ចំនួន៣០ ដែលត្រូវបានបង្កើតឡើង ក្នុងរយៈពេលប្រមាណជា១០ឆ្នាំកន្លងមក។
នៅពេលសួរនាំពីការរីកចម្រើននៅកោះនេះ អ្នកភូមិនឹងនឹកឃើញភ្លាមពីជនល្បីឈ្មោះក្នុងពិភពជំនួញម្នាក់ដែលជាអ្នកផ្តួចផ្តើមគំនិត នោះគឺលោកអៀង សុធារ៉ា ដែលជាទីប្រឹក្សាគណៈសង្ឃនាយក គណៈមហានិកាយនៃព្រះរាជាណាចក្រកម្ពុជាផងដែរ។
ទិដ្ឋភាពចំការដំណាំនៅលើកោះពាមរាំង ស្រុកពាមជរ ខេត្តព្រៃវែង។ រូបថត ក្រសួងអភិវឌ្ឍន៍ជនបទ
លោក សុធារ៉ា បានឱ្យដឹងថា លោកបានចូលរួមជួយអភិវឌ្ឍភូមិកោះពាមរាំងនោះអស់រយៈពេល៦ឆ្នាំមកហើយ។ ភូមិកោះពាមរាំងមានពលរដ្ឋជាង ២៤០ គ្រួសារ ដែលមានសមាជិកប្រមាណជា១ពាន់នាក់កំពុងរស់នៅ និងបង្កបង្កើនផលដាំដំណាំ នៅលើផ្ទៃដីប្រហែលជា ៧០០ហិកតា។
លោកបានទៅដល់ទីនោះនាឆ្នាំ ២០១៨ ហើយបានចាប់ផ្តើមអប់រំពលរដ្ឋ ឱ្យចេះធ្វើសមាធិ អប់រំពីគ្រោះថ្នាក់នៃគ្រឿងញៀន ល្បែងស៊ីសង និងសរសេរពាក្យស្លោកជាច្រើនដាក់ក្នុងភូមិ ដើម្បីអប់រំពីបញ្ហាជាច្រើនក្នុងសង្គម។ កិច្ចការទាំងនេះត្រូវបានធ្វើឡើង ក្រោមកិច្ចសហការយ៉ាងជិតស្និតជាមួយនឹងព្រះចៅអធិការវត្ត នាយកសាលាបឋមសិក្សា អាជ្ញាធរ ដែលជាម្ចាស់ស្រុកមូលដ្ឋាន។
និយាយរួម លោកបានលើកឡើងថា ការអភិវឌ្ឍភូមិនេះ លោកបានប្រើប្រាស់គោលការណ៍ព្រះពុទ្ធសាសនា ដែលមានភាវនា៤ ដូចជា កាយភាវនា សីលភាវនា ចិត្តភាវនា និងបញ្ញាភាវនា។
លោកមានប្រសាសន៍ថា៖«ខ្ញុំជួយអភិវឌ្ឍភូមិហ្នឹងទាំងពីទទេ រហូតដល់បច្ចប្បន្ននេះ រីកចំរើនគួរជាទីគាប់ចិត្តហើយ។ ខ្ញុំចាប់ផ្តើមអភិវឌ្ឍខែតុលា ឆ្នាំ២០១៨ រហូតមកដល់បច្ចុប្បន្ននេះក៏នៅតែតាមមើលជួយ អភិវឌ្ឍ ជួយណែនាំ ជួយប្រាប់អញ្ជឹងទៅ។ លោករដ្ឋមន្រ្តីបានទៅមើល ហើយ លោកពេញចិត្ត ហើយក៏បានដាក់ភូមិហ្នឹងជាភូមិគំរូ។ ភូមិហ្នឹងមានលក្ខណៈពិសេសច្រើន»។
រដ្ឋមន្ត្រីអភិវឌ្ឍន៍ជនបទលោក ឆាយ ឫទ្ធិសែន ចុះពិនិត្យស្ថានភាពអភិវឌ្ឍន៍ភូមិនៅភូមិកោះពាមរាំង ខេត្តព្រៃវែងកាលពីខែឧសភា ដើម្បីដាក់បញ្ចូលជាភូមិគំរូនាពេលខាងមុខ។
លោក នូ ម៉េង មេភូមិកោះពាមរាំងបានឱ្យដឹងថា ដំបូងឡើយលោកសុធារ៉ាបានធ្វើការអប់រំពលរដ្ឋ ដែលក្នុងនោះរួមមានការណែនាំឱ្យចេះធ្វើសមាធិតាមបែបព្រះពុទ្ធសាសនាជាដើម។ ក្រៅពីនោះមានការប្រែក្លាយផ្នត់គំនិតពលរដ្ឋពីការដាំបន្លែដោយប្រើប្រាស់ជីគីមី ទៅជាដាំបន្លែសរីរាង្គវិញ ដើម្បីទាក់ទាញទីផ្សារ និងចូលរួមថែរក្សាសុខភាពពលរដ្ឋ។ លើសពីនោះ មានការណែនាំឱ្យមានការសំអាតបរិស្ថាន ដោយនៅតាមខ្នងផ្ទះមានធុងសំរាម ឬទុកដាក់សំរាមឱ្យបានត្រឹមត្រូវ ហើយតាមផ្ទះមានសួនដំណាំនិងធ្វើរបង ដើម្បីបង្កើនសោភណ្ឌភាពក្នុងភូមិ។
លោកបន្ថែមថា ក្នុងភូមិក៏មានស្ថានីយផលិតទឹកស្អាតសម្រាប់ពលរដ្ឋប្រើប្រាស់ផងដែរតាមរយៈជំនួយរបស់ប្រទេសជប៉ុនផងដែរ ហើយចំណែកបង្គន់អនាម័យវិញមានគ្រប់ផ្ទះតែម្តង។
លោកថ្លែងថា៖«លោករដ្ឋមន្រ្តីមកឃើញពេញចិត្ត ក៏ដាក់ជាភូមិគំរូអញ្ជឹងទៅ។ យើងមានបរិស្ថានស្អាត។ ដាំបន្លែមិនប្រើសារធាតុគីមី ដែលធ្វើឱ្យឆាប់ខូចដី។ រឿងគ្រឿងញៀន អត់មានប្រើទេក្នុងភូមិ ហើយល្បែងស៊ីសងស្បើយអស់ហើយ»។
លោកបន្ថែមដូច្នេះថា៖«បានដាក់ជាភូមិគំរូអញ្ជឹង យើងរំភើបណាស់ ព្រោះភូមិយើងអាចធ្វើបាន។ ក្នុងឃុំ និងខេត្តព្រៃវែងមានតែភូមិយើងមួយទេ ជាភូមិគំរូ។ ក្រោយក្លាយជាភូមិគំរូហើយ នឹងទទួលបានការជួយច្រើនទៀតដែរ»។
លោកអៀង សុធារ៉ា (អាវស ឆ្វេង) ជាទីប្រឹក្សាគណៈសង្ឃនាយក គណៈមហានិកាយនៃព្រះរាជាណាចក្រកម្ពុជា និងរដ្ឋមន្ត្រីក្រសួងអភិវឌ្ឍន៍ជនបទ សំពះព្រះសង្ឃ ពេលចុះពិនិត្យស្ថានភាពអភិវឌ្ឍន៍ភូមិនៅភូមិកោះពាមរាំង ខេត្តព្រៃវែងកាលពីខែឧសភា ដើម្បីដាក់បញ្ចូលជាភូមិគំរូនាពេលខាងមុខ។ រូបថត ក្រសួងអភិវឌ្ឃន៍ជនបទ
លោក សុធារ៉ា ដែលជាស្ថាបនិក សហករណ៍សរីរាង្គខ្មែរ ដែលបានទទួលពានរង្វាន់អាស៊ាន ភាពជា អ្នកដឹកនាំលើការអភិវឌ្ឍជនបទ និងលុបបំបាត់ភាពក្រីក្រ (4th ASEAN “Rural Development & Poverty Eradication Leadership” Awards) កាលពីឆ្នាំ ២០១៩ ផងដែរ ក៏បានឱ្យដឹងថា ជាលទ្ធផលនៃការខិតខំរបស់លោកក្នុងការចូលរួមជួយអភិវឌ្ឍភូមិនេះ ឃើញមានលទ្ធផលថា ប្រាក់ចំណូលរបស់អ្នកភូមិកើនឡើង ដោយសារការលក់បន្លែសរីរាង្គ ប្រហែលជា ៣០ម៉ឺនដុល្លារក្នុង១ឆ្នាំៗ។ ពលរដ្ឋក្នុងភូមិក៏មានទឹកស្អាតបរិសុទ្ធប្រើប្រាស់ដូចនៅរាជធានីភ្នំពេញដែរ។
លោកមានប្រសាសន៍ដូច្នេះថា៖«ការអប់រំទាំងអស់មានសហការជាមួយព្រះចៅអធិការវត្ត ហើយយើងអប់រំជាប្រចាំ។ អញ្ជឹងបញ្ហាស្រាថយចុះខ្លាំង គ្រឿងញៀនហ្នឹង ល្បែងស៊ីសងស្ទើតែអស់រលីង។ សូម្បីតែកន្ទុយលេខ ក៏គាត់ឈប់ចាក់ដែរ»។
អ្នកនាំពាក្យក្រសួងអភិវឌ្ឍន៍ជនបទ លោក ពិត ករុណា បានឱ្យដឹងថា ក្នុងអាណត្តិទី៧នេះ ក្រសួងអភិវឌ្ឍន៍ជនបទផ្តោតកិច្ចការសំខាន់ទៅលើអទិភាពទី៣ របស់ក្រសួង គឺការធ្វើវិក្រិតកម្ម តាមរយៈការរៀបចំឱ្យមាននូវភូមិគំរូ។ ការរៀបចំជាភូមិគំរូនេះគឺក្នុងគោលបំណងលើកកម្ពស់ជីវភាពប្រជាជននៅជនបទឱ្យមានជីវភាពកាន់តែល្អប្រសើរឡើង។
លោកបន្ថែមថា ដោយឡែកចំពោះការចុះកំណត់សក្តានុពល របស់ភូមិគំរូគឺក្រសួងមានលក្ខណៈវិនិច្ឆ័យចំនួន៥។ ក្នុងនោះរួមមានផ្នែកសេដ្ឋកិច្ច, សង្គមកិច្ច, សុខភាព និងបរិស្ថានរស់នៅ, ហេដ្ឋារចនាសម្ព័ន្ធ និងចុងក្រោយគឺអភិបាលកិច្ច។
លោក អៀង សុធារ៉ា ជាស្ថាបនិក សហករណ៍សរីរាង្គខ្មែរ ដែលបានទទួលពានរង្វាន់អាស៊ាន ភាពជា អ្នកដឹកនាំលើការអភិវឌ្ឍជនបទ និងលុបបំបាត់ភាពក្រីក្រ (4th ASEAN “Rural Development & Poverty Eradication Leadership” Awards) កាលពីឆ្នាំ ២០១៩។ រូបថត សហការី
លោកបញ្ជាក់ថា៖«ក្រុមការងារក្រសួងនឹងចុះទៅធ្វើការវាយតម្លៃ ក្នុងភូមិនីមួយៗនៅតាមរាជធានីខេត្ត ដើម្បីស្រង់ថាតើភូមិណាខ្លះ ដែលអាចចូលបំពេញលក្ខខណ្ឌទាំង៥ និងប្រកាសដាក់ភូមិនេះជាភូមិគំរូ។ យើងកំពុងស្រង់ភូមិដែលមានសក្តានុពលរួចនិងចុះធ្វើការវាយតម្លៃតាមលក្ខណវិនិច្ឆ័យ ទើបប្រកាសជាភូមិគំរូជាផ្លូវការតាមក្រោយ»។
លោកបន្តថា ក្រសួងអភិវឌ្ឍន៍ជនបទមានផែនការបង្កើតភូមិគំរូឱ្យបានចំនួន ៥០ ក្នុង ១ឆ្នាំៗ។
ភូមិទាំង ៣០ដែលបានបង្កើតរួចហើយនោះមាននៅក្នុងខេត្តត្បូងឃ្មុំចំនួន ១០ភូមិ ខេត្តតាកែវ មាន ១០ភូមិ និងខេត្តកំពង់ស្ពឺ មាន ១០ភូមិផងដែរ ដែលភូមិនីមួយៗមានសក្តានុពលផ្សេងៗគ្នា។
ក្រោយពេលប្រកាសជាភូមិគំរូហើយនោះ ក្នុងភូមិនោះនឹងមានការអភិវឌ្ឍន៍ចំណុចសំខាន់ៗ ដូចជា អភិវឌ្ឍសេដ្ឋកិច្ច ដែលជួយធ្វើឱ្យមានកំណើនចំណូលសេដ្ឋកិច្ចគ្រួសារ តាមរយៈបណ្តុះបណ្តាលជំនាញ ការផ្តល់ឥណទាន យកទៅបង្កើតកសិកម្មខ្នាតធំចម្រុះមួយ ដែលអាចលក់ផលិតផលបានចំណូល។
បន្ថែមពីនោះ ក៏មានការអភិវឌ្ឍផ្នែកសង្គមកិច្ច ដូចជា លើកកម្ពស់ផ្នែកសុខភាព តាមរយៈការផ្គត់ផ្គង់ទឹកស្អាត បង្គន់អនាម័យឱ្យមានគ្រប់គ្រាន់ និងកសាងហេដ្ឋារចនាសម្ព័ន្ធផ្លូវថ្នល់ មណ្ឌលសុខភាព និងសាលាមត្តេយ្យគំរូជាដើម។
លើសពីនោះ ក៏មានលើកកម្ពស់ការអប់រំ និង ការងារគ្រប់គ្រង។ ក្នុងនោះរួមមានការអប់រំឱ្យអ្នកភូមិឧស្សាហ៍ព្យាយាម មានស្មារតីសហគមន៍ ហើយជាពិសេសគឺ ឱ្យក្លាយទៅជាម្ចាស់ការលើសមទ្ធិផលរបស់ខ្លួន បង្កើនការគ្រប់គ្រងសន្តិសុខ សណ្នាប់ធ្នាប់ ក៏ដូចជាជំរុញគោលនយោបាយ ភូមិឃុំមានសុវត្ថិភាព៕
