រូបថត៖ រដ្ឋមន្ត្រីសុខាភិបាល ឈាង រ៉ា (កណ្ដាល) បង្ហាញបន្ទប់ឆ្លុះជំងឺមហារីកនៅមន្ទីរពេទ្យកាល់ម៉ែតដល់អ្នកសារព័ត៌មាន នៅថ្ងៃទី១១ ខែកញ្ញា ២០២៤។ នៀម ឆេង
រដ្ឋមន្ត្រីក្រសួងសុខាភិបាល លោក ឈាង រ៉ា បានថ្លែងថា លោកគោរពការសម្រេចចិត្តរបស់ប្រជាពលរដ្ឋខ្មែរក្នុងការចេញទៅរកសេវាព្យាបាលជំងឺនៅប្រទេសជិតខាង និងប្រទេសដទៃទៀត ដែលមានចំនួនចន្លោះពី ២០ម៉ឺន ទៅ២៥ម៉ឺននាក់ក្នុងឆ្នាំ២០២៣។ លោកថា នេះមិនមែននិន្នាការថ្មីទេ ប៉ុន្តែជាអ្វីដែលបានកើតឡើងយូរមកហើយ។
ថ្លែងក្នុងជំនួបជាមួយអ្នកសារព័ត៌មាន ដែលរៀបចំដោយក្លិបអ្នកកាសែតកម្ពុជា នៅព្រឹកថ្ងៃទី១១ ខែកញ្ញានេះ លោក ឈាង រ៉ា បានបញ្ជាក់ថា ចរន្តនៃការចាកចេញពីប្រទេសមួយដើម្បីទៅរកសេវាព្យាបាលនៅប្រទេសផ្សេងទៀត មិនមែនកើតឡើងតែនៅកម្ពុជានោះទេ ប៉ុន្តែ មាននៅក្នុងប្រទេសផ្សេងៗ សូម្បីនៅបារាំង សហរដ្ឋអាមេរិក ម៉ាឡេស៊ី វៀតណាម ថៃ ឬសិង្ហបុរី ជាដើម គ្រាន់តែថា អត្រានៃការចេញទៅព្យាបាលនៅខាងក្រៅមានកម្រិតខុសគ្នា។
បើតាមលោករដ្ឋមន្ត្រីសុខាភិបាល ចំនួនពលរដ្ឋកម្ពុជាដែលចេញទៅព្យាបាលនៅក្រៅប្រទេសជាង ២០ម៉ឺននាក់នេះ មិនមែនជាតួលេខមួយច្រើននោះទេ គឺក្នុងអត្រាតែ ១,៥ ភាគរយប៉ុណ្ណោះ បើប្រៀបទៅនឹងចំនួនពលរដ្ឋដែលទទួលសេវាពិនិត្យនិងព្យាបាលនៅក្នុងស្រុកជាង ១៣,៩លាននាក់ក្នុងមួយឆ្នាំៗ។
លោកថ្លែងដូច្នេះថា៖ «ប៉ុន្តែ ខ្ញុំសូមគោរពការសម្រេចចិត្តរបស់បងប្អូនដែលទៅរកសេវានៅកន្លែងណាក្ដី ដែលនេះជាសិទ្ធិរបស់បងប្អូន»។
ប៉ុន្តែ លោកបានលើកជាសំនួរថា ប្រសិនបើតម្លៃនៃការព្យាបាលឬវះកាត់មួយអាចមានតម្លៃ ៥ ដងថ្លៃជាងនៅកម្ពុជា តើគុណភាពពិតជាមានភាពប្រសើរជាងសេវានៅកម្ពុជា ៥ ដងនោះដែរឬទេ។ នៅកម្ពុជា លោកសង្កេតឃើញមានភាពរីកចម្រើនខ្លាំងលើការព្យាបាលមាត់ ធ្មេញ និងភ្នែក ដែលពលរដ្ឋខ្មែររស់នៅបរទេសក៏សម្រេចចិត្តមកទទួលសេវាទាំងនេះនៅកម្ពុជា ហើយបន្ថែមកញ្ចប់ដំណើរកម្សាន្តរបស់ពួកគេនៅថ្ងៃសម្រាកនៅប្រទេសដែលពួកគាត់រស់នៅ។
លោកថា៖ «ជាក់ស្ដែងនៅថ្ងៃទី១៦ ខែកញ្ញានេះ មានជនជាតិបារាំងម្នាក់ក៏នឹងមកប្រើប្រាស់សេវានៅប្រទេសយើងអំពីសុខភាពភ្នែក។ អីចឹង វាបញ្ជាក់យ៉ាងម៉េច គឺវាបញ្ចាក់បានថា វាមានទៅមានមក ហើយទៅកន្លែងដែលមានគុណភាព និងមានតម្លៃ។ ដូច្នេះ គុណភាពនិងតម្លៃគឺជាផលធៀប។ អីចឹង កម្ពុជាយើងក៏ធ្វើបានល្អដែរ»។
បើតាមការយល់ឃើញរបស់លោក ឈាង រ៉ា ការដែលពលរដ្ឋខ្មែរចេញទៅព្យាបាលនៅក្រៅប្រទេស ប្រហែលជាបណ្ដាលមកពីការពេញចិត្តទៅលើការធ្វើបដិសណ្ឋារកិច្ចនិងការពន្យល់បង្ហាញដែលមានលក្ខណៈមួយជាបទពិសោធន៍ថ្មីនៅទីនោះ។
លោកក៏បានបញ្ជាក់ដែរថា យ៉ាងណាក៏ដោយ ក្រសួងសុខាភិបាលមិនព្រងើយកន្តើយនឹងការចេញទៅព្យាបាលនៅបរទេសរបស់ប្រជាជនខ្មែរទេ ដោយក្រសួងកំពុងពង្រឹងគុណភាពនៃសេវាសុខាភិបាលឲ្យកាន់តែប្រសើរឡើង ដើម្បីឲ្យតួលេខនៃការចេញទៅព្យាបាលនៅក្រៅប្រទេសមានការថយចុះ។
លោកនិយាយថា៖ «ដូច្នេះ យុទ្ធសាស្ត្រដើម្បីដោះស្រាយការងារនេះ គឺយើងត្រូវប្រឹងប្រែង លើកកម្ពស់នៃការខិតខំធ្វើយ៉ាងណាឲ្យការបម្រើផ្ដល់សេវានៅក្នុងស្រុកឲ្យបានប្រសើរឡើង។ យើងត្រូវតែទទួលស្គាល់ ថ្វីត្បិតតែថា យើងមានកន្លែងដែលល្អ ក៏នៅមានកន្លែងដែលមិនទាន់ល្អដែរ»៕
