លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ថ្លែងក្នុងពិធីបិទវគ្គបណ្ដុះបណ្ដាលមួយកាលពីថ្ងៃទី៤ ខែកញ្ញា។ ក្រសួងប្រៃសណីយ៍និងទូរគមនាគមន៍
ក្រសួងប្រៃសណីយ៍និងទូរគមនាគមន៍ លើកទឹកចិត្តឱ្យសិស្សានុសិស្សពិចារណា ចាប់យកការសិក្សាជំនាញឌីជីថល ដែលជាគោលដៅអាទិភាពមួយនៃយុទ្ធសាស្ត្របញ្ចកោណដំណាក់កាលទី១ ខណៈដែលការប្រឡង់បាក់ឌុបនឹងប្រព្រឹត្តឡើងនៅថ្ងៃទី៨ ខែតុលាខាងមុខ។
នៅក្នុងសេចក្ដីអំពាវនាវដែលចុះផ្សាយនៅថ្ងៃនេះ ក្រសួងបានបង្ហាញពីជំនាញថ្មីៗដែលដើរតួនាទីយ៉ាងសំខាន់ក្នុងជីវភាពរស់នៅ ការធ្វើអាជីវកម្ម និងការផ្ដល់សេវាសាធារណៈ ប្រកបដោយប្រសិទ្ធភាពខ្ពស់។
ក្រសួងក្រសួងប្រៃសណីយ៍និងទូរគមនាគមន៍ថ្លែងដូច្នេះថា៖ « សូមអំពាវនាវនិងលើកទឹកចិត្តដល់សិស្សានុសិស្សទាំងអស់ឱ្យពិចារណាចាប់យកការសិក្សាជំនាញឌីជីថល (Digital Skills) ស្របតាមបរិបទនៃបដិវត្តន៍ឧស្សាហកម្ម ៤.០ ក្នុងគោលដៅស្វែងរកការងារបានល្អ និងបានចំណូលខ្ពស់ អាចជួយលើកកម្ពស់ជីវភាពផ្ទាល់ខ្លួននិងគ្រួសារ»។
ក្រសួងបន្តថា ការចាប់យកជំនាញឌីជីថលនេះ នឹងចូលរួមចំណែកលើកស្ទួយនិងអភិវឌ្ឍប្រទេសជាតិ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ ដែលបានកំណត់យក «បច្ចេកវិទ្យាឌីជីថល» និងបច្ចេកវិទ្យា ជាអាទិភាពគន្លឹះទី៥ បន្ទាប់ពី «មនុស្ស ផ្លូវ ទឹក ភ្លើង»។
ក្រសួងប្រៃសណីយ៍និងទូរគមនាគមន៍បង្ហាញពីគោលនយោបាយមួយចំនួន ដូចជា ផែនទីបង្ហាញផ្លូវអភិវឌ្ឍន៍ជំនាញឌីជីថល ២០២៤-២០៣៥ ដែលរាជរដ្ឋាភិបាលបានអនុម័តកាលពីដើមឆ្នាំ២០២៤ ដែលផែនទី នេះ ដាក់ចេញនូវក្របខណ្ឌសមត្ថភាពជំនាញឌីជីថល ដែលមានមុខរបរចំនួន ៦៣ មុខសំខាន់ៗដែលតម្រូវការខ្ពស់ និងងាយទទួលបានឱកាសការងារល្អៗ។
បើតាមក្រសួងដដែល មុខរបរទាំងនោះរួមមាន ផ្នែកហេដ្ឋារចនាសម្ព័ន្ធឌីជីថល (Digital Infrastructure), សន្តិសុខសាយប័រ (Cybersecurity), អភិបាលកិច្ចទិន្នន័យ (Data Governance), សុសវែរនិងកម្មវិធីកុំព្យូទ័រ (Software and Applications), ទិន្នន័យនិងបញ្ញាសិប្បនិម្មិត (Data and Artificial Intelligence), ទំនាក់ទំនង លក់ និងទីផ្សារឌីជីថល (Digital Communication, Sales, and Marketing), នវានុវត្តន៍ឌីជីថលនិងសហគ្រិនភាព (Digital Innovation and Entrepreneurship)។
ក្រសួងបញ្ជាក់ដូច្នេះថា៖ «ក្រសួងសង្ឃឹមជឿជាក់ថា បន្ទាប់ពីបញ្ចប់ការសិក្សាដោយជោគជ័យ សិស្សានុសិស្សទាំងអស់នឹងចូលរួមចំណែកអភិវឌ្ឍកម្ពុជា ឆ្ពោះទៅសម្រេចបានចក្ខុវិស័យរយៈពេលវែង និងប្រែក្លាយជាប្រទេសអភិវឌ្ឍន៍នាពេលអនាគត»៕
