(ឆ្វេង) នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទជួបជាមួយមេបញ្ជាការរដ្ឋអាយដាហូ (Idaho) ឆ្មាំជាតិសហរដ្ឋអាមេរិក Timothy J. Donnellan និង (ស្តាំ) ឯកអគ្គរដ្ឋទូតចិន Wang Wenbin ក្នុងជំនួបដាច់ដោយឡែកពីគ្នា កាលពីថ្ងៃទី១៨ ខែសីហា។ RCAF
នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានជួបពិភាក្សាការងារជាមួយមន្ត្រីនៃប្រទេសមហាអំណាចពីរ គឺមេបញ្ជាការរដ្ឋអាយដាហូ (Idaho) របស់សហរដ្ឋអាមេរិក Timothy J. Donnellan និងឯកអគ្គរដ្ឋទូតចិន Wang Wenbin ក្នុងជំនួបដាច់ដោយឡែកពីគ្នា កាលពីថ្ងៃទី១៨ ខែសីហា។ ភាគីទាំងពីរថានឹងបន្តពង្រឹងទំនាក់ទំនងជាមួយកម្ពុជា។
លោកបានជួបជាមួយមេបញ្ជាការរដ្ឋអាយដាហូ (Idaho) ឆ្មាំជាតិសហរដ្ឋអាមេរិក Timothy J. Donnellan (ទីម៉ូធី ជេ.ដុនណេឡេន) នៅអគ្គបញ្ជាការដ្ឋានកងយោធពលខេមរភូមិន្ទ និងបានពិភាក្សាអំពីការរីកចម្រើននៃកិច្ចកិច្ចប្រតិបត្តិការយោធារវាងកម្ពុជានិងសហរដ្ឋអាមេរិក រួមមានទាំងការបំពេញទស្សនកិច្ចរបស់រដ្ឋមន្ត្រីការពារជាតិអាមេរិក Lloyd Austin មកកម្ពុជាកាលពីពេលថ្មីៗនេះ។ នេះបើតាមអគ្គបញ្ជាការដ្ឋានកងយោធពលខេមរភូមិន្ទ។
អគ្គបញ្ជាការដ្ឋានខ.ភ.ម. ថ្លែងដូច្នេះថា៖ «ឯកឧត្តម អគ្គមេបញ្ជាការ បានស្នើដល់ភាគីកងទ័ពសហរដ្ឋអាមេរិកជួយបណ្ដុះបណ្តាលធនធានមនុស្សក្នុងកងយោធពលខេមរភូមិន្ទ ការផ្លាស់ប្តូរទស្សនកិច្ច ការផ្លាស់ប្តូរព័ត៌មានរួមគ្នាទប់ស្កាត់អំពើភេរវកម្ម ឧក្រិដ្ឋកម្មឆ្លងដែន ការធ្វើលំហាត់ហ្វឹកហ្វឺនរួមគ្នា និងការបន្តបេសកកម្មរុករកអដ្ឋិធាតុជនជាតិអាមេរិកដែលបាត់ខ្លួនក្នុងទឹកដីកម្ពុជា និងបង្កើនកិច្ចសហប្រតិបត្តិការយោធារវាងប្រភេទទ័ពនិងប្រភេទទ័ព»។
លោក Donnellan បានបង្ហាញក្តីរំភើបរីករាយចំពោះការមកដល់ព្រះរាជាណាចក្រកម្ពុជា និងទឹកដីអង្គរដ៏ស្រស់ស្អាត។
លោកថ្លែងថា ទស្សនកិច្ចរបស់លោកនៅកម្ពុជា គឺដើម្បី បន្តអនុវត្តខ្លឹមសារបួនចំណុចដែលលើកឡើងដោយរដ្ឋមន្ត្រីក្រសួងការពារជាតិអាមេរិក Lloyd Austin ក្នុងពេលលោកមកបំពេញទស្សនកិច្ចនៅកម្ពុជា ដែលរួមមាន ការបណ្ដុះបណ្ដាលកងកម្លាំងថែរក្សាសន្តិភាព ការងារដោះមីន ការងារមនុស្សធម៌ និងការងារសង្គ្រោះគ្រោះអន្តរាយ។
នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានជួបពិភាក្សាការងារជាមួយមន្ត្រីនៃប្រទេសមហាអំណាចពីរ គឺមេបញ្ជាការរដ្ឋអាយដាហូ (Idaho) របស់សហរដ្ឋអាមេរិក Timothy J. Donnellan។ រូបថត RCAF
អគ្គបញ្ជាការដ្ឋានខ.ភ.ម. បន្តថា៖ «លោកឧត្តមសេនីយ៍ទោ Donnellan បានសម្ដែងនូវការជឿជាក់ថា ទៅថ្ងៃអនាគត ប្រទេសទាំងពីរ សហរដ្ឋអាមេរិកនិងកម្ពុជា នឹងបន្តកសាងទំនាក់ទំនងល្អជាមួយគ្នា ក៏ដូចជាបន្តធ្វើការហ្វឹកហ្វឺនរួមគ្នា តាមខ្លឹមសារដែលបានលើកឡើងបួនចំណុចដោយរដ្ឋមន្ត្រីក្រសួងការពារជាតិសហរដ្ឋអាមេរិក»។
នៅរសៀលថ្ងៃទី១៨ ខែកញ្ញាដដែល លោក វង់ ពិសេន ក៏បានជួបជាមួយលោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា ដោយភាគីទាំងពីរបានបង្ហាញពីការជឿជាក់ថា ទំនាក់ទំនងរវាងប្រទេសទាំងពីរនឹងមានភាពរឹងមាំថែមទៀត។ នេះបើតាមអគ្គបញ្ជាការដ្ឋានខ.ភ.ម.។
លោក វង់ ពិសេសបានលើកឡើងបញ្ជាក់ពីការរីកចម្រើននៃទំនាក់ទំនងនៃប្រទេសទាំងពិរ រហូតឈានដល់ «កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ មិត្តភាពដែកថែប កិច្ចសហប្រតិបត្តិការត្បូងពេជ្រ និងកិច្ចសហប្រតិបត្តិការក្នុងក្របខណ្ឌខ្សែក្រវាត់និងផ្លូវ»។
អគ្គបញ្ជាការដ្ឋានខ.ភ.ម. បញ្ជាក់ថា៖ «ឯកឧត្តមបានថ្លែងអំណរគុណចំពោះបក្ស រដ្ឋាភិបាល និង ប្រជាជនចិន ដែលជានិច្ចកាលបានជួយឧបត្ថម្ភគាំទ្រទាំងស្មារតី សម្ភារៈ ថវិកា ដើម្បីអភិវឌ្ឍសេដ្ឋកិច្ចកម្ពុជា។ ក្នុងនោះវិស័យការពារជាតិ ចិនបានជួយបណ្ដុះបណ្តាលធនធានមនុស្ស ជួយកសាងហេដ្ឋារចនាសម្ព័ន្ធ ការធ្វើទំនើបកម្មទីបញ្ជាការមូលដ្ឋានសមុទ្ររាម ការធ្វើទំនើបកម្មប្រព័ន្ធកាពារអាកាស ការធ្វើទំនើបកម្មប្រព័ន្ធកាំជ្រួចស្វ័យប្រវត្តិ និងការធ្វើទំនើបកម្មអាវុធធុនធ្ងន់គ្រប់ប្រភេទ»។
លោក វង់ ពិសេន រំពឹងថា ក្នុងអាណត្តិរបស់លោក Wang នៅកម្ពុជា កិច្ចសហប្រតិបត្តិការយោធានៃប្រទេសទាំងពីរនឹងកាន់តែមានវិសាលភាពធំជាងមុន ដូចជា ការធ្វើសមយុទ្ធកាន់តែធំ ខ្លឹមសារកាន់តែស៊ីជម្រៅ ចំនួនយោធិននិងយុទ្ធោបករណ៍ចូលរួមសមយុទ្ធកាន់តែច្រើន និងទំនើបជាងឆ្នាំមុនៗ។
លោកស្នើឲ្យភាគីចិនបន្តជំរុញលើការផ្លាស់ប្តូរទស្សនកិច្ចគ្រប់កម្រិត ការបណ្តុះបណ្តាលធនធានមនុស្ស ជួយកសាងសាលាជំនាញកាំភ្លើងធំ និងជំនាញការពារអាកាសដល់កងទ័ពជើងគោកកម្ពុជា និងការផ្លាស់ប្តូរព័ត៌មានចារកិច្ចទៅវិញទៅមក។
លោក វង់ ពិសេន ក៏បានជួបជាមួយលោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជានៅរសៀលថ្ងៃទី១៨ ខែកញ្ញា។ រូបថត RCAF
លោក Wang ត្រូវបានស្រង់សម្ដីដោយអគ្គបញ្ជាករដ្ឋាន ខ.ភ.ម.ថា៖ «ក្នុងនាមជាប្រទេសជិតខាង និងដៃគូដ៏ជិតស្និទ្ធ ចិន-កម្ពុជា បានបង្កើតនិងបីបាច់ថែរក្សាចំណងមិត្តភាពដែកថែប ដែលមិនអាចបំបែកបាន ដោយឆ្លងកាត់ការសាកល្បង ការប្រែប្រួល និងការលំបាកជាប្រវត្តិសាស្ត្រជាច្រើន។ ដូច្នេះ យើងត្រូវរួមសហការគ្នា អភិវឌ្ឍទំនាក់ទំនងនេះឲ្យកាន់តែស្អិតរមួតថែមទៀត»។
លោកក៏បានបង្ហោះនៅលើហ្វេសប៊ុក នៅថ្ងៃនេះថា៖ ភាគីទាំងពីរបានឯកភាពគ្នាក្នុងការជំរុញទំនាក់ទំនងរវាងកងទ័ពទាំងពីរឱ្យកាន់តែល្អប្រសើរ និងបញ្ចូលកម្លាំងជំរុញថ្មីក្នុងការពង្រឹងនិងធ្វើឱ្យកាន់តែស៊ីជម្រៅនូវទំនាក់ទំនងចំណងមិត្តភាពរវាងចិននិងកម្ពុជា»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៅរាជបណ្ឌិត្យសភាកម្ពុជា ថ្លែងថា ការជួបផ្ទាល់ជាមួយមេបញ្ជាការយោធាថ្នាក់រដ្ឋរបស់សហរដ្ឋអាមេរិក នឹងធ្វើឲ្យភាគីទាំងពីរយល់គ្នាកាន់តែច្បាស់ ជាជាងឮតែតាមប្រព័ន្ធផ្សព្វផ្សាយ។
លោកថា៖ «ជាទូទៅ នៅពេលមានជំនួបណាមួយ យើងឃើញថា ភាគីអាមេរិកតែងបង្ហាញពីភាពវិជ្ជមាន សន្ដានចិត្តក្នុងការកសាងទំនុកចិត្តជាមួយគ្នា ប៉ុន្តែ ជាការជាក់ស្ដែង ពេលខ្លះមានការយល់ច្រឡំគ្នា។ ដូច្នេះ ខ្ញុំយល់ថា សហរដ្ឋអាមេរិកហាក់ដូចជាមិនមានចេតនាលើកកម្ពស់ទំនាក់ទំនងនិងកិច្ចសហប្រតិបត្តិការជាមួយកម្ពុជាទេ ហើយការស្ដារទំនុកចិត្តមិនសូវសកម្ម»។
លោកបន្តថា៖ «បើយើងមើលខាងភាគីចិនវិញ ជាទូទៅអ្វីដែលគាត់ជួបនិយាយគ្នា និងអ្វីដែលធ្វើជាក់ស្ដែងភាគច្រើនមិនសូវខុសឆ្ងាយគ្នាទេ។ វាខុសពីទំនាក់ទំនងរវាងអាមេរិកនិងខ្មែរ ពេលជួបគ្នា សន្យាធ្វើល្អ ដល់ពេលចេញពីគ្នាវិញ សំឡេងរបស់គាត់តាមប្រព័ន្ធផ្សព្វផ្សាយ តាមសេចក្ដីប្រកាសព័ត៌មានដូចជាមិនឆ្លុះបញ្ចាំងទៅលើការសន្យាជាក់ស្ដែង»។
លោកថា ការប្រកាសដាក់ទណ្ឌកម្មដោយក្រសួងរតនាគារសហរដ្ឋអាមេរិក លើឧកញ៉ា លី យ៉ុងផាត់ ក៏ជាសញ្ញាដែលធ្វើឲ្យមានគម្លាតនៃទំនុកចិត្តរវាងប្រទេសទាំងពីរកាន់តែឆ្ងាយពីគ្នា៕
