ភ្នំពេញៈ យ៉ាងហោចណាស់ពលរដ្ឋជាង ២ ៣០០គ្រួសារ និងស្រូវជាង ១ពាន់ហិកតានៅក្នុងខេត្តចំនួន ៤រងផលប៉ះពាល់ដោយសារជំនន់ទឹកភ្លៀង ខណៈដែលកម្ពុជាកំពុងតែទទួលរងវិសម្ពាធ និងព្យុះដែលបង្កឱ្យមានភ្លៀងធ្លាក់ខ្លាំង។
ការធ្លាក់ភ្លៀងនាប៉ុន្មានថ្ងៃមកនេះបានធ្វើឱ្យមានជំនន់ទឹកភ្លៀងកើតឡើងនៅក្នុងខេត្តក្រចេះ ស្ទឹងត្រែង ព្រះសីហនុ និងត្បូងឃ្មុំ គិតមកដល់ព្រឹកថ្ងៃព្រហស្បតិ៍ ទី១៩ ខែកញ្ញានេះ។ ក្នុងនោះបានធ្វើឱ្យមានផលប៉ះពាល់ដល់ប្រជាពលរដ្ឋ ២ ៣៩៣គ្រួសារ និងស្រូវ ១ ២៩៥ហិកតាផងដែរ ។ នេះបើយោងតាមអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) លោក សុទ្ធ គឹមកុលមុនី។
លោកបញ្ជាក់ថា៖ «ស្ថានភាពទឹកភ្លៀងនាប៉ុន្មានថ្ងៃនេះមានបរិមាណច្រើននៅតាមតំបន់មួយចំនួន ដែលបានបង្កជំនន់ទឹកភ្លៀងនៅខេត្តមួយចំនួន តែមិនមានសភាពធ្ងន់ធ្ងរនោះទេ....ផលប៉ះពាល់នេះពុំបានបង្កជាគ្រោះថ្នាក់ស្លាប់ ឬរបួសដល់ពលរដ្ឋនោះទេ»។ ជំនន់ទឹកភ្លៀងនៅតំបន់ខ្លះ ក៏បានស្រកទៅវិញខ្លះហើយផងដែរ។
ប្រមុខរដ្ឋាភិបាល កាលពីថ្ងៃពុធបានណែនាំឱ្យស្ថាប័នពាក់ព័ន្ធទាំងអស់បង្កើនការយកចិត្តទុកដាក់ខ្ពស់ ដើម្បីជួយពលរដ្ឋដែលរងគ្រោះដោយសារជំនន់ទឹកភ្លៀង ដែលបង្កឡើងដោយឥទ្ធិពលព្យុះនេះ។
លោកនាយករដ្ឋមន្រ្តី ហ៊ុន ម៉ាណែត មានប្រសាសន៍ថា៖ «សូមគណៈអភិបាលរាជធានីខេត្ត បង្កើនការយកចិត្តទុកដាក់ខ្ពស់ តាមដានឱ្យជាប់ និងដោះស្រាយឱ្យទាន់ពេលវេលា នៅក្នុងករណីដែលមានទឹកជំនន់ប៉ះពាល់ ក្នុងភូមិសាស្រ្តទទួលខុសត្រូវ របស់ខ្លួន។ ជាពិសេស យកចិត្តទុកដាក់ទៅលើការជួយសង្រ្គោះអាយុជីវិត និង ទ្រព្យសម្បត្តិរបស់ប្រជាពលរដ្ឋ ដែលរងផលប៉ះពាល់»។
ក្នុងនាមប្រមុខរដ្ឋាភិបាល លោកបានចេញបទបញ្ជាឱ្យអគ្គមេបញ្ជាការនៃកងយោធពលខេមរភូមិន្ទ និងអគ្គស្នងការនគរបាលជាតិ បញ្ជូនកម្លាំងមធ្យោបាយ និងសម្ភារៈ ដើម្បីធ្វើអន្តរាគមន៍សង្រ្គោះទៅតាមការចាំបាច់។ ក្រៅពីនោះគ.ជ.គ.ម. ត្រូវបន្តតាមដានឱ្យបានជាប់ជាមួយរដ្ឋបាលខេត្ត និងត្រូវកំណត់ជាស្រេចនូវទីទួលសុវត្ថិភាព ក៏ដូចជាចាត់វិធានការសម្របសម្រួលនិងត្រៀមកម្លាំងមធ្យោបាយអន្តរាគមន៍សង្រ្គោះបន្ថែម។
លោកនាយករដ្ឋមន្រ្តីក៏បានណែនាំឱ្យក្រសួងសេដ្ឋកិច្ច និងហិរញ្ញវត្ថុ និង ស្ថាប័នពាក់ព័ន្ធផ្សេងទៀត ត្រូវត្រៀមនូវស្បៀងនិង សម្ភារៈបរិក្ខារចាំបាច់ដែលត្រូវបញ្ចេញទៅឱ្យប្រជាពលរដ្ឋរងគ្រោះដោយសារទឹកជំនន់ក្នុងករណីមានការស្នើសុំពីរាជធានីខេត្ត។
ប្រមុខរដ្ឋាភិបាលមានប្រសាសន៍ថា៖ «ក្រសួងកសិកម្ម និងស្ថាប័នពាក់ព័ន្ធត្រូវត្រៀមស្រូវពូជ និងសម្ភារៈចាំបាច់នានា ក្នុងករណីដែលមានផលប៉ះពាល់ធំដែលបង្កឱ្យមានការខូចខាតដល់ដំណាំរបស់ប្រជាពលរដ្ឋ ចាំបាច់ត្រូវជួយស្តារឡើងវិញ»។
គ.ជ.គ.ម បានឱ្យដឹងថា ថ្នាក់ដឹកនាំ និងមន្ត្រីគ្រប់លំដាប់ថ្នាក់របស់ខ្លួនបាននឹងកំពុងតាមដាន យ៉ាងយកចិត្តទុកដាក់ចំពោះការវិវឌ្ឍន៍នៃស្ថានភាពជំនន់ទឹកភ្លៀងនេះ។ គណៈកម្មាធិការគ្រប់គ្រង គ្រោះមហន្តរាយខេត្ត បានចេញសេចក្តីណែនាំស្តីពីវិធានការបង្ការ និងការឆ្លើយតបគ្រោះទឹកជំនន់ជូនដល់អាជ្ញាធរមានសមត្ថកិច្ចនិងសាធារណជនផងដែរ។
ជំនន់ទឹកភ្លៀងនេះក៏បានបង្កឱ្យបាក់ទំនប់អាងស្តុកទឹករបស់ក្រុមហ៊ុន អាន កូ ស្ថិតនៅភូមិកៀនក្រឡាញ់ ឃុំភ្ញីមាស ស្រុកគិរីសាគរ ខេត្តកោះកុងផងដែរ។ អាជ្ញាធរបានជូនដំណឹងនិងជម្លៀសពលរដ្ឋ ៣គ្រួសារទៅរកទីសុវត្ថិភាពទាន់ពេលផងដែរ។ នេះបើយោងតាមរដ្ឋបាលខេត្ត៕