កម្មករ កម្មាការិនីរោងចក្រកាត់ដេរមួយកន្លែងដើរចេញពីរោងចក្រ បន្ទាប់ពីបំពេញការងាររួចនៅរាជធានីភ្នំពេញ។ Post Staff
ក្រុមប្រឹក្សាជាតិប្រាក់ឈ្នួលអប្បបរមា បានសម្រេចជាផ្លូវការ កំណត់យកចំនួន ២០៨ដុល្លារ ជាប្រាក់ឈ្នួលអប្បបរមាឆ្នាំ២០២៥ កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរនិងកាបូប ដែលកើន៤ដុល្លារលើប្រាក់ឈ្នួលឆ្នាំ២០២៤ (២០៤ដុល្លារ)។ ក្នុងនោះ២ដុល្លារត្រូវបានបន្ថែមដោយនាយករដ្ឋមន្ត្រី។
តួលេខនេះត្រូវបានសម្រេចនៅរសៀលថ្ងៃទី១៩ ខែកញ្ញានេះ បន្ទាប់ពីការចរចាលើកអំណះអំណាងបង្ហាញពីជំហររៀងៗខ្លួនរវាងភាគីតំណាងនិយោជក និងភាគីតំណាងនិយោជិតកម្មករ ដោយថ្ងៃនេះ ភាគីតំណាងកម្មករទាមទារឡើងក្នុងតួលេខពីរខុសគ្នា គឺ២០៦ដុល្លារ និង២០១៤ដុល្លារ។
ចំណែកតំណាងភាគីនិយោជក បានដំឡើងតួលេខចំនួន ២០៦ ដុល្លារអាមេរិក ដូចនឹងតួលេខដែលលើកឡើងដោយតំណាងភាគីរាជរដ្ឋាភិបាល។
ការសម្រេចយកតួលេខ ២០៦ ដុល្លារ ធ្វើឡើងតាមការបោះឆ្នោត ស្របតាមមាត្រា១២ នៃច្បាប់ស្តីពីប្រាក់ឈ្នួលអប្បបរមា។ លទ្ធផលនៃការបោះឆ្នោតបង្ហាញថា តួលេខ ២០៦ដុល្លារទទួលបានសំឡេងឆ្នោត ៤៦ សំឡេងលើ ៥១សំឡេង ដែលធ្វើឲ្យតួលេខនេះជាតួលេខប្រាក់ឈ្នួលផ្លូវការសម្រាប់ឆ្នាំក្រោយ។
នៅក្រោយការបោះឆ្នោតសម្រេចនេះ លោក ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ ដែលដឹកនាំកិច្ចប្រជុំត្រីភាគី បានថ្លែងថា៖ «សម្ដេចនាយកលោកនាយករដ្ឋមន្ត្រី ហ៊ុន ម៉ាណែត បានសម្រេចបន្ថែមទឹកប្រាក់ចំនួន ២ដុល្លារ លើទឹកប្រាក់ចំនួន ២០៦ដុល្លារ។ ដូច្នេះចាប់ពីថ្ងៃទី១ ខែមករា ឆ្នាំ២០២៥ កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប នឹងមានប្រាក់ឈ្នួលអប្បបរមាចំនួន ២០៨ដុល្លារ»។
លោកបន្តថា ប្រាក់អត្ថប្រយោជន៍ផ្សេងទៀត ដែលកម្មករនិយោជិតធ្លាប់ទទួលបានកន្លងមក ត្រូវបានរក្សាទុកនៅដដែលមានដូចជា ប្រាក់សោហ៊ុយធ្វើដំណើរ និងស្នាក់នៅចំនួន ៧ដុល្លារក្នុងមួយខែ ប្រាក់រង្វាន់ធ្វើការងារទៀងទាត់ចំនួន ១០ដុល្លារក្នុងមួយខែ ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន ២ ០០០រៀលក្នុងមួយថ្ងៃ និងប្រាក់រង្វាន់អតីតភាពការងារចំនួនពី ២ដុល្លារដល់ ១១ដុល្លារក្នុងមួយខែសម្រាប់កម្មករនិយោជិតដែលបានធ្វើការចាប់ពីឆ្នាំទី២ ដល់ឆ្នាំទី១១។
លោកនាយករដ្ឋមន្ត្រី ហ៊ុន ម៉ាណែត បានថ្លែងនៅលើបណ្ដាញសង្គមក្រោយការសម្រេចនេះថា ទោះក្នុងកាលៈទេសៈលំបាកនៃសេដ្ឋកិច្ចសកលក៏ដោយ ក៏រាជរដ្ឋាភិបាលមិនភ្លេចយកចិត្តទុកដាក់ដល់ការលើកកម្ពស់ជីវភាពរស់នៅ មុខរបរ និងសុខុមាលភាពរបស់បងប្អូនប្រជាពលរដ្ឋគ្រប់ស្រទាប់វណ្ណៈ។ លោកថា ការដំឡើងប្រាក់ឈ្នួលអប្បបរមាឆ្នាំនេះ ទោះតិចក្តីច្រើនក្តី គឺដើម្បីជួយសម្រួលដល់ការលំបាកខ្លះរបស់កម្មករនិយោជិត។
លោកថ្លែងថា៖ «ទន្ទឹមនឹងការដំឡើងប្រាក់ឈ្នួលនេះ ខ្ញុំសូមជម្រាបជូនបងប្អូនកម្មករនិយោជិត និងសាធារណជនថា ខ្ញុំនឹងបន្តជំរុញដល់ក្រសួង ស្ថាប័ន អាជ្ញាធរពាក់ព័ន្ធពិនិត្យ តាមដាន និងដាក់វិធានការបន្ថែមដើម្បីពិនិត្យលទ្ធភាពកាត់បន្ថយបន្ទុកចំណាយរបស់បងប្អូនកម្មករនិយោជិត»។
អ្នកស្រី ស តឿ កម្មករនៅរោងចក្រកាត់ដេរមួយកន្លែងក្នុងខណ្ឌពោធិ៍សែនជ័យ បានថ្លែងនៅក្រោយការដំឡើងប្រាក់ខែនេះថា អ្នកស្រីមានការរីករាយខ្លះដែរ ពីការដំឡើងប្រាក់ខែនេះ ទោះបីជាមិនច្រើនក្ដី។ យ៉ាងណាក៏ដោយអ្នកស្រីថ្លែងថា តម្លៃទំនិញនៅលើទីផ្សារក៏មានការឡើងថ្លៃខ្លះដែរ ទោះបីជា តម្លៃផ្ទះជួលដែលអ្នកស្រីស្នាក់នៅមិនមានការឡើងថ្លៃក៏ដោយ។
អ្នកស្រីនិយាយថា៖ «ទោះបីឡើងតិចតួច ក៏សប្បាយចិត្តខ្លះដែរ ព្រោះបានឡើងបន្តិចម្ដងៗ។ ប៉ុន្តែ រាល់ថ្ងៃតម្លៃទំនិញក៏ឡើងដែរ ជាពិសេសក្នុងផ្សារ។ អីចឹង យើងទិញគេលក់តាមផ្លូវ ឬ រ៉ឺម៉ក ដែលថោកជាង»។
អ្នកស្រីបន្តថា អ្នកស្រីធ្វើការពីម៉ោង ៧ព្រឹកដល់ម៉ោង ១១រសៀល និងចាប់ផ្ដើមឡើងវិញពីម៉ោង ១២ ដល់ម៉ោង ៤រសៀល។ ប្រសិនបើមិនបានថែមម៉ោង អ្នកស្រីនឹងទទួលបានប្រាក់ថ្លៃបាយ ២០០០រៀលក្នុងមួយថ្ងៃ។ ប្រសិនបើថែមម៉ោងពីម៉ោង៤ដល់ម៉ោង ៦ នោះប្រាក់ថ្លៃបាយនឹងទទួលបាន៤២០០រៀល។ ប៉ុន្តែបើថែមដល់ម៉ោង ៧និង៤០នាទីយប់ ប្រាក់ថ្លៃបាយនឹងបាន៦០០០រៀល។
សម្រាប់ការថែមម៉ោងចន្លោះពី ៥០ម៉ោង ទៅ ៧០ម៉ោងក្នុងមួយខែ អ្នកស្រីអាចទទួលបានប្រាក់ឈ្នួលសរុបប្រមាណ៣០០ដុល្លារក្នុងមួយខែ៕
