អ្នកគ្រូកំពុងបង្រៀនកូនស្រីអានអក្សរក្នុងរៀនមួយ នៅរាជធានីភ្នំពេញនាពេលកន្លងមក។ Post Staff
ភ្នំពេញ៖ ខណៈដែលកម្ពុជារៀបចំប្រារព្ធទិវាគ្រូបង្រៀន ថ្ងៃទី៥ ខែតុលា ឆ្នាំ២០២៤ ក្រសួងអប់រំ យុវជន និងកីឡា (MoEYS) បានលើកទឹកចិត្ដប្រជាពលរដ្ឋឱ្យចូលរួមផ្ញើសារជាអត្ថបទ វីដេអូ រូបភាព អត្ថបទចម្រៀង កំណាព្យ ឬរឿងនិទានជូនលោកគ្រូអ្នកគ្រូ សាស្ត្រាចារ្យ ក្នុងទិវាគ្រូបង្រៀនថ្ងៃទី០៥ ខែតុលា ឆ្នាំ២០២៤ ក្រោមប្រធានបទ «ការអភិវឌ្ឍគ្រូបង្រៀនដើម្បីអភិវឌ្ឍមូលធនមនុស្សឆ្ពោះទៅកាន់ចក្ខុវិស័យកម្ពុជាឆ្នាំ២០៥០»។
ការប្រារព្ធពិធីឆ្នាំនេះបង្ហាញពីតួនាទីសំខាន់របស់គ្រូបង្រៀនក្នុងការកសាងអនាគតរបស់ប្រទេសកម្ពុជា តាមរយៈការវិនិយោគលើការអភិវឌ្ឍន៍ធនធានមនុស្ស។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានថ្លែងថា បុគ្គលិកអប់រំ ១២៤៥១៧នាក់ ដោយចំនួនប្រមាណ ៦៨ភាគរយជាគ្រូបង្រៀន។ យុទ្ធសាស្ដ្របញ្ចកោណផ្ដោតសំខាន់ទៅលើការអភិវឌ្ឍធនធានមនុស្ស ជាមុំមួយសំខាន់នៃយុទ្ធសាស្ដ្ររបស់រាជរដ្ឋាភិបាលដើម្បីចូលរួមអភិវឌ្ឍប្រទេសឱ្យទៅកាន់ប្រទេសអភិវឌ្ឍក្នុងឆ្នាំ ២០៥០។
លោកស្រី បានប្រាប់ភ្នំពេញប៉ុស្ដិ៍ថា៖ «យោងតាមយុទ្ធសាស្ដ្រនេះ ក្រសួងអប់រំ យុវជន និងកីឡា យល់ឃើញថា គ្រូបង្រៀនគឺជាបេះដូងដ៏សំខាន់នៃការអប់រំ។ និយាយរួម ជាអ្នកធានាបាននូវគុណភាពអប់រំ ក៏ដូចជាតម្រង់ទិសកុមារ និងយុវជនកម្ពុជាទាំងអស់ឱ្យក្លាយជាពលរដ្ឋពេញលេញដើម្បីចាប់យកជំនាញ និងបំណិនចំណេះដឹងគ្រប់គ្រាន់ក្នុងការចូលរួមកសាងប្រទេស»។
លោក ឈត ប៊ុនថង អ្នកស្រាវជ្រាវ និងជាទស្សនវិទូនៃរាជបណ្ឌិត្យសភាកម្ពុជា (RAC) ដែលបានសង្កត់ធ្ងន់លើសារៈសំខាន់ដែលមិនអាចកាត់ថ្លៃបានរបស់អ្នកអប់រំក្នុងការកសាងធនធានមនុស្សការផ្តល់ចំណេះដឹង និងបណ្តុះសីលធម៌។
លោកបានថ្លែងថា៖ «នៅក្នុងប្រទេសណា សម័យកាលណា គ្រូបង្រៀនតែងតែបានបំពេញតួនាទីសំខាន់នៅក្នុងការបណ្ដុះបណ្ដាល ការកសាងធនធានមនុស្ស ការផ្ដល់ចំណេះដឹង ការអប់រំសីលធម៌ និងគុណធម៌ដល់ជំនាន់ក្រោយ ដែលនេះគឺជាតួនាទីសំខាន់មែនទែន»។
មនុស្សគ្រប់រូបទាំងអ្នកជំនាញ អ្នកធ្វើជំនួញ អ្នកធ្វើនយោបាយតូចធំទាំងអស់ សុទ្ធតែឆ្លងកាត់ការបណ្ដុះបណ្ដាលរបស់គ្រូបង្រៀន។ ពួកគេមិនអាចត្រូវបានមើលស្រាលដល់ភារកិច្ច និងកតព្វកិច្ចរបស់ពួកគេបាននោះទេ។
យ៉ាងណាមិញ លោក ប៊ុនថង បានលើកឡើងថា ការមើលឃើញជាក់ស្ដែងនៅក្នុងសម័យកាលខ្លះ ដែលគ្រូបង្រៀនត្រូវបានផ្ដល់តម្លៃ ខណៈសម័យកាលខ្លះ ពួកគេមិនត្រូវបានឱ្យតម្លៃនោះ វាជារឿងស្ថិតក្នុងរយៈខ្លីៗនៅក្នុងសង្គមណាមួយប៉ុណ្ណោះ ដោយមិនឆ្លុះបញ្ចាំងពីទិដ្ឋភាពរួមឡើយ។
លោក ប៊ុនថង បានប្រាប់ភ្នំពេញប៉ុស្ដិ៍ថា៖ «ខ្ញុំលើកយកឧទាហរណ៍ជាក់ស្ដែងថា នៅក្នុងសម័យខ្មែរក្រហម គ្រូបង្រៀនគឺជាកម្មវត្ថុនៃការយកទៅសម្លាប់ចោល។ ចំពោះសម័យបច្ចុប្បន្ននេះ បុគ្គលជាគ្រូបង្រៀនខ្លះប្រព្រឹត្ដិមិនល្អ ហើយក៏មានការសន្និដ្ឋានជាទូទៅថា គ្រូបង្រៀនទាំងអស់សុទ្ធតែមិនល្អ។ ប៉ុន្ដែជារួម គ្រូបង្រៀននៅតែបំពេញតួនាទីសំខាន់ ទោះមានចំណុចខ្វះខាតរបស់បុគ្គលជាគ្រូបង្រៀនមួយចំនួនក៏ដោយ»។
លោកបានបញ្ជាក់ថា ករណីខ្លះទៀត ការមិនផ្ដល់តម្លៃដល់គ្រូបង្រៀននេះ ដោយសារពួកគេមានជីវភាពខ្វះខាត មិនសូវមានលុយ និងសម្ភារជាដើម នៅពេលសិស្ស ឬអាណាព្យាបាលរបស់សិស្ស ឬអ្នកដទៃមានជីវភាពធូរធារ មាននិយាយព្រងើយថា មិនចង់ធ្វើជាគ្រូបង្រៀន ដោយសារប្រាក់ចំណូលទាប។
លោកបានថ្លែងថា៖ «បើមើលពីសម្បកក្រៅ កត្ដាលុយកាក់ គ្រូបង្រៀនមិនសូវត្រូវបានផ្ដល់តម្លៃនោះទេ។ ប៉ុន្ដែបើនិយាយសីលធម៌ គុណធម៌ តួនាទី និងកតព្វកិច្ចរបស់ពួកគាត់ វាពិតជាសំខាន់ណាស់ ដែលមនុស្សម្នាក់ៗមិនអាចបំភ្លេចបានទេ»។
លោក ប៊ុនថង បានគាំទ្រចំពោះទិវារំឭកគុណគ្រូ ជាពិសេស ការធ្វើវីដេអូឃ្លីប រូបភាព កំណាព្យ ចម្រៀង និងរឿងខ្លីដែលកោតសរសើរដល់អាជីពជាគ្រូបង្រៀន ជារឿងដែលប្រជាជនគួរធ្វើ ជាជាងការប្រារឰបុណ្យអ្វីដែលមិនសំខាន់៕
