មន្រ្តីបរិស្ថាន និងសមាជិកក្រុមប្រឹក្សាក្រុងព្រះសីហនុ សម្អាតអនាម័យ នៅតាមដងផ្លូវជាតិលេខ៤ ដែលជាផ្នែកមួយនៃយុទ្ធនាការ«ផ្លូវជាតិគ្មានសំរាមប្លាស្ទិក»។ រូបថត ក្រសួងបរិស្ថាន
ភ្នំពេញៈ រដ្ឋមន្រ្តីក្រសួងបរិស្ថាន លោកអ៊ាង សុផល្លែតបានប្រកាសបើកយុទ្ធនាការសំអាតផ្លូវជាតិ ក្រោមប្រធានបទ« ផ្លូវជាតិគ្មានសំរាមប្លាស្ទិក»ចាប់ពីថ្ងៃទី១ ខែមករានេះ ដើម្បីធ្វើឱ្យផ្លូវជាតិគ្មានសំរាមប្លាស្ទិករាយប៉ាយ នៅក្នុងឆ្នាំ២០២៥នេះ។
ការប្រកាសដាក់ចេញ នូវយុទ្ធនាការសំអាតផ្លូវជាតិនេះ ត្រូវបានធ្វើឡើង បន្ទាប់ពីមានចលនាចូលរួមពីថ្នាក់ដឹកនាំ អាជ្ញាធរមូលដ្ឋាន គ្រប់លំដាប់ថ្នាក់ មន្រ្តីរាជការ លោកគ្រូអ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ នៅក្នុងសកម្មភាពសាកល្បងសំអាតតាមដងផ្លូវ នាពេលកន្លងមក ដូចជា ការអាតផ្លូវជាតិ លេខ៣, លេខ៤, លេខ៤១, និងលេខ៥១ ក្នុងគោលបំណងធ្វើឱ្យផ្លូវជាតិស្អាត គ្មានសំរាម សំណល់ប្លាស្ទិករាយប៉ាយ នៅតាមដងផ្លូវ។
លោករដ្ឋមន្រ្តីមានប្រសាសន៍ថា៖«យុទ្ធនាការសំអាតផ្លូវជាតិ នឹងចូលរួមចំណែក លើកកម្ពស់សោភ័ណភាពទីក្រុង ទីប្រជុំជននៅតាមបណ្តាផ្លូវជាតិទូទាំងប្រទេស កាន់តែស្រស់ស្អាត មានអនាម័យ ខ្យល់អាកាសស្អាត និងសណ្តាប់ធ្នាប់ល្អ ប្រកបដោយភាពទាក់ទាញ ការស់នៅប្រកបដោយផាសុខភាព និងការទាក់ទាញអ្នកវិនិយោគ និងអ្នកទេសចរណ៍មកប្រទេសកម្ពុជាកាន់តែច្រើនឡើង»។
ក្រសួងបរិស្ថានបានរៀបចំផែនការសកម្មភាព ក្នុងការអនុវត្តយុទ្ធនាការនេះ ដើម្បីសម្អាតអនាម័យបរិស្ថាន រើស និងប្រមូលសំរាមនៅតាមបណ្តាស្រុកខណ្ឌនានា នៅតាមដងផ្លូវជាតិគោលដៅ ឱ្យមានភាពស្អាត មិនមានសំរាម រាយប៉ាយនៅក្នុងឆ្នាំ២០២៥។
លោករដ្ឋមន្រ្តីក៏បានស្នើឱ្យអ្នកពាក់ព័ន្ធទាំងអស់ ទាំងវិស័យសាធារណៈ និងឯកជន រដ្ឋបាលរាជធានី ខេត្ត រដ្ឋបាលក្រុង ស្រុក ខណ្ឌ និងអាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស និងប្រជាពលរដ្ឋ រៀបចំសកម្មភាពចុះសំអាតផ្លូវជាតិ នៅតាមមូលដ្ឋានរៀងៗខ្លួន ការពង្រឹងរចនាសម្ព័ន្ធគ្រប់គ្រងសំរាម សំណល់ប្លាស្ទិក ឱ្យបានល្អ។
លោកបានស្នើឱ្យបន្តចូលរួមយុទ្ធនាការ កាត់បន្ថយការប្រើប្រាស់ប្លាស្ទិក«ថ្ងៃនេះ ខ្ញុំមិនប្រើថង់ប្លាស្ទិកទេ» និងយុទ្ធនាការ«កម្ពុជាស្អាត ខ្មែរធ្វើបាន» ឆ្ពោះទៅជាចលនា គ្រប់ទីកន្លែងស្អាត ដើម្បីជំរុញភាពស្អាតរបស់កម្ពុជាបន្ថែមទៀត គឺធ្វើឱ្យសង្គមយើងស្អាត និងប្រទេសជាតិមានបរិស្ថានស្អាត។
ក្រសួងបរិស្ថានបានបើកយុទ្ធនាការ កាត់បន្ថយការប្រើប្រាស់ប្លាស្ទិក ចេះទុកដាក់ និងញែកសំរាម តាមរយៈយុទ្ធនាការ “ថ្ងៃនេះ ខ្ញុំមិនប្រើថង់ប្លាស្ទិកទេ” មានការចូលរួមប្តេជ្ញាចិត្តពីសិស្សានុសិស្ស និងប្រជាពលរដ្ឋទូទាំងប្រទេសជាង៩,៧លានអង្គ/នាក់ និងយុទ្ធនាការ “កម្ពុជាស្អាត ខ្មែរធ្វើបាន” មានសិស្សានុសិស្ស និងប្រជាពលរដ្ឋ ចូលរួមអនុវត្តបាន ៣,៦លាន អង្គនាក់។
ក្រសួងបានលើកឡើងថា នៅក្នុងឆ្នាំ២០២៤ យុទ្ធនាការកាត់បន្ថយប្លាស្ទិកនៅកម្ពុជា បានកាត់បន្ថយការនាំចូលប្លាស្ទិកបានចំនួនជាង ៨០ភាគរយ និងកាត់បន្ថយសំរាម/ប្លាស្ទិក រាយប៉ាយតាមដងផ្លូវក្នុងខេត្តចំនួន១១ បានប្រមាណ ៨០ ភាគរយ បើធៀបនឹងឆ្នាំ ២០២៣។
ការដាក់ចេញយុទ្ធនាការសំអាតផ្លូវជាតិ« ផ្លូវជាតិគ្មានសំរាមប្លាស្ទិក»នេះ នឹងបន្តជួយ រៀបចំ «សម្អាតផ្ទះយើង»ឱ្យបានស្អាត មានអនាម័យ ដើម្បីត្រៀមចាំទទួល ភ្ញៀវទេសចរណ៍ អ្នកវិនិយោគជាតិ និងអន្តរជាតិ។
ទាក់ទងនឹងបញ្ហសំរាមនេះដែរ ប្រទេសជប៉ុនបានផ្តល់ជំនួយរថយន្តប្រមូលសំរាម១០គ្រឿងបន្ថែមទៀតកាលពីថ្ងៃទី២៣ ខែធ្នូ កន្លងមក ដើម្បីគាំទ្រដល់ភាពស្អាតរបស់កម្ពុជា។ រថយន្តទាំងនេះ នឹងត្រូវប្រើប្រាស់ ដើម្បីពង្រឹងការប្រមូល និងដឹកជញ្ចូនសំរាមទៅចាក់ចោលនៅទីលានឱ្យស្អាត និងទាន់ពេលវេលានៅក្នុងរដ្ឋបាលក្រុងស្រុកចំនួន៧។ ជប៉ុនក៏ធ្លាប់បានប្រគល់រថយន្តដឹកសំរាម២០គ្រឿងរួចហើយដល់ក្រសួងបរិស្ថាននាពេលកន្លងមក។
ក្រសួងបរិស្ថាន នាពេលកន្លងមកនេះ ក៏បានផ្តល់ឡដុតសំរាម ចំនួន ៦៣គ្រឿង រថយន្ត៨៨គ្រឿង ម៉ូតូកង់បី ១៦១គ្រឿង និងធុងសំរាមរាប់ពាន់ធុង ដល់រដ្ឋបាលឃុំ សាលារៀន មណ្ឌលសុខភាព និងវត្តអារាម មានធុងដាក់សំរាមឱ្យបានត្រឹមត្រូវ មានភាពស្អាត មិនមានសំរាមរាយប៉ាយ ធ្វើឱ្យប្រសើរឡើង នូវគុណភាពបរិស្ថាននៅក្នុងមូលដ្ឋាន។
កម្ពុជាបានបង្កើតសំរាមប្រមាណជិត ៤លានតោន នៅក្នុងមួយឆ្នាំ ពោលគឺនៅទូទាំងប្រទេសមានសំរាម ជាង១ម៉ឺនតោនក្នុងមួយថ្ងៃៗ។ ក្នុងនោះរាជធានីភ្នំពេញបានបង្កើតសំរាមរហូតដល់ទៅ៥ពាន់តោនក្នុង១ថ្ងៃ៕
