ម្ដាយនិងទារកអាយុ៧ខែ ត្រូវបានជួយសង្គ្រោះនៅខេត្តព្រះវិហារ កាលពីថ្ងៃទី២ ខែមករា។ មន្ទីរសុខាភិបាលខេត្តព្រះវិហារ
វាអាចចាត់ទុកថា ជាការសង្គ្រោះទារកលើកទី១ ប្រចាំឆ្នាំ២០២៥នេះ ដែលក្រុមគ្រូពេទ្យមណ្ឌលសុខភាពកោះកេរ្តិ៍ ក្នុងស្រុកគូលែន ខេត្តព្រះវិហារ បានជួយសង្គ្រោះស្ត្រីអាយុ ១៨ ឆ្នាំម្នាក់ ដែលបានសម្រាលកូនអាយុ ៧ ខែ កាលពីថ្ងៃទី២ ខែមករានេះ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានឲ្យដឹងនៅថ្ងៃនេះថា នៅថ្ងៃទី២ ខែមករា ស្ត្រីម្នាក់ឈ្មោះ ចេន អាន អាយុ ១៨ឆ្នាំ រស់នៅក្នុងភូមិម្រេចថ្មី ឃុំស្រយ៉ង់ ស្រុកគូលែន បានឈឺពោះសម្រាលកូនដំបូងនៅផ្ទះរបស់គាត់ ប៉ុន្តែផ្ទៃពោះរបស់នាងទើបតែបាន ២៨សប្ដាហ៍ ដែលស្មើនឹង ៧ខែ។
ការសម្រាលនេះកើតឡើងបន្ទាប់ពីស្ត្រីរួបនេះបានបត់ជើងតូច ហើយមានអារម្មណ៍ថាឈឺពោះ។ ក្រុមគ្រួសារក៏បានហៅគោយន្តដើម្បីដឹកស្ត្រី រូបនេះទៅមណ្ឌលសុខភាព និងបានរាយការណ៍ទៅក្រុមទ្រទ្រង់សុខភាពភូមិ (VHSG)។ ប៉ុន្តែ ដោយសារផ្ទះរបស់គាត់នៅឆ្ងាយពេក ស្ត្រីរូបនោះក៏បានសម្រាលនៅតាមផ្លូវតែម្ដង។
ក្រោយពីទទួលបានព័ត៌មាននេះពីក្រុមទ្រទ្រង់សុខភាពភូមិភ្លាម ប្រធានមណ្ឌលសុខភាពកោះកេរ្តិ៍ បានបញ្ជូនរថយន្តគិលានសង្គ្រោះ និងឆ្មបដើម្បីទៅទទួលស្ត្រីនោះ នៅពេលពួកគេធ្វើដំណើរលើគោយន្តតាមផ្លូវ។
លោកស្រី ឱ វណ្ណឌីន បន្តថា ទារកដែលទើបកើតនេះ មានទម្ងន់តែ ១គីឡូក្រាមប៉ុណ្ណោះ ដោយសារតែកើតមិនគ្រប់ខែ។ ក្រោយពេលបានជួយសង្គ្រោះម្ដាយនិងទារក តាមរយៈការទម្លាក់ស្បូន និងសម្អាតស្បូន ប្រធានមណ្ឌលសម្រេចចិត្តបញ្ជូនទាំងម្ដាយ និងទារក ទៅមន្ទីរពេទ្យគន្ធបុប្ផា នៅខេត្តសៀមរាប ដើម្បីបន្តតាមដាន និងព្យាបាល។
លោកស្រីថ្លែងថា៖ «ទង្វើដ៏ល្អប្រពៃនេះ គឺជាការបើកទំព័រឆ្នាំថ្មី២០២៥ ដ៏ល្អណាស់ និងជាការបញ្ជាក់ពីទឹកចិត្តគ្រូពេទ្យចំពោះអ្នកមានធុរ: និងមានតម្រូវការជួយសង្គ្រោះបែបនេះផងដែរ»។
លោកស្រីក៏បានកោតសរសើរនូវការប្រតិបត្តិរបស់ក្រុមគ្រូពេទ្យមណ្ឌលសុខភាពកោះកេរ្តិ៍ ដែលបានយកចិត្តទុកដាក់ជួយសង្គ្រោះ និងមានក្រមសីលធម៌ខ្ពស់ ក្នុងការខិតខំជួយសង្គ្រោះទាំងម្តាយ និងទារក និងបានបញ្ជូនពួកគេទៅដល់មន្ទីរពេទ្យគន្ធបុប្ផា នៅខេត្តសៀមរាប ដោយសុខសុវត្ថិភាព៕
