កិច្ចប្រជុំកំពូលស្ដីពីបញ្ញាសិប្បនិម្មិត ត្រូវបានរៀបចំឡើងនៅទីក្រុងប៉ារីស ថ្ងៃទី ១០-១១ ខែកុម្ភៈ ឆ្នាំ ២០២៥។ រូបថត សហការី
ភ្នំពេញ៖ នៅក្នុងការវិវត្តន៍នៃបញ្ញាសិប្បនិម្មិត (AI) កម្ពុជាកំពុងចូលរួមយ៉ាងសកម្មក្នុងការពិភាក្សាអន្តរជាតិស្តីពីការអភិវឌ្ឍន៍ប្រកបដោយការទទួលខុសត្រូវ និងការអនុវត្តបច្ចេកវិទ្យានេះ ដោយស្វែងរកកិច្ចសហការដើម្បីធានាថាអត្ថប្រយោជន៍ពី (AI) ត្រូវបានសម្រេចយ៉ាងពេញលេញ។
នៅក្នុងព្រឹត្តិការណ៍ធំៗចំនួនពីរក្នុងខែកុម្ភៈ ឆ្នាំ២០២៥ រដ្ឋមន្ត្រីកម្ពុជាពីរូប បានលើកឡើងពីការប្តេជ្ញាចិត្តក្នុងការជំរុញអភិវឌ្ឍ AI ខណៈពេលដែលធានាបរិយាប័ន្នភាពក្នុងវិស័យអប់រំ និងអភិបាលកិច្ច។
នៅថ្ងៃទី ១០-១១ ខែកុម្ភៈ ឆ្នាំ ២០២៥ រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត បានចូលរួម «កិច្ចប្រជុំកំពូលស្ដីពីបញ្ញាសិប្បនិម្មិត» ទីក្រុងប៉ារីស ប្រទេសបារាំង ជាការជួបជុំជាសាកលរបស់ប្រតិភូជាង ១៥០០ នាក់មកពី ១០០ ប្រទេស ក្រុមហ៊ុនបច្ចេកវិទ្យាធំៗ និងស្ថាប័នសិក្សា។
យោងតាមក្រសួងប្រៃសណីយ៍ បានឱ្យដឹងថា៖ «កិច្ចប្រជុំកំពូលដែលបានធ្វើឡើងតាមការអញ្ជើញរបស់ប្រធានាធិបតីបារាំង Emmanuel Macron មានគោលបំណងប្រមូលផ្តុំភាគីពាក់ព័ន្ធទាំងអស់ដើម្បីពិភាក្សាអំពីឱកាស និងបញ្ហាប្រឈមនៃបញ្ញាសិប្បនិមិត្ត ដោយផ្តោតលើប្រធានបទសំខាន់ៗចំនួនប្រាំគឺ នវានុវត្តន៍ និងវប្បធម៌ អនាគតនៃវិស័យការងារ បញ្ញាសិប្បនិម្មិតដែលគួរឱ្យទុកចិត្ត បញ្ញាសិប្បនិម្មិតបម្រើប្រយោជន៍សាធារណៈ និងអភិបាលកិច្ចកម្រិតសាកលលើបញ្ញាសិប្បនិម្មិត»។
នៅក្នុងកិច្ចប្រជុំកំពូល អ្នកពាក់ព័ន្ធបានពិភាក្សាអំពីបញ្ហាសំខាន់ៗ រួមមានៈ ការធ្វើនិយ័តកម្មនិងអភិបាលកិច្ចបញ្ញាសិប្បនិម្មិតដើម្បីបញ្ចៀសភាពអវិជ្ជមាន ធានាអត្ថប្រយោជន៍ AI គ្រប់វិស័យ នវានុវត្តន៍ដើម្បីជំរុញប្រព័ន្ធអេកូឡូស៊ីក្នុងការអភិវឌ្ឍថ្នាល កម្មវិធី និងប្រព័ន្ធផ្សេងៗមានស្តង់ដានិងលក្ខណៈបើកចំហរ ការប្រើប្រាស់ថាមពលប្រកបដោយចីរភាព និងកិច្ចសហការរវាងភាគីពាក់ព័ន្ធទាំងអស់។
ប្រទេសកម្ពុជាបានចូលរួមជាមួយប្រជាជាតិផ្សេងទៀតបានគាំទ្រលើ «សេចក្ដីថ្លែងការណ៍ស្ដីពីបញ្ញាសិប្បនិម្មិតប្រកបដោយបរិយាបន្ននិងចីរភាពសម្រាប់មនុស្សជាតិនិងភពផែនដី»។
ទោះយ៉ាងណាក៏ដោយ មិនមែនអ្នកចូលរួមទាំងអស់ចែករំលែកទស្សនៈដូចគ្នានោះទេ។ សហរដ្ឋអាមេរិក និងចក្រភពអង់គ្លេសមិនគាំទ្រសេចក្តីថ្លែងការណ៍នេះទេ ដោយបញ្ជាក់ថា ការអភិវឌ្ឍបច្ចេកវិទ្យាបញ្ញាសិប្បនិមិ្មតមិនគួរមានបទប្បញ្ញត្តិរិតត្បិតទេ ពីព្រោះការរិតត្បិតនេះអាចនឹងក្លាយជាឧបសគ្គក្នុងជំរុញនវានុវត្តន៍ និងឈានដល់ការសម្លាប់ក្រុមហ៊ុនបច្ចេកវិទ្យាផងដែរ។
ទោះបីជាមានទស្សនៈខុសគ្នាទាំងនេះក៏ដោយ ការពិភាក្សាក្នុងកិច្ចប្រជុំកំពូលបានកំណត់ការបន្តកិច្ចសហប្រតិបត្តិការរវាងរដ្ឋាភិបាល អាជីវកម្ម និងសង្គមស៊ីវិលក្នុងការរៀបចំអនាគតនៃបច្ចេកវិទ្យា AI។
ទន្ទឹមនឹងនេះ កិច្ចខិតខំប្រឹងប្រែងស្របគ្នាកំពុងដំណើរការដើម្បីបញ្ចូល AI ទៅក្នុងកំណែទម្រង់អប់រំរបស់ប្រទេស។
កាលពីថ្ងៃទី១១ ខែកុម្ភៈ ឆ្នាំ២០២៥ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាកម្ពុជា បានជួបពិភាក្សាការងារជាមួយលោក Olivier Brandouy អគ្គនាយកនៃ France Éducation International (FEI) នៅស្ថានទូតកម្ពុជានៅទីក្រុងប៉ារីស។
ការពិភាក្សារបស់ពួកគេផ្តោតលើការពង្រឹងទំនាក់ទំនងផ្នែកអប់រំរវាងកម្ពុជា និងបារាំង ដោយផ្តោតជាក់លាក់លើការអប់រំ AI និងឌីជីថល។
លោក ណារ៉ុន បានសរសេរនៅលើហ្វេសប៊ុកថា៖ «ការអប់រំឌីជីថល ក្នុងកំណែទម្រង់វិស័យអប់រំ អាចទទួលបានកិច្ចសហប្រតិបត្តិការជាមួយនឹង Expertise France និង France Education Internationale។ ខ្ញុំបានស្នើឱ្យក្រុមការងារទាំងពីរភាគីសិក្សាលើកម្មវិធីបណ្តុះបណ្តាលនៅឧត្តមសិក្សាក្នុងវិស័យបញ្ញាសិប្បនិម្មិត ដើម្បីបង្កើតនូវកម្មវិធីកិច្ចសហប្រតិបត្តិការពហុភាគីក្នុងការជំរុញ និងលើកកម្ពស់វិស័យនេះឱ្យកាន់តែមានប្រសិទ្ធភាព»។
FEI ជាអង្គការរបស់បារាំងដែលគាំទ្រការអភិវឌ្ឍន៍វិស័យអប់រំទូទាំងពិភពលោក មានគោលបំណងផ្តល់ការបណ្តុះបណ្តាល ការគាំទ្រ និងការច្នៃប្រឌិតក្នុងវិស័យ ដូចជា ការរចនាកម្មវិធីសិក្សា និងការបណ្តុះបណ្តាលគ្រូជាដើម។
ជាមួយនឹងប្រទេសកម្ពុជារៀបចំធ្វើជាម្ចាស់ផ្ទះនៃកិច្ចប្រជុំកំពូល ហ្វ្រង់កូហ្វូនី នៅឆ្នាំ ២០២៦ ភាពជាដៃគូសន្យាថានឹងពង្រឹងទាំងគុណភាពនៃការអប់រំជាភាសាបារាំង និងការបណ្តុះបណ្តាល AI នៅក្នុងស្ថាប័នកម្ពុជា។
គួរកត់សម្គាល់ថា កិច្ចពិភាក្សារួមមានផែនការបង្កើតកម្មវិធីសញ្ញាបត្រ Double Diplôme ត្រូវបានទទួលស្គាល់ទាំងនៅក្នុងប្រទេសកម្ពុជា និងប្រទេសបារាំង ដែលអាចជួយផ្សារភ្ជាប់គម្លាតរវាងប្រព័ន្ធអប់រំរបស់ប្រទេសទាំងពីរ។
លោក ណារ៉ុន ក៏បានសង្កត់ធ្ងន់លើតម្រូវការបន្ទាន់ក្នុងការរួមបញ្ចូលការបណ្តុះបណ្តាល AI សម្រាប់គ្រូបង្រៀន ដែលអាចធ្វើឱ្យប្រសើរឡើងនូវគុណភាពនៃការសិក្សានៅទូទាំងប្រទេស។
លោកបានបន្តថា៖ «ការរីកចម្រើនទាំងនេះគឺជាផ្នែកមួយនៃគោលដៅទូលំទូលាយរបស់ប្រទេសកម្ពុជាក្នុងការធ្វើទំនើបកម្មវិស័យអប់រំ និងរៀបចំកម្លាំងពលកម្មរបស់ខ្លួនសម្រាប់បញ្ហាប្រឈមនៃយុគសម័យឌីជីថល»។
លោករដ្ឋមន្ដ្រី បាននិយាយថា លោក Brandouy បានលើកឡើងពីសារៈសំខាន់នៃវិទ្យាសាស្ត្រ និងបច្ចេកវិទ្យា។ ក្នុងន័យនេះ ការពង្រឹងកិច្ចសហប្រតិបត្តិការលើវិស័យបញ្ញាសិប្បនិមិត្ត គឺជាអាទិភាពមួយ ដែលនឹងត្រូវបានពិចារណាសម្រាប់កិច្ចសហប្រតិបត្តិការរវាងកម្ពុជា និងបារាំង។
កម្ពុជាត្រូវពង្រឹងអធិការកិច្ចរបស់ខ្លួន ព្រោះអធិការកិច្ចសាលាមានសារៈសំខាន់ណាស់ក្នុងការសម្រេចបាននូវគោលដៅអប់រំរបស់ប្រទេស។
លោក ណារ៉ុន បានថ្លែងថា៖ «ការបណ្តុះបណ្តាលអធិការអប់រំ ការបញ្ចូលបញ្ញាសិប្បនិម្មិតទៅក្នុងការអប់រំ និងការបណ្តុះបណ្តាលគ្រូឱ្យប្រើប្រាស់ AI ប្រកបដោយប្រសិទ្ធភាព គឺជាកិច្ចការបន្ទាន់ដែលត្រូវតែដោះស្រាយ ដើម្បីធានាគុណភាពនៃការអប់រំស្របតាមការអភិវឌ្ឍន៍សេដ្ឋកិច្ចសង្គម»៕
