ទិដ្ឋភាពដងស្ទឹងសៀមរាបនាពេលបច្ចុប្បន្ន។ រូបថត ហុង រស្មី
សៀមរាប៖ ដងស្ទឹងសៀមរាប ជាស្ទឹងសិប្បនិម្មិត ដែលហូរកាត់កណ្ដាលក្រុងសៀមរាប នឹងត្រូវបានកែលម្អជាថ្មីដើម្បីផ្ដល់ជាទីកន្លែងកម្សាន្ដដល់ភ្ញៀវទេសចរជាតិ និងអន្ដរជាតិ។
លោក អ៊ឹង គីមលាង អភិបាលរងខេត្ដសៀមរាប បានថ្លែងថា ឆ្នាំ២០២៥នេះ រដ្ឋបាលខេត្ដនឹងធ្វើការស្ដាស្ទឹងសៀមរាប ក្រោមកម្ចីរបស់រដ្ឋាភិបាលកូរ៉េ ដែលមិនរងនូវបញ្ហាទឹកជំនន់ទៀតនោះទេ។
លោកបានបញ្ជាក់ថា បច្ចុប្បន្ននេះ អាកាសយានដ្ឋានអន្ដរជាតិក្រុងសៀមរាប ចរាចរការហោះហើរ ២៥ជើងក្នុងមួយថ្ងៃ ដោយភ្ញៀវទេសចរនៅចុងឆ្នាំ២០២៤ និងដើមឆ្នាំ២០២៥ មានចំនួនចន្លោះពីមធ្យមប្រមាណ ៣៥០០ នាក់រៀងរាល់ថ្ងៃ។
.jpg)
យ៉ាងណាមិញ លោក គីមលាង ទទួលស្គាល់ថា៖ «ទោះបីជាមានកំណើនភ្ញៀវទេសចរយ៉ាងណាក៏ដោយ ក៏វាមិនទាន់អាចឆ្លើយតបទៅនឹងចំនួនភ្ញៀវកាលពីមិនទាន់ជួបវិបត្ដិជំងឺរាតត្បាតសកលនោះទេ»។
នៅក្នុងការចូលរួមចំណែកទាក់ទាញភ្ញៀវទេសចរ ជាគោលដៅសក្ដានុពលទាំងភ្ញៀវជាតិ និងអន្ដរជាតិ រដ្ឋបាលខេត្ដសៀមរាបមានផែនការកែច្នៃដងស្ទឹងសៀមរាបប្រវែង ៧គីឡូម៉ែត្រជារមណីយដ្ឋានទេសចរណ៍។
លោកបានថ្លែងថា៖ «ជាមួយគម្រោងវិនិយោគប្រមាណ ១០លានដុល្លារ រៀងរាល់មួយគីឡូម៉ែត្រនៃដងស្ទឹងសៀមរាប នឹងត្រូវបានបង្កើតសកម្មភាពទេសចរណ៍ប្លែកៗខុសពីគ្នា។ ប្រសិនបើគម្រោងនេះលេចជារូបរាងនាខាងមុខ វានឹងអាចទាក់ទាញទាំងភ្ញៀវជាតិ និងអន្ដរជាតិមកលេងកាន់តែច្រើន»។
ស្ទឹងសៀមរាប ត្រូវបានកែលម្អពីរដងរួចមកហើយ ដោយដំណាក់កាលទីពីរ ធ្វើឡើងនៅខែឧសភា ឆ្នាំ២០២២ បញ្ចប់នៅពាក់កណ្តាលឆ្នាំ២០២៤ ក្រោមជំនួយរបស់ប្រទេសកូរ៉េ។
ការអភិវឌ្ឍន៍ដំណាក់កាលទីពីរ ត្រូវបានធ្វើឡើងចាប់ពីស្ពានផ្លូវក្រវាត់ក្រុង ឬស្ពានគង់ម៉ុច ទៅដល់ចុងភូមិអារញ្ញ សង្កាត់សៀមរាប ក្រុងសៀមរាប ដែលមានប្រវែងជិត៥ពាន់ម៉ែត្រ ដោយការកែលម្អមាត់ស្ទឹង ការសង់ស្ពានថ្មថ្មីចំនួន៣ទីតាំង ការស្ថាបនាផ្លូវបេតុង នៅម្ខាងស្ទឹង ការស្ថាបនាប្រព័ន្ធធារាសាស្ត្រ និងការស្ថាបនាទំនប់បង្ហៀរទឹក។
គម្រោងកែលម្អស្ទឹងនេះ ជាការលើកកម្ពស់សោភ័ណភាពស្ទឹងប្រវត្តិសាស្ត្រសៀមរាប និងជាទំនប់ការពារទឹកជំនន់ផងដែរ។
លោក Matti Kummu មកពីនាយកដ្ឋានសំណង់បរិស្ថានរបស់សាកលវិទ្យាល័យ Aalto និងលោក Terry Lustig អ្នកស្រាវជ្រាវឯករាជ្យបានបោះពុម្ពផ្សាយការស្រាវជ្រាវរបស់ពួកគេ «តើស្ទឹងសៀមរាបជាទន្លេមែនទេ?» ក្នុងឆ្នាំ ២០០៥។
បើតាមពួកគេ បានឱ្យដឹងថា ស្ទឹងសៀមរាប ដែលដើមឡើយជាប្រឡាយសិប្បនិម្មិត ត្រូវបានសាងសង់ឡើងដោយមានប្រភពចេញពីទន្លេពួកក្នុងសម័យអង្គរ ដើម្បីគាំទ្រដល់ប្រព័ន្ធគ្រប់គ្រងទឹកក្នុងតំបន់។
អ្នកស្រាវជ្រាវ បានបង្ហាញនៅក្នុងការស្រាវជ្រាវនោះថា៖ «យូរៗទៅ វាបានវិវត្តទៅជាទន្លេជាមួយនឹងប្រព័ន្ធអេកូឡូស៊ីផ្ទាល់ខ្លួនរបស់វា»។
ខណៈដែលវាខ្វះតំបន់ទំនាបលិចទឹកធម្មជាតិដូចទន្លេ វាដើរតួនាទីយ៉ាងសំខាន់ក្នុងធារាសាស្ត្ររបស់តំបន់ ដោយដឹកនាំទឹកពីភ្នំគូលែនទៅបឹងទន្លេសាប។
ទោះបីជាមានប្រភពដើមជាប្រឡាយសិប្បនិម្មិតក៏ដោយ ក៏ស្ទឹងសៀមរាបបានក្លាយជាផ្នែកសំខាន់មួយនៃបរិស្ថានក្នុងតំបន់ ហើយឥឡូវនេះត្រូវបានទទួលស្គាល់ថាជាស្ទឹងជាជាងគ្រាន់តែជាប្រឡាយ៕
