លោក ថង ប៊ុនថេន ហៅខ្លួនឯងជា សក្ខី ភគវន្ត ជាវាគ្មិនសមាគម ចូលរួមជាមួយរដ្ឋមន្ដ្រីក្រសួងធម្មការ និងសាសនា។ រូបថត សហការី
ភ្នំពេញ៖ ក្រសួងមហាផ្ទៃសម្រេចលុបឈ្មោះសមាគមទេវ សក្ខី ភគវន្ត ចេញពីបញ្ជីសមាគមនៅក្រសួងមហាផ្ទៃ នៅថ្ងៃទី៤ ខែកុម្ភៈនេះ។
យោងតាមសេចក្ដីប្រកាសដែលចុះហត្ថលេខាដោយលោក ស សុខា រដ្ឋមន្ដ្រីក្រសួងមហាផ្ទៃ បានឱ្យដឹងថា៖ «សមាគមទេវ សក្ខី ភគវន្ដ ត្រូវបានលុបចេញពីបញ្ជីសមាគមនៅក្រសួងមហាផ្ទៃ តាមបញ្ញត្ដិមាត្រា ៣០ នៃច្បាប់ស្ដីពីសមាគម និងអង្គការមិនមែនរដ្ឋាភិបាល»។
ការលុបចេញពីបញ្ជីសមាគមនេះ ត្រូវបានធ្វើឡើងបន្ទាប់ពីមានប្រតិកម្មយ៉ាងខ្លាំងក្លាពីសំណាក់សម្ដេចព្រះសង្ឃរាជទាំងពីរគណៈ ព្រះសង្ឃ និងពុទ្ធបរិស័ទទាំងក្នុងប្រទេស និងក្រៅប្រទេស តាមរយៈការចេញសេចក្តីថ្លែងការណ៍ថ្កោលទោសជាបន្តបន្ទាប់ក្នុងរយៈពេលកន្លងមក។
កាលពីល្ងាចថ្ងៃទី២៩ ខែមករា បុគ្គលដែលបានហៅខ្លួនឯងជា សក្ខី ភគវន្ត ឈ្មោះពិត ថង ប៊ុនថេង បានព្រមទទួលកំហុស និងចេញមុខធ្វើការសុំទោសជាសាធារណៈចំពោះការប្រើប្រាស់ពាក្យពេចន៍ប៉ះពាល់ដល់ព្រះសង្ឃ ព្រះត្រៃបិដក និងព្រះពុទ្ធសាសនា។
ត្រឹមងារវាគ្មិនរបស់សមាគម លោក ថង ប៊ុនថេង ព្រមទទួលស្គាល់នូវកំហុសឆ្គង និង យល់ព្រមពោលពាក្យសុំទោសជាសាធារណៈ យល់ព្រមលុបវីដេអូដែលបានផ្សព្វផ្សាយដែលប៉ះពាល់កន្លងមក ចេញពីបណ្តាញសង្គម ខណៈក្រសួងមហាផ្ទៃនឹងពិនិត្យមើលនូវនីតិវិធីតាមផ្លូវច្បាប់ ចំពោះសកម្មភាពប្រតិបត្តិរបស់សមាគម។
លោក ប៊ុនថេង បានសុំទោសជាសាធារណៈចំពោះកំហុសឆ្គង ដែលបានលើកឡើងថា (ព្រះត្រៃបិដកមិនគ្រប់ទឹក) និងពាក្យ (អ្នកបួសជាទម្ងន់របស់អ្នកស្រុក) ឈប់ប្រើសំពត់ពានា សម្រេចលប់វីដេអូណាដែលប៉ះពាល់ទឹកចិត្ដពុទ្ធបរិស័ទ និងព្រះសង្ឃ៕
