ក្មេងៗសិស្សសាលាលេងបោះអង្គុញ។ Keo Chanbo
ក្រសួងអប់រំជំរុញឲ្យគ្រឹះស្ថានសិក្សាសាធារណៈ និង ឯកជនលើកទឹកចិត្តឲ្យកុមារនិងសិស្សានុសិស្សលេងល្បែងនិងរបាំប្រជាប្រិយខ្មែរក្នុងអំឡុងសង្ក្រាន្តតាមសាលារៀន និងក្នុងពេលបុណ្យចូលឆ្នាំខ្មែរខាងមុខនេះ។ អ្នកវិភាគយល់ថា ល្បែងនិងរបាំប្រជាប្រិយទាល់តែមានការដឹកនាំទើបមានការចូលរួម។
នៅក្នុងសេចក្ដីណែនាំថ្ងៃទី៣១ ខែមីនា នេះ លោក ហង់ជួន ណារ៉ុន រដ្ឋមន្ត្រីក្រសួងអប់រំ បានលើកទឹកចិត្តឲ្យគ្រឹះស្ថានអប់រំនានាឲ្យចូលរួមរួមអភិរក្ស និងលើកកម្ពស់វប្បធម៌ ជំនឿ ទំនៀមទម្លាប់ ប្រពៃណីជាតិខ្មែរឱ្យបានគង់វង្ស និងរីកចម្រើន ព្រមទាំងចៀសវាងបាតុភាពផ្សេងៗ។
លោក ហង់ជួន ណារ៉ុន ស្នើឲ្យគ្រប់សាលា «បង្កលក្ខណៈឱ្យកុមារ សិស្សានុសិស្ស និងយុវជន លេងល្បែង និងរបាំប្រជាប្រិយខ្មែរនៅមុន និង ក្នុងឱកាសបុណ្យចូលឆ្នាំប្រពៃណីជាតិ ដូចជារបាំរាំវង់ រាំក្បាច់ សារ៉ាវ៉ាន់ របាំត្រុដិ និងល្បែងប្រជាប្រិយ ខ្មែរមួយចំនួន ដូចជាល្បែងបោះអង្គញ់ ចោលឈូង ដណ្តើមស្លឹកឈើ ទាញព្រ័ត្រជាដើម»។
លោកបន្តថា៖ «ត្រូវហាមឃាត់ និងទប់ស្កាត់រាល់ល្បែងទាំងឡាយណា ដែលមិនមែនជាល្បែង ឬរបាំប្រជាប្រិយខ្មែរ និងល្បែងមួយចំនួនដែលប្រឈមនឹងហានិភ័យ អសុវត្ថិភាព និងគ្រោះថ្នាក់ ដូចជាដុត ឬបាញ់ផាវ បាញ់ទឹក ជះទឹក លាប ម្សៅ ជាដើម»។
ពិធីបុណ្យចូលឆ្នាំខ្មែរនឹងប្រព្រឹត្តទៅពីថ្ងៃទី១៤ដល់ទី១៦ ខែមេសា ប៉ុន្តែ នៅតាមសាលារៀននិងមហាវិទ្យាល័យនានា ពិធីជប់លៀងចូលឆ្នាំ ឬ ហៅថាសង្ក្រាន្តតាមសាលា នឹងចាប់ផ្ដើមនៅសប្ដាហ៍ក្រោយនេះ។
លោក ឈត ប៊ុនថង អ្នកជំនាញផ្នែកអប់រំ វប្បធម៌ និងទេសចរណ៍ បានប្រាប់ប៉ុស្តិ៍ថា វាជារឿងល្អដែលក្រសួងចេញការណែនាំទាំងពេលនេះ និងជាបន្តបន្ទាប់ គ្រាន់តែថា ការអនុវត្តគឺជារឿងផ្សេង ពីព្រោះថា មិនថាសេចក្ដីណែនាំ ការអំពាវនាវ ប្រសិនបើគ្មានការបង្ខំ មិនសូវមានអ្នកអនុវត្តទេ។ លោកថា សូម្បីតែច្បាប់ដែលមានលក្ខណៈចាប់បង្ខំ ក៏ការអនុវត្តនៅតែពិបាក។
លោកថ្លែងថា៖ «ការអំពាវនាវក៏អំពាវនាវទៅ ការពន្យល់ក៏ចេះតែបន្តទៅ តែអ្នកណាធ្វើបានប៉ុនណាគឺទៅតាមលទ្ធភាពដែលយើងអាចធ្វើបាន។ ខ្ញុំគាំទ្រមួយរយភាគរយទៅលើការណែនាំរបស់ក្រសួងអប់រំ យុវជន និងកីឡា ក្រសួងវប្បធម៌ និងក្រសួងដទៃទៀតដែលតែងធ្វើការអំពាវនាវណែនាំជារៀងរាល់ឆ្នាំ។ បើសិនប្អូនៗងាកមកលេងល្បែងប្រជាប្រិយខ្មែរ វាជារឿងល្អព្រោះវាជាមរតកវប្បធម៌អរូបិយរបស់ខ្មែរយើង ដែលនៅក្នុងមនុស្ស បើមនុស្សអត់លេងទេ អត់ផ្សព្វផ្សាយទេ វានឹងបាត់បង់»។
យ៉ាងណាក៏ដោយ លោកថា ការលេងល្បែងប្រជាប្រិយនេះទាល់តែមានការរៀបចំ និងការនាំលេង។ បើពឹងលើតែក្មេងៗលេងខ្លួនឯងមិនសូវមានភាពផុសផុលទេ។
លោកបន្តថា៖ «សព្វថ្ងៃនេះប្អូនយើង យើងឃើញហើយ លេងតែស្មាតហ្វូន បាញ់ទឹក ប៉ាតម្សៅ ស៊ីផឹក រាំ។ អីចឹង ការលេងល្បែងប្រជាប្រិយ វាអាចមិនសូវគគ្រឹកគគ្រេង។ ដូច្នេះការរៀបចំលេងល្បែងប្រជាប្រិយត្រូវមានកន្លែងសមរម្យ មានអ្នកគ្រប់គ្រង ទើបអាចមានការលេងបានខ្លះ។ បើគ្រាន់តែចេញសេចក្ដីណែនាំ ហើយមិនមានការដឹកនាំទេ វាគ្រាន់តែណែនាំឲ្យតែពីរោះស្ដាប់»៕
