ជនជាតិចិន ៣នាក់ និងភូមា ២នាក់ ត្រូវបានចាប់ខ្លួនពាក់ព័ន្ធនឹងការជួញដូរគ្រឿងញៀន ១០១គីឡូក្រាម។ មន្ទីរប្រឆាំងគ្រឿងញៀន
មន្ទីរប្រឆាំងគ្រឿងញៀនបង្ក្រាបករណីជួញដូរគ្រឿងញៀន ក្នុងករណីពីរដាច់ដោយឡែកពីគ្នា រឹបអូសថ្នាំជាង ១២៤គីឡូក្រាម នៅរាជធានីភ្នំពេញ និងខេត្តស្វាយរៀង និងឃាត់ខ្លួនជនជាតិចិន ភូមា និងខ្មែរសរុប៨នាក់។
មន្ទីរប្រឆាំងគ្រឿងញៀនបានឲ្យដឹងនៅថ្ងៃទី៣១ ខែមីនានេះថា កាលពីថ្ងៃទី២៦ ខែមីនា កម្លាំងជំនាញ ក១ នៃមន្ទីរប្រឆាំងគ្រឿងញៀន ដឹកនាំដោយលោកឧត្តមសេនីយ៍ទោ អ៊ិន សុង នាយករងមន្ទីរ សហការជាមួយកម្លាំងជំនាញនៃស្នងការដ្ឋាននគរបាលរាជធានីភ្នំពេញ ខេត្តព្រះសីហនុ សម្របសម្រួលពីព្រះរាជអាជ្ញានៃ បានស្រាវជ្រាវនិងបង្ក្រាបក្រុមឧក្រិដ្ឋជនគ្រឿងញៀន ចាប់ខ្លួនជនសង្ស័យចំនួន ៥នាក់ ដែលមានជនជាតិភូមា ២នាក់ និងជនជាតិចិន ៣នាក់។
ក្នុងប្រតិបត្តិការនេះ សមត្ថកិច្ចរឹបអូសបានគ្រឿងញៀនសរុបទម្ងន់ជាង ១០១ គីឡូក្រាម ដែលមានប្រភពមកពីតំបន់ត្រីកោណមាស ក្នុងគោលបំណងនាំបន្តទៅប្រទេសទី៣ តាមលម្ហសមុទ្រ។ សមត្ថកិច្ចមិនបានបញ្ជាក់អំពីប្រភេទគ្រឿងញៀនទាំងនេះទេ។ ជនសង្ស័យ និងវត្ថុតាង ត្រូវបញ្ជូនទៅកាន់អយ្យការអមសាលាដំបូងរាជធានីភ្នំពេញដើម្បីបន្តនីតិវិធី។
ករណីដាច់ដោយឡែកមួយទៀត ចៅក្រមស៊ើបសួរនៃអយ្យការអមសាលាដំបូងរាជធានីភ្នំពេញ នៅថ្ងៃទី៣០ ខែមីនា សម្រេចឃុំខ្លួនជនត្រូវចោទ៣នាក់ ពាក់ព័ន្ធនឹងការជួញដូរ និងរក្សាទុកគ្រឿងញៀន ២៣គីឡូក្រាម មានទាំងកេតាមីន និង MDMA ខណៈជនសង្ស័យ៤នាក់ទៀតកំពុងគេចខ្លួន។
ក្រុមឧក្រិដ្ឋជនបានប្រព្រឹត្តបទល្មើសនៅទីក្រុងភ្នំពេញ និង ខេត្តព្រះសីហនុ ពីខែមករា ដល់ថ្ងៃទី២២ ខែមីនា៕
