កញ្ញា ម៉េង ហ្សីយី ដែលដើរតួជាយីសាក្នុងរឿង «វត្ដត្រកូល ៣តំណរ» «Three Lines of Reincarnation» ដែលថតនៅខេត្តសៀមរាបថ្មីៗនេះ បានបង្ហោះនៅលើ Instagram របស់នាងពីភូមិកំពង់ភ្លុក និងប្រាសាទអង្គរវត្ត។ រូបថត Instagram
ភ្នំពេញ៖ ក្រសួងវប្បធម៌ និងវិចិត្រសិល្បៈកម្ពុជា និងគណៈប្រតិភូក្នុងវិស័យភាពយន្តចិន បានចុះអនុស្សារណៈនៃការយោគយល់ដើម្បីបើកផ្លូវឱ្យមានកិច្ចសហការក្នុងវិស័យភាពយន្ដនៃប្រទេសទាំងពីរ ជាពិសេស ការកៀរគរផលិតកម្មភាពយន្ដចិនមកផលិតភាពយន្ដខ្លួននៅកម្ពុជាឱ្យកាន់តែច្រើន។
ការត្រួសត្រួយផ្លូវក្នុងវិស័យភាពយន្ដនេះ ត្រូវបានធ្វើឡើងរវាងលោក ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ និងគណ:ប្រតិភូភាពយន្តចិន ដឹកនាំដោយលោកស្រី Zhang Xuxia នាយិការងបណ្ណសារភាពយន្តចិន លោក Xu Yang ប្រធានផ្នែកទំនាកទំនងអន្តរជាតិនៃរដ្ឋបាលភាពយន្ត កាលពីថ្ងៃទី១៧ ខែមេសាម្សិលមិញ។
លោក ទូច បានប្រាប់ភ្នំពេញប៉ុស្ដិ៍ថា៖ «យើងបានចុះអនុស្សារណៈនៃការយោគយល់គ្នាមួយក្នុងកិច្ចសហប្រតិបត្ដិការក្នុងវិស័យភាពយន្ដ។ យើងសង្ឃឹមថា វិស័យភាពយន្ដនឹងមានកិច្ចសហប្រតិបត្ដិការបានច្រើន ដោយយើងមានគោលបំណងផ្សព្វផ្សាយទូលំទូលាយដល់ប្រទេសចិន ដើម្បីកៀរគរផលិតកម្មភាពយន្ដចិនមកផលិតភាពយន្ដនៅកម្ពុជា»។
.jpg)
លោកបានបន្ដថា កម្ពុជា-ចិននឹងមានការផ្លាស់ប្ដូរវិស័យភាពយន្ដ និងការបណ្ដុះបណ្ដាលផ្សេងៗជុំវិញការផលិតភាពយន្ដរវាងប្រទេសទាំងពីរ។
លោក ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ និងគណ:ប្រតិភូភាពយន្តចិន ដឹកនាំដោយលោកស្រី Zhang Xuxia នាយិការងបណ្ណសារភាពយន្តចិន ក្នុងពេលចុះហត្ថលេខាលើអនុស្សារណៈនៃការយោគយល់កាលពីម្សិលមិញ។ រូបថត ក្រសួងវប្បធម៌ និងវិចិត្រសិល្បៈ
លោក ប៉ុក បូរក្ស ប្រធាននាយកដ្ឋានភាពយន្ដ និងសិល្បៈនៃក្រសួងវប្បធម៌ និងវិចិត្រសិល្បៈ បានឱ្យដឹងថា ការចុះ MoU នេះគឺការបើកផ្លូវដើម្បីឱ្យមានកិច្ចសហការក្នុងវិស័យភាពយន្ដ រួមមាន ការបណ្ដុះបណ្ដាល ការផ្លាស់ប្ដូរសកម្មភាពនៃការរៀបចំកម្មវិធីភាពយន្ដនៃប្រទេសទាំងពីរ។
លោកបាននិយាថា ការផលិតភាពយន្ដចិននេះជាការផ្សព្វផ្សាយដ៏សំខាន់ក្នុងការទាក់ទាញភ្ញៀវទេសចរចិន។ ទេសចរនៃប្រទេសមួយចំនួនកំណត់គោលដៅទេសចរណ៍តាមរយៈការទស្សនាភាពយន្ដ។
លោកបានប្រាប់ភ្នំពេញប៉ុស្ដិ៍ថា៖ «យើងព្យាយាមសម្របសម្រួលនីតិវិធីផ្ទៃក្នុងដើម្បីពន្លឿន សម្រួលដោយធ្វើយ៉ាងណាផលិតករអន្ដរជាតិមានភាពងាយស្រួល ហើយយើងខិតខំពង្រឹងធនធានមនុស្សក្នុងការបម្រើដល់ការជំរុញផលិតករបរទេសផងដែរ»។
ត្រូវបានបង្កើតឡើងក្នុងឆ្នាំ១៩៥៨ បណ្ណសារភាពយន្តចិន (ហៅកាត់ថា CFA) បានចូលរួមជាមួយសហព័ន្ធអន្តរជាតិនៃបណ្ណសារភាពយន្ត (ហៅកាត់ថា FIAF) ក្នុងនាមជាសមាជិកតាំងពីឆ្នាំ ១៩៨០។
ជាង ៣ម៉ឺនចំណងជើងនៃភាពយន្តចិន និងបរទេសគ្រប់សម័យកាលត្រូវបានរក្សាទុកនៅក្នុងបណ្ណាល័យ CFA ចំនួនពីរដែលមានទីតាំងនៅប៉េកាំង និងស៊ីអាន។
មជ្ឈមណ្ឌលស្រាវជ្រាវសិល្បៈភាពយន្តរបស់ប្រទេសចិនបានសហការគ្នាជាមួយ CFA តាំងពីឆ្នាំ១៩៨៤។ បណ្ណសារភាពយន្តចិនគឺជាស្ថាប័នជាតិតែមួយគត់ ដែលធ្វើការអភិរក្សបេតិកភណ្ឌភាពយន្ត ការស្រាវជ្រាវភាពយន្ត និងការផ្លាស់ប្តូរវប្បធម៌។
បណ្ណសារភាពយន្តចិន ក៏ពាក់ព័ន្ធនឹងមុខងារជាច្រើន រួមទាំងការអប់រំក្រោយឧត្តមសិក្សា ការបោះពុម្ពផ្សាយតាមកាលកំណត់ ល្ខោនសិល្បៈ បណ្ណសារ និងកាតាឡុកជាដើម៕
