លោក ស៊ី ជីនពីង ចាប់ដៃជាមួយលោក ហ៊ុន ម៉ាណែត ក្នុងដំណើរទស្សនកិច្ចនៅកម្ពុជា នៅថ្ងៃទី១៧ ខែមេសា ឆ្នាំ២០២៥។ AKP
ប្រធានាធិបតីចិន ស៊ី ជីនពីង កោតសរសើរកិច្ចខិតខំប្រឹងប្រែងរបស់កម្ពុជា ក្នុងការបង្ក្រាបល្បែងស៊ីសងតាមប្រព័ន្ធអ៊ីនធឺណិតខុសច្បាប់ និងការឆបោកតាមប្រព័ន្ធបច្ចេកវិទ្យា ក្នុងដំណើរទស្សនកិច្ចនៅកម្ពុជានៅថ្ងៃទី១៧ ខែមេសា។
លោក ស៊ី ថែមទាំងបានប្ដេជ្ញាចិត្តក្នុងការពង្រឹងការសម្របសម្រួល និងកិច្ចសហប្រតិបត្តិការអនុវត្តច្បាប់ ដើម្បីបង្ក្រាបឧក្រិដ្ឋកម្មឆ្លងដែន រួមទាំងល្បែងឆ្លងដែនខុសច្បាប់ ការជួញដូរគ្រឿងញៀន ការរត់ពន្ធមនុស្ស និងការក្លែងបន្លំ។ នេះបើតាមសេចក្ដីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិ។
រាជរដ្ឋាភិបាលកម្ពុជា បានប្ដេជ្ញាបង្ក្រាបបទល្មើសតាមអនឡាញ ដូចជា ល្បែងស៊ីសងតាមអនឡាញខុសច្បាប់ ការឆបោកតាមអនឡាញ និងការជួញដូរមនុស្សជាដើម ដោយលោកនាយករដ្ឋមន្ត្រី ហ៊ុន ម៉ាណែត ជាអ្នកដឹកនាំគណៈកម្មការបង្ក្រាបបទល្មើសទាំងនេះផ្ទាល់។
.jpg)
ចំពោះកិច្ចសហប្រតិបត្តិការលើវិស័យការពារជាតិ និងសន្តិសុខ ភាគីចិននិងកម្ពុជាបានឯកភាព ពង្រឹងយន្តការកិច្ចសហប្រតិបត្តិការរវាងកងកម្លាំងប្រដាប់អាវុធនៃប្រទេសទាំងពីរ រក្សាការផ្លាស់ប្តូរ ទស្សនកិច្ចជាញឹកញាប់នៅគ្រប់កម្រិត និងបង្កើនសកម្មភាពកិច្ចសហប្រតិបត្តិការ រួមទាំងការ ហ្វឹកហ្វឺន និងសមយុទ្ធរួម។ សមយុទ្ធរួមទាំងនោះមានដូចជាការសង្គ្រោះបន្ទាន់ ការជួយសង្គ្រោះក្នុងគ្រាមហន្តរាយ និងការកែលម្អផ្នែកសេវាវេជ្ជសាស្ត្រ និងភស្តុភារកម្ម ជាដើម។
កាលពីថ្ងៃទី៥ ខែមេសា លោកនាយករដ្ឋមន្ត្រី ហ៊ុន ម៉ាណែត បានសម្ពោធដាក់ឲ្យប្រើប្រាស់មជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន និងផែរាម ដែលត្រូវបានធ្វើទំនើបកម្មក្រោមជំនួយរបស់ចិន។ មជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន នឹងត្រូវប្រើប្រាស់សម្រាប់ការធ្វើសមយុទ្ធរួមកម្ពុជា ចិន ចាប់ពីឆ្នាំ២០២៥នេះតទៅ។
ចំពោះជំនួយរបស់ចិនលើការបោសសម្អាតមីន ក្រសួងការបរទេសថ្លែងថា៖ «កម្ពុជាបានវាយតម្លៃ ខ្ពស់ចំពោះជំនួយឧបត្ថម្ភរបស់ចិន ការបណ្តុះបណ្តាលធនធានមនុស្ស និងការផ្តល់ឧបករណ៍បោស សម្អាតមីន ដើម្បីជួយកម្ពុជាឱ្យសម្រេចគោលដៅកម្ពុជាមិនទទួលរងផលប៉ះពាល់ពីមីន និងសំណល់ជាតិផ្ទុះពីសង្គ្រាម»។
សម្រាប់កិច្ចសហប្រតិបត្តិការសកល កម្ពុជានិងចិនកបានទទួលស្គាល់ការគំរាមកំហែងជាសកលដែលបង្ក ឡើងដោយការប្រែប្រួលអាកាសធាតុ ហើយប្តេជ្ញាពង្រឹងការការពារបរិស្ថាន ជំរុញកិច្ចសហការ ថាមពលស្អាត រួមមានវារីអគ្គិសនី ថាមពលព្រះអាទិត្យ និងថាមពលខ្យល់៕
