លោក ជា វុទ្ធី ឡើងផ្នែកក្នុងពិធីសម្ពោធមជ្ឈមណ្ឌលធ្វើតេស្តឧបករណ៍ពិសេសរបស់ក្រុមហ៊ុន Te Zhong Shebei Jiance Yanjiu Yuan (Cambodia) Co., Ltd។ សហការី
ក្តីបារម្ភពីបញ្ហាសុវត្ថិភាពនៃឧបករណ៍ប្រើប្រាស់ក្នុងសកម្មភាពសេដ្ឋកិច្ច និងសង្គមនៅប្រទេសកម្ពុជា នឹងត្រូវកាត់បន្ថយ បន្ទាប់ពីមជ្ឈមណ្ឌលធ្វើតេស្តឧបករណ៍ពិសេស ដែលវិនិយោគដោយក្រុមហ៊ុនមកពីខេត្តហៃណាន តេ ហ្សុង ស៊ីប៉ី ជានស៊ី យ៉ានជីវ យ័ន(Te Zhong Shebei Jiance Yanjiu Yuan (Cambodia) Co., Ltd ប្រកាសបើកដំណើរការជាផ្លូវការ។
ពិធីសម្ពោធមជ្ឈមណ្ឌលធ្វើតេស្តឧបករណ៍ពិសេសរបស់ក្រុមហ៊ុន Te Zhong Shebei Jiance Yanjiu Yuan (Cambodia) Co., Ltd បានធ្វើឡើងកាលពីថ្ងៃទី៣១ ខែមីនា ដោយមានការចូលរួមពី លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹកអភិវឌ្ឍន៍កម្ពុជា (CDC), លោក សាត សាមី រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ ព្រមទាំងថ្នាក់ដឹកនាំក្រសួង ស្ថាប័នពាក់ព័ន្ធ និងតំណាងសមាគមពាណិជ្ជកម្មចិននៅកម្ពុជា ជាច្រើនទៀត។
មជ្ឈមណ្ឌលធ្វើតេស្តឧបករណ៍ពិសេស ត្រូវបានបង្កើតឡើងក្នុងគោលបំណងធ្វើការត្រួតពិនិត្យ និងធ្វើតេស្តឧបករណ៍ពិសេសឱ្យបានហ្មត់ចត់ ដើម្បីទប់ស្កាត់គ្រោះថ្នាក់ផ្សេងៗ។ ឧបករណ៍ពិសេសទាំងនោះ មានដូចជា ឡចំហុយ ធុងសម្ពាធ ជណ្តើរយន្ត កន្លែងលេងកម្សាន្ត និងគ្រឿងចក្រលើកទម្ងន់ ជាដើម។ ឧបករណ៍ទាំងនេះសុទ្ធតែជាមុខសញ្ញា ដែលទាមទារឱ្យមានការត្រួតពិនិត្យគុណភាពច្បាស់លាស់ជាប្រចាំ។
ក្នុងពិធីបើកសម្ពោធមជ្ឈមណ្ឌលខាងលើ លោក ជា វុទ្ធី បានលើកឡើងថា ការកើនឡើងនូវឧស្សាហូបនីយកម្ម ក៏ដូចជាការរីកដុះដាលនៃវិស័យអចលនទ្រព្យ និងហេដ្ឋារចនាសម្ព័ន្ធនៅកម្ពុជា បានធ្វើឱ្យតម្រូវការប្រើប្រាស់ឧបករណ៍ពិសេសដូចជា ឡចំហាយ ជណ្តើរយន្ត និងគ្រឿងចក្រកើនឡើងយ៉ាងគំហុក។
ក្នុងបរិការណ៍នេះ ការត្រួតពិនិត្យ និងធ្វើតេស្តឧបករណ៍ទាំងអស់នេះពិតជាមានសារៈសំខាន់ណាស់ ដើម្បីជួយការពារអាយុជីវិតប្រជាជន និងដូចជាជំរុញលឿនកំណើនសេដ្ឋកិច្ចផងដែរ។
លោកបន្ថែមថា មជ្ឈមណ្ឌលនេះនឹងដើរតួនាទីយ៉ាងសំខាន់ក្នុងការលើកកម្ពស់ និងធ្វើឱ្យប្រសើរឡើងនូវកម្រិតសុវត្ថិភាពឧស្សាហកម្មទាំងមូលនៅកម្ពុជា។ វានឹងបញ្ចូលកម្លាំងរុញច្រានយ៉ាងខ្លាំងទៅក្នុងការអភិវឌ្ឍរយៈពេលវែង និងជាជំហានដ៏សំខាន់ក្នុងដំណើរការអភិវឌ្ឍសេដ្ឋកិច្ចប្រទេសកម្ពុជា។
លោកបានថ្លែងថា៖«មជ្ឈមណ្ឌលត្រួតពិនិត្យឧបករណ៍ពិសេសនេះ គឺជាសមិទ្ធផលថ្មីមួយនៅកម្ពុជា ដោយមជ្ឈមណ្ឌលនេះនឹងក្លាយជាផ្នែកដ៏សំខាន់មួយនៃប្រព័ន្ធអេកូឡូស៊ីរបស់វិស័យឧស្សាហកម្ម អចលនទ្រព្យ និងហេដ្ឋារចនាសម្ព័ន្ធ ក្នុងការធានាបានថាឧបករណ៍ពិសេសដែលបានប្រើប្រាស់ គឺស្របតាមស្តង់ដារអន្តរជាតិ និងមានសុវត្ថិភាពខ្ពស់»។
ប្រធានមជ្ឈមណ្ឌលត្រួតពិនិត្យឧបករណ៍ពិសេស Te Zhong Shebei Jiance Yanjiu Yuan (Cambodia) លោក He Jing Wei បាននិយាយថា ប្រទេសកម្ពុជាកំពុងស្ថិតក្នុងដំណាក់កាលមាសនៃការអភិវឌ្ឍឧស្សាហកម្មដែលមានតម្រូវការសម្ភារ និងឧកបរណ៍ជាច្រើនសម្រាប់ប្រើប្រាស់ក្នុងការងារជាច្រើន។
ទោះយ៉ាងណា បើគេមើលទៅឧបករណ៍ប្រើប្រាស់មួយចំនួន គឺគុណភាពហាក់នៅមានកម្រិត ដែលទាមទារឱ្យមានការត្រួតពិនិត្យពីអ្នកជំនាញ ឬការធ្វើតេស្តតាមរយៈម៉ាស៊ីនទំនើបៗ។
លោកបន្តថា ការបង្កើតមជ្ឈមណ្ឌលធ្វើតេស្តឧបករណ៍ពិសេស នេះមានគោលដៅចម្បងចំនួន ៣ រួមមាន ទី១. ធ្វើឱ្យការត្រួតពិនិត្យគុណភាពឧបករណ៍មានលក្ខណៈស្តង់ដារ និងគ្រប់ជ្រុងជ្រោយ, ទី២ ការនាំយកបច្ចេកវិទ្យាថ្មីៗពីប្រទេសចិនមកកម្ពុជា និងទី៣ ការបណ្តុះបណ្តាលធនធានមនុស្សលើជំនាញគ្រប់គ្រងសុវត្ថិភាព និងការប្រើប្រាស់ឧបករណ៍ឱ្យមានលក្ខណៈស្តង់ដារ។
លោកបានបញ្ជាក់ថា៖«យើងសូមសន្យថានឹងប្រកាន់ខ្ជាប់នូវបេសកកម្មការពារសុវត្ថិភាពឧស្សហកម្មជាតិកម្ពុជា ការពារបរិស្ថាន ព្រមទាំងធានានានូវភាពត្រឹមត្រូវនៃការវាស់វែង ដោយប្រកាន់ខ្ជាប់នូវគោលការណ៍គុណភាព [វិទ្យាសាស្រ្ត យុត្តិធម៌ ភាពជាក់លាក់ និងប្រសិទ្ធភាព] ក្នុងការងារ»។
លោកប្រាប់ទៀតថា ក្រៅពីអាជីវកម្មត្រួតពិនិត្យឧបករណ៍ពិសេស មជ្ឈមណ្ឌលក៏នឹងមានអនុវត្តគម្រោងធ្វើតេស្តគុណភាពទឹក ប្រភពទឹក បរិស្ថាន និងការក្រិតតាមខ្នាតវាស់វែង ជាដើម៕
