កុមារអូទីស្សឹមសម្ដែងរបាំប្រពៃណីខ្មែរក្នុងពិធីអបអរទិវាអូទីស្សឹមពិភពលោកថ្ងៃទី២ ខែមេសា នៅ ព្រះវិហារព្រះកុមារយេស៊ូ នៃព្រះសហគមន៍កាតូលិកនៅបឹងទំពុន រាជធានីភ្នំពេញ។ រូបថត ហុង រស្មី
ភ្នំពេញ៖ សាលាអប់រំពិសេសនៃការលូតលាស់ (GSES) ប្រារឰទិវាអូទីស្សឹមពិភពលោកឆ្នាំ ២០២៥ ថ្ងៃទី២ ខែមេសានេះ ជាមួយនឹងការអំពាវនាវការគាំទ្រការកសាងសាលារៀនថ្មីពីសំណាក់ស្ថាបនិក និងនាយិកា ដោយលើកឡើងពីដំណើរ និងបេសកកម្មបន្តរបស់សាលាក្នុងការជួយដល់កុមារអូទីស្សឹម។
កម្មវិធីដែលរៀបចំឡើងនៅព្រះវិហារព្រះកុមារយេស៊ូ នៃព្រះសហគមន៍កាតូលិកនៅបឹងទំពុន រាជធានីភ្នំពេញ មានការចូលរួមពីភ្ញៀវកិត្តិយស មាតាបិតាសិស្ស និងអ្នកគាំទ្រ បានផ្តោតសំខាន់លើតម្រូវការបន្ទាន់សម្រាប់សាលាថ្មី ដើម្បីបំពេញការអប់រំ និងការព្យាបាលឯកទេស។
ចាប់តាំងពីការបង្កើតឡើងក្នុងឆ្នាំ ២០១៧ ដោយអ្នកស្រី ភោគ ម៉ានី ជាម្តាយរបស់កុមារអូទីស្សឹមម្នាក់ បាននិយាយថា សាលា GSES គឺជាសញ្ញានៃក្តីសង្ឃឹមសម្រាប់គ្រួសារដែលជួបការលំបាកក្នុងការស្វែងរកឱកាសសិក្សាសមរម្យសម្រាប់កូនរបស់ពួកគេ។
អ្នកស្រី ម៉ានី បានចែករំលែកថា៖ «សាលានេះមិនគ្រាន់តែជាកន្លែងសិក្សាប៉ុណ្ណោះទេ វាគឺជានិមិត្តសញ្ញានៃក្តីសង្ឃឹម និងសមភាពសម្រាប់កុមារអូទីស្សឹម ដែលជារឿយៗត្រូវបានបដិសេធនៅតាមសាលារៀនរដ្ឋ និងជនឯកជាច្រើន។ វាជាការផ្តល់ឱកាសដល់កុមារទាំងនេះដើម្បីរីកចម្រើន»។
ក្នុងឱកាសអបអរទិវាអូទីស្សឹមពិភពលោក សាលាអប់រំពិសេសនៃការលូតលាសក៏បានដាក់លក់ស្នាដៃគំនូររបស់កុមារអូទីស្សឹម។ រូបថត ហុង រស្មី
ថ្លែងនៅក្នុងទិវាអូទីស្សឹមអន្ដរជាតិ លោក សរ បូរីរក្ស នាយកវិទ្យាស្ថានជាតិសង្គមកិច្ច បានឱ្យដឹងថា កុមារមានសេចក្ដីត្រូវការពិសេស ជាពិសេសកុមារអូទីស្សឹមត្រូវបានលើកស្ទួយនូវសិទ្ធិឱ្យទទួលបានការអបរំពេញមួយជីវិតប្រកបដោយគុណភាពបរិយាប័ន្ន និងសមធម៌។
លោកបានវាយតម្លៃខ្ពស់ចំពោះការចូលរួមរបស់អង្គការក្រៅរដ្ឋាភិបាលក្នុងវិស័យអប់រំ និងពិការភាព ជាពិសេស ពង្រឹងបំណិនជីវិតសង្គមផ្ដោតលើកុមារ និងចែករំលែកបទពិសោធដើម្បីលើកកម្ពស់ការរៀន និងការបង្រៀនកុមារតូចតាមកម្រិតមតេយ្យសិក្សាជាដើម។
លោកបានថ្លែងថា៖ «ដោយសារវិទ្យាស្ថានជាតិសង្គមកិច្ចមានតួនាទីពង្រឹង និងពង្រីកការកសាងសមត្ថភាពកម្លាំងសេវាសង្គម។ ក្នុងនោះ វិទ្យាស្ថានជាតិសង្គមកិច្ច ក៏បានរៀបចំបើកវគ្គបណ្ដុះបណ្ដាលរយៈពេល ៦ខែដល់សិស្ស និស្សិត និងបុគ្គលិកមន្ដ្រីរដ្ឋលើការថែទាំកុមារទូទៅ កុមារអូទីស្សឹម និងដោនស៊ីនដ្រូម។ ដូច្នេះ លោកស្រីនាយិកា យើងអាចផ្សារភ្ជាប់ការងារនេះជាមួយគ្នា»។
ដោយចាប់ផ្តើមពីសិស្សត្រឹមតែប្រាំមួយនាក់ សាលា GSES បានពង្រីកខ្លួនដើម្បីបម្រើសិស្សចំនួន ៣៤៥ នាក់ នាពេលបច្ចុប្បន្នដោយមានក្មេងស្រីចំនួន ៥៩ នាក់ និងបុគ្គលិកចំនួន ១១៦ នាក់ (ស្រី ៧៨នាក់)។
លោកបូជាចារ្យ អូលីវីយ៉េ ផ្ចិតហស្នេ អភិបាល ព្រះសហគមន៍កាតូលិកភូមិភាគភ្នំពេញ ថ្លែងទៅកាន់អ្នកចូលរួម។ រូបថត ហុង រស្មី
ទោះជាយ៉ាងណាក៏ដោយ ដោយសារតម្រូវការសេវាកម្មបន្តកើនឡើង សាលារៀនកំពុងខិតខំប្រឹងប្រែងក្នុងការពង្រីកខ្លួន និងពង្រឹងសមត្ថភាពក្នុងការផ្ដល់ការអប់រំ និងបំណិនជីវិតដល់ពួកគេ។
នៅខែមិថុនា ឆ្នាំ ២០២៤ គណៈកម្មាធិការព្រះវិហារព្រះកុមារយេស៊ូ នៃព្រះសហគមន៍កាតូលិក បានផ្តល់ដីដល់សាលា GSES នៅលើបរិវេណរបស់ខ្លួន ដើម្បីសាងសង់សាលា ១០ ជាន់សម្រាប់កុមារអូទីស្សឹម។
អគារថ្មីកម្ពស់ ១០ ជាន់ គឺជាគម្រោងផ្លាស់ប្តូរដែលនឹងមានបន្ទប់ចំនួន ៥០ រួមទាំងថ្នាក់រៀន បន្ទប់ព្យាបាលផ្នែកចលនា បន្ទប់ព្យាបាលផ្នែកញាណ បន្ទប់ថែទាំ និងសូម្បីតែអាងហែលទឹក។
រចនាសម្ព័ន្ធទំនើបនេះនឹងមិនត្រឹមតែបំពេញតម្រូវការអប់រំប៉ុណ្ណោះទេ ប៉ុន្តែថែមទាំងផ្តល់នូវបរិយាកាសចិញ្ចឹមបីបាច់សម្រាប់ការបណ្តុះបណ្តាលបំណិនជីវិត និងការអភិវឌ្ឍន៍ប្រកបដោយបរិយាប័ន្នផងដែរ។
ដើម្បីជួយរៃអង្គាសថវិកាចាំបាច់ សាលា GSES បានចាប់ផ្តើមយុទ្ធនាការ «មួយដុល្លារ មួយសុបិន» ហើយបានរៃអង្គាសប្រាក់បានចំនួន ៥១ ៣៣៥ ដុល្លាររហូតមកដល់ពេលនេះ។
ព្រះភិក្ខុ វជិរប្បញ្ញោបណ្ឌិត គូ សុភាព មានសង្ឃដិកាអប់រំផ្លូវចិត្តដែលទាក់ទងទៅនឹងផ្លូវនៃប្រាជ្ញា មេត្តា និងធម្មជាតិពិតនៃជីវិត។ រូបថត ហុង រស្មី
អ្នកស្រី ម៉ានី បានឱ្យដឹងថា៖ «អគារនេះនឹងផ្លាស់ប្តូរជីវិត មិនត្រឹមតែសម្រាប់កុមារអូទីស្សឹមប៉ុណ្ណោះទេ ប៉ុន្តែសម្រាប់គ្រួសាររបស់ពួកគេ ដែលជារឿយៗតស៊ូជាមួយភាពតានតឹងក្នុងការចិញ្ចឹមកូនដែលមានតម្រូវការពិសេស។ យើងត្រូវការជំនួយពីសំណាក់ទ្រង់ ឯកឧត្ដម លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី និងសប្បុរសជនទាំងអស់ដើម្បីធ្វើឱ្យសុបិននេះក្លាយជាការពិត»។
អគារសិក្សាថ្មីនេះគឺជាការសហការគ្នារវាងសាលា GSES និងព្រះសហគមន៍កាតូលិក ដែលឆ្លុះបញ្ចាំងពីការប្តេជ្ញាចិត្តយូរអង្វែងរបស់ព្រះវិហារចំពោះការគាំទ្រ និងការធ្វើបរិយាប័ន្នក្នុងសហគមន៍។
ចាប់តាំងពីការបង្កើតឡើងមក ព្រះវិហារបានក្លាយជាសសរស្តម្ភសម្រាប់សលាអប់រំពិសេស GSES ហើយការសម្រេចចិត្តបែងចែកដីសម្រាប់សាលាថ្មីនេះ បង្ហាញពីចក្ខុវិស័យរួមគ្នាក្នុងការលើកកម្ពស់សេចក្តីថ្លៃថ្នូរ និងការអប់រំសម្រាប់កុមារទាំងអស់ ដោយមិនគិតពីសាវតារបស់ពួកគេ។
លោកបូជាចារ្យ អូលីវីយ៉េ ផ្ចិតហស្នេ អភិបាល ព្រះសហគមន៍កាតូលិកភូមិភាគភ្នំពេញ បានថ្លែងថា៖ «អ្នកគ្រូ ម៉ានី សុំឱ្យយើងជួយ ហើយលោកឪពុកមុនៗបានជួយជាថវិកា និងបានកៀរគរប្រាក់ពីប្រទេសបារាំងមកជួយបន្ថែម។ ប៉ុន្ដែដោយសារវិបត្ដិសេដ្ឋកិច្ចនៅបារាំង និងការបង្វែជំនួយទៅជួយប្រទេសក្រីក្រជាងកម្ពុជា ដូច្នេះយើងត្រូវជួយខ្លួនឯង គឺខ្មែរជួយខ្មែរ»។
លោក សរ បូរីរក្ស នាយកវិទ្យាស្ថានជាតិសង្គមកិច្ច ថ្លែងទៅកាន់អាណាព្យាបាលរាប់រយនាក់ដែលចូលរួមទិវាអូទីស្សឹមពិភពលោក។ រូបថត ហុង រស្មី
គម្រោងនេះមិនត្រឹមតែសម្រាប់កុមារដែលកំពុងចូលរៀន GSES ប៉ុណ្ណោះទេ ប៉ុន្តែសម្រាប់មនុស្សជំនាន់ក្រោយផងដែរ។
អ្នកស្រី ម៉ានី បាននិយាយថា៖ «សាលារៀននេះនឹងក្លាយជាមរតកដ៏យូរអង្វែងនៃក្តីមេត្តា និងក្តីសង្ឃឹមសម្រាប់កុមារទាំងអស់ដែលមានពីការភាពអូទីស្សឹម ហើយវានឹងផ្តល់ឱ្យគ្រួសារនូវអារម្មណ៍ ដែលទទួលបានការមើលថែ និងការអប់រំ»។
កម្មវិធីអបអរទិវាអូទីស្សឹមនេះ មានការគោរពភ្លេងជាតិ របាំជូនពរ សុន្ទរកថា និងសង្ឃដិកាអប់រំផ្លូវចិត្តដែលទាក់ទងទៅនឹងផ្លូវនៃប្រាជ្ញា មេត្តា និងធម្មជាតិពិតនៃជីវិត សម្ដែងដោយព្រះភិក្ខុ វជិរប្បញ្ញោបណ្ឌិត គូ សុភាព។ ទិវានេះបានបញ្ចប់ដោយការប្រគល់វិញ្ញាបនបត្រនៃការដឹងគុណដល់សិស្សគំរូ និងអាហារថ្ងៃត្រង់អបអរសាទរ។
សម្រាប់ព័ត៌មានបន្ថែម ឬចូលរួមចំណែកក្នុងយុទ្ធនាការ «មួយដុល្លារ មួយសុបិន្ដ» សូមទាក់ទង GSES តាមរយៈ gses2017@hotmail.com ឬទូរស័ព្ទមកលេខ ០១២ ៧១ ៣១ ៨៨ / ០១២ ៧៤១ ៥៥៦៕
កម្មវិធីដែលរៀបចំឡើងនៅព្រះវិហារព្រះកុមារយេស៊ូ នៃព្រះសហគមន៍កាតូលិកនៅបឹងទំពុន រាជធានីភ្នំពេញ មានការអញ្ជើញចូលរួមពីភ្ញៀវកិត្តិយស មាតាបិតាសិស្ស និងអ្នកគាំទ្រ បានផ្តោតសំខាន់លើតម្រូវការបន្ទាន់សម្រាប់សាលាថ្មី ដើម្បីបំពេញការអប់រំ និងការព្យាបាលឯកទេស។ រូបថត ហុង រស្មី
អ្នកស្រី ភោគ ម៉ានី ជាស្ថាបនិក និងនាយិកាសាលាអប់រំពិសេសនៃការលូតលាស់ (GSES)។ រូបថត ហុង រស្មី
កុមារអូទីស្សឹមសម្ដែងរបាំប្រពៃណីខ្មែរក្នុងពិធីអបអរទិវាអូទីស្សឹមពិភពលោកថ្ងៃទី២ ខែមេសា នៅ ព្រះវិហារព្រះកុមារយេស៊ូ នៃព្រះសហគមន៍កាតូលិកនៅបឹងទំពុន រាជធានីភ្នំពេញ។ រូបថត ហុង រស្មី
