ថ្នាក់ដឹកនាំសមាគមឧកញ៉ាកម្ពុជា ក្នុងសន្និបាតប្រចាំឆ្នាំ២០២៤ កាលពីខែមីនា។ សមាគមឧកញ៉ាកម្ពុជា
សមាគមឧកញ៉ាកម្ពុជានឹងចាត់វិធានការតាមនីតិវិធីច្បាប់ចំពោះគោរមវន្ត (អ្នកមានងារជាឧកញ៉ា) ណា ដែលបានរកឃើញថាបានប្រព្រឹត្តសកម្មភាពប៉ះពាល់ដល់គោរមងារដែលអង្គព្រះមហាក្សត្របានព្រះរាជទាន បន្ទាប់ពីឧកញ៉ា ឈាវ មុន្និន បង្ហាញអាកប្បកិរិយាមិនសមរម្យនៅលើ Tik Tok។
នៅក្នុងសេចក្ដីប្រកាសព័ត៌មាននៅរសៀលថ្ងៃទី២ ខែមេសានេះ សមាគមឧកញ៉ាកម្ពុជា បានអំពាវនាវដល់គោរមវន្តទាំងអស់ឲ្យប្រកាន់ខ្ជាប់នូវកិត្តិយស សីលធម៌ សុជីវធម៌ និងសេចក្តីថ្លៃថ្នូរនៅក្នុងសង្គម ក្នុងការប្រកបមុខរបរនិងវិជ្ជាជីវៈឱ្យបានខ្ជាប់ខ្ជួន។
សមាគមឧកញ៉ាកម្ពុជា ស្នើឲ្យអ្នកទទួលបានងារជាឧកញ៉ា យកចិត្តទុកដាក់ឱ្យបានខ្ពស់ជាទីបំផុត ចំពោះការប្រើប្រាស់បណ្តាញសង្គម ឬមធ្យោបាយផ្សព្វផ្សាយនានា ជៀសវាងចែកចាយ ឬ ផ្សព្វផ្សាយនូវសកម្មភាព ឬការប្រើពាក្យសម្តីទាំងឡាយណា ដែលធ្វើឱ្យប៉ះពាល់ដល់ងារជាកិត្តិយស ដែលអង្គព្រះមហាក្សត្របានព្រះរាជទាន។
សេចក្ដីប្រកាសព័ត៌មានបន្តថា៖ «ជាមួយគ្នានេះដែរ សមាគមឧកញ៉ាកម្ពុជានឹងចាត់វិធានការតាមនីតិវិធីច្បាប់ជាក់ស្តែងចំពោះគោរមវន្តណា ដែលបានរកឃើញថាបានប្រព្រឹត្តសកម្មភាព ឬប្រើពាក្យសម្តីទាំងឡាយណាដែលធ្វើឱ្យប៉ះពាល់ដល់គុណតម្លៃ និងឧត្តមភាពដ៏ឧត្តុង្គឧត្តម នៃគោរមងារឧកញ៉ា ស្របតាមព្រះរាជក្រឹត្យនិងអនុក្រឹត្យខាងលើ»។
សមាគមឧកញ៉ាកម្ពុជា គឺជាស្ថាប័នតែមួយគត់ដែលតំណាងឱ្យឧកញ៉ាទាំងអស់នៅកម្ពុជា និងបានចែងអំពីតួនាទី ភារកិច្ច ព្រមទាំងសិទ្ធិនិងកាតព្វកិច្ចរបស់សមាគមដើម្បីរក្សានិងលើកកម្ពស់គុណតម្លៃ និងឧត្តមភាពដ៏ឧត្តុង្គឧត្តម នៃគោរមងារ ឧកញ៉ា ដែលជាព្រះរាជទានដ៏ខ្ពង់ខ្ពស់បំផុតរបស់ ព្រះមហាក្សត្រតាំងពីបុរាណកាលរៀងមក។
ទោះបីជាមិនបានលើកចំឈ្មោះបុគ្គលណាមួយ សេចក្ដីប្រកាសព័ត៌មានទំនងសំដៅទៅលើឧកញ៉ាម្នាក់ឈ្មោះ ឈាវ មុន្និន ដែលជាយោធិនផ្កាយ១ នៅក្រសួងការពារជាតិ ដែលបានប្រើប្រាស់អាកប្បកិរិយាមិនសមរម្យនៅលើបណ្ដាញសង្គម Tik Tok ប៉ះពាល់ដល់ក្រសួងនិងកងយោធពលខេមរភូមិន្ទ។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា បានថ្លែងថា ការប្រព្រឹត្តខុសនឹងច្បាប់ វិន័យ ក្រមសីលធម៌ ឬ អ្វីដែលមានចែងព្រះរាជក្រឹត្យ ត្រូវតែមានវិធានការដូចដែលមានចែងនៅក្នុងក្រមទាំងនោះ។ លោកថា ស្ថាប័នដែលមានសមត្ថកិច្ចត្រូវតែចាត់វិធានការ បើមិនដូច្នេះទេ បុគ្គលនោះនឹងបន្តសកម្មភាពមិនសមរម្យ ហើយស្ថាប័នមានសមត្ថកិច្ចមិនអនុវត្តតាមអាណត្តិរបស់ខ្លួន៕
