កណ្តាលៈ ឃ្លាំង​រោងចក្រ​ ចំនួន៣ឃ្លាំង និងផ្ទះប្រជាពលរដ្ឋចំនួន៤ខ្នង ត្រូវ​បាន​អគ្គិភ័យឆេះបំផ្លាញ​ កាលពីថ្ងៃទី១​ ខែ​មេសា នេះ នៅវេលាម៉ោង៩និង៥០នាទី​ ស្ថិតក្នុងភូមិថ្លើក ឃុំពើក​ ស្រុកអង្គស្នួល​។

អធិការដ្ឋាននគរបាលស្រុកអង្គស្នួលបានឱ្យដឹងថា ឃ្លាំងរោងចក្រនេះ គឺមានស្តុក​សម្ភារ​ជ័រ​ធ្វើស្នោរ​  និង​ស័ង្កសី។ ​អគ្គិភ័យ​ត្រូវបានរលត់ទាំងស្រុង​ នៅវេលាម៉ោងជាង២ នាថ្ងៃដដែលនេះ ក្រោយពី​មាន​កិច្ច​អន្ត​រាគមន៍ពី រថយន្តពន្លត់អគ្គិភ័យ​ ចំនួន​ ៤៣គ្រឿង​។

ក្នុងនោះ មានការប្រើប្រាស់ទឹកអស់ចំនួន​ ១១៣ឡាន​ និងប្រើប្រាស់​កម្លាំងសរុប៣៦៥នាក់​ ដែលមានការ ដឹកនាំដោយ អភិបាលខេត្តកណ្តាល លោកគួច ចំរើន​ និងលោកឧត្តមសេនីយ៍ទោ​ ឈឿន​ សុចិត្ត​ ស្នងការនគរបាលខេត្តកណ្តាលផងដែរ។​

ទោះយ៉ាងណា មូលហេតុនៃអគ្គិភ័យនេះមិនទាន់ត្រូវបានសមត្ថកិច្ចប្រាប់ឱ្យដឹងនោះទេ។ គ្រោះអគ្គិភ័យនេះមិនមានបង្កគ្រោះថ្នាក់​ដល់អាយុជីវិត ឬរបួសស្នាមនោះទេ ហើយការសហការពន្លត់អគ្គិភ័យជាច្រើនស្ថាប័នបានជួយទប់ស្កាត់ មិនបណ្តាលឱ្យភ្លើងឆេះរាលដាលបន្តទៀតផងដែរ។​

រថយន្តអគ្គិភ័យដែលចូលរួមអន្តរាគមន៍នោះ រួមមាន រថយន្តពន្លត់អគ្គិភ័យ​៩១១, ​តំបន់សេដ្ឋកិច្ចកាណាឌីយ៉ា,បូរីសង្ឃឹមថ្មី, ស្នងការដ្ឋាននគរបាលខេត្តកណ្ដាល, ​៧១១, អធិការដ្ឋាននគរបាលស្រុកកណ្ដាលស្ទឹង, ស្នងការដ្ឋាននគរបាលខេត្តកំពង់ស្ពឺ, ១១៩, ​អគ្គស្នងការដ្ឋាននគរបាលជាតិ, ​ក្រុមហ៊ុនខ្មែរប៊ូបើរីជីស និងរថយន្តពន្លត់អគ្គិភ័យ​ នាយកដ្ឋានពន្លត់អគ្គិភ័យក្រសួងមហាផ្ទៃ។

យ៉ាងហោចណាស់ មានករណីគ្រោះអគ្គិភ័យកើតឡើងពាក់ព័ន្ធនឹងរោងចក្រ និងឃ្លាំងចំនួន៣នៅក្នុងខែមីនាកន្លងមក។ ក្នុងនោះមាន រោងចក្រកាត់ដេរ ហ្វ័រម៉ាតខេមបូឌាខូអិលធីឌី ក្នុងខណ្ឌដង្កោ កាលពីថ្ងៃទី១១កុម្ភៈ និងឃ្លាំងស្ដុក និងកែច្នៃជ័រស្វិតមួយកន្លែង ស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ កាលពីយប់ថ្ងៃទី១៥ ខែមីនា។ ចុងក្រោយ គឺទីតាំងផលិត និងឃ្លាំងស្តុកពូក ក្នុងខណ្ឌពោធិ៍សែនជ័យ កាលពីទី​២៧ ខែកុម្ភៈនេះ។

កាលពីថ្ងៃទី ៣០ ខែមីនាកន្លងមក អគ្គិភ័យក៏បានឆេះផ្ទះពលរដ្ឋផ្ទះអស់៤ខ្នងទាំងស្រុង និងរោលជញ្ជាំង៧ខ្នង នៅខណ្ឌឫស្សីកែវ រាជធានីភ្នំពេញផងដែរ។ គ្រោះអគ្គិភ័យនេះ កើតឡើងដោយសារតែឆ្លងចរន្តអគ្គិសនី៕