រូបចម្លាក់ព្រះនារាយណ៍ ឬ ព្រះវិស្ណុ ធ្វើពីសំរឹទ្ធត្រូវបានជួលជុលរួចរាល់ និងកំពុងត្រូវបានរៀបចំដាក់នៅសារមន្ទីរជាតិ Guimet ក្នុងទីក្រុងប៉ារីស ដើម្បីតាំងពិព័រណ៍ពីថ្ងៃទី៣០ ខែមេសា ដល់ចុងខែកញ្ញា ឆ្នាំ២០២៥។
ចម្លាក់ព្រះនារាយណ៍ត្រូវបានកសាងនៅសតវត្សរ៍ទី១១ ហើយត្រូវបានយកចេញពីប្រាសាទមេបុណ្យខាងលិចដែលស្ថិតនៅកណ្ដាលបារាយណ៍ទឹកថ្លាក្នុងខេត្តសៀមរាប។ ចម្លាក់នេះត្រូវបានអ្នកស្រាវជ្រាវបារាំងរកឃើញនៅឆ្នាំ១៩៣៦។ ចុងក្រោយចម្លាក់នេះត្រូវបានយកទៅតម្កល់ទុកនៅសារមន្ទីរជាតិក្នុងទីក្រុងភ្នំពេញ។
កាលពីខែឧសភា ឆ្នាំ២០២៤ ចម្លាក់ដែលដើមឡើយមានប្រវែងរហូតដល់ទៅ ៥ម៉ែត្រនេះត្រូវបានបញ្ជូនទៅកាន់ប្រទេសបារាំងដើម្បីជួសជុលនិងផ្គុំជាមួយនឹងបំណែកចំនួន ៣៩ដុំ។
.jpg)
លោក វន នឿន អនុប្រធានការិយាល័យអភិរក្សនៃនាយដ្ឋានសារមន្ទីរនៃក្រសួងវប្បធម៌ និងវិចិត្រសិល្បៈ និងទទួលបន្ទុក រោងជាងអភិរក្ស និងជួសជុលវត្ថុធ្វើពីលោហៈ បានប្រាប់ភ្នំពេញប៉ុស្តិ៍ថា រូបព្រះវិស្ណុត្រូវបានជួសជុលរួចរាល់តាមតែអាចធ្វើបាន ហើយត្រូវបានដឹកចេញពីទីក្រុង Nantes ទៅទីក្រុងប៉ារីសដើម្បីដាក់តាំងពិព័រណ៍នៅសារមន្ទីរ Guimet។
លោកបញ្ជាក់ថា ពិធីបើកពិព័រណ៍ព្រះវិស្ណុ នឹងធ្វើឡើងនៅថ្ងៃទី២៨ ខែមេសា នេះ ដោយមានថ្នាក់ដឹកនាំពីក្រសួងវប្បធម៌ចូលរួម ប៉ុន្តែការបើកឲ្យសាធារណជនចូលទស្សនានឹងធ្វើឡើងចាប់ពីថ្ងៃទី៣០ ខែមេសា រហូតដល់ចុងខែកញ្ញា។
សម្រាប់ការជួសជុលចម្លាក់ព្រះនារាយណ៍នេះ លោក វន នឿន បញ្ជាក់ដូច្នេះថា៖ «នៅក្នុងគម្រោងជួសជុលនេះ គឺយើងបានធ្វើការលាងសម្អាតយកដី និងសំណល់ផ្សេងៗដែលជាប់នៅលើផ្ទៃ។ ចំណែកបំណែកដែលមាន បំណែកណាដែលផ្គុំទៅត្រូវគ្នា យើងផ្គុំបញ្ចូលគ្នា។ បំណែកណាដែលត្រូវនឹងដងខ្លួនធំរបស់ព្រះវិស្ណុ យើងយកទៅផ្គុំនឹងដងខ្លួន ដូចដែលបានឃើញនៅក្នុងរូបភាពខាងលើ»។
លោកបន្តថា ក្នុងចំណោមបំណែកទាំង ៣៩ ក៏មានបំណែកដែលផ្គុំទៅមិនត្រូវគ្នាផងដែរ ហើយត្រូវបានរក្សាទុក។
បើតាមលោក វន នឿន បន្ទាប់ពីតាំងពិព័រណ៍នៅប្រទេសបារាំងរួច រូបចម្លាក់នេះនឹងត្រូវដឹកទៅតាំងបង្ហាញជាច្រើនកន្លែងទៀតនៅសហរដ្ឋអាមេរិករហូតដល់ឆ្នាំ២០២៧៕
