កម្ពុជារំពឹងថា នឹងអាចលុបបំបាត់ជំងឺគ្រុនចាញ់ឲ្យអស់ពីកម្ពុជានៅឆ្នាំ២០២៥នេះ ស្របតាមផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ ឆ្នាំ២០១១-២០២៥ ខណៈដែលឆ្នាំ២០២៤ ជំងឺគ្រុនចាញ់នៅកម្ពុជាមានតែ៣៥៥ករណីប៉ុណ្ណោះ ធ្លាក់ចុះពីជាង ១ពាន់ករណីកាលពីឆ្នាំ ២០២៣។
ការរំពឹងនេះត្រូវបានលើកឡើងដោយលោកនាយករដ្ឋមន្ត្រី ហ៊ុន ម៉ាណែត នៅក្នុងលិខិតប្រារព្ធទិវាជាតិប្រឆាំងនឹងជំងឺគ្រុនចាញ់ ក្រោមប្រធានបទ «យើងបញ្ចប់ជំងឺគ្រុនចាញ់ដោយវិនិយោគឡើងវិញ គិតច្នៃប្រឌិតឡើងវិញ គ្រប់គ្រងឡើងវិញ» នៅថ្ងៃទី២៥ ខែមករានេះ។
លោកនាយករដ្ឋមន្ត្រីបញ្ជាក់ថា កម្ពុជាមានមាគ៌ាត្រឹមត្រូវនៅក្នុងផែនការយុទ្ធសាស្ត្រជាតិ ដោយបានសម្រេចនូវសមិទ្ធផលផ្លែផ្កានៃគោលដៅជាបន្តបន្ទាប់រួមមាន ទប់ស្កាត់មិនឱ្យមានភាពស៊ាំថ្នាំគ្រុនចាញ់តាំងពីឆ្នាំ២០១៥ គ្មានអ្នកស្លាប់ដោយសារជំងឺគ្រុនចាញ់តាំងពីឆ្នាំ២០១៨ និង គ្មានជំងឺគ្រុនចាញ់ទម្រង់សន្ធំ (ឬប្រភេទហ្វាល់ស៊ីប៉ារ៉ូម) ឆ្នាំ២០២៤។
.jpg)
លោកថ្លែងថា៖ «ឆ្នាំ២០២៤ ប្រទេសកម្ពុជាមានជំងឺគ្រុនចាញ់ត្រឹមតែ៣៥៥ករណីប៉ុណ្ណោះ គឺបានកាត់បន្ថយ៧៥ភាគរយ បើធៀបនឹងឆ្នាំ២០២៣ ដែលជាទឡឹករណ៍គួរជាទីមោទកខ្ពស់របស់កម្ពុជា ក្នុងការចូលរួមជាមួយប្រទេសក្នុងតំបន់និងសកលលោក ដើម្បីសម្រេចគោលដៅគ្មានជំងឺគ្រុនចាញ់»។
លោកបន្តថា៖ «ប្រទេសកម្ពុជាយើងកំពុងតែឈានឆ្ពោះជិតដល់ការសម្រេចបានជោគជ័យនូវកម្ពុជាគ្មានជំងឺគ្រុនចាញ់ នាដំណាច់ឆ្នាំ២០២៥ នេះ ដែលជាដំណើរគួរឱ្យកោតសរសើរ និងសាទរជាទីបំផុត ប៉ុន្តែយើងក៏មិនអាចបន្ធូរដៃ បានឡើយ ព្រោះថាដើម្បីឈានទៅបញ្ចប់ជំងឺគ្រុនចាញ់ឱ្យបានជាស្ថាពរ១០០ភាគរយ យើងត្រូវតែបន្តខិតខំប្រឹងប្រែងទាំងអស់គ្នាបន្ថែមទៀត ទាំងកម្លាំងកាយចិត្ត ប្រាជ្ញាស្មារតី និងធនធាន...»។
លោកអំពាវនាវដល់ប្រជាពលរដ្ឋនិងភាគីពាក់ព័ន្ធចូលរួមតាមគ្រប់វិធីដើម្បីលុបបំបាត់ជំងឺគ្រុនចាញ់នេះឲ្យអស់ពីកម្ពុជា នៅឆ្នាំនេះ និងរួមចំណែកដល់ការលុបបំបាត់ជំងឺនេះទាំងស្រុងនៅឆ្នាំ២០៣០៕
នៅឆ្នាំ២០២៣ ករណីជំងឺគ្រុនចាញ់បានកើតឡើងជាង ១ ០០០ ករណី ថយចុះជាង ៦០ ភាគរយ បើប្រៀបធៀបក្នុងឆ្នាំ ២០២២ ដែលមានជំងឺគ្រុនចាញ់ជាង ៤ ០០០ ករណី។ ចំណែកនៅឆ្នាំ២០២៤កន្លងទៅ កម្ពុជាមានករណីគ្រុនចាញ់តែ ៣៥៥ករណីប៉ុណ្ណោះ គឺបានកាត់បន្ថយ៧៥ភាគរយ។ នេះបើតាមមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ៕
