លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ជួបជាមួយមន្ត្រីកសិកម្មឃុំ កាលពីខែធ្នូ ឆ្នាំ២០២៤។ ឃឹម ហ្វីណង់
ទីភ្នាក់ងារសហប្រតិបត្តិការអន្តរជាតិកូរ៉េខាងត្បូង ហៅកាត់ថា កយកា (KOICA) ចុះកិច្ចព្រមព្រៀងលើកំណត់ហេតុពិភាក្សាគម្រោងជាមួយក្រសួងកសិកម្មក្នុងការផ្ដល់ជំនួយឥតសំណងប្រមាណ ១២ លានដុល្លារដើម្បីពង្រឹងសមត្ថភាពមន្ត្រីកសិកម្ម និងជួយឲ្យកសិករអាចសម្របខ្លួនទៅនឹងការប្រែប្រួលអាកាសធាតុ។
សេចក្ដីប្រកាសរបស់ KOICA នៅថ្ងៃទី២៨ ខែមេសានេះបញ្ជាក់ថា ជំនួយឥតសំណងនេះធ្វើឡើងតាមរយៈគម្រោងមួយដែលមានឈ្មោះថា «គម្រោងកសាងទំនាក់ទំនងចម្រុះរវាងការស្រាវជ្រាវ អប់រំ និងផ្សព្វផ្សាយកសិកម្មដែលបន្ស៊ាំទៅនឹងបម្រែបម្រួលអាកាសធាតុនៅប្រទេសកម្ពុជា»។
KOICA បញ្ជាក់ថា៖ «គម្រោងនេះនឹងត្រូវបានអនុវត្តពីឆ្នាំ២០២៥ ដល់ឆ្នាំ២០៣០ ដើម្បីផ្តល់ឱ្យមន្ត្រីផ្សព្វផ្សាយឃុំ នូវឧបករណ៍ និងការបណ្តុះបណ្តាលដែលពួកគេត្រូវការ ដើម្បីជួយឲ្យកសិករអាចសម្របខ្លួនទៅនឹងការប្រែប្រួលអាកាសធាតុ និងលើកកម្ពស់ជីវភាពរបស់កសិករផងដែរ»។
.jpg)
បើតាម KOICA ដដែល គម្រោងនេះនឹងនឹងបង្កើតទំនាក់ទំនងបន្ថែមរវាងផ្នែកពាក់ព័ន្ធនានាដូចជាការអប់រំ-ស្រាវជ្រាវ និងផ្សព្វផ្សាយ ដែលគម្រោងនេះនឹងត្រូវអនុវត្តនៅសាកលវិទ្យាល័យភូមិន្ទកសិកម្ម។
ពិធីចុះហត្ថលេខាលើកំណត់ហេតុនៃកិច្ចពិភាក្សានៃគម្រោងនេះ ត្រូវបានធ្វើឡើងរវាងលោកស្រី Choi Moonjung នាយិកានៃការិយាល័យ KOICA ប្រចាំកម្ពុជា និងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
KOICA៖ «មន្ត្រីផ្សព្វផ្សាយឃុំដែលខិតខំប្រឹងប្រែងទាំងអស់មានតួនាទីយ៉ាងសំខាន់ក្នុងការនាំយកចំណេះដឹង និងបច្ចេកទេសអនុវត្តកសិកម្មសំខាន់ៗដល់កសិករទូទាំងប្រទេស។ ការវិនិយោគចំពោះមន្ត្រីផ្សព្វផ្សាយឃុំនេះ គឺជាការវិនិយោគលើវិស័យកសិកម្មកម្ពុជាដើម្បីពេលអនាគត»។
យោងតាមក្រសួងកសិកម្ម ក្នុងឆ្នាំ២០២៥នេះ មន្ត្រីកសិកម្មឃុំចំនួន ១ពាន់នាក់ នឹងត្រូវដាក់ពង្រាយនៅគ្រប់រាជធានី និងខេត្តទាំង២៥ ទូទាំងប្រទេសកម្ពុជា។ រហូតមកទល់ពេលនេះ មន្ត្រីកសិកម្មឃុំចំនួន ២៥០នាក់ត្រូវបានដាក់ពង្រាយរួចហើយកាលពីឆ្នាំ២០២៤៕
