លោក ហ៊ុន ម៉ាណែត ថ្លែងនៅក្នុងពិធីសម្ពោធផ្លូវជាតិចំនួន ៣ខ្សែ នៅថ្ងៃទី២៩ ខែមេសា។ AKP
លោកនាយករដ្ឋមន្ត្រី ហ៊ុន ម៉ាណែត ជំរុញឲ្យអាជ្ញាធរទាំងថ្នាក់ស្រុកនិងខេត្តនីមួយៗគិតផលប្រយោជន៍រួមជាងជាជាងផលប្រយោជន៍ផ្ទាល់ខ្លួន ក្នុងការទាក់ទាញវិនិយោគិនទៅបណ្ដាក់ទុននៅក្នុងខេត្តរៀងៗខ្លួន។
លោកនាយករដ្ឋមន្ត្រីនៅព្រឹកថ្ងៃទី២៩ ខែមេសានេះ បានបើកសម្ពោធផ្លូវជាតិចំនួន ៣ខ្សែ មានតម្លៃ ១៨៨លានដុល្លារអាមេរិក រួមមានផ្លូវជាតិលេខ ៣១, ៣៣, និង ៤១ ដែលស្ថិតនៅមួយផ្នែកនៃភាគនិរតីនៃប្រទេសកម្ពុជា។
នៅក្នុងពិធីនេះ លោកលើកឡើងដូច្នេះថា៖ «ធ្វើផ្លូវហើយអត់មនុស្សដើរ វាក៏មិនកើតដែរ។ ធ្វើផ្លូវហើយអត់វិនិយោគមកប្រើប្រាស់ទាញយកផល ក៏យើងមិនសូវបានសក្ដានុពលដែរ។ អីចឹងរដ្ឋនឹងបន្តលើកទឹកចិត្ត ហើយសុំបណ្ដាខេត្តទាំងអស់នៅតាមបណ្ដោយផ្លូវ និងខេត្តពាក់ព័ន្ធនៅទិសនិរតី ត្រូវខិតខំធ្វើយ៉ាងណា ទាញច្បាមយកការទាក់ទាញនោះមក»។
.jpg)
លោកថា អាជ្ញាធរត្រូវពិនិត្យមើលថាតើវិនិយោគទាំងនោះទាញផលប្រយោជន៍រួមអ្វីខ្លះ មិនមែនជាការគិតផលប្រយោជន៍បុគ្គលនោះទេ និងលើកទឹកចិត្តឲ្យខេត្ត និងស្រុកនីមួយៗមានការប្រកួតប្រជែងគ្នាដើម្បីទាក់ទាញវិនិយោគ តាមរយៈការផ្ដល់សេវាកម្មល្អ។
លោក ហ៊ុន ម៉ាណែត៖ «សុំកុំនិយាយថា តើវាទាញអ្វីឲ្យខ្ញុំ។ ដូរនិយមន័យពីខ្ញុំ ទៅខេត្តខ្ញុំ។
កុំឃើញគេមកថា តើខ្ញុំបានអ្វីផ្ទាល់ខ្លួន ប៉ុន្តែ ត្រូវសួរថា តើខេត្តខ្ញុំ ប្រជាជនក្នុងភូមិនេះបានអីច្រើន។ បើយើងដាក់ទិសដៅនេះ ទើបបម្រើសេវាបានល្អ។ បើស្រុកយើង ភូមិយើងបានរីកចម្រើនហើយ យើងគ្រួសារយើងក៏បានផលដែរ។ បើយើងដាក់គោលដៅ យើងនិងគ្រួសារយើងមុន ជួនកាលគេអត់នៅទេ គេរត់ទាំងអស់គ្នា»។
ពីកម្រិតរដ្ឋាភិបាល លោកថ្លែងថា រដ្ឋាភិបាលលោកនឹងបន្តធ្វើផ្លូវមេ និងផ្លូវខ្នែងតូចៗតភ្ជាប់គ្នា «ទាល់តែថ្ងៃណាមួយប្រជាពលរដ្ឋចាប់ផ្ដើមជិះវង្វេង ជាជាងអត់ផ្លូវ។ រុញទាល់តែដល់តែម្ដង»។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា យល់ស្របទៅនឹងការលើកឡើងរបស់លោក ហ៊ុន ម៉ាណែត លើការផ្ដល់សេវាល្អ ហើយថាការលើកឡើងរបស់លោក ហ៊ុន ម៉ាណែត គឺជាការដាស់តឿនដល់មន្ត្រីដែលជាអ្នកបម្រើប្រជាពលរដ្ឋនៅគ្រប់លំដាប់ថ្នាក់នៃរដ្ឋបាល ឲ្យគិតប្រយោជន៍រួមក្នុងមូលដ្ឋានដែលខ្លួនគ្រប់គ្រងនិងដឹកនាំ ជាជាងគិតតែប្រយោជន៍ខ្លួនឯង ប្រយោជន៍គ្រួសារជាធំ។
លោកថ្លែងថា៖ «ក្នុងនាមជាមន្ត្រីសាធារណៈ មន្ត្រីគឺជាអ្នកបម្រើប្រជាពលរដ្ឋនិងសហគមន៍របស់ខ្លួន … ដែលនៅក្នុងសង្គមប្រជាធិបតេយ្យសេរី មន្ត្រីមិនមែនជាចៅហ្វាយ ឬជាម្ចាស់នៃអាជីវកម្មដូចវិស័យឯកជនទេ ប៉ុន្តែជាអ្នកបម្រើប្រជាពលរដ្ឋដែលត្រូវគិតប្រយោជន៍សាធារណៈជាធំ»។
លោកបន្តថា ប្រសិនបើមន្ត្រីគ្រប់លំដាប់ថ្នាក់អនុវត្តតាមអ្វីនាយករដ្ឋមន្ត្រីបានលើកឡើង ការផ្ដល់សេវាកម្ម និងការផ្ដល់ផលប្រយោជន៍នានាដល់ប្រជាពលរដ្ឋនឹងប្រសើរជាងមុន។ ជាលទ្ធផល ប្រជាពលរដ្ឋនឹងរីករាយចំពោះសេវាកម្ម និងផលប្រយោជន៍ដែលទទួលបាន៕
